Mark 16

YisasiꞋa ago falimainefitila hetimaine.

Sapati yupamoꞋa haꞋno higeꞋya Yemesina itaꞋamoꞋa MaliaꞋe hamoꞋamoꞋa Magatala kumate alagi SalomiꞋene Yisasina augafale manaꞋage masaveteti faletegahe ani masavena aliꞋya emainae. Sota yupa yagemoꞋa yaufa nehaigeꞋya ani aꞋneyaga komulega vae. Kategama vayana amakaiꞋamige kea hume hume umainae “Komumo avayaleꞋma aililemalea yafana ta taya huno avayaletila alino avayu huno faitega atalelategahie?” huꞋya hae. NehuꞋya agesaga huꞋya agayana ani ala yafakefa ago alikelitalageno faitega hanegeꞋya agemainae. AgeteꞋya ani yafakapinaga hai faleꞋya mogayana nago neyana aya tamaga kaiyaga mopale mainegeꞋya agayana ani kanomoꞋa ayaꞋaya efe kena failinegeꞋya ageteꞋya tusiꞋa amamaꞋyo aimainae.

AmamaꞋyo neꞋaigeno ani kanomoꞋa mage huno hie “Tamakaila tamamaꞋyoa oꞋaino. Tamakaya Nasaleti Yisasife ati neꞋayae. Yafaga yosale nilima heꞋya asaimalaya kanohe ati neꞋayayanagi agaya falimainefiti ago hetimaine. Mafina omainegi ani kanoma malaya kumala ma hanegi ageho. Tamakaya utama YisasiꞋenema tokaeꞋya nemaiya anagaꞋene PitaꞋene mage hutama hamapaiho “YisasiꞋa ofalino afaꞋa mainenoꞋma tamahapaimainea kemoꞋa ago uhagotelamateno Kalili umainegi anilega neꞋutama Yisasina mogeho.” huno hamanepaiye.

HigeꞋya amakaya atili huteꞋya amamaꞋyo aigeꞋya yafakapitila hatilaviꞋya amaiyayeꞋya vayanagi kolima haya yafe nagoꞋa vayala ani kea hamaopainae.

Magatala kumate MaliaꞋa Yisasina agemaine.

Sota yupa nate alakefafi YisasiꞋa falimainefitila hetino viaꞋamo hagoteno Magatala kumate Malia mainelega uvaꞋyi higeno agemaine. Nayona ani aꞋmo agupina seveniꞋa (7) Satani Avamula mainegeno YisasiꞋa anatitaleneane. 10 Ani MaliaꞋa ageteno viaꞋamo YisasiꞋenema tokaeꞋya nemaiya anagala mogeana tusiꞋa hamau huꞋya avineꞋatageno ani aꞋmoꞋa mage huno mo hamapaiye “YisasiꞋa falimainefitila ago hetigeꞋna nagaya agaila ago ageteꞋna neꞋoe.” huno hamapaigeꞋya haviteꞋya “Havige nehane.” huꞋya amametitia ohunae.

AgaiꞋa anagapiti tole kanolatamogania katega Yisasina agemainaꞋe.

12 HaenagaꞋa ani vayapitila tolemogania kumala ataleꞋana katega neꞋvaꞋageno YisasiꞋa evaꞋyi higeꞋana agemainaꞋe. 13 AgeteꞋana ani kanolatana eteꞋana vayaꞋanimoꞋya mainalega vaꞋaꞋamogani “YisasiꞋa naꞋa kano agoꞋe.” huꞋana mo nehaꞋana ani vayaꞋmoꞋya “Havige nehaꞋe.” huꞋya haviꞋya amametitia ohunae.

YisasiꞋa aleveniꞋa (11) anagaꞋamoꞋya aliꞋya alisaya ke hamapaimaine.

14 HaenagaꞋa aleveniꞋa (11) anagala kave maiꞋya nenageno YisasiꞋa evaꞋyi huno maineno amakaya vayaꞋmoꞋyama haya kemoꞋa “YisasiꞋa falimainefitila ago hetigeta agemainone.” huꞋya haya kema havisaya yafena amakuꞋamoꞋa tilegeꞋya haviꞋya amametitima ohaya yafe YisasiꞋa ke memamakie. 15 Kemamakiteno mage huno hamapaiye “MukiꞋa kotega utama nagai kanale mono kea alitama veaꞋmogamina mo hamapaiho. 16 HamapaisageꞋya nagoꞋa veaꞋmoꞋya ani kehena ‘Tamage nehae.’ huꞋya haviꞋya amakupi maleꞋya amametiti hisagetama tina falematesageno Anumaya KotiꞋa amaku amamena aligatigahianagi nagoꞋa veaꞋmoꞋya ani kehena ‘Havige nehae.’ huꞋya haviꞋya amakupi omalesaya veafena Anumaya KotiꞋa ‘Hani yapi tegelege nehia atafi viho.’ huno humategahie. 17 Nagai kema haviꞋya amakupi maleꞋya ametiti hisaya veaꞋmoꞋya ani tokiyaꞋage avame yana hugahae nagai nagile Kefo Avamula vea amakupitila amanati neꞋataleꞋya amaku amakesafiti ohavinesaya kefitila alu amake alu amakea aigahae. 18 VeaꞋma akafu neꞋamanisia osifaꞋvema atafa hisayana amaugafa amagata oꞋaisigeꞋya ofaligahae. VayaꞋma nefalia posini lima nesayana amaugafa amagata oꞋaisigeꞋya ofaligahae. Kalima neꞋaliya vayaꞋmogami amaugafaleꞋma amayama malesagenoꞋa kaliꞋamimoꞋa kanale humategahie.” huno hie.

Anumaya KotiꞋa Yisasina avalegeno ikapinaga haimaine.

19 YisasiꞋa, AnumayatimoꞋe mani kea hamapaitegeno ikapinaga avalesaga higeno haino Anumaya Kotina tamaga ayatega umaine. 20 UmainegeꞋya YisasiꞋene tokaeꞋya nemaiya anagala mukiꞋa kotega ute ete huꞋya Yisasi mono kea hamanepaigeno AnumayamoꞋa amakaiꞋene vaiyeno amaya huno tokiya yamaꞋaleti “Ani kea tamage nehae.” huꞋya veaꞋmoꞋya havisaya yafe kasagoꞋya tokiya avame yana humainae. Mani kema hua kea tamage.

Copyright information for `KMU