Luke 20

Yisasifena “HimamukaꞋa ta kamine?” huꞋya havigemainae.

Nago yupa YisasiꞋa ala mono nopi maineno alitalu humainaya vayala humavelino Anumaya Koti kanale mono kea hamapaigeꞋya ani kumate vayatamaene mono note kava vayaꞋene kahegi kema havilinaya anagaꞋene agaitega emainae. Mage huꞋya hae “Hana augafa ala kanomo hugategeka mani kavala me nehane? Tokiya yaka ta kamine?” huꞋya havigae.

Havigageno YisasiꞋa mage huno hie “Nagaya hagoteꞋna nago yafena tamahavigegahue nagaila nahapaiho. YoniꞋma tima falematenea yana Anumaya KotiꞋa hutegeno ani kavala me nehifi afa vayaꞋmoꞋya hutageno lina fale neꞋamate? Hufalote hutama nahapaiho.” huno hamavige.

HigeꞋya “NaꞋa maꞋa hugahune.” huꞋya mohu mehu huteꞋya mage hae “Anumaya Koti hutegeno emaine.” hisunagenoꞋa YisasiꞋa “NaꞋa higetama agai kea tamakupina nomalae?” huno hugahianagita tagaya “Afa vayaꞋmoꞋya hutageno emaine.” huta hisunana mukiꞋa veaꞋmoꞋya “YoniꞋa Anumaya Koti aune kano maine.” huꞋya ago humainayafe “Yafa kaꞋyoteti tahaesageta faliyafene.” huꞋya mohu mehu huteꞋya Yisasifena kenonaꞋa mage huꞋya hae “Tapiga hutene? Tagaya ohavinone.” huꞋya humainae. Hageno YisasiꞋa mage huno hamapaiye “Nagaya aniꞋa huꞋna hana kanomoꞋa hunategeꞋna emainoe huꞋna tamahaopaigahue.” huno hie.

Havi vayaꞋmoꞋya vaini hoyaleꞋma yagai-mainaya avame ke.

YisasiꞋa aepa heno veafe nago avame kea mage huno hamapaiye nago kanomoꞋa vaini nofi alaga hoya kali-maleteno noꞋagea vayafe mage hie “Etama hoyaꞋnilela yagaitama maineho. Ani nofiꞋmo alagafitila aye fako hutama aliho.” humateteno ayaꞋaya kanagefa umaigahe alu kotega umaine. 10 Afu nelea kanafina ani hoyamona nefaꞋa nago aliꞋya kanoꞋa hutegeno kava vayatega nagoꞋa vaini nofi alaga aligahe umaine. VigeꞋya hoyale kava vayaꞋmoya atafa huꞋya aikoliteꞋya “Okamigahunagi ataleka vuo.” huꞋya hageno ataleno umaine.

11 Utegeno nagola kayo kayo kanoꞋa hutegeno viana aniꞋa huꞋya aikoliteꞋya agaye hisifa kava huteteꞋya “Okamigahunagi ataleka vuo.” huꞋya hageno ataleno umaine. 12 Utegeno eteno nagola kayo kayo kanoꞋa hutegeno viana aniꞋa huꞋya aikoligeno kolamoꞋa higeꞋya hoyafinagati avaleꞋya malaga hagaꞋyu hutalenae.

13 HagaꞋyu hutalageno hoyamona nefaꞋa agesafinaga mage huno havie “HanaꞋa hisue? NafaꞋneꞋnimona nahau nayamopafi nenahaiya nafaꞋneꞋnia hutesugeno visigeꞋya agai kea havisao?” huno havimaine. 14 Agesa haviteno hutegeno neꞋvigeꞋya ageteꞋya mage huꞋya hae “Mamona mani hoyamona nefa nafaꞋne. NefaꞋma falisigenofena mani nafaꞋnemoꞋa hoyaꞋa aligahianagita agaila ago haegetao. Haesunageno falisigeta mani hoya tagai ya hapaegahie.” huꞋya hae. 15 HuteꞋya hoyafinagati avaleꞋya hagaꞋyu hutaleteꞋya hayageno fali-maine. YisasiꞋa mage hie “NaꞋa hayanagi hoyamona nefaꞋa naꞋa humategahie? 16 Eteno hoyaꞋafima kava yagai-mainaya vayala tavata me hamaesigeꞋya faligahae. Fali haꞋno hisageno alu vayafe ‘HoyaꞋnilela kava me yagaiho.’ huno hugahie.” huno hie. HigeꞋya anifima alitalu humainaya veaꞋmoꞋya mage hae “AvoꞋnio ani kavala ohisie.” huꞋya humainae.

