Revelation of John 3

Satisi maineꞋya mono note neꞋvaya veatega ma kemoꞋa umaine.

Satisi maineꞋya mono note neꞋvaya veate kava kanohena* mage huka kao nagaya seveniꞋa (7) Anumayamo AvamuꞋene seveniꞋa (7) kaꞋnefiꞋyagaene nayapina atafa hulinoa kanomoꞋna mani kea tamahanepauve “Nagaya tamakai auꞋava yatamia ago tamake-mainoanagiꞋya veaꞋmoꞋya tamakaifena ‘Agola maige maige hisaya hamaimu hanea veale.’ huꞋya nehayanagi tamakaya nagai kema atalaya yafena ago fali-mainae. Faligahe hayanagi tamauꞋma fae-maiya yana neꞋataletama hetitama kanale auꞋava yatamia ali lokiya vaiho. Nagaya agoana auꞋava yatamimoꞋa AnumayaniꞋamo aufina fatago ohunae. Ohuneanagitama agoꞋma havi-mainaya mono kehena tamakesamoꞋa hao hinagetama akave maletama kefo yatamihena tamakuꞋa aiyahae hiho. Fae-mainesaletiꞋma he otisayana nagaya ‘Omegahie.’ hutama hisaya kanafi musufa vaya kana huꞋna esuaꞋamoꞋna kefo yamo anonatamia me lamamigahue. Me lamamigahuanagi nagoꞋa Satisi mainaya veaꞋmoꞋya kanaleꞋya hageno amakuꞋamoꞋa oniꞋyaꞋagela ohunea veaꞋne mainayanagiꞋya efeꞋage kenaꞋamia faimatesugeꞋya amatesia kava huꞋya nagaiꞋene ailokaeꞋya vaiyegahae. Vai neꞋayesageꞋna SataniꞋene tuma huꞋya agase-mainaya veala efeꞋage kena faimategahue. Maige maige hisaya hamaimu hanesia veaꞋmogami amakima kae-malenoa avopi ani veaꞋmogami amakia haneanagiꞋna aye ohananegahuanagiꞋna amakai amakia Nenafa auleꞋene ensole vea amauleꞋene huhaleꞋna hugahue.”

Nagi tamakesama hanesimoga-tama AvamuꞋmoꞋa mono note neꞋvaya veaꞋmogamifema hia kea haviho.

Filatelafia maineꞋya mono note neꞋvaya veatega ma kemoꞋa umaine.

Filatelafia maineꞋya mono note neꞋvaya veate kava kanohena* mage huka kao nagaya Anumaya KotiꞋna alu aotage kanogiꞋna tamagelafa nehue. TevitiꞋma kava yagai-mainea ki nofila nagaya ago aliꞋna fita yaki-malenoanagino nago kanomoꞋa eteno alino fita okigahie. Nagaya fita ago aliꞋnama ki-malesugenoꞋa nago kanomoꞋa alino oꞋyakigahie. Nagaya mage nehue tamakai auꞋava yatamia ago age-mainoe. Ageho tamakai tamaufina fita ago yaki-malogeno visaya fiamoꞋa hane. AgoꞋma yaki-malenoa fita nago kanomoꞋa eteno alino okigahie. Tamakaya osi kanoꞋa tokiyatamia hanegetama nagai kea akave nemaletama nagai nagia ali fala okigeꞋna age-mainoe. Haviho nagoꞋa veaꞋmoꞋya mage nehae “Isaleli veaꞋne mainone.” huꞋya havigea nehayanagi Satani veaꞋne mainayanagiꞋna nagaya amakaila aliꞋna tamaiyafinaga amatesugeꞋya “Ago tagase.” huꞋya ape humaineꞋya nagaya tamakaifema nayamopafima nenahaiya yana amavelisugeꞋya agegahae. 10 “Kana yapina tokiyaꞋage hutama mailava hutama maiho.” huꞋnama hu-mainoa kea ago akave malenagi mukiꞋa ma mopafi veaꞋmogamina avameꞋma humatesua yapina tusiꞋa kana yamo falote hugahianagiꞋna tamau vaisugetama tamakaya ani yapina omaigahae. 11 Nagaya naiyayeꞋna aupaꞋa egahugi. Atafa hulinaya kea atafa hutalako hulisayana nagoꞋa veaꞋmoꞋya tamamisua kanale yana tamahaofalegahae. 12 Atafa hulineꞋya SataniꞋenema tuma huꞋya agase-mainaya veaꞋmoꞋya no yosamo avamete kana hageꞋna Anumayamo mono nopi ayeꞋna ali hetimatesugeꞋya maigahayanagiꞋya eteꞋya oꞋutafa huꞋya oꞋugahayanagiꞋna amaugafale AnumayaniꞋamo agiene AnumayaniꞋamona ikapinagati esia kumaꞋmo agia, haegafa Yelusalemu kumaꞋmo agiene nagaila haegafa nagiene amaugafale kaemategahue.

