Mark 6

Nasaleti kumate veaꞋmoꞋya Yisasina amakaveꞋno hutenae.

YisasiꞋa ani kumala ataleno viaꞋamo ko aepaꞋalega vigeꞋya agaiꞋaenema tokaeꞋya nemaiya anagaꞋmoꞋya akave umainae. Sapati yupa mono noꞋamifi haino Anumaya Koti kea mukiꞋa vayala hamapaigeꞋya haviteꞋya amamaꞋyo aigeꞋya mage huꞋya hae “MukiꞋa havi haviꞋyana hanateti alia kea nehie? Ayapitila tokiyaꞋage avame yama humainea tokiyaꞋa hanateti alimaine? Mani kanoa no negia aliꞋyate kano maineanagi Malia nafaꞋne mainegi YemesiꞋene YoseseꞋene YutasiꞋene SaimoniꞋenena aganaꞋamoꞋya mainagi asaꞋamoꞋya tagaiꞋene nagopi mainae.” huꞋya huteꞋya amaipa kafa heteꞋya amakaveꞋno hutenae. AmakaveꞋno hutayanagi YisasiꞋa mage huno hie “Anumaya Koti kema nehia kanomoꞋa mukiꞋa kumate mono huhaleno hamapaisiana agia alisaga nehagi kumaꞋale maisiana agaiꞋa afamoꞋene no kumaꞋale vayaꞋenena agia alisaga ohugahae.” huno humaine. Mani kumatela ala tokiya avame yana ohunegi afaꞋa nagoke nagoke kali vayake aya malegeno kanale humatene. Kanale humatenegi afaꞋa mukiꞋa veala agaife haviꞋya amakupi maleꞋya amametiti ohaya yafe YisasiꞋa amaꞋyo aigeno alu kumate kumatela vaiyeno monola hamapaino humaveli maine.

YisasiꞋa tuelufuꞋa (12) anagaꞋamogamina aliꞋyate humatene.

YisasiꞋa tuelufuꞋa (12) anagaꞋamogamife ke higeꞋya ageno mukiꞋa Kefo AvamuꞋma veaꞋmogami amakupiti amanatitalesaya tokiya amamiteno mage hie “Tole ali lokaete lokaete hutama viho.” huno humatene. HuneꞋamateno mage huno hie “Kama visayana ayopatamige alilitama viho. Kutamiene mayaene monetamiene alitama oꞋviho. Tamaiya nona vaigahayanaki tole siota vaioꞋaliho.” 10 NagoꞋene mage huno hie “Nago nopima haifalenutamahena ani nopi faetama maitama hutetama amataletama alu kumatela viho. Faelitetama ohiho. 11 NagoꞋa kumateꞋma visageꞋya veaꞋmoꞋya ali falu falama huotamateꞋya ‘Tamakai kema ohavigahune.’ huꞋya hisagetama ani kumala neꞋataletama ‘Havi kava hae.’ hutama hisaya yafe tamaiyafima hanesia kugukege mopa aihehe huneꞋataletama viho.” huno hamapaiye. 12 HamapaigeꞋya ani vayala neꞋuꞋya mukiꞋa veaꞋnehe mage huꞋya hae “Kefo yatamihena havitama tamakaye nehinagetama tamakuꞋa aiyahae hiho.” huꞋya hamapaiye. 13 HamapaiꞋya mukiꞋa Kefo Avamula veaꞋmogami amakupitila amanati neꞋataleꞋya kasagoꞋya kali veala amaugafale masavena falematageno kanale humatene.

HelotiꞋa agesa haviana Yisasifena “Ti falemate YoniꞋe.” huno humaine.

14 Ani kanafina Yisasi avagemoꞋa ala higeno nagola sauve kanomo agia HelotiꞋe anima haya kea havimaine. NagoꞋa veaꞋmoꞋya Yisasifena mage huꞋya hae “Ma kanoa tima falematea YoniꞋe falimainefiti hetimaine. Hetimaineafe tokiyaꞋa hanegeno ma tokiya aliꞋyana neꞋalie.” huꞋya hae. 15 HageꞋya nagoꞋa veaꞋmoꞋya Yisasifena mage huꞋya hae “Ma kanoa Ilaiya maine.” huꞋya hageꞋya nagoꞋa veaꞋmoꞋya “Aune kanoa nayo amaune vaya kana nehie.” huꞋya hae. 16 Hageno HelotiꞋa haviteno mage huno hie “Yonina haeho huꞋna hugeꞋya ageꞋya hataga hutalenaya kanoa faliteno komufiti hetimaine.” huno hie.

