John 8

Kefo kava hu-mainea ala avaleꞋya Yisasite emainae.

MukiꞋa veaꞋmoꞋya kumaꞋamilega ute ete hageno YisasiꞋa Olivi yosa hanea agoꞋyafi hai-maine. KegeꞋafiti YisasiꞋa he-tino ala mono nopi umainegeꞋya veaꞋmoꞋya melitalu hageno YisasiꞋa mopale maineno mono kea hama-nepaiye.

Hama-nepaigeꞋya kahegi kema havilinaya anagaꞋene Falasia vayaꞋene nago ala alu vene moli nehigeꞋya ageteꞋya avaleꞋya alitalu hu-mainaya veaꞋmogami amaufi me he-ti-tenae. Me he-ti-teteꞋya Yisasife mage huꞋya nehae “Hu-maveli kanomoga ma aꞋmoꞋa alu vene moli nehigeta ageteta avaleta neꞋone. MoseseꞋma kahegi kema taminea kemoꞋa maꞋa hu-maine ‘Ani kavaꞋma hisia aꞋmona yafateti haetama he-vai-teho.’ huno hu-mainegi ‘Kagaya naꞋane huka nehane?’ huꞋya nehae. Agaifema mani kema hayana aye-vataga huꞋya nagoꞋa havige hisigeta atafa huta kaiyeke hu-tegahune.” huꞋya hayanagi YisasiꞋa ape huno mopafi maineno aginagoleti avo negae. Avo negaegeꞋya anileꞋma he-tiꞋya maineꞋya mani kema havige havigema haya vayafe YisasiꞋa he-tino mage hie “TamakaipitiꞋma nago osi kefo yakaꞋa omalenesia kanomoga hagoteka yafana hagaꞋyu huka mani aꞋmo augafalela aiko-lio.” huno hie.

Mage huteno eteno ape huno mopafi avo negae. Mani kema higeꞋya mukiꞋa atagu-feꞋya ute ete hageꞋya hagoteꞋya vayatamamoꞋya ataleꞋya vageꞋya haenaga mukiꞋamoꞋya ataleꞋya ute ete hageno YisasiꞋa ape huno mainegeno ani aꞋmoꞋa aule he-tino maine. 10 Mainegeno YisasiꞋa he-tino ani aꞋmofena mage huno hie “Ma aꞋmogae mani vayala hanatega vae? Nago kanomoꞋa kagaila kaiyekema hu-gatesia kanoa omainefio?” huno hie. 11 Higeno mani aꞋmoꞋa mage hie “AꞋao, ala kanomogae, nago kanoa omaine.” huno higeno YisasiꞋa mage hie “Nagaya nagaiꞋenena kaiyekea hu okategahugi afaꞋa ugananagi eteka nagoꞋene kefo yana ohuo.” huno nehie.

YisasiꞋa ma mopafi kaꞋni maine.

12 HaenagaꞋa YisasiꞋa mono nopi alitalu hu-mainaya vayaꞋyagahe mage hu-maine “Nagaya ma mopafi veala aye hale-ma-tesua kano mainoe. Nagai nakaveꞋma malesaya veaꞋmogatama maige maige tamahaimula hanea hale yana alitetama haniki yapina ute ete ohugahae.” huno hie. 13 HigeꞋya Falasia vayaꞋmoꞋya Yisasifena mage huꞋya hae “Kagaya kagaikaꞋa kehe hu-falote nehananagi kekahena havita tametiti ohugahune.” huꞋya hae. 14 Hageno YisasiꞋa mage huno hie “Tamage nagaya nagaiꞋniꞋahe kea nehuanagi hua kehena havitama tamameti hiho. NaꞋafene nagaya aepama heꞋnama emainoa kumaꞋene visua kaꞋene age-mainoanagitama tamakaya nagayama emainoa kumaꞋene visua kaꞋene oꞋagenae.

