Romans 2

Anumaya KotiꞋa kaiyekema humatesiana fatago huno humategahie.

Kefo yama nehaya yafena nagoꞋa veafena “Lamakaya naꞋa kava nehae.” hutama nehutama amakaila fako hu neꞋamatagi tamakaiꞋenena aniꞋa kefo kavala nehageno tamakaiꞋenena tamakaya nehie. Tamakaya kaiyeke humataya veamogatama aniꞋa kefo yana ago humainayafe kenonama hisaya kea omalene. Tagaya ago havimainone Anumaya KotiꞋa kelamage keleti kefo yama humainaya veaꞋmogamina kaiyekea fako humateteno anonaꞋamia alitagifeno neꞋamamie. NeꞋamamianagi hanaꞋa tamakesa nehaviye tamakaya aniꞋa kefo yana nehaya veaꞋmogamife “Tamakaya naꞋa kava nehae.” hutama nehutama ani kefo yana nehayanagi “Anumaya KotiꞋa kaiyeke hulamateteno anonaꞋa alitagifeno otamigahie.” hutama nehao? AꞋao kefo yana ago humainaya anonaꞋa tamamigahie. Ifi Anumaya KotiꞋa tusiya huno kayone yamaꞋa tamamiteno aupaꞋa kaiyekea hu notamategi ayaꞋayate tamakava maime neꞋuno kefo yama haya yafena anonaꞋa aupaꞋa alitagifeno notamamigetama “Ani kefo yana afa ya kana yane.” hutama tamakesa nehaviyo? Havige nehagi kefo yatamihena tamakuꞋa aiyahae hutama “NagoꞋene ohugahune.” hutama hisayafene huno Anumaya KotiꞋa kayone hulamateno kaiyekema huotamatea yafena nohaviyo? KaguꞋamoꞋa tusiya huno tokiyaꞋage humainegeka “Kefo yaniꞋahena naguꞋa aiyahae ohugahue.” hukama nehana yafena Anumaya KotiꞋa kagaila haima vai negatea yana halaꞋya humaleneanagino kaiyekema humatesia yupa agaiꞋa fatago huno fako hulamateteno tamaveligahie. Anumaya KotiꞋa mukiꞋa veaꞋmoꞋyama humainaya yateti anonaꞋamia alitagifeno amamigahie. NagoꞋa veaꞋmoꞋya “Anumaya KotiꞋa muse huno tagia alisaga hisigeta tokiyaꞋaene hale yapi maisune.” huꞋya kanale kava huge huge nehaya veaꞋmogamina Anumaya KotiꞋa agola maige maige hisaya hamaimula amamigahie. Amamigahianagi nagoꞋa veaꞋmoꞋya amakaiꞋami amaugafahekeꞋya amakesa nehaviꞋya kelamage kemona akave omaleꞋya kefo yamo auꞋava kava akave nemalageno Anumaya KotiꞋa tusiya huno haiya vaimateteno amakata aisia yana amamigahie. NagoꞋa veaꞋmoꞋya kefo kava maiꞋya huge huge nehaya yafe Anumaya KotiꞋa tusi kana yaꞋene amaugafa amagata aisia yamoꞋene amakaila alino aiso humategahie. Hagoteno Yuta veaꞋmogami amamiteno anileti Yuta veaꞋne omainaya veaꞋnenena amamigahie. 10 Amamigahianagi fatago kavaꞋma nehaya veaꞋnea Anumaya KotiꞋa halemainea tokiyaꞋaene ala amakiene amaipamoꞋa falu hisia yaꞋene amamigahie. Hagoteno Yuta veaꞋmogami amamiteno anileti Yuta vea omainaya veaꞋnenena amamigahie. 11 Anumaya KotiꞋa mukiꞋa veafena nagoke agu agesale maineno neꞋamamie.

12 MukiꞋa veaꞋnea kahegi kema hamaopaigeꞋya ohavineꞋya kefo yama maiꞋya humainesayana Anumaya KotiꞋa ani kahegi keletila kaiyekea hu oꞋamategahigi fako hinageꞋya hanimo aguꞋafi agola amakata aisia no maigahae. MukiꞋa veaꞋnea kahegi kema havilineꞋya kefo yama nehaya veaꞋnea Anumaya KotiꞋa agaiꞋa kahegi keleti kaiyekea alino aye fako humategahie. 13 NagoꞋa veaꞋmoꞋya kahegi kema haviteꞋya agoꞋma atalenesaya veafena Anumaya KotiꞋa “Fatago veaꞋne mainae.” huno hu noꞋamategi kahegi kema akave nemalesaya veafe Anumaya KotiꞋa “Fatago veaꞋne mainae.” huno humategahie. 14 Yuta veaꞋne omainaya veaꞋmoꞋya Anumaya Koti kahegi kea amakaipina omaleneanagi amakaiꞋami amaku amakesafima hanea kema akave malayana akave malenaya kemoꞋa amakaiꞋami amaku amakesafiti ani kahegi kea ali falote humainae. 15 Anumaya KotiꞋa agaiꞋa kahegi kema amakuꞋafima kae-malenea kea amave-ligeꞋya amaku amakesamoꞋa nagoꞋma hia kanafina “Havi kava nehane.” huno kaiyekea hu neꞋamateno nagoꞋma hia kanafina “Kanale kava nehane.” huno humaineanagino taguꞋafina ago kae-malegeno haneagino tavenelie. 16 Nagaya YisasiꞋma hulatenea kanale mono kema nehua kefiti ma kea hane, ma mopama haꞋno hisia yupa Anumaya KotiꞋa Yisasi Kalaisi avayafitila mukiꞋa veaꞋmoꞋya falakiꞋya humainesaya yafena kaiyekea humateteno fako humategahie.

