a4:3Ohale 95:11; Yun 3:11
b4:4T Mabu 2:2
c4:5Ohale 95:11
d4:7Ohale 95:7-8
e4:8Tutumu 31:7; Yos 22:4
f4:10Yun 4:4
h4:14Yun 3:1; 10:23
i4:16Yun 10:19

Hebrews 4

Godote Hido Hawela Ami Hopo Ebeno Tawakalubi Mabuma꞉ Da꞉hiduimiya꞉

Ba꞉bema꞉ numa꞉la꞉, Godote dopamo aeno iniwala꞉tamo kebe tabo hibilo da꞉goiya꞉, ba꞉be tabote ka꞉lo aeno komoma꞉ bitana, iyo, ale ebeno Hido Hawela Ami Hopamo kona꞉pa꞉la꞉hama꞉ ebete modobo gabo atamo ikaa꞉miya꞉. Ba꞉be mabuma꞉ wadiyala aeno iniwalino komo ba emalagidolo ale tole komo lawete hidonomamo kemedenama꞉nema꞉, la꞉ ipuwalo etate ba꞉be Hido Hawela Ami Hopamo na꞉pa꞉gama꞉ hibo gabo ududikapoma꞉. Ba꞉ hibila, a ba꞉ma tetelo Hido Tabo keba ka꞉na kulihuya꞉ma꞉, aeno iniwala꞉te ba꞉ atumu dopamo Godokono tabo ulihuya꞉, huiyatiya ibino tabo uliho tetelo iba꞉te hido komo ebegodolo kumiya꞉ha꞉ mabu ebeno tabo hibima꞉ midi komodo kalawiya꞉ha꞉. Huiyatiya ba꞉ma tetelo a puya꞉te Godoko hibima꞉ da꞉midinama꞉ aeno komo eba ka꞉naha꞉, mabu a ebeno Hido Hawela Ami Hopamo hibinomolo kona꞉pa꞉la꞉hama꞉nema꞉, ebete atamo hibinomo tabo keba ka꞉na ka꞉goiya꞉ ba꞉ba ka꞉na.

Ba꞉ hibila, Godote ebeno hawela ami komoma꞉ ba꞉gala aeno iniwalino komoma꞉ ba꞉moe tabo dopamo a꞉goiya꞉,

“Naeno mauba ipuwalo
hibi tabonomo ba꞉ma ka꞉na goiya꞉mo,
‘Nale iba꞉tamo kebe hopo ikalamema꞉
dopamo demalagidoluya꞉mo,
na ukui hiya꞉ma꞉ miditi
ba꞉bene emedena emedena tetelo
iba꞉te naeno Hido Hawela Ami Hopamo a꞉kana꞉pa꞉la꞉hamena꞉!’”
Numa꞉la꞉, Godote ba꞉moe tabo goeheno, dopamo ebete alomo ba꞉gala hopo haba konomo ya꞉lo tetenomolo ododiliti, ba꞉be oko owati komo sa꞉ba꞉ni hegela tetelo da꞉wibuimiya꞉ hawela ba꞉bo amitiya꞉. a 
Iyo, ba꞉ hibila, Godokono Buka taboeno komokomo hiliyonomo ipuwalo sa꞉ba꞉ni hegeloeno komoma꞉ eta tabote ba꞉ma ka꞉na bitana, “Godote ebeno oko hiliyonomo hawaminalete sa꞉ba꞉ni hegela tetelo hawela bamitiya꞉.” b  Ba꞉bene ale ba꞉moe komo umima꞉, Godokono Bukalo ebeno hawela ami komoma꞉ eta tabote ba꞉ma ka꞉na kaitana, “Emedena emedena tetelo iba꞉te naeno Hido Hawela Ami Hopamo a꞉kana꞉pa꞉la꞉hamena꞉.” c 

Numa꞉la꞉, dopamo tetelo puya꞉te Godokono Hido Tabo dulihuya꞉, iba꞉te hibima꞉ midihino ebeno tabamo kapapamila꞉haliya꞉ha꞉, ba꞉bema꞉ iba꞉te ibino hido tete otate ebeno hawela ami komamo kana꞉pa꞉la꞉huya꞉ha꞉. Huiyatiya kalakala konomola, ba꞉ma tetelo gigihote a꞉hiya꞉midalo itana komopa꞉te ba꞉be atu hawela ami komamo hibima꞉ midi komodo kona꞉pa꞉la꞉hama꞉. Ba꞉moe komo ba꞉ ba꞉ma ka꞉nala, komo gogo hiliyonomate da꞉petolamiya꞉ Godote dopo tawakalubino hido tete ota komo ba emalagidolonape, ebete komo tawakalubi mabuma꞉ gala eta hegela bekaihatiya꞉, ba꞉be hegela ebete ka꞉lo hegelama꞉ goena. Ba꞉ hibila, ebeno Bukalo kebe tabote ba꞉be eta hegeloeno komo da꞉hawakalimina ale dopamo umima꞉, iyo, Godote ba꞉be tabo Da꞉ibidiko ipuwado ba꞉ma ka꞉na goiya꞉,