13 Nagi tamakesama hanesimogatama AvamuꞋmoꞋa mono note neꞋvaya veaꞋmogamifema hia kea haviho.

Leotisia maineꞋya mono note neꞋvaya veatega ma kemoꞋa umaine.

14 Leotisia maineꞋya mono note neꞋvaya veate kava kanohena* mage huka kao nagaya kelamage kemona aepaꞋa maineꞋna efi efi huꞋna mukiꞋa kanafina kea huhaleꞋna nehue. Nagaya mukiꞋa Anumaya KotiꞋa eheꞋma taloma humalenea yamona aepaꞋa mainoanagiꞋna mani kea mage huꞋna tamahanepauve. 15 Nagaya tamakai auꞋava yatamia ago age-mainoe. Nagai kemona tamakaveꞋnona ohunayanagi tamakupina yasiꞋage humainegeno amukoa nohie. Nagai kemoꞋa tamakupina amukoꞋageꞋma hu-maineleꞋasina musena huleꞋasinagi nagai kea osiꞋa tamakupina malenageno muvalisua naipa nehigeꞋna nagaitegatila tamavaleꞋna hagaꞋyu hu-lamatalesua nagesa nehie. 17 Tamakaya mage hutama nehae “KasagoꞋya afenoꞋyatia hai ali-mainone. Nago ya kanoꞋahena aupa nohune.” hutama nehayanagi tamakaya havige nehagi haviyatafa hutama mainayanagiꞋya veaꞋmoꞋya tamakeꞋya kalagi ai-lama-tesaya avamete hutama mukiꞋa yafena aupa hutama mainageno tamaulagamoꞋa asu hu-mainegetama tamaugafa alapaꞋage veaꞋne kana hutama mainaya yafena tamakaitamia noꞋagae. 18 NaꞋa humaineafe mani kea tamahanepauve mone afenoꞋene veaꞋnema maisayafena nagaitegati kanileta yafana, atafi kae-malenaya yafana me miya hiho. Tamaugafa alapaꞋage mainageno tamakaye hisia yama aiso hisayafe efeꞋage kena me miya hutama failiho. Tamaulagafima falesaya masavena tamamisugetama falesageno tamaulagamoꞋa kanale hinagetama agegahae. Ani yaꞋyaga nagaiteti me miya hiho. 19 Nagaya nayamopafima nahaiya veaꞋmoꞋya nagai kema haviꞋya akave malesaya yafena kaꞋyo kevea neꞋamamuafe aluya hutama lamakesa nehavitama kefo yatamihena tamakuꞋa aiyahae hutama “NagoꞋene ohugahune.” hutama hiho. 20 Ageho nagaya fiate heti-maineꞋna tamakaifena kea nehuanagitama ani kema nagoke nagokeꞋmogatama havitetama fitama yaki-natesayana haifaleꞋna tamakaiꞋene tokaeta maineta kavela negahune. 21 NagoꞋa veaꞋmoꞋya SataniꞋene tuma huꞋya agasesaya veafena mage huꞋna humategahue “Nagaya SataniꞋenena tua huꞋna agaseteꞋna NenafaꞋma kava yagai-mainea sialela agaiꞋene me lokaeꞋna mainoa avamete hutama nagaiꞋene kava yagaigahae.” huꞋna humategahue.

22 Nagi tamakesama hanesimoga-tama AvamuꞋmoꞋa mono note neꞋvaya veafema hia kea haviho.

Copyright information for `KMU