Luke 12

Ya꞉suti Ma꞉lapila Netewa Komoma꞉ Tabo Dolamagiya꞉

Ma꞉t 10:26-27

Eta tetelo tawakalubi hiliyonomate Ya꞉suku umima꞉ da꞉kapiyuimiya꞉ iba꞉te emokatihuia꞉go pelamitiya꞉, etate eta emokamidanakui, etate eta emokamidanakui, ba꞉ba ka꞉na ewagelitiya꞉. Ba꞉ba tetelo Ya꞉suti ebe ta꞉matapi na꞉goelamiya꞉, “La꞉ hidamo! Palawa baa꞉te ha꞉kiya hunamo da꞉mahiga, Pa꞉lisi kapiyuimipino awagaha komo ba꞉ba ka꞉nala. Ba꞉bema꞉ ba꞉mako awagaha komote la꞉tamo akuluhukala꞉, mabu ba꞉be awaga komo ba꞉ ibino ma꞉lapila netewa komola. Numa꞉la꞉, kebe ihilatehole komate da꞉pola꞉na galane tetelo Godote kohawakalilamema꞉ne, ba꞉gala awalelahale komate da꞉pola꞉na galane tawakaluba꞉te kulameholema꞉na꞉. a  Ba꞉bene la꞉le du tetelo dolamagiminakoma, tawakaluba꞉te huiyatiya alo tetelo kulihoma꞉na꞉, ba꞉gala genama gulu la꞉le ganalo da꞉ga꞉lanakoma, ba꞉bi komokomoma꞉ iba꞉te tabo madodo ba adipate tawakalubi hiliyonomatamo kohawakalilamema꞉na꞉.”

La꞉ Poko Na꞉ka꞉tolemeonama

Ma꞉t 10:28-31

Ba꞉bene Ya꞉suti gala na꞉kagoiya꞉, “Naeno mabuluba꞉la꞉, nale la꞉tamo goemo, ape anakapulame iya꞉tawahapi akatolelama꞉la꞉. Iba꞉te la꞉ danakapulamemena꞉, iba꞉godolo eta helote a꞉kitanamene la꞉eno gobogoboeno ka꞉ka꞉ kubahilamema꞉. Ba꞉bema꞉ la꞉ poko na꞉ka꞉tolemeonama? Ebe ba꞉ Godotela, la꞉ ebe na꞉tolemenala꞉, mabu ebegodolo helo bitana tawakalubi anakapulamete Koe Habamo iya꞉hekema꞉. Iyo, na hibi tabo begoemo, ebe kapiya na꞉tolemenala꞉!

“Numa꞉la꞉, tawakaluba꞉te paibo de holahola netewa toea mana꞉mo uwateholo ba꞉bi holaholoeno ka꞉ka꞉ kokoha꞉ma꞉ ga꞉lanaka, huiyatiya Godote ba꞉bako deha꞉poto hola kapiya a꞉kadodamene. Ba꞉gala ba꞉moe komo ba꞉ hibila, la꞉eno watoeno hinibo hiliyonomo Godote ya꞉lo tetelo a꞉ka꞉lamiholiya꞉, iyo, la꞉eno hiya꞉hiya꞉ komo ebete iya꞉tawanomola. Ba꞉bema꞉ la꞉ ukui bilibilima꞉ akeda꞉hala꞉. Ebeno malemale holaholatamo hibilo bitana, huiyatiya ebeno malemale la꞉tamo konomoma꞉ eda꞉te emedena tetelo bitanamene!” b 

Tawakalubino Holoholo Hapulu Ya꞉suku Hawakalimi Komo

Ma꞉t 10:32-33; 12:32; 10:19-20

Ba꞉bene Ya꞉suti gala na꞉kagoiya꞉, “Nale la꞉ begoelamemata, kebe lumagiti hawakala da꞉goemene, ‘Na Ya꞉suku ta꞉matadawala,’ na Tawakalubino Naniwiti ba꞉ atumu Godokono nopopino holoholo hapulu kogoema꞉nemo, ‘Ba꞉moe lumagi ba꞉ naeno ekawila.’ Huiyatiya kebe lumagiti na iya꞉tawaha꞉ma꞉ hawakala da꞉goemene, na ba꞉ atumu Godokono nopopa꞉tamo ebe iya꞉tawaha꞉ma꞉ kakagoema꞉nemo.

