Matthew 26

Kava vayaꞋmoꞋya Yisasina haesaya ke hu-haꞋya ki-mainae.

YisasiꞋa mukiꞋa mani kea hu haꞋno huteno agaiꞋaenema lokaeꞋya nemaiya anagafena mage huno hie “Tamakaya ago havimainae tole kana mainesunageꞋya kafuꞋahe kafuꞋahe Anumaya KotiꞋa taginagomogami amaugafama ali-gati-mainea kanahe* alitalu huꞋya imua kigahae. Ani imuma kisaya kanafina ikapinagati emainoa kanoa vayaꞋmo natenea nafaꞋnemoꞋnia natafa huꞋya yafaga yosale nili heꞋya nasasaigeꞋna faligahue.” huno hie.

Mono note kava vayaꞋene Yuta vayatamaene ala mono note uhagote-mainea kava kanoa, KaiyafasiꞋe ani kanomo nopi, melitalu huꞋya mainae. MaineꞋya mage hae “HanaꞋa huta agesi huta Yisasina atafa huta haesunageno falisie? Ala imuma kisaya kanafina atafa ohugahune. Atafa hisunageꞋya veaꞋmoꞋya havigu tusiꞋa ke huꞋya tu huyafenagita atalegahune.” huꞋya hae.

Nago aꞋmoꞋa Yisasina anupi masave takino fale-tene.

YisasiꞋa Petani viana nayona fugitaya age-mainea kanomo agia SaimoniꞋe kanomo nopi umaine. Umainegeno nago aꞋmoꞋa yafa keꞋayola alilino anileꞋma eana ani keꞋayoꞋma taloma hu-malenaya yafamo agia alapasata. Ani li keꞋayopina nagola tusiꞋa miyamaꞋa hanea masavena manaꞋage tina haneanagino YisasiꞋa kave maino nenegeno ani aꞋmoꞋa Yisasi anupi ani masavena takino fale-tene. Takino fale-neꞋa-tegeꞋya YisasiꞋenema tokaeꞋya nemaiya anagaꞋmoꞋya ageteꞋya ke vaiꞋya mage hae “NaꞋa higeno mani manaꞋage masavena afaꞋa neꞋatale? Ani masavena nago kanomoꞋma miya hileꞋasina tusiꞋa mone aliteta ani masaveteti monea afenoꞋamima omalenea veaꞋne amamuteꞋasine.” huꞋya hae. 10 Hageno YisasiꞋa ani kea haviteno mage huno hie “Kea oꞋama-kitama afaꞋa ataleho. Havige nehagi nagaila tusiꞋa kanale kava hu-nena-te. 11 MoneꞋamima omale veaꞋmoꞋya mukiꞋa kanafina tamakaiꞋenekeꞋya maigahayanagi nagaya tamaikaiꞋenena mukiꞋa kanafina omaigahue. 12 Mani aꞋmoꞋa masavena naugafaleꞋma takino fale-nena-teana afaꞋa ofaliꞋna mainogeno masavema faleꞋya he-vai-na-tesaya avamete huno fale-nena-te. 13 Tamage huꞋna tamaha-nepauve mukiꞋa ma mopafi veapima nagaifena kanale mono kema hama-paisafina mani aꞋmoꞋma hia kavafeꞋenema hama-paisageꞋya mukiꞋa veaꞋmoꞋya agaifena amakesa havigahae.” huno hie.

YutasiꞋa hu lamage huno kava vayafe “Yisasina avaleꞋna tamamigahue.” huno hama-pai-maine.

14 Higeno Yutasi IsakaliotiꞋa Yisasina tuelufuꞋa (12) anagaꞋene tokaeno nemaiya kanogino neꞋamataleno viaꞋamo mono note kava vayate umaine. 15 UvaꞋyi huno mage huno hie “Agesi huꞋna tamave-lisugetama Yisasima atafa hisayana na kano namigahae?” huno higeꞋya muse huteꞋya aupaꞋa tetiꞋa (30) siliva alaga mone aminae*. 16 Amigeno YutasiꞋa vaya kulata oꞋaiya yate kesi kateti Yisasina movalesigeꞋya atafa hisaya kafe ati-ye-maine.

YisasiꞋa agaiꞋaenema tokaeꞋya nemaiya anagaꞋaene kavela ne-mainae.

