Romans 4

Anumaya KotiꞋa Apalahamufena “Fatago kano mainane.” huno hutene.

ApalahamuꞋa Yuta veaꞋmogati taginagomofena naꞋane hisune? ApalahamuꞋa agaiꞋa aliꞋyateti mukiꞋa kahegi kemona akave maleneafe Anumaya KotiꞋa “Fatago kano mainane.” huno hileꞋasina ApalahamuꞋa agaiꞋa agia alisaga hileꞋasinagi Anumaya Koti aufina naꞋa kavala ohune. Anumaya Koti autaꞋmafina mage huno kae-malenayane

“Anumaya KotiꞋa Apalahamufena ‘NaꞋa hugategahue.’ huno hulokiya vai-malenea kehena ‘Lamage hanafe aniꞋa hunategane.’ huno agupi maleno ametiti hiafe Anumaya KotiꞋa mage huno hutene ‘Fatago kano mainane.’ huno huteneane.” huꞋya kae-malenayane.
VeaꞋmoꞋya aliꞋya neꞋaliya yateti miyama alinuꞋyahena ani miyafena “AfaꞋa muse ya nelamie.” huꞋya nohagi “AliꞋya alimainona anonaꞋa neꞋalune.” huꞋya nehae. Nago kanomoꞋma “Kahegi kema mukiꞋa kanaleꞋma akave malesuafe Anumaya KotiꞋa ‘Fatago kano mainane.’ huno hunategahie.” hunoꞋma ohisiana “Anumaya KotiꞋa agaiꞋage kefo kava nehia kanomofena ‘Fatago kano mainane.’ huno hutenea kanomoꞋa nagaila ‘Fatago kano mainane.’ huno hunategahie.” huno ametiti humaineafe Anumaya KotiꞋa anima agupi maleno ametiti humainea yana ageteno “Fatago kano mainane.” huno huneꞋate. Yuta veaꞋmogatina taginagomoꞋa, TevitiꞋa, mage humaine nagoꞋa veaꞋmoꞋya kahegi kea akave omaleꞋya Anumaya Kotife haviꞋya amakupi malesayana Anumaya KotiꞋa amakaifena “Fatago veaꞋne mainae.” huno humatesia veaꞋmoꞋya tusiꞋa muse hugahae. TevitiꞋa amakaifena mage huno Anumaya Koti avopina humaineane

“VeaꞋmogatama kefo kavaꞋma haya kavala Anumaya KotiꞋa ago aigetamateno atalelamateneafe muse hiho. Kefo yama haya kavala ago ayehaꞋmi-taleneafe muse hiho.
AnumayamoꞋa nago kanomo humainea kefo yafena havino oꞋamino age kanitesiana ani kanomoꞋa muse hugahie.” huno humaineane.
Amaugafa laga humainaya Yuta vayafekeꞋya ani musena hisae huno nehio? AꞋao, amaugafa laga ohunesaya veaꞋnene aniꞋa huꞋya musena hugahae. Apalahamufe tagesa havisune. Anumaya KotiꞋa Apalahamufena “NaꞋa kavala hugategahue.” huno hulokiya vaimalenea kehena “Tamage hananagika aniꞋa hunategane.” huno agupi maleno ametiti humainea yateti Anumaya KotiꞋa “Fatago kano mainane.” huno hutene. 10 ApalahamuꞋa hanaꞋa huno mainegeno Anumaya KotiꞋa “Fatago kano mainane.” huno hutene? Agoya anoꞋya laga hutegeno huteneo? AꞋao, laga ohunea kanafi ani kea huteneane. 11 Hagoteno augafa laga ohuneno Anumaya Koti kea havino agupi maleno ametitia humainea yateti Anumaya KotiꞋa “Fatago kanoa mainane.” hunoꞋma hutenea yafema veaꞋmoꞋya havisaya yafe augafa laga humaine. Ani yafe mukiꞋamoꞋya amaugafa laga ohuneꞋya ApalahamuꞋma humainea kava huꞋya Anumaya Kotife haviꞋya amakupi maleꞋya amametiti humainaya yateti “Fatago veaꞋne mainae.” huno humatenesia veaꞋmoꞋya Apalahamuna aginagomoꞋya mainae. 12 Mainagi nagoꞋa veaꞋmoꞋya amaugafa laga humainayanagi ani kavakeꞋyama ohayana ApalahamuꞋma augafa laga ohunea kanafima humainea kava huꞋya Anumaya Kotife haviꞋya amakupi malenaya kavaꞋene humainaya veaꞋmogami totoꞋamimo maine.