17 Helotina aganaꞋamo agia FilipiꞋe. Filipi aꞋmo agia HelotiasiꞋe. HelotiꞋa Helotiasina kumai a alitenea yafe YoniꞋa Helotife mage huno hie “Anumaya Koti kea atagaeka kaganakamo aala kumai a alitenane.” huno hia yafe HelotiꞋa vayala humategeꞋya Yonina motafa huꞋya avaleꞋya kina nopi hutenayane. 19 Hutenageno HelotiasiꞋa Yonifena tusi hai vaiteteno haesageno falisia agesa havino maiyanagi HelotiꞋa agesa mage huno havimaine “YoniꞋa kefo yana ohuno fatago kanoa alu aotage kano maine.” huno havilinea yafe Yonifena koli huno “Ohaegahae.” huno auꞋneꞋvaino agai kea haviteno agesa kuꞋmo nehuno tole agesa havino afaꞋa muse huno keꞋa nehaviane.

21 Nago yupa Helotina atenea kanamoꞋa falote higeno HelotiꞋa ala imu kimaleteno mukiꞋa kamani kava vayaꞋene ati kava vayaꞋene Kalili kotegama afenomaꞋa kasago humainea vayaꞋyagaene ke higeꞋya imulega emainae. 22 Emainageno Helotiasina munaꞋamoꞋa eno amoneꞋayegeno HelotiꞋene vayaꞋamoꞋyaene neꞋageꞋya tusiꞋa musemaꞋa hageno HelotiꞋa ani munaꞋmofena mage huno hie “Kahaisia yafena afaꞋa hisanageꞋna kamigahue. 23 Anumaya Koti aulagafi kahanepauve nagoꞋa yafema nahavigesanana afaꞋa kamigahue. Mone fenoꞋenefema nehuka mopaenefema hisanana afaꞋa nagai yaꞋyaga haneanagiꞋna amuꞋnopiti ali fako huꞋna kamigahue.” huno humaine.

24 Higeno ani munaꞋmoꞋa viaꞋamo itaꞋamofena mage huno havige “Na kanohe ke huꞋna havigesue?” huno higeno itaꞋamoꞋa mage huno hie “YoniꞋa ti falemate kanomo ageꞋya fakaliteka anumaꞋa aifakalika me namio huka hapaiyo.” huno hie. 25 Higeno aiyayeno ala sauve kanomotega viaꞋamo mage huno hapaiye “AupaꞋa ti falemate Yonina ageꞋya fakaliteka anumaꞋa yopafi maleka me namio.” huno hie. 26 Higeno ala sauve kanomoꞋa haviteno aipamoꞋa tusiꞋa kanaꞋage higeno Anumaya Koti aulagafima huno lokiya vaimalea yafeꞋene maiya vayafeꞋene agesa haviteno mage huno hie “Ani munaꞋmo kea he falaꞋokigahue.” huno hie. 27 Higeno aupa kanoꞋa nago ati kanoꞋa huteno mage huno hapaiye “Yonina ageꞋya mo fakalika anumaꞋa alika eno.” huno higeno kina nopi viaꞋamo Yoni ageꞋya mo fakalitalene. 28 Fakaliteno anumaꞋa yopafi maleno alino eaꞋamo ani munaꞋmona memigeno itaꞋamona alino amine.

29 AmigeꞋya YoniꞋenema tokaeꞋya nemaiya anagaꞋmoꞋya ani kea haviteꞋya uꞋya augafaꞋa moliꞋya yafakapi mo hevaitenae.

YisasiꞋa faefu tauseniꞋa (5,000) vayamogami kavela amamine.

30 Aposolo vayala Yisasitega eteꞋya mukiꞋa humainaya kavaꞋene humaveliya kene eꞋya me hapaimainae. 31 Me hanepaigeꞋya mukiꞋa veaꞋmoꞋya agaitega neꞋuꞋya neꞋeꞋya maiꞋya hageno YisasiꞋenema tokaeꞋya nemaiya anagaꞋmoꞋya kaveꞋamima nesaya kanaꞋamia omalea yafe YisasiꞋa mage huno hie “Egeta tagaitige kaꞋme kotega umaifalu hamano.” huno hie. 32 HigeꞋya amakaiꞋamige tipi kalefi haisaga humaiꞋya kaꞋme kotega ugahe umainae.

33 VageꞋya mukiꞋa veaꞋmoꞋya amaketeꞋya amaugosafina ago agemainaya vayalegiꞋya kumaꞋamileti mopafi amaiya yeꞋya uhagoteꞋya ani kaꞋme kotega uvaꞋyi humainae. 34 UvaꞋyi hageno YisasiꞋa tipi kalefiti asaga hulavino ageana mukiꞋa veaꞋnea elitalu humaiya veala amaketeno agesa mage huno havie “Ma veaꞋnea sipi sipi kana huꞋya mainayanagi kava yagaisaya vayala omainae.” huno agesama havia yafe kalagi aimateno alu ke alu kea hamapaiye. 35 Hamanepaigeno yagemoꞋa tavi falegahe higeꞋya agaiꞋaenema tokaeꞋya nemaiya anagaꞋmoꞋya agaite eꞋya mage huꞋya hae “Ma kumala vaya omai kuma hanegeno yagemoꞋa tavi falegahe nehiafe ma veala humatesanageꞋya uꞋya nagoꞋa veaꞋmogami hoyafitiꞋene notegatiꞋene nesaya kaveꞋamia mo miya hisae.” huꞋya hae. 37 Hageno YisasiꞋa mage huno hamapaiye “Tamakaya tamakaitami nesaya kavela amamiho.” huno higeꞋya agaifena mage huꞋya hae “Nago kanomoꞋa tu hataletiꞋa (200) kanafi aliꞋya aliteno ani moneleti kosa hesia maya miya ohileꞋasine. Tagaya ani moneleti mo miya hulita ani maya memamisune hunageka nehano?” huꞋya hae. 38 Hageno YisasiꞋa mage huno hie “Mogeho naꞋmagi maya hane?” huno higeꞋya uꞋya mogayana higeꞋya “FaefuꞋa (5) mayagi tole noyamegi huno hane.” huꞋya hae.