17 Hale oki kai-hamema nenaya kanamona hagote kanale YisasiꞋenema tokaeꞋya nemaiya anagaꞋmoꞋya Yisasife mage huꞋya me havigae “Anumaya KotiꞋa Yuta vaya amaugafama ali-ga-ti-mainea kanahe kagesa havisana kavela hana nopi mo-lalo tala hisune hunageka nehane?” huꞋya hae. 18 Hageno YisasiꞋa mage huno hama-paiye “Ala kumate uvaꞋyi hutama nago kanomote mage hutama mo hiho ‘Hu-lave-nelia kanomoꞋa mage hie ‘Falisua kanamoꞋa ago aupa higeꞋna kagai nopi nagaiꞋenema tokaeꞋya nemaiya anagaꞋaene Anumaya KotiꞋa Yuta vaya amaugafama ali-ga-ti-mainea kanahe tagesa havisuna kavela nesune huꞋna nehueꞋ huno hie.’ hutama hiho.” huno hie. 19 HigeꞋya agaiꞋaenema tokaeꞋya nemaiya anagaꞋmoꞋya YisasiꞋma hama-paiya avamete huꞋya ani kavela mo-lalo tala hu-mainae.

20 Talo tala hu-malageꞋya yagemoꞋma tavi faleamaꞋa YisasiꞋa tuelufuꞋa (12) anagaꞋaene kave negahe folamole mainae. 21 MaineꞋya kavela nenageno YisasiꞋa mage huno hie “Tamage huꞋna tamaha-nepauve nagaiꞋenema mainafitila nago kanomoga nagesi huka nahaesana yatela vai-neꞋayane.” huno hie. 22 HigeꞋya anagaꞋamoꞋya amaipa haviya huteꞋya agaifena mage huꞋya havigae “Anumayamogae nagaife nehano?” huꞋya nagoke nagokeꞋmoꞋya havigae. 23 Havigageno YisasiꞋa mage huno hie “NagaiꞋenema nagoke yopafiti ayateti vayagofinoꞋma nenea kanomo nagesila huno nahaesia yatela vai-neꞋaye. 24 Nagaya ikapinagati emainoa kanoa vayaꞋmo natenea kanomoꞋna nagaife huꞋya Anumaya Koti avopina kae-malenaya kate ugahuanagi vayaꞋmoꞋya havisagi huno nagesi hisia kanomofena avoꞋnio nahau hanagi kagaya kaꞋyeka maiyo huꞋna nehue. Ani kanomoga itakamoꞋma okateneleꞋasina kanale hileꞋasine.” huno hie. 25 Higeno YutasiꞋa agesiꞋma hisia kanomoꞋa mage huno hie “Hu-lave-nelina kanomogae nagaife nehano?” huno higeno YisasiꞋa mage huno hapaiye “Kagaya kagaika ago hu-falote nehane.” huno hu-maine.

YisasiꞋa kai-hameꞋene nofi alagamo tiꞋene anagaꞋa amamine.

26 Kavela nenageno YisasiꞋa kai-hame kana maya alino nunamu huno muse huteno kolite kolite huno agaiꞋaenema tokaeꞋya nemaiya anagala neꞋamamino mage huno hie “Mamona nagaiꞋni naugafagi alitama neho.” huno hie. 27 Nagola vaini nofi alagamo ti* hanea keꞋayola aliteno nunamu huno muse huteno amamite amamite nehuno mage huno hie “MukiꞋamogatama neho. 28 Ma lina nagaiꞋa kolaniꞋae. NahaesageꞋna falisugeno kolaniꞋamoꞋa tamakaifene huno take take hu-lavisiafe haegafa kea, Anumaya KotiꞋene hagelafitama maisaya kea* ali fatago hugahianagino Anumaya KotiꞋa ani kolatetifene huno kasagoꞋya veaꞋmogami kefo yaꞋamia aige-ama-teno atale-ma-tegahie. 29 Nagaya tamaha-nepauve menia nagaya vaini nofi alagamo tina* nagoꞋene onegahuanagiꞋna NenafaꞋa kava yagai-mainea kumate umaineꞋna haegafa nofi alagamo tina* eteꞋna tamakaiꞋene tokaeꞋna maineꞋna negahue.” huno hie. 30 HigeꞋya nagola yagamea huteꞋya Olivi yosa hanea agoꞋyafi hai-mainae.

YisasiꞋa Pitafe “KakaveꞋno hu-na-tegane.” huno hie.

