Revelation of John 7

Vani hataleti foti fo tauseniꞋa (144,000) Isaleli veaꞋmogamina Anumayamo avona hamanile aigaꞋmaema-tene.

Ani kema haviteꞋna agoana foꞋa (4) ensole vayaꞋmoꞋya foꞋa (4) ma mopamo atupalega heti-maineꞋya yasimona atafa huꞋya ali-talako huligeno yasimoꞋa taga higeno mopafima hanea yamoꞋene hagelimoꞋene yosayagamoꞋenena kanage kanagala ohunae. OhageꞋna agogeno nago ensole kanomoꞋa yagemoꞋma evaꞋyi nehilegati eaꞋamo haimuꞋma hanea Anumaya KotiꞋa agaiꞋa veaꞋmogami humatenea avona aigaꞋmaematesia yana ayapi atafa hulineno ani foꞋa (4) ensole vayala mopaene hageliꞋene ali haviyama hisaya tokiyaꞋamima amaminea ensole vayafe mage huno ala kegefafiti hamapaiye. “Tamakaya mopaene hageliꞋene yosayagaenema ali haviyama hisaya ensole vayaꞋmogatama neꞋataletama tagava mainegeta tagaya hagoteta Anumaya Kotitimo aliꞋya veaꞋmogami hamanilela AnumayamoꞋma humatenea avona aigaꞋmae-matetesunagetama ani yaꞋyaga ali haviyana hugahae” huno hie. HigeꞋna havugeno huyogino hamanile avoma kae-malenea veaꞋnea vani hataleti foti fo tauseniꞋa (144,000) Isaleli veaꞋnea alu nofipiti alu nofipiti huyogi-malenea veꞋnea agoe. Yuta nofipiti tuelufu tauseniꞋa (12,000) veaꞋnene Lupeni nofipiti tuelufu tauseniꞋa (12,000) veaꞋnene Kati nofipiti tuelufu tauseniꞋa (12,000) veaꞋnene huyogi-malene. Asa nofipiti tuelufu tauseniꞋa (12,000) veaꞋnene Napatalai nofipiti tuelufu tauseniꞋa (12,000) veaꞋnene Manase nofipiti tuelufu tauseniꞋa (12,000) veaꞋnene huyogi-malene. Simioni nofipiti tuelufu tauseniꞋa (12,000) veaꞋnene Livai nofipiti tuelufu tauseniꞋa (12,000) veaꞋnene Isaka nofipiti tuelufu tauseniꞋa (12,000) veaꞋnene huyogi-malene. Sepuluni nofipiti tuelufu tauseniꞋa (12,000) veaꞋnene Yosefe nofipiti tuelufu tauseniꞋa (12,000) veaꞋnene Penisamini nofipiti tuelufu tauseniꞋa (12,000) veaꞋnene huyogi-malene.

KasagoꞋya veaꞋmoꞋya Anumaya Koti agia alisaga humainae.

KasagoꞋya veaꞋnea ohavunamaꞋa veaꞋnea alu kotega alu kotega veaꞋnene, alu make alu make neꞋaiya veaꞋnene, alu amaugafa lu amaugafa kali-mainea veaꞋnene, mukiꞋa Anumaya Koti sauve kanomo siamo aulegaene Sipi sipi nafaꞋnemo aulegaene heti-maineꞋya efe kena ayaꞋaya kenaꞋamia failineꞋya faꞋnofamo haisa amayapi atafa huli huli hulinae. 10 Hu-lineꞋya ala kegefafiti mage huꞋya hae “Sauve kanomo siale mainea Anumaya KotitimoꞋene Sipi sipi nafaꞋnemoꞋene tagu tamema ago aligati-mainea yamona aepaꞋa mainaꞋe.” huꞋya hae. 11 NehageꞋya mukiꞋa ensole veaꞋmoꞋya hetiꞋya Anumaya KotiꞋma mainea sialeꞋene tueti foꞋa (24) kava vayaꞋmoꞋyaene foꞋa (4) hamaimuꞋene anagaꞋmoꞋyaene maigagiꞋya maineꞋya mukiꞋamoꞋya ani siale ape huꞋya Anumaya Koti agia alisaga nehuꞋya mage huꞋya hae.

12 “Tamage Anumaya KotiꞋa mukiꞋa muse hisia yana alisie. TokiyaꞋage hale yamaꞋaene agia haneanagino kanale havi haviꞋyamaꞋa hanea kano maineafe agia alisaga nehuta tusiꞋa muse hutesune. AgaiꞋa kava yagaisia tokiyaꞋamoꞋa agola hanege hanege huno hanesie. Tamage.” huꞋya humainae.

Ani anagaꞋmogamina amakatama neꞋaiya yamoꞋa menia agola haꞋno hie.

13 Ani kea hu neꞋatageno nagola ala kava kanomoꞋa nagaifena mage huno nahavige “Nama ayaꞋaya efe kenama fai-linaya veala taꞋyae? Hanategati emainae?” huno nahavige-maine. 14 NahavigegeꞋna nagaya, YoniꞋna, mage huꞋna hue “MusekaꞋa nehugi kagaya kagaikaꞋa havilinane.” huꞋna hugeno nagaifena mage huno hie “Mani veaꞋmoꞋya tusiꞋa kana yama hanea kanafi maineꞋya tokiyaꞋage huꞋya kefo yaꞋamihema haviꞋya fali-mainea Sipi sipi nafaꞋnemo kolateti kenaꞋamia agola sese hageno efeꞋage hu-maineanagiꞋya emainae. 15 Ani yafe amakaya Anumaya KotiꞋma mainea siamo aulega heti-maineꞋya felugaene kegeꞋene agai agia alisaga nehuꞋya agai aliꞋya neꞋaliyanagino Anumaya KotiꞋa au vaimateno kava yagaimategahie. 16 Yagai-mateneanagino nagoꞋene amakala otegahie. Tifena oꞋamakegahie. YagemoꞋa amuko-nako huno amaleno oꞋamasagaligahie. 17 Sipi sipi nafaꞋnemoꞋa Anumaya Koti mainea siamona aulega hanea amuꞋnopi hetino maineno sipi sipi kava kanoꞋami maineanagino kapaiꞋma nehagea tima hanea komulega amavaleno mo matenageꞋya maige maige hisaya tina nenesageno Anumaya KotiꞋa amaunua alino haꞋmi-matesigeꞋya nagoꞋene avia oꞋategahae.” huno higeꞋna nagaya YoniꞋna havimainoe.

Copyright information for `KMU