Romans 6

Tagaya KalaisiꞋene ailokaeta faliteta agaiꞋene fali-mainopiti ago heti-mainone.

Tagaya na ke hugahune? Tagaya kefo yama hisunagenoꞋa Anumaya KotiꞋa kayone hisuna yamaꞋa tagaipina ala huno havatelatesie huta hisuno? Na kea ohutafa huta ohisune. Kefo kava nehuna yana ago ataleta falimainea augafa veaꞋne mainone. Falimainaya veaꞋmoꞋya kefo yana ohugahae. Yisasi KalaisiꞋene alino tategeta aigaꞋmaeta agaiꞋene falimainageꞋya tima fale-latenaya kea ohavinao? Tamage tima fale-latenaya yamoꞋa Yisasi KalaisiꞋene aigaꞋmaeta agaiꞋene falunageno komufina hevailategeno NelafaꞋa tokiya hale yamaꞋaleti Kalaisina komufitila alino hetitenea kava huno tagaiꞋenena ali hetilateteno haegafa tahaimula tamigeta ali-mainonafe kanaleꞋya huta haegafa auꞋava yapi vaiyesune.

Tagaya KalaisiꞋene ailokaeta eteta tahaimula alita mainone.

Tagaya agaiꞋene aigaꞋmaeta agayama humainea kava huta faliteta aniꞋa huta agaiꞋene aigaꞋmaeta fali-mainefiti hetimainea kava huta hetigahune. Tagaya havimainone kefo yamo tokiya ago fali haꞋno hisiafe nayoma nehavuna atafa lagu tagesa Yisasi KalaisiꞋene aigaꞋmaeno yafaga yosale ago fali-maineanagita tagaya kefo yamo aliꞋya veaꞋne nagoꞋene omaisune. Fali-mainesia kanomona kefo yamoꞋa nagoꞋene atafa ohugahie. Hai falimaine. Tagaya KalaisiꞋene aigaꞋmaeta fali-mainesunana aniꞋa huta agaiꞋene fali-mainesupitila hetita maigahune huta tagupi havita malenone. Tagaya ago nehavune Yisasi KalaisiꞋa fali-mainefiti ago heti-maineafe nagoꞋene eteno ofaligahie. Fali yamoꞋa tokiyaꞋa omaletafa huno omaleneafe kava yagai oꞋategahie. 10 Nagoke yupa kanoꞋa kefo yamo tokiya hegaseno fali-maineafe nagoꞋene eteno ofaligahie. Haegafa haimu alino Anumaya Kotina haiya kava hisiafe maine. 11 NaꞋa humaineafe tamakaiꞋenena ani lamakesa havi havi hutama maiho, “Kalaisi falimainea avamete nagaya ago fali-mainoanagino kefo yamo tokiyamoꞋa nagoꞋene kava huonategahie. Yisasi KalaisiꞋene aigaꞋmaeꞋna Anumaya Kotina haisia kava hisue.” hutama hiho.

12 Na yafe kefo yamoꞋa “Ala kavatami mainoe.” huno falisia tamaugafamoꞋa “Age haꞋye hisia kava huo.” huno kava oꞋyagaisie. 13 Kefo kava hisaya yafena tamaiya, tamayana, tamaulaga, kefo yamote aliꞋyafena tamakuꞋa oꞋamiho. MukiꞋa Anumaya Kotina agaiꞋage amiho. Tamakaya falimainafiti hetimainaya veaꞋne mainagi tamaugafamoꞋa mukiꞋa kanale auꞋava yama alisiafe Anumaya Kotina amiho. 14 Tamakaya kahegi kemoꞋa tamaku tamamena aligatisiafe tamametitia nohagi “Anumaya KotiꞋa kayone hulateteno ago aligati-maine.” hutama nehae. Ani yafe kefo yamoꞋa tamakaila “Na kava hiho.” huno ala kavatamia omaitafa huno omaisie.

Tagaya fatago auꞋava yamo aliꞋya veaꞋne maisune.

15 Tagaya naꞋane hugahune? Kahegi kemo akave malesune huta tametitia nohunagi Anumaya KotiꞋa kayone hulatenea yafe havita tametitia nehuta kefo yana kanalelagita hisuno? AniꞋa ohutafa huta ohugahune. 16 Tamakaya ohavinao? Nago kanoma mukiꞋa lamaku tamakesa hakitama amitetama agai avaya ali hipoꞋya hutama maisayana ani kanomo aliꞋya veaꞋa maigahae. Kefo yama hu yamo aliꞋya veaꞋnema mainutamahena ani kefo yama nehaya anonaꞋa alitetama falitama agola Anumaya KotiꞋenena omaileꞋasinagi tamakaya Anumaya Koti kea akave male yamo aliꞋya veaꞋnema mainutamahena ani kema akave malaya anonaꞋa alisageno Anumaya KotiꞋa “Fatago veaꞋne mainae.” huno hulamategahie. 17 Tamage nayona tamakaya kefo yamo aliꞋya veaꞋne mainageno Anumaya Koti kea huhalagetama havilama hutama ago akave malenae. NaꞋa humainayafe Anumaya Kotina musena huneꞋatone. 18 Kefo yamoꞋma nofi hulamatenea yapitila Anumaya KotiꞋa ago alino kalu helamategetama fatago yamo aliꞋya veaꞋne mainae. 19 Kema havi yatamimoꞋa yaufa akavi ohuneafene huꞋna veaꞋmogata tagu tagesafiti nehuna kea tamahanepaugi haviho hagotetama tamaiya, tamayana, mukiꞋa yatamia “Kefo yamo aliꞋya nafaꞋne maiho.” hutama hu-mainayanagi menia tamaiya, tamayana, mukiꞋa yatamia fatago hisia yamo aliꞋyate aminutamahena Anumaya Kotina alu aotage veaꞋneꞋa maigahae.

20 Hagotetama kefo yamo aliꞋya veaꞋneꞋa mainetama fatago kavala ohisaya tamakesa havimainayane. 21 Kefo yamo aliꞋya veaꞋne mainetama ani kavala humainayafe anonatamia hana augafa kanale ya alimainae? Menia ani yafena tamakaye hisifa yamaꞋage hanegi anonaꞋa kanale yana oꞋalinae. Ago falitetama Anumaya KotiꞋenena omaisaya yamaꞋage ali falote humainae. 22 Kefo yamoꞋma nofi hulamatenea yapitila menia Anumaya KotiꞋa ago alino kalu helamateteno “AliꞋya veaꞋnimogatama maiho.” huno higetama mainageno ani aliꞋyamo anonaꞋa “Tamakaya alu aotage veaꞋneꞋniꞋa agola maige maige hisaya tamahaimula aligahae.” huno humaine. 23 Kefo yamo aliꞋya veaꞋmoꞋya anonaꞋamima alisaya yana fali yane. Faligahagi Anumaya KotiꞋa nagola muse yana afaꞋa nelamie. AnumayatimoꞋa Yisasi KalaisiꞋene ailokaeta mainonafe agola maige maige hisuna tahaimula ago tamine.

Copyright information for `KMU