31 YisasiꞋa mage huno hama-paiye “Tamakaya mukiꞋamogatama meni kegela nagaiꞋma hu-na-tesaya kavafena nagaifema havitama tamakupi maletama tamametiti nehaya yana ataletama asaga hu-lavisagi nayona ani yafena mage huno kae-maleneane

‘Nagaya sipi sipi kava kanoa haesugeꞋya sipi sipiyaga atagufeꞋya faleꞋya ute ete hugahae.’ huno kae-maleneane.
32 Kae-maleneanagi fali-mainesufiti Anumaya KotiꞋa alino he-ti-na-tesigeꞋna Kalili uhagote-lama-teꞋna ugahue.” huno hie. 33 Higeno PitaꞋa kenonaꞋa mage huno hie “Hu-ga-tesaya yafema mukiꞋa anagaꞋmoꞋya kagaifema haviꞋya amakupi maleꞋya amametiti nehaya yama ataleꞋyama falesageꞋnahena nagaya mukiꞋa kanafina kataleꞋna ofalegahue.” huno hie. 34 Higeno YisasiꞋa kenonaꞋa mage huno hie “Pitaga tamage kaha-nepauve meni kegela kokolemoꞋa agea oꞋainesigeka tagufa (3) kanale ‘Nagaya oꞋagenoa kanoeꞋ huka avane hugane.” huno hie. 35 Higeno PitaꞋa mage huno hie “KagaiꞋene nahaesageꞋna faligahuanagiꞋna kagai kagia avanena huꞋna ali fala okigahue.” huno higeꞋya mukiꞋa agaiꞋaenema tokaeꞋya nemaiya anagaꞋmoꞋya nagoke kegeꞋya hu-mainae.

YisasiꞋa Ketesemani hoyafi nunamu mo hu-maine.

36 YisasiꞋa amakaiꞋene viaꞋamo Ketesemani uvaꞋyi huteꞋya YisasiꞋa agaiꞋaenema tokaeꞋya nemaiya anagafena mage huno hie “Tamakaya male maineho. Nagaya amule visuaꞋamoꞋna nunamuna huꞋna havigegahue.” huno hie. 37 PitaꞋene Sepeti nafaꞋnetalaꞋene amavaleno viana aipamoꞋa kanaꞋage higeno haumanamoꞋa halegeno kasageke nehie. 38 Huteno mage huno hama-paiye “Nahau nayamopamoꞋa tusiꞋa kanaꞋage nehigeꞋna ago falisua kava nehugi male mainetama kava yagaitama maineho.” huno hie. 39 OsiꞋa viaꞋamo Anumayamotega ke huno havigegahe mopafi agoꞋya moyeno maineno nunamuna mage huno havige “Nagaya ago falisua kava nehugeno ani havi kanamoꞋa satuꞋage hu-mainea tima hanea keꞋayola kahaisigekahena ani keꞋayola naha-fale-talo. Nagai nagu nagesa akave omaleka afaꞋa kahaisia yana huo.” huno havige.

40 Havigeteno momakeana agaiꞋaenema tokaeꞋya nemaiya anagaꞋmoꞋya faeꞋya mainageno Pitafena mage huno mo hie “Vae kagaya aupa yage kanoꞋa kava oꞋyagaika mainano? 41 SataniꞋa aye-lama-vataga hisigeno tamakuꞋamoꞋa ‘Ohugahue.’ huno tokiyaꞋage hugahianagi amega tamaugafamoꞋa tokiyaꞋa afaꞋa omaleneanagino ‘Hugahue.’ huno hisia yana hugahigi Satani kema ohavisaya yafena kava yagaitama mainetama Anumayamotega ke hutama havigeho.” huno hama-paiye.

42 Huteno amataleno viaꞋamo tole (2) kanale nagoꞋene nunamuna mage huno havige “Nenafagae nagaya falisua kava hugeno ani havi kanamoꞋa satuꞋage hu-mainea tima hanea keꞋayola kahaisigekahena ani keꞋayola naha-fale-talo huꞋna nehuanagi afaꞋa kahaisia yana huo.” huno havige. 43 Havigeteno eteno momakeana amau tokotoko higeꞋya faeꞋya mainae.

44 FaeꞋya mainageno tagufa (3) kanale nunamuna nagoꞋene ani avamete huno havige-maine. 45 Havigeteno YisasiꞋa agaiꞋaenema tokaeꞋya nemaiya anagate eteno mage huno mo hama-vige “Mai-falu hutamage faetama mainao? Haviho kanaꞋniꞋa ago falote nehie. Nagaya ikapinagati emainoa kanoa vayaꞋmo natenea nafaꞋnemonia nagesi huno navaleno kefo yama nehaya vayaꞋmogami amayapi natesigeꞋya nahaegahe nehae. 46 MukiꞋamogatama hetitama vigetao. Ageho nagesi huno nahaesia kanoa ago neꞋegi vigeta mogamano.” huno hu-maine.