39 Hageno YisasiꞋa mage hie “MukiꞋamogatama alitalu hute hute hutama kanale apepate mopale maiho.” huno hie. 40 HigeꞋya fifitiꞋa (50) veala nagopi alitalu huꞋya maigeꞋya vani hataletiꞋa (100) veala nagopi alitalu huꞋya mainae. 41 YisasiꞋa faefuꞋa (5) mayaene tole noyamene aliteno anafinaga agesaga huno neꞋageno Anumaya Kotitega ani kavefe huno muse huteno maya kofa huno agaiꞋaenema tokaeꞋya nemaiya anagala amamigeꞋya aliꞋya fako hutele huꞋya veala neꞋamamigeno tole noyamene kolino mukiꞋa veaꞋma nesayafe amamine. 42 AmamigeꞋya mukiꞋamoꞋya neꞋya amamu hae. 43 Amamu higeꞋya atalaya mayaene noyamene atupatapaꞋa alitalu huꞋya kupi aiteꞋya tuelufuꞋa (12) kupi aigeno havatemaine. 44 Ani kaveꞋma nemainaya vayala faefu tauseniꞋa (5,000) vemoꞋya nemainae.

YisasiꞋa ti agupile umaine.

45 AupaꞋa YisasiꞋa agaiꞋaenema tokaeꞋya nemaiya anagafe mage huno hie “Tamakaya nagaila nenataletama hagotetama tipi kalefina haisaga humaitama atu kaiyaga Petesaita kumatega utegeꞋna nagaya veala humatesugeꞋya viho.” huno hie. 46 Viho humategeꞋya utageno YisasiꞋa Anumayamotega ke huno havigegahe agoꞋyafi haimaine. 47 Haino mainegeno hanikigeno tipi kalemoꞋa tikotumona amuꞋnopi utegeno YisasiꞋa agaiꞋage ti agegayale maine. 48 Maineno ageana amaulegati yasimoꞋa eaꞋamo tipi kalemona meyetu fegeteana oꞋvigeno YisasiꞋa ageteno kotigahe hia avametega ti kotumona agupile viaꞋamo amakaitela momakasegahe hie. 49 Amakasegahe ti agupile vianagi eneꞋegeꞋya ageteꞋya amakesa mage huꞋya haviye “Hakalo neꞋefi?” nehuꞋya “Avovo.” hae 50 Avovo huꞋya tusiꞋa koli huteꞋya atali talu hayanagi aupaꞋa amakaifena mage huno hie “Kolia ohutama maiho. Nagaya neꞋogi tokiya vaitama maiho.” huno hie. 51 Huteno tipi kalefi haino amakaiꞋene nemaiyana yasimoꞋa taga higeꞋya ani vayaꞋmoꞋya tusiꞋa amamaꞋyoge humainae. 52 YisasiꞋa tokiyaꞋaleti kaveꞋma amaminea yafena amakuꞋamoꞋa haꞋyagino atalako higeꞋya aepaꞋa havilama ohunae.

YisasiꞋa kasagoꞋya Kenesale veala kaliꞋamia alino kanale humatene.

53 Ti kotuna takaeꞋya Kenesale kotega uvaꞋyi huteꞋya hatilaviꞋyama vayana tipi kalea nofiteti ayetenae. 54 Tipi kalefiti hatilavino neꞋvigeꞋya aupaꞋa veaꞋmoꞋya Yisasina augosafina agemainae. 55 AgeteꞋya note note amaiyayeꞋya ute ete huꞋya kali veala hagifanale amavaleꞋya “YisasiꞋa ma kumate maine.” huꞋya haya kea haviteꞋya agaite amavaleꞋya etele humainae. 56 YisasiꞋa vilega osi kumatelo ala kumatelo talapinagao kali veala amavaleꞋya kuma amuꞋnopi momateneꞋya Yisasifena mage huꞋya havigae “Kanale kenakamo atupalela avate hisuno?” huꞋya hateꞋya avate humainaya veala kalimoꞋa kanale humatene.

Copyright information for `KMU