Luke 21

MoneꞋa omale aꞋmoꞋa Anumaya Kotitega muse yamaꞋa atalene.

YisasiꞋa agesaga huno ageana veaꞋmoya moneꞋamimoꞋma haimainea veaꞋmoꞋya “Monetia Anumaya Kotina amigahune.” huꞋya pokisifi atalenae. Atalageno ageana nagola moneꞋa omale keto aꞋmoꞋa tole osi haesa monea anifi me vaimaine. Me vaigeno YisasiꞋa ageteno mage huno hie “Tamagelafa huꞋna tamahanepauve ma ma moneꞋa omale keto aꞋmoꞋa mukiꞋa hagoteꞋyama metalaya veaꞋmogamina amakaseno ala mone metale. Metaleanagi moneꞋami-moꞋma haimainea veaꞋmoꞋya aliꞋyamaꞋa omalenea monegiꞋya, afaꞋa malenaya mone metalageno ani aꞋmoꞋa mukiꞋa kaveꞋma alino nesia moneꞋa mukiꞋa metale.” huno humaine.

YisasiꞋa “Ala mono nona tagape ailavigahie.” huno humaine.

NagoꞋa vayaꞋmoꞋya ala mono nofena mage huꞋya hae “Anumaya Koti agi alisaga hugahe vayaꞋmoꞋya kanale yafana aliꞋya ma nona ali hilato huꞋya kimalenae.” huꞋya hae. Hageno YisasiꞋa mage huno hie “Ma ma neꞋagaya nona nago kanama falote hinagenoꞋa ani yafaꞋyaga mukiꞋa alino lagape aitalesigeno aposi-lavino tole yafamoꞋa nago yafamo agupile aikalo huno omaigahie.” huno humaine.

YisasiꞋa “TusiꞋa kana yamo falote hugahie.” huno humaine.

“Hulave nelina kanomogae na kanafi ani kavala hugahie? HanaꞋa tokiya avameꞋya ani kanama faloteꞋma hisia kanafina taveligahie?” huꞋya havigae. Hageno YisasiꞋa mage huno hie “NagoꞋa veaꞋmoꞋya havigema tamahapaisagetama havisao? Ohavisaya yafe kaꞋye ho. KasagoꞋya vayala nagai nagi ayeꞋya ‘Tamaugafa aligatisuna yafe Anumaya KotiꞋa hulategeta neꞋone.’ huꞋya hisaya vayala evaꞋyi huꞋya ‘YisasiꞋma eteno esia kanamoꞋa ago falote nehie.’ huꞋya hisagetama amakavela oꞋviho. ‘NagoꞋa kotega kame nehae. NagoꞋa kotegaenema tu hugahe nehae.’ huꞋyama tamahapaisagetama kolia ohiho. Ani yaꞋyaga hagoteꞋya hugahayanagi ma mopama haꞋno hisia yaꞋyaga aupaꞋa vaꞋyi ohugahie.

10 Nago nofi vayaꞋmoꞋya nagoꞋa nofi vayaꞋene kamea hugahae. Ala kotega vayaꞋene nago ala kotega vayaꞋene kamea hugahae. 11 TusiꞋa imila aligahie. Alu kotega alu kotega tusiꞋa kafu nehuꞋya amakatesia kanaene tusiꞋa kali alisaya kanaene falote hugahie. Ikapinagatila tusiꞋa lamamaꞋyo aisia tokiya avame yaꞋyaga falote hugahie.

12 Ma ma tamahapauva kemoꞋa falote ohunesigeꞋya tamakaya nagai nakaveꞋma nehayafe vayaꞋmoꞋya tamatafa huꞋya ali haviya hulamateteꞋya mono nopi kava vayateꞋene Kamani kava vayateꞋene kaiyekea hulamatesayafe tamavaleꞋya kina nopi tamategahae. 13 Tamatesagetama ani kanafina nagai kea hamapaigahae. 14 Hamapaigahagi kaiyekema hulamatesaya yupa ‘NaꞋane hugahune?’ hutama tamakesa ohaviho. 15 Nagi nagaya nagaiꞋniꞋa ani kanafina kanale ke hisaya kea tamahapaisugetama hisageꞋya kame vayatamimoꞋya ‘Havige hae.’ huꞋya ketamia hefala okigahae. 16 Hefala okigahagi ani kanafina itatamimogamiꞋene nelamafaꞋene neputamimoꞋyaene tamasatamimoꞋyaene tamakaitami afamoꞋene nelamafuꞋyaene tamakaifena ‘Ma mainae.’ huꞋya kaiyekema hulamatesaya yafena kame vayatamimogami amayapi tamavaleꞋya tamatesageꞋya nagoꞋamogatamina tamahaesagetama faligahae. 17 Tamakaya nagai nakaveꞋma nehayafe mukiꞋa veaꞋmoꞋya amaipa kafa helamategahae. 18 AniꞋa hulama-tegahayanagi kanaleꞋya hutama maigahae. Tamayolegefafina nagola haviya ohugahigi tokiyaꞋage hutama hetitama maisayafe agola maige maige hisaya tamahaimula aligahae.”

“Yelusalemu kumaꞋmoꞋa haviya hulavigahie.” huno YisasiꞋa humaine.