Yuta vayaꞋmoꞋya mage humainae “Kahegi kemo taya hugahie.” huꞋya havigea humainae.

17 Kagaya “Yuta kano mainoe. Mosese kahegi kea haviꞋna akave nemaloanagino naya hugahie.” huka kagaikaꞋa kagi alisaga nehuka “Anumaya Koti nafaꞋne mainoe.” huka nehano? 18 Kahegi kea ago huge kavelige hageka havilinanafe “Anumaya Kotima nehaiya kavafena haviteꞋna fatago auꞋava yana ago havilinoa kano mainoe.” huka nehano? 19 Kagaya ma kagesa nehavine “Kahegi kemo aepaꞋa havilinogi aulaga asu humai kanomo visia kana aveligahue. Hani yapi mainaya veala ayevasa humategahue.” huka nehano? 20 “Kahegi kemo aepaꞋa havilinoafe nagoꞋa kema ohavinaya veaꞋmogamiꞋene osi osi nafaꞋneyagaene humaveli hamaveli hugahue.” huka nehano? 21 Alu veaꞋnea humave-nelinanagi naꞋa higeka kagaikaꞋahena ave notine? “Musufa yana ohiho.” huka huhaleka veala hamanepainanagi kagaikaꞋa musufa yana nehano? 22 “Kumai he yana ohiho.” huka veala hamanepainanagi kagaikaꞋa ani kumaiya nehano? Ago falimainaya veafe “Anumayati maine.” huꞋya amakisana neꞋvaiya yafena “Onahautafa huno onahaiye.” huka nehananagi ani veaꞋmogami mono nopitila musufa yana nehano? 23 Kagia alisaga nehuka “Kahegi kea havimainoe.” huka nehananagi ani kea ago alitagae-mainanafe Anumaya Koti agia ali haviya nehano? 24 E, Anumaya Koti kema kae-malenaya autaꞋmafina Yuta veaꞋmogatihena mage huꞋya humainayane “Tamakaitamia havi kavaꞋma nehaya yatamihena Yuta vea omainaya veaꞋmoꞋya tamaketeꞋya Anumaya Koti agihena kamuge hatageꞋya vai neꞋatae.” huno humaine.

Amaugafa taga nehaya yana afa ya kana humaine.

25 Kahegi kema akave malesayana Yuta vayaꞋmoꞋya humainaya kava huꞋya amakoya anoꞋya laga hu yamoꞋa* tamaya hugahianagi kahegi kema alitama atagaesayana tamaugafa taga nehaya yana afa ya kana yane. 26 Amakoya anoꞋya taga ohunaya vayala Yuta vea omainaya veaꞋmoꞋya kahegi kemo akave malesayana Anumaya KotiꞋa ani veafena mage huno hugahie “NagaiꞋni nafaꞋneyaga maineꞋya amaugafa laga humalenaya vaya kana humainae.” huno humategahie. 27 Kahegi kea akave maletama tamaugafa laga nehagi ani kahegi kema ali neꞋatagaetama nagoꞋa vayaꞋmoꞋya, amaugafa laga ohunaya Yuta vea omainaya veaꞋmoꞋya, kahegi kema haviꞋya akave maleꞋya tamakaila tamakaseꞋya kanale kava nehaya yamoꞋa “Havi kava nehae.” huno hulamategahie. 28 TaꞋyafigae Anumaya Koti veaꞋnea, Yuta veala, tama veaꞋne mainae? Amegati amaugafaꞋage taga humalenayafe Anumaya Koti veala omainagi Anumaya Kotina amakuꞋama amitafa humainayafe Yuta veaꞋnelafa mainae. Ani veala kahegi kema akave malenayafe amakaiꞋami amaugafa taga ohunagi Alu Aotage AvamuꞋmoꞋa amakupi emaineno haegafa amaku amakesa amamigeꞋya mainae. VeaꞋmoꞋya naꞋama humainesaya veaꞋmogami amakia alisaga ohugahagi Anumaya KotiꞋa agaiꞋage amakia alisaga hugahie.

Copyright information for `KMU