YutasiꞋa Yisasina avaleno kame vaya amayapi atene.

47 Ani kea nehigeno YutasiꞋa tuelufuꞋa (12) anagaꞋaene tokaeno nemaiya kanomoꞋa evaꞋyi higeꞋya agaiꞋene mukiꞋa vayala, mono note kava vayaꞋene nagoꞋa Yuta vayatamaenema hu-matea vayaꞋenena, ayaꞋaya naepege naepege huꞋya muki kaꞋyoꞋene aliꞋya emainae. 48 Agesi huno Yisasima haesaya avame yama huno amavalea kanomoꞋa ani vayafena mage huno hama-paiye “AtakoꞋma hisua kanoa haesaya kano mainegi atafa hutama tokiyaꞋage hutama avaletama viho.” huno hama-paiye. 49 Hama-paiteno YutasiꞋa aupaꞋa Yisasite viaꞋamo mage hie “Hulave-nelina kanomogae.” nehuno atako hu-maine. 50 Atako higeno YisasiꞋa mage huno hie “Nenafugae hugahema esana yana aupaꞋa huo.” huno higeꞋya ani vayaꞋmoꞋya Yisasina atafa huꞋya aye-talako hu-mainae. 51 Atafa nehageno nagola agaiꞋaenema he-ti-maiya kanomoꞋa ayaꞋaya naepeꞋa he-vayu huno ala mono noteꞋma uhagote mainea kava kanomona aliꞋya kanoꞋamona agesa ai-fakali-talegeno asaga hu-lavi-maine. 52 Ai-fakali-talegeno YisasiꞋa ani kanomofena mage huno hie “AyaꞋaya naepekaꞋa tafugepi eteka vaiyo. AyaꞋaya naepeleti tu hisaya vayaꞋmoꞋya ayaꞋaya naepeleti hamaesageꞋya faligahae. 53 Kagaya ohavinano? Nagaya Nenafategama ke huꞋna havigesuana seveti tauseniꞋa (70,000) ensole vayaꞋa nahauke heꞋya tuma hisaya yafena hu-ma-tesigeꞋya egahae. 54 Egahayanagi naꞋama hisagenoꞋa hanaꞋa huno nagaifena ‘NaꞋa kavala hu-tesageno faligahiema.’ huꞋya Anumaya Koti avopima kae-malenaya kemoꞋa falote huno tamagea hugahie?” huno havige.

55 AnileꞋma melitalu hu-maiya vayafena YisasiꞋa mage huno hie “Tamakaya nagaifena ‘Vaya hamaeno musufaya nehia kano maine.’ hutama ayaꞋaya naepene muki kaꞋyoꞋene alitama natafa hugahena neꞋao? Nagaya mukiꞋa kanafina efi efi huꞋna tamakaiꞋene ala mono nopina maineꞋna mono kea tamaha-pauvanagi naꞋa higetama natafa ohunayane? 56 Ohunayanagi nayoma mainaya amaune vayaꞋmoꞋya kae-malenaya kemoꞋa falote huno tamage hisia yafe mukiꞋa mani kavala hutama natafa nehae.” huno hie.

HigeꞋya mukiꞋa agaiꞋaenema tokaeꞋya nemaiya anagala neꞋataleꞋya fale haꞋno hu-mainae.

Yisasina kaiyeke hu-tenae.

57 Yisasima atafa haya vayaꞋmoꞋya avaleꞋya ala mono note uhagote-mainea kava kanomo* note, Kaiyafasi note, avaleꞋya vageꞋya kahegi kema havilinaya anagaꞋene Yuta vayatamaene alitalu huꞋya mainae. 58 PitaꞋa akave anatino vianagi avatela oꞋunegi ago aluꞋale umaineno ala mono note hagote kava kanomo nomo haupale uvaꞋyi huno hai-faleno maineno ati vayaꞋene mopale maineno “Yisasina hu-tesaya yana agesue.” huno umaine. 59 Mono note kava vayaꞋene mukiꞋa kanisole vayaꞋene YisasiꞋma haesaya kaiyeke hu-tegahe nagoꞋa vaya “Kefo kava higeta age-mainone.” huꞋya havige hu-tesaya vayafe ati-ye-mainae. 60 Atiyayana omaigeꞋya kasagoꞋya vayaꞋmoꞋya havige huꞋya Yisasifena huteꞋya haenaga tole kanolatana he-tiꞋana Yisasifena mage huꞋana haꞋe “Ma kanomoꞋa mage huno hu-maine ‘Nagaya Anumaya Kotina ala mono nomaꞋa aliꞋna lagape ai-taleꞋna tagufa (3) kanale ani nona eteꞋna ki-talegahue.’ huno hu-maine.” huꞋana haꞋe.

