Luke 17

Kefo auꞋava yamoꞋa amametitia ali haviya nehie.

YisasiꞋa agaiꞋaene tokaeꞋya nemaiya anagafe mage huno humaine kefo yama huo huno ayemavataga hisaya yana falote hugahianagi kefo yama hisaya kate tamavaleno visia kanomofena “Kefo kava nehananagika kana yana aligane.” Ani kanomoꞋa nagoꞋa osi anagaꞋnihe “Kefo yama huo.” huno hisiana tusiꞋa kefo kava nehianagiꞋna tusiꞋa kana ya amigahue. Ala yafakefaleti ani kanomo ageꞋyafi maleꞋya nofi kiteꞋya hage lipi hagaꞋyu hutalesayana ani kana yana afa avamete kana ya haneanagi nagaya tusiꞋa kana ya amigahue. Amigahuanagi tamakaya kaꞋye ho. NegafuꞋa kefo yama hinageka “NaꞋa kavala ohuo.” huka kemakio. Amakigeno agayama aguꞋa aiyahaeꞋma hinageka aigeꞋateka kefo yamaꞋa ataleto. NegafuꞋa nagoke yupa seveniꞋa (7) kanaleꞋma kefo yama hugateteno ani kefo yafe “NaguꞋa aiyahae nehue.” huno hisigekahena kagaya aniꞋa huka seveniꞋa (7) kanale aigeꞋateka kefo yamaꞋa ataleto huno humaine.

YisasiꞋa amametiti hisaya auꞋava yamo ke humaine.

YisasiꞋene tokaeꞋya nemaiya anagaꞋmoꞋya Anumayamofe mage hae “Kagaife havita tagupi maleta tametiti nehuna yana kagaya nagoꞋene alika ayaꞋaya hulato.” huꞋya hae. Hageno YisasiꞋa mage hie “Tamakaya nagaifena havitama tamakupi maletama tamametiti nehaya kavala osi masatati yosamo alaga kanoꞋa hanea avamete hutama osiꞋa havitama tamakupi malesayana ma yosahe mage hutama hapaigahae ‘Ma yosamoga kagaya aepa muki tagasi huka ala tipi hageka haiyo.’ hutama hapaisageno tamakai kea akave malegahie.” huno hamapaiye.

YisasiꞋa aliꞋya kanomo auꞋavafe humaine?

Tamakaipiti nago kanoa aliꞋya neꞋalia kanoꞋamoꞋa hoya aliꞋyapi, afu kava aliꞋyapi, ani aliꞋyana alino haꞋno huno esigenoꞋa ala kanomoꞋa ani aliꞋya kanohe mage huno hapaisio “Kagaya aupaꞋa me maifalu huka maineka kavela no.” huno hapaisio? AꞋao ani kea ohugahianagino mage huno hugahie “Kagaya kaveꞋnia talo tala hunateka kenakaꞋa faiteka kaveꞋnia alika me namigeꞋna hagoteꞋna netesugeka kagaya haenaga negane.” huno hugahie. Anima hapaiya kema akave malenea yafena ala kanomoꞋa “Kanale kava hanafe musekaꞋa nehue.” huno hisifi? AꞋao aniꞋa ohugahie. 10 Tamakaya aniꞋa hutama mukiꞋa tamahapai-mainoa aliꞋyana alitama avaya ayetetama mage hutama hiho “Tagaya kanale aliꞋya anaga omainone. Tagaiti aliꞋyanagita ago alune.” hutama hiho huno humaine.

YisasiꞋa teniꞋa (10) fugita kali neꞋaliya vaya alino kanale humatene.

11 YisasiꞋa Yelusalemu ukahe viana SameliaꞋene Kaliliene amuꞋnopi katega umaine. 12 Nago kumate uvaꞋyi higeꞋya teniꞋa (10) fugita kali neꞋaliya vayala aluꞋale heti-maineꞋya ala kefiti mage hae “Yisasiga ala kano mainanagi tagaila kahau hulato.” huꞋya hae.

14 Hageno YisasiꞋa amaketeno mage hie “Tamakaya mono nopi kava vayate utama tamaugafa momaveliho.” huno higeꞋya ani vayatega neꞋvageno katega amaugafamoꞋa eteno kanale humatene.

15 Kanale humategeꞋya vafiti nagoke kanomoꞋa augafa ageana kanale higeno eteno katega viaꞋamo ala kefiti muse huno Anumaya Koti agi alisaga humaine. 16 Huteno Yisasite aiyafi mepe huno maineno aiyale alisoso nehuno “Kagaifena tusiꞋa musekaꞋa nehue.” huno hie. Aiyale alisosoma hia kanoa Sameliati kanoe.

17 YisasiꞋa ani kanoa ageteno mage hie “Nagesa havuana teniꞋa (10) vaya ago aliꞋna kanale humatenofi? huꞋna huanagi nainiꞋa (9) vayala hanate mainagekae? 18 NaꞋa higeꞋya ani vayaꞋyaga Anumaya Koti agia melisaga ohae? Mani nagoke kanoa alu kotegati emainea kanomoꞋa agaiꞋage Anumaya Koti agia melisaga nehie.” huno hie. 19 YisasiꞋa ani kanomofena mage huno hapaiye “Kagaya hetika vuo. Nagaifema havika kagupi maleka kametiti hana yamo kagaila alino kanale hugate.” huno hie.

Ikapinagati emainea kanoa vayaꞋmo atenea nafaꞋnemoꞋa efufute atalegahie.