Anumaya KotiꞋa hulokiya vaimalenea kemoꞋa agaifema haviꞋya amakupi malenaya veafeke humaine.

13 Anumaya KotiꞋa ApalahamuꞋene aginagomoꞋenefe mage huno humaineane “MukiꞋa ma mopagefa kava yagaisayafe tamamigahue.” huno hulokiya vaimalene. “Kahegi kemona akave maletesageꞋna tamamigahue.” huno ohunegi “Tamakaya Anumaya Kotife havitama lamakupi malageꞋna ‘Fatago veaꞋni mainae.’ huꞋna hulamatoafe tamamigahue.” huno humaineane. 14 Kahegi kema akave nemalaya veaꞋmoꞋya alileꞋasina haviꞋya amakupi nemalaya yamoꞋa afa ya kana higeno hulokiya vai-malenea kemoꞋa falote ohileꞋasine. 15 Kahegi kemoꞋa Anumaya Kotina hai vaigeno anonaꞋa nelamianagi kahegi kema omalesina “Ago ali neꞋatagaune.” huꞋya ohaleꞋasine.

16 Anumaya KotiꞋa hulokiya vai-malenea kemoꞋa kayone nehia yamaꞋaleti falote hisiafeꞋene mukiꞋa Apalahamuna aginagomoꞋya alisaya yafeꞋene “Agaife haviꞋya amakupi maleꞋya amametiti humainaya yateti aligahae.” huno humaine. Kahegi kema akave nemalaya veaꞋmoꞋyage oꞋaligahagi taginagomoꞋa, ApalahamuꞋma, ametiti humainea kava hisuna veaꞋmogatina ApalahamuꞋa neꞋalafa maine. 17 Mage huꞋya Apalahamufena kae-malenayane

“Kagaya mukiꞋa kotega veaꞋmogamina totoꞋamimoga maigane.” huꞋya kae-malenayane.
ApalahamuꞋa Anumaya Kotife havino agupi maleno ametiti humaineafe Anumaya Koti aulagalela tototimo maine. Anumaya KotiꞋa falimainaya veala eteno hamaimula neꞋamamino falote ohunea yamofena “Falote huo.” huno higeno falote humainea kano maine.

ApalahamuꞋa kanaleꞋya huno Anumaya Kotifena havino agupi malene.

18 ApalahamuꞋa ani kehena havino ametitia hianagi nafaꞋnema atesia kanaꞋamoꞋa ago haꞋno humainea yafena agesa ohavinegi “MukiꞋa kotega veaꞋmogamina totoꞋamimoga maigane.” huno humainea kele ametiti humaine. 19 Ani kanafina ApalahamuꞋa vani hataletiꞋa (100) kafu ago haꞋno hutegeno kolamoꞋa ago hau higeno nafaꞋne atesia tokiyaꞋa omalegeno aꞋamoꞋenena namo a mainea yafena tole agesa ohavinegi tokiyaꞋage huno Anumaya Kotife havino agupi maleno ametitia humaine. 20 Anumaya KotiꞋa “Hugategahue.” huno humainea kehena “Namisio onamisio?” huno tole agesa ohavinegi Anumaya Koti agia alisaga nehuno havino agupi maleno ametiti hia yamoꞋa alakefa humaine. 21 “Hugategahue huno humainea yana namigahie.” huno agesa havilama humaine. 22 NaꞋa humaineafe Anumaya KotiꞋa “Fatago kanoa mainane.” huno hutene. 23 “Anumaya KotiꞋa ‘Fatago kanoa mainane.’ huno hutene.” huno kae-malenea kea agaiꞋagefekeꞋyana ohunegi tagaiꞋenefe mani kea humaineane. Tagaya “Anumaya KotiꞋa Yisasi Kalaisina falimainefiti alino hetitenea kano maine.” huta havita lagupi maleta tametiti hunageno “Fatago veaꞋnea mainae.” huno hulatene. 25 Anumaya KotiꞋa Yisasina kefo yatia ayehaꞋmi-talesiafe hutegeno me falimaine. Faliteno tagaifena “Fatago veaꞋneꞋniꞋae.” huno hulatenea kemona tokiyaꞋage huno hanesiafe Anumaya KotiꞋa Yisasina fali-mainefitila ali hetitene.

Copyright information for `KMU