10 “Ba꞉gala kebe lumagiti Tawakalubino Naniwino komoma꞉ duhimi tabo dolamagimini, Godote ebeno kuba egeboleme iya꞉tawala, huiyatiya kebe lumagiti Godokono Gobogoboeno ododi komoma꞉ kubama꞉ da꞉goemene, Godote ba꞉be kuba egebolemete a꞉kadodoma꞉mene.

11 “Ba꞉bema꞉ iba꞉te la꞉eno komo kanagilamelelamema꞉ Yu tawakalubino baidi ibubulamehole genamamo la꞉ da꞉magatalemena꞉, ba꞉ba tetelo la꞉le gabomani dubu ba꞉gala komo koko dubu iba꞉tamo kebako tabo ga꞉lama꞉ ukui bilibilima꞉ akeda꞉hala꞉, ba꞉ma ka꞉na, ‘Na kebe tabo na꞉ka꞉goemo? Ba꞉gala na iba꞉tamo tabo keba ka꞉na na꞉ka꞉huiyamo?’ c  12 Numa꞉la꞉, Godokono Gobogobote ba꞉ba tetenomolo la꞉le iba꞉tamo dolamagimima ba꞉be tabo la꞉ kiya꞉tulamema꞉na꞉ta.”

Daedae Dogodogodawoeno Iya꞉tulame Uwi

13 Ba꞉bene tawakalubi hiliyonomate Ya꞉sukuba꞉ da꞉pola꞉nuya꞉, eta lumagiti ibi ipuwalo ebetamo na꞉goiya꞉, “Iya꞉tulamedawa, naeno naniwi na꞉kiyama꞉, aeno nabiwiti atamo da꞉miya꞉palea꞉mi ba꞉bi dogodogo ilina ebete hidamo nalabala꞉mene.”

14 Ya꞉suti ebetamo na꞉huiyuya꞉, “Dubu, ama꞉ pote ka꞉kiyamiti nale la꞉eno komo anagiya꞉midadawama꞉ keda꞉ma꞉?” 15 Ba꞉bene ebete tawakalubi hiliyonomatamo na꞉goiya꞉, “La꞉ hidamo! Ilina uwate ubi komote la꞉tamo akuluhukala꞉, mabu lumagiti hiliyonomo ilina ba uwate hibi ka꞉ka꞉ ebo a꞉kuma꞉mene.” d 

16 Ba꞉bene Ya꞉suti eta iya꞉tulame uwi iba꞉tamo ba꞉ma ka꞉na olamagiya꞉, “Eta ilina dogodogodawate nemedenami, ebeno hakalo pali ilinate konomamo apepehonama꞉. 17 Ba꞉bene ebe ha꞉kiya ebeno ukuilo na꞉goi, ‘Naeno pali ilina miya꞉teno genama modobolo kapola꞉naha꞉, ba꞉bema꞉ na bada komo na꞉kododimo? 18 Ehe! Na ba꞉ma ka꞉na kododima꞉nemo. Nale naeno pali ilina miya꞉teno genama anabulilamete uliuli koko genama gala kaketemotema꞉nemo, ba꞉bene ba꞉bi genama ipuwamo naeno pali ilina ba꞉gala komo koko ilina komiya꞉tema꞉nemo. 19 Ba꞉ba tetelo nale naeno tepo ipuwalo kogoema꞉nemo, ‘Na konomo dubula! Na koko ilina hidonomamo a꞉miya꞉timo, ba꞉bema꞉ na komo hiliyonomo gogolo kodakoda oko owatihino, na baa꞉ kana, helo gao beya kani, ba꞉ba ka꞉na kalakalago dito bemedenamo!’ ’ 20 Huiyatiya Godote ebetamo na꞉goi, ‘Ama꞉ daedae lumagilata! Ka꞉lo dulu nale amia꞉no ka꞉ka꞉ kolawemema꞉nemata, ba꞉bene ama꞉ ha꞉kiya amia꞉no komoma꞉ da꞉miya꞉tenama꞉ ba꞉bi ilina hiliyonomo pote na꞉kuwatemene?’”

