Matthew 5

YisasiꞋa agoꞋyafi maineno mono kea hu-haleno hu-maine.

YisasiꞋa mukiꞋa alitalu hu-mainaya veaꞋnea amaketeno agoꞋyafi haino mopale mainegeꞋya agaiꞋenema tokaeꞋya nemaiya anagaꞋmoꞋya Yisasitega emainae. Ageno YisasiꞋa avayafiti mage huno hie.

MukiꞋa yaꞋamima omalenea veaꞋmoꞋya “Tagupi nagoꞋa kanale yana omaleanagita tagaitia kanale kavala ohugahunagi Anumaya KotiꞋa taya hisie.” huꞋya hisaya veaꞋmogamina Anumaya KotiꞋa amakaila kava yagai-ma-tegahigi ani yafena muse hutama maiho.

Hamaumana halesigeꞋya hamau huꞋya nemaisaya veaꞋmoꞋya Anumaya KotiꞋa amaya huno amaipa falu hisia yana amamisia yafena muse huꞋya maisae.

Amaugafama aliꞋya nohaiya veaꞋmogamina Anumaya KotiꞋa haenagaꞋa mukiꞋa mopa amamisia yafena muse huꞋya maisae.

Anumaya KotiꞋa fatago hu-mainea kavafena “Nelahaigeno ani yafena laga nele.” huꞋya hisaya veaꞋmoꞋya Anumaya KotiꞋa amamu hisigeꞋya maisaya fatago kavaꞋma amamisia yafe muse huꞋya maisae.

MukiꞋa veaꞋmoꞋya nagoꞋa neꞋamafugamife kalagi ai-mateꞋya hamau hu-neꞋamatesaya veaꞋmogamina Anumaya KotiꞋa aniꞋa huno kalagi aino hauna hu-matesia yafena huꞋya maisae.

MukiꞋa veaꞋmoꞋya Anumaya Koti kema akave malesaya yafena tole amakesama ohavinaya veaꞋmoꞋya Anumaya Kotima agesaya yafena muse huꞋya maisae.

NeꞋamafugamifena “Nagoke tamaku tamakesale maiho.” huꞋya nehisaya veaꞋmogamina Anumaya KotiꞋa “Nagai nafaꞋneyaga mainae.” huno hu-matesia yafena muse huꞋya maisae.

10 NagoꞋa veaꞋmoꞋya fatagoma huꞋya mainesageꞋya nagoꞋa veaꞋmoꞋya amaipa kafa he-mateꞋya ali-haviyama hu-ma-tesageꞋya maisayana Anumaya KotiꞋa amakaiꞋma kava yagai-ma-tenea yafena muse huꞋya maisae.

11 Tamakaya nakaveꞋma nemalageꞋya tamaketeꞋya kamuge hu-lama-teꞋya ali-haviya hu-nela-mateꞋya “Ma kavala havi kava nehae.” huꞋya havigema hu-lama-tesagetama afaꞋa muse nehutama maiho. 12 AniꞋama hu-lama-taya kavala nayona Anumaya Koti amaune vayaꞋmogamina aniꞋa hu-ma-tenayane. Ani kavaꞋma hu-lama-tesaya kanafina ikapinaga anonaꞋa kasagoꞋya yaꞋyaga alisaya yafena tamaipamoꞋa kanale nehinagetama muse hiho.

Tamakaya sole kana hutetama kaꞋni kana hu-mainae.

13 Tamakaya ma mopale veaꞋmogamina hagama nehamaiya sole kana hutama mainae. SolemoꞋa hagama nehia yamaꞋama haꞋno hisigetama hanaꞋa hutama hagama nehia yamaꞋa ali falote hugahae? Hagama nehia yamaꞋamoꞋa ago yagu yaguma hisiana afa ya kana hinageꞋya ani Solea veaꞋmoꞋya faitega ai-tagu-fe-talesageꞋya amaiyaleti ute ete huꞋya aye-lata-pegahae.