15 Tamakaya ma mopafi veaꞋmogamina no maiyateti fako nehayanagi nagaya nago kanomo no maiyana fako nohue. 16 Fako nohuanagi nagaya nago kanomoma fako hu neꞋa-tesugenofena kema hua kelela havitama tamameti hiho. Nagaya nagaiꞋnige fako nohuanagi hu-natenea NenafaꞋa nagaiꞋene tole huno aliꞋyana neꞋalino fako nehie. 17 Tamakai mono kemoꞋa mage huno nehie ‘Tole kanolatamoganima keꞋanimoꞋma nagoke kateꞋma visiana keꞋanimoꞋa tamage hugaꞋe.’ hutama nehayane. 18 Nagaya nagaiꞋniꞋahena kea hu-falote huꞋna nehugeno nagaiꞋma hu-nategeꞋna emainoa NenafaꞋa nagaifena aniꞋa huno hu-falote nehie.” huno nehie. 19 HigeꞋya haviteꞋya Falasia vayaꞋmoꞋya mage huꞋya havigae “NegafaꞋema hana kanoa hanate maine?” huꞋya havigageno YisasiꞋa mage hie “Tamakaya nagaiꞋma onagenayana Nenafana aniꞋa hutama oꞋagenae. NagaiꞋma nage-mainaleꞋasipa Nenafana aniꞋa hutama age-mainaleꞋasine.”

20 YisasiꞋa mani kea ala mono nopina muse yama nemalaya kaiyaga maineno mani kea hu-mave-lianagi agayama falisia kanaꞋamoꞋa aupa ohunea yafe nago kanomoꞋa agaila atafa ohune.

YisasiꞋa veaꞋmogamifena “Visua kumatega oꞋugahae.” huno nehie.

21 YisasiꞋa eteno nagoꞋene mage hu-maine “Nagaya ago visugetama nagaifena natiyegahayanagi tamakaitami kefo yatamia oꞋataletama hanesigetama faligahae. Nagayama visua katela tamakaya oꞋugahae.” huno hie. 22 HigeꞋya Yuta vayaꞋmoꞋya amakaiꞋamifina mage huꞋya hae “Nagayama visua katela tamakaya oꞋugahae hunoꞋma hia kemona aepaꞋa agaiꞋa augafa hae-faligahe nehifi?” huꞋya hae. 23 Hageno YisasiꞋa mage huno hie “Tamakaya afetegati emainayanagi nagaya anafinagati emainoe. Tamakaya ma mopafiti emainayanagi nagaya ma mopafiti omenoe. 24 NaꞋafene nagaya tamakaila ago tamaha-pai-mainoe ‘Tamakaitami kefo yatamia oꞋatalesageno hanesigetama faligahae.’ huꞋna hu-mainoane. Tamakaifema nagaya ‘MaꞋa kano mainoe.’ huꞋna hu-mainoa kehe havitama tamakupi maletama tamametitima ohisayana kefo yatamia oꞋataletama hanesigetama faligahae.” huno hie. 25 HigeꞋya “Kagaya tagae?” huꞋya havigageno YisasiꞋa mage hie “Nagaya laꞋnae huꞋna tamakaila hagoteꞋna tamaha-pai-mainoane. 26 Tamakaifema kasagoꞋya kema, hu-lamateꞋna fako hisua kea hane. NagaiꞋma hu-na-tegeꞋnama emainoa kanomoꞋa tamage keꞋage kano mainegeꞋna agaitegati nagaya havimainoa ke ma mopafi veaꞋmogatamina tamaha-nepauve.” huno nehie.

27 Ani kea Nefafema nehigeꞋyagi amakaya haviꞋya aepaliꞋya ohavinae. 28 Ohavinaya yafe YisasiꞋa mage hie “Tamakayama ikapinagati emainoa kanoa vayaꞋmo natenea kanomoꞋnina yafaga yosale alisagama hisaya kanafina tamakaya nagayama ‘Ani kano mainoe.’ huꞋna hu-mainoa yafe havilama hutama havigahae. Nagaya nagaiꞋni nagesafitila nago yana nohue. AꞋao nagaila Nenafama hu-mainea keꞋage nehugetama nehavie. 29 NagaiꞋma hu-natenegeꞋna emainoa NenafaꞋa nagaiꞋene maineno mukiꞋa kanalela agayama museꞋma hia kavaꞋma huafenagino nagaila nonatale.” huno hie. 30 HigeꞋya kasagoꞋya veaꞋmoꞋya YisasiꞋma hia ke haviteꞋya amakupi maleꞋya amametiti nehae.