21 Ba꞉bema꞉ Ya꞉suti ebeno kuititi tabo ba꞉ma ka꞉na goiya꞉, “Lumagi ha꞉kiya ebeno komoma꞉ ilina ba dogodoguilame huiyatiya ebeno tepo ipuwamo Godokono hidohido komo miya꞉teheno, ebe ba꞉ ba꞉bako daedae dawala.” e 

Godoko Hibima꞉ Midi Komo

Ma꞉t 6:25-34

22 Ba꞉bene Ya꞉suti ebe ta꞉matapa꞉tamo na꞉goiya꞉, “Nale la꞉ begoelamemata, la꞉eno emedeho komokomoma꞉ akaukuibilibilihonala꞉, iyo, la꞉le naha ilina ba꞉gala pupulino ilina uwatema꞉ koamo akemalagidola꞉la꞉. 23 Numa꞉la꞉, naha ilina ba꞉gala pupulino ilina iba꞉te kokoma꞉ keda꞉hanaha꞉, mabu naha ilinate lumagitamo hibi ka꞉ka꞉ a꞉kikama꞉mene, ba꞉gala pupulino ilinate atumu ebeno ape emedena tetelo a꞉kowalubinamene. 24 Ba꞉bema꞉ la꞉ owa holaholoeno komo nemalagidolala꞉, iba꞉te pali ilina a꞉kamihala꞉ ba꞉gala iba꞉te pelamete nahoeno kikipo a꞉kapetapihala꞉, iyo, ibino pali ilina miya꞉teno genama puliyala, huiyatiya Godote iba꞉tamo baa꞉ modobolo ikalamenako. Numa꞉la꞉, Godokono malemale hibilo bitana holaholatamo, huiyatiya ebeno malemale la꞉tamo konomoma꞉ eda꞉te emedena emedena tetelo bitanamene! 25 Ba꞉bema꞉ la꞉ ukui bilibilima꞉ akeda꞉hala꞉. Lumagi ebe ha꞉kiya ebeno hoe tete eta hegelamo keba ka꞉na na꞉kihatemene, ba꞉gala ebete ebeno ka꞉ka꞉ keba ka꞉na na꞉ka꞉ga꞉gima꞉tepamene? Gabo puliyala, kitanaha꞉! 26 Numa꞉la꞉, la꞉ la꞉eno ka꞉ka꞉ tete nanekela꞉mo ga꞉gilama꞉tepale modoboha꞉, ba꞉bema꞉ mabu keka꞉ la꞉ komo komokomoma꞉ dukuibilibilihonama?

27 “La꞉ hopoeno haiyaino komo nemalagidolala꞉, iba꞉te oko a꞉kowata꞉la꞉ ba꞉gala pupulino ilina a꞉kododila꞉la꞉. Nale la꞉ begoelamemata, Ko Gawadalagi Solomonote ilina dogodogodawanomoma꞉ eda꞉nami, huiyatiya ebete hidohido tita꞉goeno ilina da꞉pupulinakui, ba꞉bi kalikoeno titi ba꞉moe hopoeno haiyaino hido komote na꞉gogolena. 28 Numa꞉la꞉, ba꞉moe hopoeno hemate ka꞉lo napepehuta, dumutu tawakaluba꞉te koa꞉mo kiya꞉hekema꞉na꞉, huiyatiya Godote ba꞉bi nonoka ilina tita꞉goenoma꞉ midilina, ba꞉bema꞉ ebete atumu la꞉tamo pupulino ilina modobolo bikalamenakomena꞉ta. La꞉ ba꞉moe komo hidamo iya꞉tawahaheno la꞉eno hibima꞉ midi komo Godotamo kokoha꞉! 29 Ba꞉bema꞉ naha ilina ba꞉gala beya niho komo konomamo akemalagidolenala꞉, ba꞉gala ukui bilibilima꞉ akeda꞉hanala꞉. 30 Ba꞉moe hopo konomolo tawakaluba꞉te ba꞉moi ilina ukui bilibila꞉go oholena, la꞉ huiyatiya eba ka꞉na akewagelenala꞉, mabu ba꞉bi ilina la꞉godolo modobolo pola꞉naheno, la꞉eno Nabiwiti ya꞉lo iya꞉tawanako. 31 Ba꞉bema꞉ la꞉ Godote Ko Gawadalagima꞉ deda꞉na ba꞉be komo dopamo nohowada꞉la꞉, ba꞉bene la꞉eno modoboha꞉ tetelo ebete la꞉eno komokomo ulamelelamete la꞉tamo modobolo bikalameholenakomena꞉ta.”