17 Hageno YisasiꞋa nago kea mage huno hie “Kae-malenaya kemoꞋa mage huno humaineane

‘VayaꞋmoꞋya yafa noma kigahena nago yafafena ‘Haviya humaine.’ huꞋya atalayanagi haenagaꞋa ani yafamoꞋa ‘TusiꞋa kanale yafane.’ huꞋya nomo ayetagenale malenae.’ huꞋya kae-malenayane.” huno hie.
Huteno amakeno ute ete hiana higeno mage huno hie “AgoꞋma kae-malenaya kemona aepaꞋa havilinao?
18 MukiꞋa veamoꞋya ani yafateꞋma asaga hulavisayana amaugafamoꞋa atalaga huno haviya hugahianagi ani yafamoꞋa vaya amaugafaleꞋma asaga hulavisiana ailatapeno aitalaga talago hutalegahie.” huno hie. 19 HigeꞋya kahegi kema havilinaya anagaꞋene mono note kava vayaꞋene “Tagaife ani avame kea nehie.” huꞋya ago haviteꞋya “Menia avaleta kina nopi ategahune.” huꞋya hayanagi vaya amauhe koli huꞋya atalenae.

Sisana takisi monea amigahafi oꞋamigahae?

20 AtaleꞋya ala tokiyaꞋama hanea kanomote kaiyeke hutesiafe Yisasifena kesi amata huꞋya maineꞋya agesaya vayala humatageꞋya moyevataga hisayafe ani vayala “Kanale fatago vaya mainone.” huꞋya fau nehuꞋya YisasiꞋma hisia keleti atafa hugahe humainae.

21 Anima kesi kateꞋma vaiyaya vayaꞋmoꞋya mage huꞋya hae “Humaveli kanomogae tagaya havunana nehana kea fatago katekeꞋya hana kanoe. Nagi kava vayaꞋene afa vayaꞋene nagoke katekeꞋya hamapaika veaꞋma amaipa aye kea nohanagi tamage hutafa huka Anumaya KotiꞋa ‘Ma kate vuo.’ huno hia kegeꞋya taveneline. 22 Nagi takisi he yatela kava kanoa Sisana kanale amisupi oꞋamisune?” huꞋya havigae. 23 Havigageno YisasiꞋa agaiꞋma ayevataga haya kea ago haviteno mage huno hamapaiye “Nagola alaga monea alitama naveliho.” higeꞋya aveligeno “Mani alaga monelela ta augosaene ta agiene hane?” huno higeꞋya “Sisa augosaene agiene hane.” huꞋya hae. 25 Hageno YisasiꞋa mage huno hie “Sisana agaiꞋa yanagi agaila amiho. Nagi Anumaya Kotina agaiꞋa yana agaila amiho.” huno hie. 26 HigeꞋya anima kesi kateꞋma vaiyaya vayaꞋmoꞋya “Vaya amaulagafi hisia keleti atafa hugahe hunanagi tokiya ke hianagita atafa ohugahune.” huꞋya nehuꞋya hia kehe amakesa havi havi huꞋya ke ohuꞋya mainae.

Satiusi vayaꞋmoꞋya faliteꞋya hetisaya auꞋavafe Yisasina ke huꞋya havige-mainae.

27 NagoꞋa Satiusi vayaꞋmoꞋya* Yisasitega emainae. Ani vayala mage nehaya vayale “Falimainaya vayala eteꞋya heotigahae.” huꞋya nehaya vayalagiꞋya Yisasite mage huꞋya me havigae “Humavenelina kanomoga MoseseꞋa tagaifena mage huno kae-maleneane ‘Nago kanoma nepuꞋamoꞋa nafaꞋneꞋa oꞋate kanomoꞋma aꞋama ataleno falisigenoꞋa aganaꞋamoꞋa ani aala aliteno maineno fali-mainesia kanomofe anonaꞋa nafaꞋne atesie.’ huno kae-maleneane.

29 SeveniꞋa (7) konaga mainayanagino nepuꞋamimoꞋa aala aliteneanagino nafaꞋnea oꞋate kano maineno falimaine. 30 Falitegeno anile aganaꞋamoꞋa aliteana nafaꞋnea oꞋate kano falimaine. 31 Falitegeno anile aganaꞋamoꞋa eteno aniꞋa hute hute hayana mukiꞋa seveniꞋa (7) konagamoꞋya ani aala alitayana nafaꞋneꞋamia oꞋateꞋya afaꞋa falimainae. 32 Haenagalafa ani aala falimaine. 33 SeveniꞋa (7) konagamoꞋya ani aala alitenayanagi fali-mainesafitiꞋma hetisaya kanafina hana kanomo ani aala aligahie?” huꞋya havigae.