Ke-lamagemoꞋa alino tamakaila nofi hu-lama-tenaya yana haꞋno hisigetama afa vea maigahae.

31 YisasiꞋa amakupima maleꞋya amametitima haya Yuta vayafena mage hie “Tamakaya nagai kema mukiꞋa kanafima akaveꞋma malesayana nagai ke havisaya anagaꞋniꞋa maigahae. 32 Nagayama tamagema hua kema havilama hutama havisagenoꞋa ani ke-lamagemoꞋa tamakaila kanama lamahaiya yamoꞋa nofi hu-lama-tenaya yana haꞋno hisigetama afa vea maigahae.” huno hie. 33 HigeꞋya kenonaꞋa mage hae “Tagaya Apalahamu nofi vaya mainona yafe nagoꞋa vayaꞋmoꞋya nofila hu-la-tageta miya oꞋali aliꞋyana oꞋalinone. NaꞋa higeka tagaifena nofila hu-lama-tagetama miya oꞋali aliꞋyapi mainaya vea ali haꞋno hisugetama afa vaya kana hutama maigahae huka nehane?” huꞋya hae. 34 Hageno YisasiꞋa kenonaꞋamia mage hie “Tamage-lafa huꞋna tamaha-nepauve mukiꞋa veaꞋma kefo kavaꞋma taloma hisayana kefo yaꞋamimoꞋa nofi hu-ma-tegeꞋya miya oꞋali aliꞋya veaꞋne kana huꞋya mainae. 35 Nagi miya oꞋali aliꞋya veala nagoꞋa afamopina agola omaigahayanagi atenea nafaꞋneꞋamoꞋa agola ani afamopi maigahie. 36 Anumaya Koti NafaꞋnemoꞋa kefo yatamimoꞋma tamatafa hu-mainea nofila alino lagama hu-taleana tamage huno ago alino laga hu-talegetama kanale hutama mainae. 37 Nagaya ago havimainoe tamakaya Apalahamu nofi vaya mainayanagi nagai kemoꞋa tamakupina omalenea yafe nagaila nahaegahena nehae. 38 Nagayama nehuana NenafaꞋma nave-li-mainea yaꞋyagahe nehuanagi tamakaya tamakaitami nelamafa tamaha-pai-mainea kava nehae.” huno nehie.

39 YisasiꞋa higeꞋya Yuta vayaꞋmoꞋya haviteꞋya mage hae “NelafaꞋa Apalahamu maine.” huꞋya hageno YisasiꞋa mage hie “Tamagema tamakaya Apalahamu nafaꞋneyagama mainaleꞋasina agayama nehia kavala talo haleꞋasine. 40 Talo haleꞋasinagi menia nagaya tamage kema Nenafategati havimainoa ke tamaha-pauva kanomonia naꞋa higetama nagaila nahaegahena nehae. ApalahamuꞋa naꞋa kavala ohunea yane. 41 Tamakaya nelamafa nehia kava nehae.” huno higeꞋya “ItatimoꞋa moli hu-liteno huno otateneane. Tagaila Anumaya KotiꞋa agaiꞋage nagoke nelafa maine.” huꞋya hae.

42 Hageno YisasiꞋa mage hie “Tamagema Anumaya KotiꞋa nelamafaꞋma maineleꞋasina nagaya Anumaya Kotitegati emainoa yafe nagaifena tamahaileꞋasine. NagaiꞋniꞋa nagesafitila omenogi Anumaya KotiꞋa agaiꞋa hu-na-tegeꞋna emainoe. 43 NaꞋa higetama kema hua kea havilama hutama nohaviye? Mani kemona aepaꞋamoꞋa maꞋa hu-maine tamakaya havisaya tokiyatamia omaleanegitama nagai kea ohavigahae.

44 Tamakaila SataniꞋa lama-tenea nelamafa agu agesa tokiyaꞋage hutama nelamafa akave nemalae. Aepama he-mainelegati vaya hamaeno fali-ma-tegeno omai kanoe. Ani kanomo agupina tamage kemoꞋa omalenegeno havigema hiana mukiꞋa kanale nehia kava nehie. Ani kanoa havigeꞋage kanoe. MukiꞋa havigema hu yana SataniꞋa agaiꞋafiti havigeꞋage kemona aepaꞋa maine. 45 Nagaya lamakaifena tamageꞋage ke nehua yafe havilama hutama tamakupi maletama tamametitia nohae.