Godokono Hunu Habalo Ilina Dogodoguilame Komo

Ma꞉t 6:19-21

32 Ba꞉bene Ya꞉suti gala na꞉kagoiya꞉, “La꞉ naeno sipi-goegoe kapiyuimi deha꞉potolata, ba꞉bema꞉ la꞉ akatoletolehala꞉! Godote Ko Gawadalagima꞉ deda꞉na ba꞉be hido komo la꞉eno Nabiwiti ubila la꞉tamo ikalame. 33 Ba꞉bema꞉ la꞉ tolamete la꞉eno ilina hiliyonomo nekolowamiholete awaepa꞉tamo mani na꞉nikalamehola꞉la꞉, iyo, la꞉ ba꞉be gabodo wiboha꞉ mani kuiha nododila꞉la꞉, ba꞉ma ka꞉na la꞉eno hidohido ilinate Godokono Hunu Habalo ba꞉nepola꞉lama꞉namena꞉ta. Ba꞉bi ilinate ba꞉bolo a꞉kawibohamena꞉, iyo, pilo tawakaluba꞉te a꞉kuwata꞉mena꞉ ba꞉gala unawa꞉te a꞉kanala꞉mena꞉. f  34 La꞉ hidamo! La꞉eno ilinate kebolo da꞉pola꞉namena꞉ la꞉eno tepo ipuwoeno ukui atumu ba꞉bolo konepola꞉nama꞉na꞉.”

Uliholo Emedena Komo

35 Ba꞉bene Ya꞉suti gala na꞉kagoiya꞉, “La꞉ hidamo! Diyala, eta komote la꞉tamo da꞉ pemene, ba꞉bema꞉ la꞉eno kaliko pupuliti na꞉hidala꞉ ba꞉gala alo na꞉pa꞉tihala꞉. g  36 Iyo, ko dubuino okopa꞉te ebeno pe komo uliholo keba ka꞉na ka꞉latimina, wadiyala la꞉ ba꞉ ba꞉ba ka꞉na nemedeniya꞉la꞉. Numa꞉la꞉, ba꞉be ko dubuti uli kamenago kapiyama꞉ eda꞉te poko habane da꞉pemene, ebeno okopa꞉te ebeno pe komo dulimina꞉ gigiho kalakalago ebetamo dito ka꞉hiya꞉midamema꞉na꞉. 37 Ba꞉bene ko dubuti da꞉pemene ibino kalakala konomoma꞉ keda꞉ma꞉ne, mabu iba꞉te ebetamo uliholo ba emedena ebete ibi ba꞉bo pulame. Nale la꞉ begoelamemata, ebete ibino hido komo pulamelelamete ebete ebeno atuino kaliko pepekanate ebe ha꞉kiya iba꞉tamo huiyaha꞉ okodawama꞉ ba pimidi, okopa꞉te gagahiditi ebete iba꞉tamo hido baa꞉ ba꞉bo kopikalamema꞉ne. 38 Diyala, ko dubuti iwa tetelo da꞉ pemene o owaloho hapuamo da꞉ puluhukumini, ba꞉bema꞉ okopa꞉te ebetamo ba ulihona, ebete iba꞉tamo da꞉pemene iba꞉te koamo kokalakalahama꞉na꞉.

39 “Ba꞉gala ba꞉moe eta komo na꞉kemalagidolala꞉. Genama namutudawate pilo lumagino pe tete diya꞉tawamene ebete ba꞉ba teta꞉mo kulihonama꞉ne, mabu ebe ubihinola pilo dawate ebeno genamamo popegama꞉. h  40 Ba꞉bema꞉ la꞉ atumu na꞉hidala꞉, mabu diyala, la꞉ ulihoheno ba emedena Tawakalubino Naniwiti ba꞉bo da꞉ pemene.”

