Mark 5

YisasiꞋa aifo kanomo agusafiti Kefo Avamula anatitalene.

Kalili ala tikotuna takaeꞋya ame agegayamona Kelasa* vea mainalega uvaꞋyi hae. YisasiꞋa ani tipi kalea neꞋataleno ti agegayalega neꞋvigeno nago kanomona Kefo AvamuꞋmo agupi mainea kanomoꞋa matimatipinagati Yisasite emaine. Ani kanoa yafakapinaga nomaꞋa hanegeno anifinaga mainegeꞋya tokiyaꞋage seni nofiteti kitesaya vayala omainae. VayaꞋmoꞋya seni nofiteti aiya ayaꞋene kisalu kimalenageno ani nofila aigalu heneꞋataleno aiyafi nofila yafateti ailatapegeno nofila aikaꞋno higeno “Ako huka maiyo” huꞋya hapaisaya tokiyaꞋamima hanea vayala omainae. Omaigeno ani kanomoꞋa nateꞋene kegeꞋene efi efi huno matimatipinagaene agoꞋyaleꞋene maineno tusi aviteno avovo nehuno yafateti agaiꞋa augafa aige talaga talagoma humainea yamoꞋa amumoꞋa tusiya humaine.

Ani kanomoꞋa Yisasina ayaꞋayate neꞋegeno ageteno aiyayeno eno aiyafi aleꞋya meyeno mopafi maineno alisoso huneꞋate. YisasiꞋa mage huno hie “Kefo AvamuꞋmogae agusafinagatila hatilavio.” huno hutea yafe ani kanomoꞋa ala kegefafiti mage huno hie “Yisasigae, ago tagaseno anale mainea Anumaya Kotina neꞋamogae, naꞋa hunategahe nehane? MusekaꞋa nehugi nagata aisia kavala huonato.” huno hie.

Higeno YisasiꞋa ani kanohena mage huno hie “Kagai kagia tagae?” huno havigegeno “Nagia KasagoꞋya-moꞋnae. MukiꞋa Kefo AvamuꞋmoꞋya nagupi haifaleꞋya mainaya yafe nagia KasagoꞋyamoꞋnae.” huno hie. 10 Huteno Yisasifena mage huno hie “MusekaꞋa nehue ma kumatetila Kefo Avamula humatesanageꞋya alulega oꞋvisae.” huno hie.

11 NehigeꞋya kasagoꞋya afuyagamoꞋya agoꞋyafi maineꞋya kave nenae. 12 NenageꞋya Kefo AvamuꞋmoꞋya Yisasife mage huꞋya havigae “Ani afuyagamo amakuꞋafi hulategeta vamano.” huꞋya havigae. 13 Havigageno YisasiꞋa “AniꞋa hiho.” huno higeꞋya Kefo AvamuꞋmoꞋya ani kanomo agupitila hatilaviꞋya afuyagamogami amakupi haifalageno ani afuyagamoꞋya amaiyayeꞋya nagola aulufi kapi taviteꞋya tipi asaga hulaviꞋya ti nakaiꞋya fali haꞋno humainae. Afua tu tauseniꞋa (2,000) afuyaga fali haꞋno humainae.

14 Fali haꞋno hageꞋya ani afuyagale kava neꞋyagaiya vayala faleꞋya ala kumatega mainaya veaꞋneheꞋene hoyafinaga mainaya veaꞋneheꞋene “NaꞋa maꞋa higeta neꞋone.” huꞋya hamapaigeꞋya ani veala “Hia yana agesune.” nehuꞋya emainae. 15 Yisasite eꞋya kasagoꞋya Kefo AvamuꞋmoꞋma agupifiti hatilavino via kanomona agesa akalo higeno kenaꞋa failino anile mopale mainegeꞋya megeteꞋya koli hae. 16 YisasiꞋma humainea kavaꞋma agemainaya veaꞋmoꞋya naꞋa maꞋa huno Kefo Avamula agupima mainea kanoa alino kanale hutea yafeꞋene afuyagama humatea yafeꞋene hamapaiye. 17 HamapaigeꞋya ani veaꞋmoꞋya Yisasifena “Tagaila tataleka ago vuo.” huꞋya hae.

18 Hageno YisasiꞋa ugahe tipi kalefi haisaga hunemaigeno Kefo AvamuꞋma agupiti ataleno umainea kanomoꞋa Yisasifena “KagaiꞋene visuꞋe.” huno havigegeno YisasiꞋa “AꞋao kagaya nokalega visanaꞋamoga mukiꞋa AnumayamoꞋma aigekateno hugatea yafena vayakamogamina mo hamapaiyo.” huno hie. 20 Higeno ani kanomoꞋa viaꞋyamo teniꞋa (10) ala kumaꞋyaga hanea kotega uno YisasiꞋma hutea yafena hamapaigeꞋya mukiꞋa veaꞋmoꞋya amamaꞋyoa aimainae.

Soka kanomo munala faligahe humaine.