14 Tamakaya mukiꞋa ma mopama hanea kotega kaꞋni kana veaꞋne mainae. Ala kumaꞋma agoꞋyafima hanesiana fala okigahianagiꞋya mukiꞋa veaꞋmoꞋya agegahae. 15 NagoꞋa veaꞋmoꞋya lamua hanagaliꞋya susufanefinaga aiso hu-nomalagi nopinaga aye-halesigeꞋya veaꞋmoꞋya agesayafe ani lamua sipale nemalae. 16 NaꞋa hu-mainegi tamakaya ani kava hutama lamumoꞋa aye-hale-ma-tea kava hutama Yisasi kea hama-paitama kanale kavala veaꞋmogami amaule hisageꞋya ageteꞋya ikapinaga mainea Nelamafa agia alisaga hugahae.

Anumaya Koti kahegi kemo kea.

17 Tamakaya ma lamakesa ohaviho “Nayona Mosese kahegi kene amaune vayamoꞋya hu-mainaya kene YisasiꞋa ali-talegahe emaine.” hutama ohiho. Nagaya ani yaꞋyaga aliꞋna oꞋatalegahugi ani kea ali falote hisugetama “Tamage nehie.” hutama hisayafe emainoe. 18 Nagaya tamagelafa huꞋna tamaha-nepauve ma mopaene ikaꞋene fanane hugaꞋanagi kahegi kefi mukiꞋa osi osi oꞋagemo avoꞋyaga afaꞋa hanegahie. Nagoke ya kanoꞋagela fanane ohugahigi mukiꞋama hu-mainaya kemoꞋa falote huno tamage-lafa hugahie. 19 Tamage-lafa hu-mainayafe nagoꞋa veaꞋmoꞋya ani kahegi kea osi kanoꞋa “Akavela omalegahunema.” huꞋya alu veaꞋmogamife “AniꞋa hiho.” huꞋya hisaya veaꞋmoꞋya Anumaya KotiꞋa kava yagai-mainea kumatela osi nafaꞋne kana veaꞋne maigahagi nagoꞋa veaꞋmoꞋya mukiꞋa kahegi kema ali hipoꞋya huꞋya “Ma kava hiho.” huꞋya hama-paisayana Anumaya KotiꞋa kava yagai-mainea kumatela ala huno agase-mainea amakiene veaꞋne maigahae. 20 Nagaya tamagelafa huꞋna tamaha-nepauve Falasia* vayaꞋene kahegi kema havilinaya anagaꞋene hu-mainaya fatago kavala tamakaya agasetama tusiꞋa kanale hu-mainea fatago kavaꞋma ohisayana amuha ohunayanagino tokiyatamia omaleneanagitama Anumaya KotiꞋa kava yagai-mainea kumatela haitama omaigahae.

YisasiꞋa nagoke amaipa hisaya kemofe hu-maine.

21 Tamakaya ago havilinae nayoma mainaya veaꞋmogamina mage huꞋya hama-pai-mainayane “Veala hamaetama fali-oꞋamateho. VeaꞋma haemaetama fali-matesayana kaiyeke hu-lama-tegahae.” huꞋya hu-mainayane. 22 Nagi nagaya menia tamaha-nepauve nagoꞋa veaꞋmoꞋya neꞋamafufema amaipa kafa hetesayana Anumaya KotiꞋa kaiyeke hu-ma-tegahie. NagoꞋa veaꞋmoꞋya neꞋamafufema “Havi kavakeꞋya nehana kano mainane.” huꞋya hisayana ala kaiyekele he-tigahae. NagoꞋa veaꞋmoꞋya neꞋamafufema “Kagaya aifoꞋnafo kano mainane.” huꞋya hisayana hani yapima tegelege nehia atafi ugahae. 23 NaꞋa nehaya yafe tamakaya Anumaya Kotina nago yama amigahena mono nopi haitama mainetama “Veha nenafuna haviya hu-tenoanagino aipamoꞋa haviya nehie.” huka kagesa haviteka Anumaya Kotina amisana yana anile neꞋataleka negafutega tanaipa mo-li-falu hutetana eteka esanaꞋamoga amisana yana Anumaya Kotina memio.