34 Havigageno YisasiꞋa mage huno hamapaiye “Ma mopafi mainaya veaꞋmoꞋya vea aligeꞋya aꞋne aligeꞋya nehayanagi haenagaꞋama falote hisia kanafina veaꞋmoꞋya amatea kavama agoꞋma huteꞋya maineꞋya fali-mainesafitiꞋma hetisaya kanafina vemoꞋya aꞋnea oꞋaligahae. AꞋmoꞋyaenena vea oꞋaligahae. 36 Ikapinaga ensole vaya kana huꞋya maisayafenagiꞋya nagoꞋene ofaligahae. AgoꞋma fali-mainafitila heti-mainayafe Anumaya Koti nafaꞋneyaga maigahae.

37 Fali-mainaya veaꞋmoꞋya hetisaya kea MoseseꞋa ago haviline. Nago osi yosale ala ata anefela leanagi ani osi yosa otene huno kae-malenea kefiti mage huno kae-maleneane

‘Anumaya KotiꞋa ApalahamuꞋagi AisakiꞋagi Yekopugami Anumaya KotiꞋami mainoe.’ huno humaineane.
Ani anagala fali-mainayanagi ‘Anumaya KotiꞋami mainoe.’ huno humaineafe amaku amamemoꞋa ofaliꞋya afaꞋa mainae huno ani kea humaine. Anumaya Koti aulagafina ani anagala hamaimula afaꞋa hane.” huno humaine.
39 HigeꞋya nagoꞋa kahegi kema havilinaya anagaꞋmoꞋya agaifena mage hae “HumaꞋvenelina kanomoga kanale ke nehane.” huꞋya hae. 40 HageꞋya Satiusi vayaꞋmoꞋya koli huꞋya nagoꞋene haviokenae.

“Anumaya KotiꞋma hapalitenea kanoa taꞋe.” huno YisasiꞋa veala hamavige.

41 YisasiꞋa mage huno hamavige “VeaꞋmoꞋya Kalaisifena, Anumaya KotiꞋma huꞋtenea kanomofena, ‘Tevitina aginagomoꞋa ma mopale kano maine?’ huꞋya haya kemona aepaꞋa naꞋane hae? 42 Anumaya Kotifena yagame kae-malenaya avona TevitiꞋa mage huno humaineane

‘Anumaya KotiꞋa Anumayanimofena mage huno humaine ‘Tamaga nayatega ala vaya mainalega siale mopale emainesanageꞋna kame vayakaꞋa kaiyafi amatesugeꞋya kagaife ‘Ago tagasane.’ huꞋya hugahae.’ huno kae-maleneane.’
44 TevitiꞋa Kalaisife ‘AnumayaniꞋa mainane.’ huno humainegi naꞋa higeno TevitiꞋa haenagama atesia aginagomofena ‘AnumayaniꞋa mainane.’ huno humaineane?” huno hamavige.

Kahegi kema havilinaya anagaꞋmoꞋya kefo kavala nehaya anagakeꞋya mainae.

45 MukiꞋa veaꞋnea maineꞋya havigeno YisasiꞋa agaiꞋene tokaeꞋya nemaiya anagafe mage huno hie “Kahegi kema havilinaya anagafena kaꞋyeho. Ani anagaꞋmoꞋya ayaꞋaya kena failiya yafena ‘Nelagafi notagafi?’ huꞋya nehaya anagale. Vaya atagu nefaya kumapi mo vaiyatete nehuꞋya ‘NaꞋa vaya mainae huꞋya ali falu fala hulatesae.’ huꞋya nehuꞋya mono nopiꞋene imuleꞋene ‘Ala vayaꞋage alitalu huꞋya nemaiya yatekeꞋya maigahune.’ huꞋya nehae. 47 Ani anagaꞋmoꞋya keto aꞋneyagahena ‘Mono nopima atalesaya monea tamiho.’ huꞋya nehuꞋya noꞋamifima hanea yaꞋyaga musufaya huꞋya moneꞋamia ali haꞋno nehaya anagalagiꞋya vayala ayemavataga huꞋya ‘Kanale anaga mainae.’ huꞋya hisae huꞋya ayaꞋaya nunamuna humainae. AniꞋama nehaya anagaꞋmoꞋya havi miyana tusiya huno amaugafa amagata aisia yaꞋene aligahae.” huno hie.

Copyright information for `KMU