Mulu Okodawa Ba꞉gala Daedae Okodawa Ibino Komo

Ma꞉t 24:45-51

41 Ba꞉bema꞉ Pitate Ya꞉sutamo na꞉goiya꞉, “Kodawa, ama꞉ ba꞉moe iya꞉tulame uwi a kapiyatamo ka꞉gaa꞉wa o hiliyonomo tawakaluba꞉tamola꞉ka꞉?”

42 Huiyatiya Kodawa Ya꞉suti na꞉goiya꞉, “Namutudawatamo da꞉papamiwatanako ba꞉be mulu okodawoeno komo keba ka꞉nala꞉ka꞉? Ba꞉ hibila, oko namutudawate ebe lawete komo okopi ulamedawama꞉ kihatema꞉ne, ba꞉ma ka꞉na ebete ibino baa꞉ naha tetelo iba꞉tamo modobolo kikalameholema꞉ne. 43 Ba꞉bene ba꞉be muludawate oko hidamo ba owatina, ebeno namutudawate pete ebeno komo da꞉pumimini, ba꞉be okodawate koamo kokalakalama꞉ne. 44 Na la꞉tamo hibi tabo begoemo, namutudawate ba꞉be mulu okodawoeno komoma꞉ atumu ba pekalakala, ebete ebe ebeno ilina hiliyonomo ulamedawama꞉ kihatema꞉ne. i 

45 “Huiyatiya ba꞉be okodawate kuba ukui lawete ebeno tepo ipuwalo ba꞉ma ka꞉na da꞉goemene, ‘Naeno oko namutudawate tete ga꞉ga꞉dopolo nemedena, tiyolo kapenaha꞉,’ ba꞉ba tetelo ebete oko owatihino ebeno namutudawoeno baa꞉ koamo nate helo gao beya ba꞉bo konima꞉ne, ba꞉bema꞉ ebete daedaema꞉ eda꞉te komo okopi dubu ba꞉gala kamenakamena alukuli ba꞉bo kotupuimima꞉ne. 46 Ba꞉bene ba꞉be daedae okodawate ulihoheno ba emedena ebeno namutudawoeno pe komo a꞉kiya꞉tawamene. Ba꞉ba tetelo namutudawate pete daedae okodawa koamo panagalimihote komo kuba ododilipa꞉go konoemema꞉ne ebeno kuba huiya konelawema꞉.

47 “Ba꞉ hibila, kebe okodawate ebeno namutudawoeno ubi komo iya꞉tawate huiyatiya hido komo ododihino, namutudawate ebe kukamo kopanagalimihoma꞉ne. j  48 Huiyatiya eta okodawate ebeno namutudawoeno ubi komo iya꞉tawaheno ebete eta kuba ebetamo dododimini, namutudawate ba꞉be kuba mabuma꞉ huiya kopikamema꞉ne huiyatiya koamo a꞉kapanagalimihamene. Numa꞉la꞉, tawakaluba꞉te eta lumagitamo hidohido ilina dikamehomena꞉ iba꞉te konomamo gala uwatemema꞉ kakaga꞉lama꞉na꞉. Ba꞉ ba꞉ba ka꞉na Godote kebe lumagitamo hidohido komo hiliyodopo dikamehomene, ebete ba꞉be lumagino emede ipuwalo atu hidohido komo ba꞉koholemenakomene.”