20 NagoꞋa Falasia vayaꞋmoꞋya mage huꞋya havigae “Na kanafi Anumaya KotiꞋa aepa heno kava yagaigahie?” huꞋya hageno YisasiꞋa mage huno humaine “Anumaya KotiꞋma kava yagaisia kanama falote hisiana tamaulagamoꞋa oꞋagesia kava huno egahie. 21 VeaꞋmoꞋya ‘Malega hane. Amualega hane.’ huꞋya ohugahagi haviho Anumaya KotiꞋa tamakaipi ago kava yagaino maine.” huno hie.

22 YisasiꞋa agaiꞋaene tokaeꞋya nemaiya anagafe mage huno hamapaiye “HaenagaꞋa nago kanama falote hisigetama mage hutama hugahae ‘Ikapinagati emainea kanoa vayaꞋmo atenea nafaꞋnemona nagoke yupa kanoꞋa agesune.’ hutama hugahayanagi afaꞋa oꞋagegahae. 23 OꞋagegahagi nagoꞋa veaꞋmoꞋya ‘Amugalega mainegi ageho.’ nehuꞋya ‘Malega mainegi ageho.’ nehuꞋyama hisagetamahena amakavela oꞋviho. 24 Ikapinagati emainoa kanoa vayaꞋmo natenea nafaꞋnemoꞋna eteꞋna esua yamoꞋa maꞋa hugahie ikamoꞋa nago kaiyaga aupaꞋa aulumayaꞋmoꞋma nehia avamete huno mukiꞋa kotega aivasa nehinageꞋna nagaya eteꞋna egahue. 25 Egahuanagi hagoteꞋya meni kanafima mainaya veaꞋmoꞋya nagaifena ‘KahaoteꞋyakae.’ huꞋya hunatesageno tusiya huno nagata aigahie. 26 Nagaya ikapinagati emainoa kanoa vayaꞋmo natenea nafaꞋnemoꞋna eteꞋna esua kanafima mainaya veaꞋmoꞋya nayoma NoaꞋma mainea kanafima mainaya veaꞋmoꞋya humainaya kavala hugahae. 27 NoaꞋma mainea kanafina kavela neneꞋya tina neneꞋya aꞋnema aliyamoꞋene vele uyamoꞋene mukiꞋa kanafina ani yafekeꞋya amakesa havi havi huꞋya mainageno NoaꞋa ala tipi kalefi haisaga humaigeno tusiꞋa lina hogino mukiꞋa ani veaꞋnea alino haviya higeꞋya ago fali haꞋno humainayane.

28 LotiꞋma mainea kanafina ani kava huꞋya kaveꞋene tiꞋene neneꞋya nagoꞋa yaꞋamia miya nehuꞋya hoya aliꞋyaꞋamia neꞋaliꞋya noꞋamia negiꞋya mukiꞋa kanafina ani yafekeꞋya amakesa havi havi humainayane. 29 Ani amakesale mainageno LotiꞋa Sotomua neꞋataleno umainea kanalela Anumaya KotiꞋa ikapinagati tusiꞋa hiꞋmanaꞋage ata nelea yafaꞋyaga koꞋmopa hia kava huno asaga hulavino mukiꞋa veaꞋnea hamaegeꞋya fali-mainayane. 30 Nagayama ikapinagati emainoa kanoa vayaꞋmo natenea kanomoꞋna eteꞋna esua kanafima mainesaya veaꞋmoꞋya nayona Loti mainea kanafima mainaya veaꞋmoꞋya humainaya kavala aniꞋa hugahae.

31 YisasiꞋma esia kanafina nagoꞋa veaꞋmoꞋya kumatega mainesaletila afenoꞋyaꞋamia alisaya yafena eteꞋya nopinaga ohaisae. Nagi aniꞋa huꞋya hoyafinaga mainesaya veaꞋmoꞋya eteꞋya noꞋamilegama hanesea afenoꞋya alisaya yafena oꞋvisae. 32 Tamakaya Loti aꞋmoma hutenea kavafena tamakesa aikalo hinagetama havilama hutama haviho. 33 NagoꞋa veaꞋmoꞋya hamaimuꞋma hanesigeꞋya ‘Mai yatia atafa hutalako huligahune.’ huꞋya amakesama havisayana ani kanale mai yaꞋamimoꞋa fanane hugahianagi nagoꞋa veaꞋmoꞋya ‘Kanalelagita maisuna yatiene tahaimuene Yisasife tagesa nehavita afaꞋa atalegahune.’ huꞋya hisagenoꞋa kanaleꞋya huno mai yaꞋamia aligatimatesigeꞋya maige maige yana aliteꞋya agola maigahae. 34 Tamahanepauve nagayama eteꞋna esua yupa ani kegela tole vekalatana nagoke sipale faeꞋana mainesaꞋagenofena Anumaya KotiꞋa nagoke avalegahianagino nagola alitaye-talegahie. 35 Tole atalana tokaeꞋana aliꞋya neꞋalisaꞋageno Anumaya KotiꞋa nagoke avalegahianagino nagoꞋmona alitaye-talegahie.” huno hie. 37 HigeꞋya mage huꞋya havigae “Anumayamogae mani kavala hana kumate falote hugahie?” huꞋya havigageno YisasiꞋa mage huno hamapaiye “AfumoꞋma fali-mainesia kefafina hakikimoꞋya yage yage huꞋya alitalu hunemaiyanagi ikapinagati kanomoꞋna aniꞋa huꞋna mukiꞋa veaꞋmogami amuꞋnopi egahue.” huno hamapaiye.

Copyright information for `KMU