21 YisasiꞋa tipi kalefi asaga humaino tina lakaeno eteno ti agegayalega egeꞋya muki veaꞋmoꞋya agaite melitalu humainae. 22 Emainageno nagola soka kanoa, YailasiꞋe nehaya kanoa, emaineno Yisasina mogeteno aiyafi mope humaine. 23 Mope humaineno tokiyaꞋage huno Yisasina mage huno havige “Vae nagai munala faligahe ayaya neꞋaigi kaya mo maletesanageno kanale hutesie.” huno hie. 24 Higeno YisasiꞋa agaiꞋene vigeꞋya veala yageꞋyage huꞋya akave umainae.

Yisasina kenaꞋale avate hia aꞋmona kaliꞋamoꞋa haꞋno humaine.

25 Vageno tuelufuꞋa (12) kafua mukiꞋa kanale aigu nopinaga nemaiya aala anile maine. 26 NagoꞋa tota vayate ute ete hugeteana agataiya kavala hageno moneꞋama amaminea yamoꞋa haꞋno higeno ani kaliꞋa nago kanomoꞋa ali kanale huoꞋatenegi kaliꞋamoꞋa ala humaine. 27 Ani aꞋmoꞋa Yisasi avagea haviteno ani yageꞋyageꞋma haya veapi Yisasina akavelegati kenaꞋale mevate hie. 28 Avate nehuno agesa mage huno havie “KenaꞋale avate nehisugeno kaliꞋnimoꞋa haꞋno hunategahie.” huno agesafinaga havimaine. 29 Haviteno aniꞋa higeno aupaꞋa kolamoꞋa taꞋnegeno augafafinaga malegeno ageana kaliꞋamoꞋa ago kanale hutene. 30 Kanale huteanagi YisasiꞋa “NagoꞋa tokiyaꞋnia ago nataleno vie.” huno agesafinaga haviteno anifima alitalu humainaya veaꞋmogami amuꞋnopi maiyahae huno mage hie “Ta kenaꞋnilela mevate hie?” huno humaine. 31 HigeꞋya agaiꞋaenema tokaeꞋya nemaiya anagaꞋamoꞋya mage hae “MukiꞋa veala yageꞋyage hageka neꞋaganagi naꞋa higeka na kea hamavinegane?” huꞋya hae. 32 Hageno YisasiꞋa moge mege huno avate hia kanohe ati ayemaine. 33 Ati neꞋayegeno ani aꞋmoꞋa kaliꞋa ago kanale hutegeno agea yafe koli huno atili huteno aiyafi mope huno YisasiꞋma hutea yafena tamage huno hapaiye. 34 Hapaigeno YisasiꞋa mage huno hie “AꞋmogae nagaifema havika kagupi maleka kametiti hanageno ago kalikaꞋamoꞋa kanale hugategi kaipamoꞋa yasi nehinageka afaꞋa vuo. KalikaꞋa agola haꞋno hie.” huno hapaiye.

35 HanepaigeꞋya nagoꞋa vayala soka kanoa, Yailasi notegati mage huꞋya me hapaiye “MunakamoꞋa ago falimainegi ataleka kava kanomona kasalo haegi nagoꞋene havioko.” huꞋya hae. 36 Hageno YisasiꞋa hapaiya kehena ohavisia agesa haviteno soka kanohena mage huno hie “Kolia ohuka nagaife havika kagupi maleka kametiti huo.” huno humaine. 37 MukiꞋa veafena omeho huneꞋamateno PitaꞋene YemesiꞋene nepuꞋamoꞋa YoniꞋene amavaleno umainae. 38 Soka kanomo note uvaꞋyi huꞋya agayana mukiꞋa veala tusiꞋa avineꞋatageno YisasiꞋa nopi haifaleno amakaifena mage huno hie “NaꞋa higetama tusiꞋa avianeꞋatae? Ma munala ofalinegi afaꞋa faeno maine.” huno hie. 40 Mani kea higeꞋya veaꞋmoꞋya faligeꞋyama agaya yafe kigiꞋa hutageno “Kumatega hatilavitama viho.” huno higeꞋya kumatega hatilavigeno YisasiꞋa itaꞋafoꞋamoganiene agaiꞋaenema vaya anagaꞋene amavaleno falimainea munaꞋma malalega amavaleno haimaine. 41 Haino umaineno ayate atafa hulineno agaiꞋa kefiti mage huno hie “Talita kumi.” huno hie. Tagaiti kefina “Ma munaꞋmoga kahanepaugi hetio.” huno humaine. 42 Higeno aupaꞋa ani munaꞋmoꞋa hetino ute ete hie. Ago ala munalagino tuelufuꞋa (12) kafuꞋa hanea munalagino hetino ute ete higeꞋya anile mainaya veaꞋmoꞋya amamaꞋyo aiye. 43 AmamaꞋyo aigeno YisasiꞋa tokiyaꞋage ke huno “Anima agaya yafena veala hamaꞋopaiho” huno kahegi neꞋamateno “Kavela amiho.” huno humaine.

Copyright information for `KMU