46 Hana veaꞋmoga nageteka nagaifena ‘Kefo yakaꞋa hane.’ huka fako hu-nena-teka hu-falote hunategane? AꞋao, aniꞋa ohugahae. Nagaya lamageꞋage kea huꞋna tamaha-nepauvanagi naꞋa higetama nagaifena tamakupina havi nomalae? 47 NagoꞋa veala Anumaya Koti nafaꞋneyaga maineꞋya Anumaya Koti kea nehaviyanagi tamakaya Anumaya Koti nafaꞋneyaga omainaya yafe nagai kea nohaviye.”

YisasiꞋa “ApalahamuꞋa falote ohunea kanafina nagaiꞋniꞋa nagaya mainoane.” huno nehie.

48 Yuta vayaꞋmoꞋya kenonaꞋa Yisasifena mage huꞋya hae “Tagaya kagaifena tamage nehune ‘Samelia kano mainane. Kefo AvamuꞋmoꞋa kagupina tamage maine.’ huta nehune.” huꞋya hae. 49 Hageno YisasiꞋa mage hie “Nagaipina Kefo Avamula omaine. AꞋao nagaya Nenafa agi alisaga nehugetama lamakaya nagai nagia alitama afepinaga nemalae. 50 Nagaya nagia alisaga nohuanagi nagoke kanomoꞋa nagai nagia alisaga hisia kano maine. Ani kanoa, Anumaya KotiꞋe, kaiyekea hu-ma-tesia kano maine.

51 Tamage-lafa huꞋna lamaha-pauve nagai kema akaveꞋma malesamoꞋya ofaligahae.” huno hie. 52 HigeꞋya Yuta vayaꞋmoꞋya mage hae “Ani kema hana yafena tagayama havunana kagaikaꞋa kagupi Kefo Avamula maine. ApalahamuꞋene nayona mainaya Anumaya Koti amaune vayaꞋmoꞋya fali-mainagi kagaya ‘Nagai ke akave malesamoꞋya ofaligahae.’ huka nehano? 53 ApalahamuꞋa taginagomona ‘Agase-mainoa kano mainoe.’ huka nehano? ApalahamuꞋa faligeꞋya Anumaya Koti aune vayala ago fali-mainae. Kagaya hanaꞋa augafa kano mainoe huka nehane?” huꞋya hae.

54 Hageno YisasiꞋa mage hie “Nagaya nagima alisaga hisuana afa ya kana hugahianagi Nenafa tamakaya ‘Anumaya Kotitimo maine.’ hutama nehaya kanomoꞋa nagai nagia alisaga nehie. 55 Alisaga nehianagi tamakaya agaila oꞋagetafa hu-mainae. Nagaya agaila ago age-mainogi ‘AgaiꞋma oꞋagenoe.’ huleꞋasina tamakai kana huꞋna havigeꞋage kano mauleꞋasinagi nagaya ago agaila age-mainoanagiꞋna agai kea akave nemaloe. 56 ApalahamuꞋa tamakinagomoꞋe nagayama ma mopaleꞋma falote hisua kanahe agesia yafena musena hu-maineanagi agetenoꞋa tusiꞋa muse hu-maine.” huno hie. 57 HigeꞋya Yuta vayaꞋmoꞋya kenonaꞋa mage hae “Kagaya fifitiꞋa (50) kafua ohunanagi kagaya vayatama omainane. Apalahamuna age-mainano?” huꞋya hae. 58 Hageno YisasiꞋa mage hie “Tamage-lafa huꞋna tamaha-nepauve Apalahamuna oꞋatenele nagaya hagoteꞋna monafinaga mainoane.” huno nehie. 59 Ani kema hia yafe yafa kaꞋyoteti aliꞋya aiko-ligahe nehageno YisasiꞋa fala-kino amataleno ala mono no kategati hati-lavino umaine.

Copyright information for `KMU