Mark 4

Nago kanomoꞋa hoyafima avina nefaiya yate YisasiꞋa avame kea humaine.

YisasiꞋa tikotumo agegayalega umaineno nagoꞋene humaveligeꞋya kasagoꞋya veaꞋnea agaite elitalu huꞋya yageꞋyage haya yafe tipi kalefi haisaga humaino mopale maiteno ti amuꞋnopi umainegeꞋya yageꞋyage haya veaꞋmoꞋya ti agegayalega hetiꞋya mainae. HetiꞋya mainageno YisasiꞋa alu ke alu kea avame kefiti mage huno hamapaiye “Haviho nago kanomoꞋa avina hanaigahe vie. Avina yamaꞋa alino aihelafino nehanaigeno nagoꞋa avinamoꞋa kapi tavino hanegeꞋya namayagamoꞋya me neꞋya haꞋno hae. NagoꞋa avinamoꞋya yafa mopafi taviteꞋya osiꞋa mopa hanea yafe aupaꞋa hagemainae. Hagayanagi yagemoꞋa teno amukonako higeno hafuꞋya omalea yafe fayoteꞋya asagaliye. NagoꞋa avinamoꞋa avetanafa inomo amuꞋnopi tavino hageteno avetanafa inoꞋene tokaeꞋana haiteteꞋana avetanafa inomoꞋa ayetegeno haviya higeno alagaꞋa falote ohune. Falote ohunegi nagoꞋa avinamoꞋa kanale mopafi tavino hageteno ala huno alaga ayeana nagoꞋa avinamoꞋa tetiꞋa (30) alaga ayegeno nagoꞋa avinamoꞋa sikisitiꞋa (60) alaga ayegeno nagoꞋa yosalela kasagoꞋya vani hataletiꞋa (100) alaga ayeno vasaimai vasaimai humaine. Tamakesama hanesigetama havilama hutama haviho.” huno hie.

YisasiꞋa naꞋane agesa hanegeno avame kegeꞋyana humaine.

10 MukiꞋa veala utageꞋya agaiꞋa tuelufuꞋa (12) anagaꞋamoꞋyaene nagoꞋa veaꞋene ani avame kemona aepaꞋahe havigae. 11 Havigageno YisasiꞋa mage huno hamapaiye “Tamakaila Anumaya KotiꞋa kava yagailamatenea yafe falakimainea kea Anumaya KotiꞋa tamaya hinagetama havigahagi nagai kema nohaviya veala avame kekeꞋya hamanepauve. 12 Ani veaꞋmoꞋya ageme geme nehaiyanagi agelama huꞋya oꞋagegahae. Havime havime nehaiyanagi havilama huꞋya ohavigahae. Havilama ohisaya yafe avame kea hamanepauve. Havigu havilama huꞋya amakuꞋa aiyahae hisageno Anumaya KotiꞋa aigeꞋamateno kefo yaꞋami atalemateyafe nehue.” huno hie

Avinamote avame kea huhaleno hie.

13 YisasiꞋa mage huno hie “Mani avame kea havilama ohunao? MukiꞋa avame kea hanaꞋa hutama havigahae?” huno hie. 14 Avina yama hanaigahe via kanomoꞋa Yisasife kanale mono kea nefaiye. 15 NagoꞋa veaꞋmoꞋya kapi tavimainea avinamo avamete mainageno kanale kea faimalegeya maineꞋya Anumaya Koti kea haviyanagi amakupi omalesaya yafe SataniꞋa amakupitila ani kea melitalene. 16 AniꞋa huno yafa mopafima tavimainea avinamoꞋa maꞋa humaine nagoꞋa veaꞋmoꞋya Anumaya Koti kea haviꞋya aupaꞋa atafa huteꞋya muse hae. 17 Muse hayanagi hafuꞋyamoꞋa mopafi otavinea yamoꞋa alige atalege veaꞋne maineꞋya osi kana kanoꞋa osiꞋa haviꞋya amakupi maletageno havi kanama falote nehiano Anumayamo kema haviya yafe veaꞋmoꞋya ali haviya humatesaya kanamoꞋma amakaite falote nehiano aupaꞋa Anumaya Koti kea neꞋatalae. 18 NagoꞋa avina avetanafa hanea inomo agusafi tavimainea avinamoꞋa maꞋa humaine nagoꞋa veaꞋmoꞋya Anumaya Koti kea haviteꞋya ma mopafi mukiꞋa yaꞋyagaꞋamihena amakesa haviꞋya moneꞋamima yokaloꞋamihena kalagi aigeꞋya ani yaꞋyagamoꞋa Anumaya Koti kea aliꞋya ayetalako huteꞋya atalageno alaga aye helafino tama nohie. 20 Tama nohianagi kanale mopafima tavimainea avinamoꞋa maꞋa humaine nagoꞋa veaꞋmoꞋya Anumaya Koti kea haviꞋya amakupi malageno ani alaga mukiꞋa aye henelafie. NagoꞋa veaꞋmoꞋya nagoke avina yosalela tetiꞋa (30) alaga ayemainae. NagoꞋa veaꞋmoꞋya nagoke avina yosalela sikisitiꞋa (60) alaga ayemainae. NagoꞋa avina yosalela vani hataletiꞋa (100) alaga ayemainae.” huno humaine.