62 HaꞋageno ala mono note hagote kava kanomoꞋa heti-maineno Yisasina mage huno havige “Kagaifena na augafa kea nehae? Kaiyekema hu-ga-taꞋa kemo anonaꞋania hu-falote huka nohane?” huno havige. 63 Higeno YisasiꞋa avaya tukino ke ohuno maineno nago ke kanoꞋa ohune. Ohigeno ala mono note hagote kava kanomoꞋa eteno mage huno havige “HaimuꞋaene Anumaya Koti aufima kaha-vi-goa kea tamage huka taha-paiyo. Kagaya Anumaya KotiꞋa taugafa ali-gatigahema hu-ga-tenea kanoa, Kalaisiga, mainano? Kagaya Anumaya Kotina nafaꞋneꞋamoga mainano?” huno havige. 64 Havigegeno YisasiꞋa hu-falote huno mage huno hie “E, kagaya ani kema hanana hai nehane. Tamage ani kano mainoe. Tamaha-nepauve tamakaya haenaga ikapinagati emainoa kanoa vayaꞋmo natenea kanomoꞋna tusiꞋa himamuꞋa hanea Anumaya Kotina aya tamaga kaiyaga hanea siale maineꞋna ikate hanea siate esugetama nagegahae.” huno hie. 65 Higeno ala mono note hagote kava kanomoꞋa ani kea haviteno aipamoꞋa tokiyaꞋage higeno kenaꞋa alino hatata nehuno mage huno hie “Anumaya Kotife hu-haviya hu-neꞋatea kea hai havunanagiꞋya nagoꞋa vayaꞋmoꞋya kaiyekea hu-oꞋatesae. Tamakaya Anumaya Kotife hu-haviya hu-neꞋatea kea ago haviye. 66 Hai havunagi na tamakesa nehaviye?” huno higeꞋya mage hae “AnonaꞋa alisia yafe haesageno falisie.” huꞋya hae.

67 HuteꞋya nagoꞋa vayaꞋmoꞋya Yisasi augosafi amavetuꞋna he-neꞋateꞋya amayateti aiko-ligeꞋya nagoꞋamoꞋya amayana ali atale-lineꞋya aiko neliꞋya mage huꞋya havigae “Kalaisigae kaune laga huka taha-paiyo taꞋya negahayae?” huꞋya havigae.

PitaꞋa Yisasifena avane huno “Nagaya noꞋagoa kano maine.” huno nehie.

69 PitaꞋa nomo haupalega mopale mainegeno nago aliꞋya munaꞋmoꞋa eaꞋamo Pitafe mage huno hie “Kagaya Kalili YisasiꞋene tokaeka nemaina kano mainane.” huno hie. 70 Higeno PitaꞋa avane huno mukiꞋa vaya amaufi “AꞋao, ani kanoa oꞋagenoa kanohe maika nehane.” huno hu-maine. 71 Huteno fiatega umainegeno nago aliꞋya munaꞋmoꞋa megeteno anile he-ti-mainaya vayafe mage huno hie “Mani kanoa Nasaleti YisasiꞋene vai-neꞋayea kanoe.” huno hie. 72 Higeno PitaꞋa nagoꞋene eteno “AꞋao Anumayamo aufi tamage nehue oꞋagenoa kanomofe nehane.” huno hie. 73 OsiꞋa mainegeꞋya anile he-ti-maiya vayaꞋmoꞋya Pitafena mage huꞋya me hae “Tamage kagaya Kalili kano mainananagika kavefuꞋna ali-yahae higeka kema nehana yana tave-linageta havune agai anagapi kano mainane.” huꞋya hae. 74 Hageno PitaꞋa mage huno hie “Nagaya tamakema ohisugenoꞋa Anumaya KotiꞋa nahaesie. Anumaya Koti aulagafi tamage huꞋna tamaha-nepauve tamakayama nehaya kanoa nagaya oꞋagenoa kanoe.” huno nehigeno kokolemoꞋa age ai-maine. 75 Agea aigeno Pitana agesamoꞋa aikalo higeno YisasiꞋma hapaigeno havi-mainea kea mage huno hu-maineane “KokolemoꞋa agea oꞋainesigeka kagaya tagufa (3) kanale avane huka nagaifena ali fala-kigane.” huno hu-mainea kemoꞋa Pitana agesamoꞋa aikalo higeno haviteno hati-lavino viaꞋamo tusiꞋa avi mo-te-maine.

Copyright information for `KMU