Revelation of John 4

Ikapinaga maineꞋya Anumaya Koti agia alisaga nehae.

YoniꞋa mage huno hie ani kemoꞋa haꞋnoma higeꞋna agoana ikapina nago fita yaki-malenea fiana age-mainoe. NeꞋagogeno hagoteꞋnama ufema nehia augafa agema aigeꞋna havua augafa kea nagoꞋene havuana mage huno hie “Male ehaigeꞋna mukiꞋa yama anileꞋma falote hisia yana kavelino.” huno hie. Higeno aupaꞋa Anumaya Koti AvamuꞋmoꞋa tusiya huno natafa higeꞋna agoana ikapinaga nago sia agogeno ani siale nago kanoa maine. Ani sialeꞋma mainegeꞋna agoa kanomo augafamoꞋa tusiya huno aihaesa huno alave alave huteno aihalegeꞋna age-mainoe. Agogeno nagoꞋma alave alave hiana yosa haisa fulagenaꞋmoꞋa sauve kanomo siale aigagi-maineno aihanelegeꞋna age-mainoe. NeꞋagogeno tueti foꞋa (24) sia ani sauve kanomo siale maigagi-mainageꞋya tueti foꞋa (24) kava vayaꞋmoꞋya ani siayagale mainae. MaineꞋya efeꞋage kenaꞋamia fai-lineꞋya amanutela sauve veaꞋmoꞋya kanileta yafateti talo humale tumano kuꞋma vai neꞋaliya avamete huꞋya vai-linae. Anumaya Koti sialeti aulumaya alino monagemo huno alu ge lu gema aiya yamoꞋa anifiti falote humaine. Anumaya Koti siamo aulega seveniꞋa (7) lamua aivasa humaine. Ani lamua Anumayamona seveniꞋa (7) AvamuꞋamoꞋya mainae. Mainageno Anumaya Koti siamo aulega nago tikotuna hanegeno telelalayamaꞋa tamage huno omalegeno galasimoꞋma alave alave hia avamete humaine. FoꞋa (4) hamaimuꞋene anagaꞋmoꞋya hetiꞋya ani siale maigagiꞋya mainageno amaulaga kasagoꞋya haneteno amaulegaene amakavelagaene alino anoꞋvai-maine. Hagote haimuꞋene kanomoꞋa kaveꞋage afua, laiyoni afu kana higeno anile haimuꞋene kanomoꞋa pulamaka kana higeno anile haimuꞋene kanomona vaya augosa kali-maigeno anile haimuꞋene kanomona anale haleno vai neꞋayea haki kana nama kana humaine. Ani foꞋa (4) hamaimuꞋene anagaꞋmoꞋya sikisiꞋa (6) amagekoꞋna hanegeno kasagoꞋya amaulagamo amaugafamona agupilegaene amagekoꞋnamona afepinagaene alino vai-maine. Vai-mainageno felugaene kegeꞋene mage huꞋya huge huge nehae

“Anumaya KotiꞋa mukiꞋa tokiyamona aepaꞋa maineno kefo yana nohigi tusiya huno alu aotage kano maine. NayoꞋene meniene maineanagino haenagaꞋa maisia kano maine.” huꞋya humainae.
HamaimuꞋene anagaꞋmoꞋya sauve kanomo siale maiya kanoa, agola maige maige nehia kanomofena, mage huꞋya hae “TokiyaꞋage hale yamaꞋa hanea kagia alisaga nehuta tusiꞋa muse nehune.” huꞋya nehageꞋya ani tueti foꞋa (24) kava vayaꞋmoꞋya sauve kanomo siale maiya kanoa agola maige maige nehia kanomo aule mope huꞋya agia alisaga hugahe ali-mainaya kanileta yafateti talo humale tumano kuꞋamia aliꞋya ani siamo aiyafi mo malae. 11 Mo nemaleꞋya mage huꞋya hae

“Vaeha tagai Anumaya Kotigae kagaya mukiꞋa yana ‘NaꞋa huꞋna talo hugahue.’ huka humainanafe mukiꞋa yana talo hu-malanageno haneafe tagaya tokiyaꞋage hale yamaꞋaene kagia alisaga nehuta tokiyaꞋage kano mainane huta kagia alisaga nehune.” huꞋya hae.
HageꞋna nagaya YoniꞋna himona kana yapi age-mainoe.

Copyright information for `KMU