VeaꞋmoꞋya lamua hanagaliꞋya sipale kapinaga nomalae huno humaine.

21 Hamapaiya yafe YisasiꞋa mage huno hamavige “NagoꞋa veaꞋmoꞋya lamua hanagaliꞋya susufaneletila aiso hunemalao ifi sipa kapinaga hanagaliꞋya aiso hunemalae? AꞋao aihalesia yafe sipale hanagaliꞋya nemalae. 22 HaenagaꞋa mukiꞋa falakimainesia yamoꞋa efalote hugahie. MukiꞋa kesi kava nehisaya yamoꞋa efalote hinageꞋya veaꞋmoꞋya agegahae. 23 Tamakesama hanesimogatama havilama hutama haviho.” huno hie.

24 Huteno mage huno hie “Anumaya Koti kema havisaya yafena tamakesa havilama hutama haviho. Havisaya kea akave malesageno nagoꞋa kene tamahapaisigetama havigahae. 25 Havilama huno havilinesia kanomona Anumaya KotiꞋa nagoꞋene havisia yana amigahianagi ‘Ago havilinoe.’ huno nehisia kanomona havilinesiamaꞋa hafalegahie.” huno hie.

Avina yamoꞋma nehagea yate avame kea humaine.

26 YisasiꞋa mage huno hie “Anumaya Koti kava yagaimainea yamoꞋa maꞋa humaine. Nago kanomoꞋa avina yana hoyafi hanaemaleteno kegela mo faeteno feluga hetiteno huge hugeteana ani avinamoꞋa hanaꞋa huno falote huno ala nehia yamona aepaꞋa ani kanomoꞋa oꞋagene. 28 OꞋagenegi afaꞋa mopamoꞋa agaiꞋageꞋya nuna amigeno aifalo huno hageteno haisa falote huteno haenaga alaga ayeno afu nele. 29 Akavi huteno afuma nelea kanamoꞋa ago evaꞋyi hia yafe aupaꞋa viaꞋyamo naepeleti hataga humaine.

Masatati avina yosamote avame kea humaine.

30 YisasiꞋa mage huno hie “Anumaya KotiꞋa kava yagaimainea yamoꞋa hanaꞋa maine? NaꞋane huꞋna maꞋa huno hane huꞋna avame kefitila tamahapaisue? 31 Ma ma osi alagamo hia avamete humaine. Ani alagamo agia masatatie. Ani osi osi alagamoꞋa nagoꞋa yosalagama negaliya yosalagamoꞋa agaseno osi kanoꞋa hane. 32 Osi osi humaineanagi kalimaletegeno hageno haiteno ala yosagefa haino mukiꞋa hoyafima hanea yosayaga amakaseno ayaꞋaya humainegeꞋya namayagamoꞋya akopatela noꞋamia me negiye.” huno hie.

YisasiꞋa avame kegeꞋya humaine.

33 YisasiꞋa aniꞋa huno kasagoꞋya avame kea alumo alumo huno amakupima havisaya avamete kea hamapaiye. 34 YisasiꞋa vayaꞋyagaene maineno mukiꞋa kema hamapaiya kea avame kegeꞋya hamahapaiyanagi agaiꞋaenema tokaeꞋya nemaiya anagala amahaote mainageno hufalote huno hamapaimaine.

YisasiꞋa ala yasimofe higeno taga humaine.

35 Ani yupa yagemoꞋa tavifalegahe higeno YisasiꞋa agaiꞋaenema tokaeꞋya nemaiya anagafe mage huno hie “Tikotumona atu faliga vigetao.” huno hamapaiye. 36 HigeꞋya mukiꞋa elitalu humainaya veala neꞋamataleꞋya tipi kalefi haisaga humaiꞋya Yisasina avaleꞋya vageno nagoꞋa tipi kaleyagamoꞋya agai tipi kalene tokaeꞋya vae. 37 NeꞋvageno tusiꞋa yasimoꞋa alino timona aikalato kalato huno tipi kalefi atalegeno tipi kalefi havategahe hie. 38 Havategahe higeno YisasiꞋa tipi kalemona akavelega tala yosale afita aino faemainegeꞋya agafa huꞋya mage hae “Hulavenelina kanomogae tikotupi asaga hulavita ti nakaita falisunageka kahauna huotategano?” huꞋya hae.

39 Hageno YisasiꞋa hetino ani limofeꞋene yasimofeꞋenena tokiyaꞋage ke huno “Taga huo.” higeno yasimoꞋene timoꞋenena taga huꞋana alava humainaꞋe. 40 Alava higeno YisasiꞋa agaiꞋaenema tokaeꞋya nemaiya anagafe mage huno hie “NaꞋa higetama kolia nehae? Nagaife havitama tamakupi maletama tamametiti nehaya yamoꞋa kaleꞋyo humaineo?” huno hamavige. 41 HamavigegeꞋya amamaꞋyo aiteꞋya huge havige huꞋya mage hae “Ma kanoa taꞋe? YasimoꞋene timoꞋene agai kea haviteꞋya akave nemalae.” huꞋya hae.

Copyright information for `KMU