Matthew 17

Yisasina augafamoꞋa alino ai-yahae huno aluya hu-maine.

YisasiꞋa sikisiꞋa (6) kana maiteno Pitana Yemesina Yonigamina amavaleno ayaꞋaya agoꞋyafi hai-mainae. HaiꞋya mainageno Yisasina augosamoꞋa alino alu augosa kaligeno augosafitila yage kana huno ai-vasa nehigeno kenaꞋamoꞋa efeꞋage huno alave alave hu-maine. Ageho tole kanolana nayoma fali-mainaꞋa kanolana MoseseꞋene IlaiyaꞋene YisasiꞋene kea kea nehaꞋe. NehaꞋageno PitaꞋa Yisasife mage hie “Anumayamogae tagaya male maunana kanaleꞋya hie. Kahaisigekahena katega nona taliꞋa (3) ki-lama-tesue kagaila nagolagi Mosesena nagolagi Ilaiyana nagolagi huno hanesie.” huno hie. Ani kea hanepaigeno nagola hale yamaꞋaene siaꞋmoꞋa evaꞋyi huno alino aiso hu-mategeno siapinagati ala kefiti age aino mage huno hie “Mani kanoa nagai nafaꞋnegi nahau nayamopafi nenagea kanogi agaifena aluya huno nenahaigi agai kea haviho.” huno hie. HigeꞋya agaiꞋaenema tokaeꞋya nemaiya anagaꞋmoꞋya koli huꞋya amamaꞋyo aigeꞋya mopafi amakoꞋya aiye-mainae. AmakoꞋya aiyeꞋya mainageno YisasiꞋa avate eno mage hie “Kolia ohiho. Hetiho.” huno hu-maine. HigeꞋya age-saga huꞋya agayana YisasiꞋa agaiꞋage mainegeꞋya age-mainae.

AgeteꞋya agoꞋyafiti enelaviꞋya YisasiꞋa kahegi mateno mage huno hie “Anima agaya yafena nagoꞋa veaꞋnea hamaꞋopainegeꞋna ikapinagati emainoa kanoa vayaꞋmo natenea kanomoꞋna fali-mainesufiti hetisua yupa hama-paigahae.” huno hie. 10 HigeꞋya agaiꞋaenema lokaeꞋya nemaiya anagaꞋmoꞋya mage huꞋya havigae “NaꞋa higeꞋya kahegi kema havilinaya anagaꞋmoꞋya ‘IlaiyaꞋa hagoteno neꞋesigeno Anumaya KotiꞋa taugafa ali-gatisia kanoa egahie.’ huꞋya nehayane?” huꞋya havigae. 11 Havigageno YisasiꞋa mage huno hie “Tamage IlaiyaꞋa hagoteno egahianagino mukiꞋa yana alino kanaleꞋya huno talo tala hugahie. 12 Hugahianagi tamaha-nepauve IlaiyaꞋa ago emaineanagi agaila age-lama ohuꞋya hamaiya kava huꞋya agaila havi kava hu-tenaya kavala aniꞋa huꞋya ikapinagati emainoa kanoa vayaꞋmo natenea kanomonina ali haviya hu-natesageno naugafa nagata aigahie.” huno hie. 13 Mani kema hiana “YoniꞋa tima fale-neꞋamatea kanomofe hie.” huꞋya hu-mainae.

Nago nafaꞋnemo agupina Kefo Avamu mainea nafaꞋnea YisasiꞋa alino kanale hu-tene.

14 YisasiꞋene agaiꞋaenema tokaeꞋya nemaiya anagaꞋmoꞋya mukiꞋa veala melitalu huꞋya mainale evaꞋyi hageno nago kanomoꞋa Yisasite mepe hu-maine. 15 Yisasifena mage huno hie “Anumayamogae kagaya neꞋnafaꞋneꞋnimona kahau huto. Ani nafaꞋneꞋnia mananiꞋya neꞋagegeno augafamona ali haviya nehigeno mukiꞋa yupa ata taꞋnekino tipi asaga hu-nelavino nehie. 16 NaꞋa nehigeꞋna kagaiꞋene tokaeꞋya nemaiya anagakamogamite avaleꞋna oana aliꞋya kanale hu-tesaya amukoꞋamia omalene.” huno hie. 17 Higeno YisasiꞋa mage huno hama-paiye “Vae tamakaya meni kanafima mainaya veaꞋmogatama nagaifena havitama tamakupi maletama tametitia ohutama fatago hutama nomaiye. AniꞋa haya yafe kasalo nenahaegi naꞋmagi yupa tamakaiꞋenena mainesugetama nagaifena havitama tamakupina malegahae? huno nehuno ani nafaꞋnemo nefafe ‘NafaꞋnekaꞋa avaleka eno.’ huno hie. 18 Higeno avaleno egeno YisasiꞋa anima agupi mainea Kefo Avamufena ke-makino ‘Ataleka hati-lavio.’ huno hutegeno hati-lavigeno aupaꞋa ani nafaꞋnemona kanale hu-tene.”