25 Nago kanomoꞋa “Havi kava huna-tananagiꞋna kaiyekea hu-gategahe nehue.” huno kavalenoꞋma vinagetana neꞋutana “Nenafuga kaipa falu hisia yana kamigahue.” huka hapaiyo. AniꞋa ohisanana kavaleno kaiyekema hu-gatesia kanomote vinageno haviteno ati kanomo ayapi katesigeno kavaleno nofila mo hu-gategahie. 26 Nofila mo hu-gategahigi tamage tamaha-nepauve kaiyekema hu-gatenea kanomoꞋma “Mone namio.” huno hu-mainesia monema oꞋaminesanana nofipitila ataleka omegane huno hu-maine.

YisasiꞋa kumai he yafe hu-maine.

27 Tamakaya nayo kea ago havimainae mage huno hu-maineane “Kumai he kavala ohiho.” huno hu-maineane. 28 Nage hu-maineanagi nagaya menia tamaha-nepauve nagoꞋa veaꞋmoꞋya nago aꞋmona aulagafiti age haꞋye huno “Ani aꞋmofena naꞋa hu-ga-tegahue.” huno aguꞋafinaga havino haꞋyema hiana ani atela ago kumai kava hu-maine. 29 Tamaga kaiyaga tamaulagamoꞋma agea yafema kefo kavaꞋma hisaya tamaku tamakesa tamamisigetama ani tamaulaga ali faꞋyitama atalesagenoꞋa nago tamaugafa atupaꞋa omalenea yafe kanaleꞋya hutama maigahae. AniꞋama ohinutamahena muki tamaugafa hanimo aguꞋafi tegelege nehia atafi hagaꞋyu hu-lama-talegahie. 30 Tamaga tamayaꞋmoꞋma tamavayu huno kefo kava hisaya tamaku tamakesama tamamisigetama ani tamayana he-fakalitama ataleho. NaꞋafene? Nago tamaugafa atupaꞋa omalenea yafe kanaleꞋya hutama maigahae. AniꞋama ohinutamahena muki tamaugafa hanimo aguꞋafi tegelege nehia atafi hagaꞋyu hu-lama-talegahie.

YisasiꞋa aꞋnema amatalesaya yafe hu-maine.

31 Nayona mani kea hagetama havimainae. “NagoꞋa vayaꞋmoꞋyama aꞋamima hu-tesayana ani vayaꞋmoꞋya aꞋamimofena ‘Ago hu-negatoe.’ huno avona kaeno amino.” huno hu-maineane. 32 Hu-maineanagi nagaya menia tamaha-nepauve aꞋamoꞋma kumai ohenesigeno anauꞋamoꞋma atalesigeno ani aꞋmona alino kumai nehia a kana hu-tene. Nago kanomoꞋa anima atalenea aꞋma aliteana ani kanomoꞋene kumai he yana nehie.

Anumayamo aufi “Tamage nehue.” hutama ohiho.

33 Nago kea nayoma hama-pai-mainaya kea ago havimainagi naꞋa hu-maine “Kagaya ‘Anumayamo aufina tamage nehuanagiꞋna naꞋa hugahue.’ huka hisanana fatago huka ani kavala huo.” huno hu-maineane. 34 Hu-maineanagi nagaya tamaha-nepauve tamakaya “Anumaya Koti aufina tamage nehue.” hutama ohiho. Tamakaya “Ikamo agile tamage nehue.” hutama ohiho. Ikapinaga Anumaya KotiꞋa kava yagai-mainea kuma hanegetama agaife nehae. 35 Tamakaya “Mopamo agile tamage nehue.” hutama ohiho. Ani mopalega Anumaya KotiꞋa aiya haꞋyo hu-maleno mainea mopa hane. Tamakaya “Yelusalemu kumaꞋmo agle tamage nehue.” hutama ohiho. Ani Yelusalemu kumala ala sauvetimoꞋa Anumaya Koti kava yagai-mainea kuma hane. 36 Tamakaya “Nanuteti huꞋna lamage nehue.” hutama ohiho. Tamakaya tamayolagefahena “Anupa nayolegefaene tuhi nayolegefaene falote hino.” hutama hisaya tokiyatamia omalegi ani kea ohiho. 37 “E,” hinutamahena ani keꞋage hiho. “AꞋao.” hinutamahena ani keꞋage hiho. Nago kenema hisayana Kefo AvamuꞋmoꞋa ani kea ali falote nehie.