Ya꞉suti Tawakalubino Alaholo Mabuma꞉ Eda꞉na

Ma꞉t 10:34-36

49 Ba꞉bene Ya꞉suti gala na꞉kagoiya꞉, “Na hopo habanapa꞉tamo Godokono koe badahiya꞉mo, iyo, ibino kuba huiya mabuma꞉ na ubila Godote ba꞉moe hopo tiyolo kemadomema꞉. 50 Huiyatiya numa꞉la꞉, Godoko ubila ebete na hoe ipuwamo kadunatenema꞉, ba꞉bema꞉ ba꞉be komote peheno nale dopamo hopo habanapino kuba mabuma꞉ eta huiya iba꞉tamo a꞉kikalama꞉mo. k  51 La꞉ na꞉kemalagidolutama nale ba꞉moe hopamo gelebadi adahema꞉ pe? Ao, na tawakaluba꞉tamo gelebadi ikalamema꞉ kapiya꞉ha꞉, ibi anagiya꞉midalema꞉ piya꞉mo. 52 Numa꞉la꞉, naeno tabo komokomoma꞉ anagiya꞉mida komote tawakalubi ipuwalo kuluhukuma꞉ne. Ba꞉bema꞉ ba꞉ma tetene tupuimiti eta genamalo paibo badininipalate da꞉pola꞉namena꞉ ibi teta꞉mo anagiya꞉midalete, netewa-kapiyate netewatamo alaholopima꞉ keda꞉ma꞉na꞉ ba꞉gala netewate netewa-kapiyatamo atumu alaholopima꞉ kakeda꞉ma꞉na꞉. 53 Iyo, iba꞉te ba꞉ma ka꞉na kalaholohoma꞉na꞉, naba꞉te ibino kuhia꞉tamo ba꞉gala kuhia꞉te ibino naba꞉tamo, menokoba꞉te ibino bohelemela꞉tamo ba꞉gala bohelemela꞉te ibino menokoba꞉tamo, kamenakamenate ibino awino menokoba꞉tamo ba꞉gala ba꞉bi menokoba꞉te iba꞉tamo.” l 

Ya꞉suti Tawakalubino Iya꞉tawaha꞉ Komoma꞉ Da꞉goiya꞉

Ma꞉t 16:2-3

54 Ba꞉bene Ya꞉suti hiliyonomo tawakaluba꞉tamo na꞉goiya꞉, “La꞉ hegelate da꞉nihitigana ba꞉ba hapulu bubu odolonalo dumima, la꞉ ba꞉ma ka꞉na koga꞉lama꞉nemata, ‘Wegolate koma꞉ne,’ ba꞉bene ba꞉be komote hibima꞉ keda꞉ma꞉ne. 55 Ba꞉gala eta komo. La꞉ huhu ba꞉gala gogo ibino mauba komo dumima ba꞉ma ka꞉na koga꞉lama꞉nemata, ‘Hegelate koenomoma꞉ keda꞉ma꞉ne,’ ba꞉bene ba꞉be komote hibima꞉ keda꞉ma꞉ne. 56 Iyo, la꞉ hopo haba ba꞉gala alomo ibino komokomo ulame iya꞉tawahala, huiyatiya ba꞉ma tetelo Godote la꞉ ipuwalo dododilina ba꞉bi komoeno ipuwa la꞉ hidamo badama꞉ kiya꞉tawahanaha꞉? Mabu la꞉ ba꞉ ma꞉lapila netewa tawakalubilata!”

Amia꞉no Alaholodawago Gelebadima꞉ Eda꞉ Komo

Ma꞉t 5:25-26

57 Ba꞉bene Ya꞉suti ebeno tabo moga꞉melo gala na꞉kagoiya꞉, “Bada mabuma꞉ la꞉ ha꞉kiya la꞉eno komo hidamo kanagilamenaha꞉? 58 Ama꞉tamo da꞉maubana ba꞉be lumagiti ama꞉ gabomani ko dubutamo da꞉magatamena꞉, la꞉ ebetamo nuluhukuhino wadiyala ama꞉ dopamo alaholodawago gelebadima꞉ na꞉nediya꞉la꞉. Ama꞉ ebe gelebadimihino, hibila, ebete ama꞉ ko dubutamo komagatama꞉na꞉ta, ba꞉bene ko dubuti huiyatiya amia꞉no kuba anagiya꞉midamete ama꞉ polisi dubutamo ba noeme, ebete ama꞉ du genama guamo ba꞉bo konihatema꞉na꞉ta. 59 Na ama꞉tamo na꞉goemo, ama꞉ du genama gulu ba nemede, gabomani dubuti kebako tete huiyama꞉ ama꞉ da꞉kiyamemena꞉, ama꞉le ba꞉bako huiya modobotenomo modobotete habamo gala kakapema꞉na꞉ta, huiyatiya ama꞉le ba꞉be huiya modoboteheno a꞉kuluhukamena꞉ta.”

Copyright information for `KNVARAMIA