Romans 5

Anumaya KotiꞋa tagaifena “Fatago veaꞋne mainae.” huno hulatene.

Tagaya YisasiꞋa hulatenea yafema havita tagupi maleta tametiti humainonafe Anumaya KotiꞋa “Fatago veaꞋne mainae.” huno hulatene. AnumayatimoꞋa, Yisasi Kalaisi, ani kavala hulateneafe Anumaya Koti tokiya hale yapi maigahune. Yisasi KalaisiꞋa agaiꞋa hulatenea yateti ka valilategeta Anumaya Kotina kayone yamaꞋafi umaineta Anumaya Kotina tokiya hale yamaꞋafi mo lokaeta maisunafe tametitia huta musena nehune. Ani yafekela musena nohunagi kana yapiti tokiya vaisuna yatimoꞋa falote hisiafene huta kana yama vaꞋyi hiana ani yafena muse nehune. Tokiya vaisuna yatimoꞋma hanesigenoꞋa Anumaya KotiꞋa muse hulatesia auꞋava yatimoꞋa falote hisigeno Anumaya KotiꞋa tagu tamena aligatisiafe tametitia nehuta agava mainone. Anumaya KotiꞋa Alu Aotage Avamula ago tamigeno lagupi mainegeno ani Avamuteti aluya huno hau ayamopafi nehaiya yana tamineafe tametiti hisuna yana afa ya kana ohugahigi taya hugahie.

Nayona tagayama kanale kava hisuna amukotima omalenea kanafina, Anumaya KotiꞋma malenea kanafina, KalaisiꞋa tagayama kefo yama nehuna veaꞋmogatilefene huno me falimaine. Nago kanomoꞋa fatago kanomona aya hisuafene huno ofalileꞋasine. Tamage nagoke kanomoꞋa kayoneꞋage kanomona aya hisuafene huno falileꞋasino? Ohavinonagi tagaya kefo kavakeꞋya huta maunageno KalaisiꞋa tagaifene huno me falimainea yateti Anumaya KotiꞋa tagaifena hau ayamopafi nehaiya yana taveli-maine. AgaiꞋa kolamaꞋaleti kefo yama humainona anonatia aligeno Anumaya KotiꞋa “Fatago veaꞋne mainae.” huno hulateteno nagoꞋene taya huno kefo yama nehuna yana Anumaya KotiꞋa hai vaino anonatia tamigahe hianagi YisasiꞋma falimainea yateti tagai anona ago alimaineafe tagu tamena aligatigahie. 10 Tagaya Anumaya Kotina kame huteta mainona kanafina agaiꞋa nafaꞋnemo falimainea yateti Anumaya KotiꞋa “AfaꞋa maiho.” huno ali falu hulategeta nagoke taipale maineta Anumaya KotiꞋene taipamoꞋa falu higeta mainonageno YisasiꞋa fali-mainefiti heti-mainea haimuꞋaene maineanagino nagoꞋene taya huno tagu tamena aligatigahie. 11 Nagi nago yana AnumayatimoꞋa, Yisasi KalaisiꞋma hulatenea yafena Anumaya Kotife aluya huta musena nehune. Yisasi KalaisiꞋa ago lavaleno Anumaya KotiꞋene nagopi ailokaelategeta nagoke taipale mainone.

AtamuꞋa fali yana ali falote humaineanagi YisasiꞋa haimu alisaya yana ali falote humaine.

12 AtamuꞋa, nagoke kanomo, kefo yana higeno ani kefo yama humainea yamoꞋa ma mopafina falote hutegeno kefo yama humainea kumiꞋamoꞋa haneafe veaꞋma fali yana alifalote higeno mukiꞋa veaꞋmoꞋya kefo yama hayafe anonaꞋamia fali yamoꞋa mukiꞋa veapina emaine. 13 Kahegi kemoꞋa omenegeno kefo yana haneanagino kahegi kema omalesina Anumaya KotiꞋa nagoke nagokeꞋmogati kefo yatihena ohavisine. 14 Atamu mainea kanaleti aepa heꞋya veala falimainae. Falime falime uꞋya Mosese mainea kanafina aniꞋa huꞋya mukiꞋa falimainae. NagoꞋa veaꞋmoꞋya AtamuꞋma atagae-mainea kava huꞋya oꞋatagaenayanagi afaꞋa falimainae. Haenagama esia kanoa Yisasi Kalaisi amemaꞋa kana huno AtamuꞋa taveli-maine.