Havi kava hu-lama-tesaya veaꞋmogamina anonaꞋamia hu-oꞋamateho.

38 Nayona mani kea hagetama ago havimainagi “Nago kanomoꞋa kaulagama ai-lagatisigekahena ani kanomo aulaga anonaꞋa ai-lagatio. KaveꞋma ai-halalima hisigekahena anonaꞋa agaila aniꞋa huka avela ai-halali huo.” huno hu-maineane. 39 Hu-maineanagi nagaya tamaha-nepauve nago kanomoꞋa havi kavaꞋma hu-ga-tesigekahena kaꞋyona oꞋamio. Nago kanomoꞋa kagalamesaleꞋma kaiko-lisigekahena nago kaiyagakaꞋa mai-yahae hugeno kaiko-lino. 40 Nago kanomoꞋma “Haviya hu-natea kanoe.” huno kaiyekema hu-gateno “AnonaꞋa kagaiꞋa siota namio.” huno hisigekahena ala yasi siotakaene amio. 41 Nago kava kanomoꞋa tokiyaꞋage ke huno “AfenoꞋyaniꞋa nago kilomita alika vuo.” huno hisigekahena ani kilomita mogaseka nagoꞋene tole kilomita alika vuo. 42 Nago kanomoꞋma “Nago yaka namio.” hunoꞋma hisigekahena afaꞋa hagaꞋyu huka amio. Nago kanomoꞋma “NamisanageꞋna yoka aliteꞋna eteꞋna kamigahugi namio.” huno hisigekahena afaꞋa amio.

YisasiꞋa “Kame vayatamihena tamahaino.” huno hu-maine.

43 Nayoma hama-pai-mainaya kemoꞋa ago havimainagi “Kumatamile mainesaya nelama-fugamifena tamahau tamayamopafi tamahainagetama kame vayatamihena tamaipa kafa he-mateho.” huꞋya hu-mainayane. 44 Hu-mainayanagi nagaya menia tamaha-nepauve “Kame veatamimofena tamahau tamayamopafi tamahaino. Haviya hu-nelamataya veaꞋmogamina ‘Amaya huo.’ hutama Anumayamotega havigo.” 45 Ani kavaꞋma hisayana ikapinaga mainea Nelamafana nafaꞋneꞋa maigahae. Anumaya KotiꞋa kanale veaꞋneleꞋene havi veaꞋneleꞋene yagemona hu-tegeno nago avamete huno aye-hale-matene. Anumaya KotiꞋa fatago nehaya veaꞋneleꞋene havi kava nehaya veaꞋneleꞋene kola hu-tegeno nago avamete huno kola neꞋaiye. 46 VeaꞋmoꞋya tamakaifema hamau amayamopafi neha-mainagetamahena tamakaya aniꞋa hutama amakaifema tamahaisiana ani kavamoꞋa afa yanagino anonatamia oꞋaligahae. Kefo kava nehuꞋya amaugafaleti takisi mone neꞋaliya vayaꞋmoꞋya aniꞋa kavala nehae. 47 NelamafuꞋenekeꞋyama kea kea nehisaya yana afa yanagi. Yisasi ke ohavinaya veaꞋmoꞋya aniꞋa kavala nehae. Kame vayatamimoꞋene kea kea hiho. 48 Ikapinaga NelamafaꞋa ala huno kanale kavakeꞋya hu-maineanagitama tamakaya aniꞋa augafa veaꞋne mainetama ala hutama kanale kavakeꞋya nehutama maiho.

Copyright information for `KMU