20 “KasagoꞋya kame ati vayaꞋmoꞋya Yelusalemu kumaꞋma kove kove hisagetama agesayana ani kumala ‘Ali hagagi-talegahae.’ hutama tamakesa havigahae. 21 Havisayana Yutia mainesaya veaꞋmogatama tamaiya-yetama agoꞋyalega viho. Yelusalemu mainesaya veaꞋmogatama tamaiya-yetama ani kumala ataletama viho. Hoyafinaga mainesaya veaꞋmoꞋya eteꞋya kumaꞋamilega omesae. 22 Ani kanafina mukiꞋa Anumaya Koti kema kae-malenaya kemoꞋa falote huno tamage hisiafe Anumaya KotiꞋa ani veala kefo yama humainaya anonaꞋa ali haviya humategahie.

23 Ani kanafina amaipaene aꞋnene nute ani-linesia nafaꞋnemogami itaꞋamimoꞋyaenefe tusiꞋa nahau nehie. Ani kanafina Isaleli kumala tusiya huno haviya hugahie. Isaleli veaꞋmoꞋya kefo yama humainaya anonatamia Anumaya KotiꞋa havi kavala hulamatesigetama tusiꞋa tamaugafa lamakata yana aligahae. 24 Kame vayaꞋmoꞋya nagoꞋa veala ayaꞋaya naepeleti hataga hamaesageꞋya faligahae. NagoꞋa veala nofi humateteꞋya amavaleꞋya alu kotega Yuta veaꞋne omainaya veaꞋmogami kotega momategahae. Yuta vea omainaya veaꞋmoꞋya eꞋya Yelusalemu kumala mukiꞋa amaiyaleti ayelata-pesageno aposi-lavigahie. Aposi-lavisigeꞋya ani Yuta vea omainaya veala anile emaige maige huꞋya maisageno Yuta vea omainaya veaꞋmoꞋya kava yagaisaya kanaꞋamia haꞋno hugahie.”

HaenagaꞋa Ikapinagati emainea kanoa vayaꞋmo atenea nafaꞋnea egahie.

25 YisasiꞋa nagoꞋene mage huno hie “Yagene kaꞋnefiꞋene ikamoꞋene kugava kava huno alu kava humaveligahie. Nagi hage limoꞋa ayepafa hulino ute ete hisia yafena mukiꞋa kotega ma mopafi veala tusiꞋa amamaꞋyo aigahie. 26 IkateꞋma hanea yamoꞋya kanage kanage huꞋya alu kate kate visaya yafena mukiꞋa ma mopafima mainaya veaꞋmoya ‘Na ya falote hugahe nehie?’ huꞋya nehisageno amaipamoꞋa kanaꞋage nehinageno amaulagamoꞋa kagi kagi hinageꞋya asaga hulavigahae. 27 MukiꞋa ani yamaꞋa faloteꞋma hutesigeꞋna ikapinagati emainoa kanoa vayaꞋmo natenea kanomoꞋna siate elavisugeꞋya nagegahae. TusiꞋa himamu yaniꞋaene tusiꞋa hale yaniꞋaene esugetama nagegahae. 28 Ani kugava yaꞋyaga aepama heno esigetamahena ‘Taugafa aligatisia kanamoꞋa ago aupaꞋa falote hugahe nehie.’ hutama hetitama tamanuna alisaka hutama ageho.” huno humaine.

Tamakaya fiki yosale agevame hiho.

29 YisasiꞋa nago avame kea mage huno hamapaiye “Fiki yosaleꞋene afa yosaleꞋene ageho. 30 Ani yosamoꞋa haegafa haisama falote higetamahena ‘Anuna neꞋvalea kana falote hugahie.’ hutama nehae. 31 AniꞋa hugahianagi anima tamahapauva kugava yama agenutamahena ‘Anumaya KotiꞋa kava yagaisia kanamoꞋa ago falote hugahie.’ hutama havigahae.

32 Nagaya tamage huꞋna tamahanepauve meni kanafima mainaya veaꞋnea ofalinesageno ani yaꞋyaga falote hugahie. 33 IkaꞋene ma mopaene ago fanane hugahianagi nagai kemoꞋa fanane ohugahie.

34 Tamakaitamile yagaiho. Havigu havili nelitetama nehutama havigu kave nesaya yafeꞋene tamaugafale yaꞋenefe tamakesa havi havi hisageno ani yamoꞋma aiso hulamatesiana ala kanomo kalifumoꞋma aupaꞋa hatea kava huno esigetamahena talo tala ohunesageno esigi kava yagaitama maiho. YisasiꞋa mukiꞋa ma mopafi veaꞋmogami amaulagale evaꞋyi hinageꞋya atali-talu hugahae. 36 Ani yafena tamakaitami nagoke nagokemogatama kava yagaiho. MukiꞋa kanale tokiyama alisayafena nunamuna higeno ani tokiya tamamisigeno ani havi yama falote hisia kanafina Anumaya KotiꞋa tamaugafa aligatisigetama ikapinagati emainoa kanoa vayaꞋmo natenea kanomoni naule hetigahae.” huno hamapai-maine.

37 YisasiꞋa mukiꞋa kanafina ala mono nopi haino maineno humavenelino mukiꞋa kegela Olivi yosa hanea agoꞋyafi haino nemaiyane. 38 Haino mainegeno koꞋma neleana mukiꞋa veala “Agai kema havigahune.” huꞋya mono nopina etele nehayane.

Copyright information for `KMU