15 AtamuꞋma humainea kefo yaꞋene Anumaya KotiꞋa kayone hulatenea yamoꞋene nago avamete ohunegi aluꞋa luꞋa humainaꞋe. Tamage nagoke kanomoꞋa kefo yama humainea yateti mukiꞋa veala nefaliyanagi Anumaya KotiꞋa tusi ya huno kayone yamaꞋafiti nagoke kanoa, Yisasi KalaisiꞋa, kanale yama hulatenea yana afaꞋa lamigeno tusiya huno fali yamona agaseno kasagoꞋya veala ali kayone humatene. 16 Anumaya KotiꞋa kayone hulatenea yaꞋene AtamuꞋa kefo yama humainea anonaꞋaenena nago avamete ohunegi aluꞋa luꞋa humainaꞋe. Nagoke kanomoꞋa kefo kavaꞋma humaineafe Anumaya KotiꞋa mukiꞋa veaꞋmogamina kaiyekea humateteno “Hanimo aguꞋafi agola tamakata aisia no maigahae.” huno humateneanagi kasagoꞋya veaꞋmoꞋya kasagoꞋya kefo yana humainayanagi kayone humatenea veaꞋmogamina “Fatago veaꞋne.” huno humatene. 17 Tamage nagoke kanomo kefo yana humainea yateti faliyamoꞋa falote hu-maineanagiꞋya mukiꞋa veaꞋmoꞋya nefaliyanagi nagoke kanomoꞋa, Yisasi Kalaisi, hulatenea yateti kasagoꞋya veaꞋmoꞋya YisasiꞋa kanale ya huno kayone hulatenea yafema haviꞋya amakupi malaya veaꞋmogamife Anumaya KotiꞋa “Fatago veaꞋne mainae.” huno hu-matesigeꞋya agola maige maige hisaya hamaimula aliteꞋya KalaisiꞋa hulatenea yateti tokiya vaiꞋya maigahae.

18 NaꞋa humaineafe nagoke kanomo kefo yana humainea yateti mukiꞋa veaꞋmogamina Anumaya KotiꞋa kaiyekea humateteno “Hanimo aguꞋafi agola tamakata aisia no maigahae.” huno hulateanagi nagoke kanomo fatago kava hu-maleneafe Anumaya KotiꞋa agaife havino neꞋamino kasagoꞋya veaꞋmogamifena “Fatago veaꞋne mainae.” huno humatenea yateti agola maige maige hisaya hamaimula ago alimainae. 19 Nago kanoa, AtamuꞋe, Anumaya Koti kea akave omaleafe mukiꞋa veaꞋmoꞋya kefo yamaꞋagela nehaya veaꞋne mainagi nagoke kanomoꞋa, YisasiꞋa, Anumaya Koti kea akave maleneafe Anumaya KotiꞋa kasagoꞋya veaꞋmogamifena “Fatago veaꞋne mainae.” huno humategahie.

20 Hu-mategahianagi Anumaya KotiꞋa kahegi kema amamiana tusiya huꞋya alitagae-mainae. Kefo yama haya yamoꞋa alakefa hianagi Anumaya KotiꞋa kayone hulatenea yamoꞋa ani kefo yamona agaseno tusiꞋa yakefa hane. 21 Kefo yama humainaya anonaꞋa mukiꞋa veaꞋnea nefaliyanagi kayone hulatenea yamaꞋa tusiya huno haneafe AnumayatimoꞋa, Yisasi Kalaisi falimainea yateti Anumaya KotiꞋa kayone hulateno “Fatago veaꞋnea mainae.” huno hulateteno agola maige maige hisuna tahaimula lamine.

Copyright information for `KMU