“La꞉ huiyatiya ka꞉lo hegelalo Godokono tabo dulima,
ebetamo wato kodakodahibima꞉ akeda꞉hala꞉!” d 
Ba꞉bema꞉ numa꞉la꞉, puya꞉te Godokono dopo tabo dulihuya꞉, ebeno okodawa Yosuwate ibi hibi hawela ami komamo na꞉magataliya꞉tale, Godote galane tetelo eta hido hegeloeno komoma꞉ Da꞉ibidigodone ba꞉ka꞉goiya꞉na꞉. e  Ba꞉be mabuma꞉ a ba꞉moe komo iya꞉tawahala, eta hibi hawela ami komote Godogodolo bitana ebete ebeno tawakaluba꞉tamo kikalamema꞉, iyo, ebete sa꞉ba꞉ni hegelalo ebeno oko owati komone hawela keba ka꞉na kamitiya꞉, ale ba꞉ba ka꞉na ba꞉be atu hawela ami ipuwamo kona꞉pa꞉la꞉hama꞉nema꞉. 10 Ba꞉bema꞉ hibila, kebe lumagiti Godokono hibi Hawela Ami Hopamo da꞉na꞉pa꞉gamene, ebete ebeno oko owati komone hawela ba꞉bo konamima꞉ne, Godote dopamo ebeno oko owati komone hawela keba ka꞉na kamitiya꞉ ba꞉ba ka꞉na. f  11 Ba꞉bema꞉ wadiyala a hibima꞉ midipa꞉te oko owati ipuwalo helonomoma꞉ keda꞉hama꞉nema꞉, ale ba꞉be Hawela Ami Hopamo hibilo kona꞉pa꞉la꞉hama꞉, mabu puya꞉te Godokono tabo dopamo dulihuya꞉, iba꞉te ibino hibima꞉ midiha꞉ komodo hibo gabo keba ka꞉na ka꞉nududiya꞉, a hiliyonomo ipuwalo eta kapiyate ba꞉ba ka꞉na nega modoboha꞉.

12 Ba꞉moe komo ba꞉ hibila, Godokono tabote ba ka꞉ka꞉na tawakalubino tepo ipuwalo oko helonomamo owatina, gihanomo kiyokiyo gili keba ka꞉nala꞉ka꞉ ba꞉ba ka꞉na, iyo, ebeno gihate komo hiliyonomo alaholoho gilino giha na꞉gogolena. Ba꞉bema꞉ Godokono tabote lumagino ukui mabamo a꞉pa꞉ganomo a꞉pa꞉ganako, ba꞉be lumagino tepo ipuwoeno ukui ba꞉gala gobogoboeno ukui hidonomamo kanagilamelemema꞉. Iyo, ba꞉ hibila, tawakaluba꞉godolo da꞉pola꞉na, Godote ba꞉bi tepo ipuwoeno ubi komo ba꞉gala emalagidolo komo ebeno tabamo ba anagilamelelame, ba꞉bi hiya꞉hiya꞉ komo hiliyonomo ba꞉bo hawakalilamenako. g  13 Ba꞉bema꞉ numa꞉la꞉, Godote hiya꞉hiya꞉ hiliyonomo komo ba iya꞉tawa, tawakaluba꞉te ebegodone eta komo ugumui modoboha꞉, iyo, hopo haba konomolo ba꞉gala alomo hunulu da꞉pola꞉na ebete ba꞉bi komokomo hiliyonomo ebeno baida꞉mo hibinomolo nulamena. Ba꞉moe mabuma꞉ galane tetelo a hiliyonomate aeno ododili komo ipuwalo eta kapiya komo ugumui gabo umihino Godokono holoholo hapuamo ba꞉ba ka꞉na da꞉nikulima꞉, ebete ha꞉kiya aeno komo ba anagilamelea꞉me, ale aeno kuba ododili huiya uwate ipuwalo ale ebe duhimima꞉ eta tabo ga꞉lama꞉ a꞉kamodobama꞉.

Ya꞉suti A Mabuma꞉ Godotamo Hawa꞉goeno Ikamehopino Hununomo Watodawama꞉ Deda꞉na

14 Ba꞉moe ba꞉be mabuma꞉ ale tawakaluba꞉tamo kebe hibima꞉ midi komo ka꞉hawakaliminakoma꞉, wadiyala a ba꞉be komo kodakodanomolo katila꞉nama꞉nema꞉, mabu Ya꞉suti a mabuma꞉ Godotamo hawa꞉goeno ilina ikamehopino Hununomo Watodawama꞉ eda꞉na, iyo, ebe Godokono Guduma꞉ ba eda꞉na Godokono holoholo hapuamo a꞉nuluhukuya꞉ emedena emedena tetelo a kowalubinama꞉. h  15 Ba꞉bema꞉ a mabuma꞉ Godotamo hawa꞉goeno ikamehopino Watodawama꞉ deda꞉na, dopamo ebete hopo habalo ba emedena Saitanate komo hiliyonomo tetelo ebetamo hiya꞉hiya꞉ kuba emogabuimi gabodo penakui, atamo keba ka꞉na ka꞉penako ba꞉ba ka꞉na. Ba꞉ hibila, Ya꞉suti ba꞉be komone aeno apeno hiya꞉hiya꞉ heloha꞉ komo ba iya꞉tawana, ba꞉be mabuma꞉ ebete a na꞉malemalea꞉tena. Ba꞉bema꞉ numa꞉la꞉, ale aeno heloamo kuba gabamo emogabuimi komone alahutiho kamodobonaha꞉, huiyatiya kalakala konomola, Ya꞉suti a owalubi modobola, mabu dopamo ebete Saitanatamo papamiwataheno eta kapiya tetelo eta kuba kododiya꞉ha꞉. 16 Ba꞉moe ba꞉be mabuma꞉ wadiyala ale Godokono Ko Gawadalagi luta baha꞉mo toleheno konikulima꞉nema꞉ aeno kuba ododili mabuma꞉ ebeno malemale ale ba꞉bo konelawema꞉. Iyo, hibila, a ha꞉kiya a owalubima꞉ modoboha꞉ma꞉ ba eda꞉hana, huiyatiya ebeno malemale komote modobolo itana aeno kuba ododili komo hiliyonomo kegebolea꞉mema꞉. i 

Copyright information for `KNVARAMIA