19 YisasiꞋene tokaeꞋya nemaiya anagaꞋmoꞋya amakaiꞋamige Yisasite mage huꞋya me havigae “Tagaila naꞋa higeno Kefo AvamuꞋma anatisuna amukotia omale?” huꞋya havigae. 20 Hageno YisasiꞋa mage huno hama-paiye “Nagaifema havitama tamakupi maletama tamametiti haya yatamimoꞋa osi hu-mainea yafe ani kava hisaya amukotamia omalene. E, nagaya tamage-lafa huꞋna tamaha-nepauve tamakaya osi kanoꞋa oꞋagemo avina kanoꞋa Masatati avinamoꞋma hia kava hutama nagaifena havitama tamakupi malaleꞋasina ma agoꞋyamofena mage hutama hapaisagenoꞋa ‘Hetika alule vuo.’ hisagenoꞋa ani agoꞋyamoꞋa agola vileꞋasine. Nagaifema havitama tamakupi malesayana tamakaya nago aliꞋyafena ‘Amuha ohunone.’ hutama ohugahagi mukiꞋa tokiya kavala iohugahae.” huno hu-maine.

YisasiꞋa nagoꞋene tole kanale “Fali-mainesufitila he-tigahue.” huno hu-maine.

22 Kalili kotega alitalu huꞋya mainageno YisasiꞋa agaiꞋaenema tokaeꞋya nemaiya anagafe mage huno hama-paiye “Osi kanaꞋa maitesugeno nago kanomoꞋa nagesi huno ikapinagati emainoa kanoa vayaꞋmo natenea kanomonina kame vayaꞋmogami amayapi navaleno nategahie. 23 NatesigeꞋya nahaesageꞋna falisugeꞋya he-vaina-tesageꞋna tole yupa komufi maiteꞋna tagufa (3) molisia kanale eteꞋna he-tigahue.” huno higeꞋya ani kehena agaiꞋaenema tokaeꞋya nemaiya anagaꞋmoꞋya havigeno kanaꞋage hamau-maine.

YisasiꞋa mono note mone amamine.

24 Nago yupa YisasiꞋene agaiꞋene tokaeꞋya nemaiya anagaꞋmoꞋya Kapaneamu evaꞋyi hageꞋya mono noma ali fatago hisaya monea vaya amaugafaleti takesi neꞋaliya vayaꞋmoꞋya Pitate mage huꞋya me havigae “Tamakaila hu-lamave-nelia kanomoꞋa ani mono note monea neꞋataleo.” huꞋya hae. 25 Hageno PitaꞋa mage hie “E, ani monea neꞋatale.” huno nehuno nopinaga hai-falegeno YisasiꞋa hagoteno mage huno havige “Saimonigae naꞋane kagesa nehavine. Ma mopale sauve vayaꞋmoꞋya vaya amaugafaleti takesi monea aliꞋya tagami neꞋamamiye? MukiꞋa amakaiꞋami kotega vayateti neꞋalio ifi alu vayaꞋmogamiteti neꞋaliyo?” huno havige. 26 Havigegeno PitaꞋa mage huno hie “Alu vayatetila afaꞋa neꞋaliye.” huno higeno YisasiꞋa mage hie “Tamage hane. AniꞋa huꞋya amakaiꞋami kotega vayaꞋmogami amaugafaletila takesi noꞋaliye. AniꞋa huta lagaya Anumaya Koti anaga mainonagi tagaitetila takesia oꞋalisae. 27 OꞋaligahayanagi havigu naꞋa hisunageꞋyahena amaipamoꞋa haviya hugahayanagika kagaya ti kotute visanaꞋamoga noyame hukua atalesanageno tavisigeka hagote noyamema avayuma hinuka avaya ali aka hu-lineka nagola monea agegane. Ani monea alika ani vayala memamisanageꞋya tolemogatiꞋa taꞋaugafaleti takesi monea aligahae.” huno hu-maine.

Copyright information for `KMU