Romans 13

Tagaya Kamani vayaꞋmogami amakave maleta maisune.

MukiꞋa veaꞋmogatama Kamani vayaꞋmogami kea akave maleho. Nago Kamani kanoa agaiꞋa falote huno omainegi mukiꞋa Kamani aliꞋyana Anumaya Koti ayapiti alino falote humalegeꞋya yagai-mainae. Kamani vayaꞋmogami kehena “KahaoteꞋyakae.” huꞋya hisayana Anumaya KotiꞋenefe “KahaoteꞋyakae.” huꞋya nehae. Ani kavaꞋma hisaya veaꞋmoꞋya amakaiꞋami amakata aisia anonaꞋa aligahae. Kanale kava nehisaya veaꞋmoꞋya Kamani vayafena kolia ohugahagi havi kavaꞋma nehisaya veaꞋmoꞋya koli hugahae. Kamani vayafe kolima ohinutama kanale kavakeꞋya hiho. Kamani vayaꞋmoꞋya tamaya hisagetama kanaleꞋya hutama maisayafe Anumaya Koti aliꞋya vaya mainagi havi kavaꞋma hisayana tamahaesaya tokiyaꞋamia haneafe koli hiho. Havi kavaꞋma hisaya veaꞋmogamina havi yana anonaꞋa amakata aisia yama amamisayafe Anumaya KotiꞋa humategeꞋya agai aliꞋyana neꞋaliye. Kamani vayaꞋmoꞋya hamai vai yama tamisaya yafekela kolia huta amakai kea ohavisunagi tagaiti laguꞋamo “NaꞋa hiho.” huno hisia kavakeꞋya huta akave malesunafe Kamani vayaꞋmogami kea akave malegahune.

Kamani vayaꞋmoꞋya Anumaya Koti aliꞋya neꞋaliꞋya mukiꞋa kanafina ani aliꞋyatekeꞋya kava yagai lokiyaꞋage humainayafe tamakaya tamaugafale takesi monea neꞋatalae. AnonaꞋa mukiꞋa kava vayala neꞋamamitama tamaugafaletiꞋma kanisole takesiene Kamani takesiene amamiho. Kava vayatamimogamina amaiyaꞋafinaga ako hutama mainetama amakia alisaga hisaya vayaꞋmogamina amakia alisaga hutama maiho.

NagoꞋa veaꞋmogamina taguꞋa amamitafa huta amamisune.

Nago yana tamamitageꞋya “HaenagaꞋa tamamigahune.” hutama humainesaya yana aupaꞋa amamiho. Tamafu-tamakanagamina tamakuꞋa amamitama amaya hiho. NagoꞋa veaꞋmoꞋya amafu-amakanama amakuꞋama amamisayana mukiꞋa kahegi kemona akave nemalae. E, kahegi kemoꞋa mage humaine, Kumai he kavala ohuo. Veala haegeno ofalino. Musufa yana ohuo. Alu kanomo kuꞋafenotela ageka kahaꞋyea ohuo huno nagoꞋa kene humainegi mukiꞋa kahegi kemona aepaꞋamoꞋa nagoke mage huno hane, kagaika kaugafahema kahaiya avamete mukiꞋa veaꞋmogami amaugafahena kahaino huno humaineane. 10 MukiꞋa veaꞋmogami amakuꞋama neꞋamamiya veaꞋmoꞋya alu veaꞋmogamina havi kavala huoꞋamategahae. Ani yafe veaꞋmoꞋya amakuꞋama neꞋamamiya veala mukiꞋa ani kahegi kemona akave nemalae.

Tagaya fatago huta kana vaiyesune.

11 Menima mainona kanafima nehaya kavala ago havilinayafe tamaula faetama omaitama hetitama maisaya kanamoꞋa ago falote humaine. Tagayama hagoteta Yisasife havita lagupi maleta tametiti humainona kanafina Anumaya KotiꞋa tagu tamema aligatisia kanamoꞋa aluꞋale haneanagino meni kanafina ago eno aupa nehie. 12 Hanima kimainea kanamoꞋa ago haꞋno hugahe nehigeno koꞋma alino halesia kanamoꞋa ago falote hugahe nehiafe mukiꞋa hani yapima nemaiya auꞋava yana ataleteta tuma hisuna kenatia, hale yamo auꞋava kenatia failisune. 13 Kama vaiyesunana fatago huta veaꞋmoꞋya yagefima vaiyaya avamete huta vaiyesune. Alitalu huta havili neta hagifali kea ohatageta anegi-nagia ohisune. Ageta lahaꞋyea huta augafale maita yokalo oꞋateta moli huliteta ohisune. Alu kanomo yatela ageta lahaꞋyea ohuta tua ohisune. 14 Anumayatimona Yisasi Kalaisina kenatami kana hutama avaletama taugafale aigaꞋmaetama age lamahaye hisaya yafena tamakesa havi havi hutama omaiho.

Copyright information for `KMU