Romans 10

MukiꞋa Isaleli veaꞋmoꞋya Anumaya Koti auꞋava yana oꞋagenae.

NafuꞋnaganagatama Anumaya KotiꞋa Yuta veaꞋmogami amaku amamena aligatisiafe aluya huno nenahaigeꞋna mukiꞋa yupa ani yafena nunamuna nehue. Amakayama nehaya kavala ageteꞋna mani kea nehue amakaya Anumaya Kotina haisia kavala aluya huꞋya hisaya amaku amakesa nehaviyanagi anima haiya yafena havilama nohuꞋya ani kavala nohae. Anumaya KotiꞋa veafema “Fatago veaꞋne mainae.” huno humatenea yafena nohaviꞋya “Ani kavala hulato.” huꞋya havinokagi amakaiꞋamima maiya auꞋava yaꞋamia “Anumaya KotiꞋa ageteno ‘Fatago kava nehae.’ huno hugahie.” huꞋya nehayanagi amakaiꞋami humainaya yafe ani kea huoꞋamategahie. HuoꞋamategahigi KalaisiꞋa hulatenea yafema haviꞋya amakupi maleꞋya amametiti humainaya veaꞋmogamifena Anumaya KotiꞋa “Ago fatago veaꞋne mainae.” huno humateteno ani yafena KalaisiꞋa Mosese kahegi kemona alifatago huno ali haꞋno humaineane. Kahegi kema akave malesayana Anumaya KotiꞋa “Fatago veaꞋne mainae huno humategahie.” huno MoseseꞋa mage huno kae-maleneane.

“NagoꞋa veaꞋmoꞋya mukiꞋa kahegi kema akave malesayana ani keleti vaiyegahae.” huno hu-maineane.
Hu-maineanagi nagoꞋa veaꞋmoꞋya Yisasi hulatenea yafema haviꞋya amakupi maleꞋya amametiti humainayafe Anumaya KotiꞋa “Fatago veaꞋne mainae.” huno humatenea yamofena mage huno hie tamakuꞋafitila mage hutama haviokeho “Ta ikapinaga haiteno Kalaisina avaleno elavigahie?” hutama ohiho. “Ta falimainaya veaꞋne nelaviya kapina Kalaisina fali-mainefiti avalegahe tavigahae” hutama havi okeho. NaꞋane hie? Ani kemoꞋa tamahanile haneteno tamavayale haneno tamakupi hane. Anima hu falote nehuna kea YisasiꞋma hulatenea yafema havita lagupi maleta lametiti hisuna yafe humaine. Tamakaya tamavayafiti “YisasiꞋa AnumayaniꞋa maine.” hutama huhaneletama tamakuꞋafitila “Anumaya KotiꞋa Yisasina fali-mainefiti ali hetitene.” hutama tamakupi maletama tamametiti hisageno Anumaya KotiꞋa tamaku tamamena aligatigahie. 10 TaguꞋafina YisasiꞋa hulatenea yafena havita tagupi maleta tametiti humainona yateti Anumaya KotiꞋa “Fatago veaꞋne mainae.” huno hunelate. Tavayafiti “YisasiꞋa hulatenea yafe haviꞋna nagupi malenoe.” huta hufalote nehuna yateti Anumaya KotiꞋa tagu tamena alinegatie. 11 Anumaya Koti autaꞋmafina mage huno humaine

“NagoꞋa veaꞋmoꞋya Yisasife haviꞋya amakupi maleꞋya amametiti hisayana amakayea ohugahae.” huno humaineane.
12 Anumaya Koti aulagafina Yuta veaꞋnene Yuta veapi omainaya veaꞋnene nago avamete huꞋya mainageno Anumaya KotiꞋa mukiꞋa veaꞋmogami AnumayaꞋami maineanagiꞋya mukiꞋa veaꞋmoya agaitega ke hisageno kanaleꞋya huno amaya hisia yana kasagoꞋya amamigahie. 13 Anumaya Koti autaꞋmafina mage huno humaineane

“MukiꞋa veaꞋmoꞋya Anumayamo agi ayeꞋya ke hisagenoꞋa amaku amamena aligatigahie.” huno humaineane.
14 Aligatigahianagi YisasiꞋa hulatenea yafema haviꞋya amakupi omalesayana hanaꞋa huꞋya agia ayegahae? YisasiꞋa hulatenea yafema ohavisayana hanaꞋa huꞋya agaifena haviꞋya amakupi maleꞋya amametitia hugahae? Nago kanomoꞋma YisasiꞋa hulatenea yafema huhaleno hamaopaisiana hanaꞋa huꞋya ani kea havigahae? 15 YisasiꞋa hulatenea yafema huhaleꞋya hisaya veaꞋma hu oꞋamatesayana hanaꞋa huꞋya ani kea huhaleꞋya hugahae? Anumaya Koti autaꞋmafina mage huno humaineane

“Yisasife kanale mono kea, tamaipa falu hutama maisaya kema, alino esia kanoa kanale kano maineanagita muse hisune.” huno humaineane.

MukiꞋa Isaleli veaꞋmoꞋya YisasiꞋma hulatenea yafena haviꞋya amakupina omalenae.

16 MukiꞋa mani kema nehaviya veaꞋmoꞋya haviꞋya amakupina nomalae. Anumaya Koti autaꞋmafina AisaiyaꞋa mage huno humaineane

“Anumayamoga hana veaꞋmoꞋya hamapauva kea haviꞋya amakupi maleꞋya amametiti humainae?” huno havige-maineane.
17 Amakupi maleꞋya amametiti humainaya yamo havimainaya kefiti falote humaine. Anima havimainaya kea Kalaisife hamapaigeꞋya havimainae. 18 Nagaya maꞋa huꞋna tamahavi-negoe mani kanale kea ohavinao? AꞋao tamagelafa huꞋna tamahapauve mukiꞋamoꞋya ago havilinae. Anumaya Koti avopina mage huno humaineane

“Amake aiꞋyama haya kemoꞋa mukiꞋa kotega ute ete huno keꞋamimoꞋa mukiꞋa kumate umaine.” huno humaineane.
19 NagoꞋene tamahavi-negoe mani kanale kea Isaleli veaꞋmoꞋya ohavinao? Tamage huꞋya ago havilinae. Hagoteno MoseseꞋa Anumaya KotiꞋma humainea kea mage huno humaineane

“Nagaya havigu veala, nago nofipi omainaya anagapiti amavalesugetama ani yafena tamaipa havi haviya humategahae. Nago nofi veala, kanaleꞋya huꞋya havisaya amaku amakesa omalenesia veala amavalesugetama ani yafena ke vaigahae.” huno humaineane.
20 AisaiyaꞋa tokiyaꞋage huno Anumaya KotiꞋma humainea kea mage huno humaineane

“NagoꞋa veaꞋmoꞋya nagaifena natia noꞋayesaya veaꞋmoꞋya ago nagemainae. Nagaifema nagoꞋa veaꞋnema hamavi-okenaya veaꞋmogami amaulagale ago fufute efalote hugeꞋya nagemainae.”
21 Isaleli veaꞋmogami-fena mage humaine “AyaꞋaya kanagefa nayateti ‘Eho ehoꞋ huꞋna kea huanagi nagai kea akave omaletama ke vaige vaige nehaya veaꞋmogatamae.” huno humaineane.
Copyright information for `KMU