c1:4-5Ikuli 3:14-15; Ohale 89:27; Kol 1:18; Haw 3:1; 4:5
d1:61Pit 2:9; Haw 5:10; 20:6
e1:7Da꞉n 7:13; Sek 12:10; Ma꞉t 24:30; Yon 19:34-37; 1Tes 4:17
g1:13Da꞉n 7:13; 10:5
h1:14Isi 43:2; Da꞉n 7:9; 10:6; Haw 2:18; 19:12; 14:2
i1:16Yun 4:12; Haw 2:12; 19:15
j1:17-18Ais 44:6; 48:12; Haw 2:8; 22:13

Revelation of John 1

Ba꞉moe Buka Ka꞉lamiholedawoeno Kalakala Komo

Ba꞉moe hopolo tete tatalilo dikulihomena꞉, Ya꞉su Kelisote ba꞉bi komokomo ebeno huiyaha꞉ okopa꞉tamo ba꞉moe bukalo hawakalilamena. Ba꞉ hibila, Godote ba꞉bi komo Ya꞉sutamo dopamo hawakalilamete, ba꞉bene ebete ebeno nopodawa na ebeno huiyaha꞉ okodawa Yonetamo poemi, nale ba꞉bi atu komo ebegodone hidamo kiya꞉tawama꞉. a  Ba꞉bema꞉ na Yonete kebe komo nopodawagodolo dulamimo, nale ba꞉bi hiya꞉hiya꞉ komo ba꞉moe bukamo miya꞉tehomo, iyo, kebe tabo komokomo Godogodone natamo da꞉pikuli ba꞉gala Ya꞉suti natamo kebe hibi komokomo da꞉hawakalilami, nale ba꞉moe bukalo ba꞉bi hiliyonomo komo ama꞉ buka ka꞉lamiholedawatamo olamagitamo. Ba꞉bema꞉ lumagiti ba꞉moe bukoeno tabo da꞉ka꞉lamiholemene, ebete na꞉kalakalamene! Ba꞉gala puya꞉te ba꞉moe bukoeno tabo ulihote da꞉papamila꞉hamena꞉, iba꞉te na꞉kalakalahamena꞉! Ba꞉ hibila, Godote kebe hiliyonomo komo ba꞉moe bukalo da꞉hawakalilamena, tete tatalila ba꞉bi komate kikulihoma꞉na꞉. b 

Yonete Sa꞉ba꞉ni Sosa꞉tamo Nolata Tabo Doemiya꞉

Na Yonete ba꞉moe bukoeno tabo komokomo A꞉isiya hopoeno sa꞉ba꞉ni habahaboeno sose tawakaluba꞉tamo poelamitamo.

Ba꞉moe hopo tupuimihino Godote dopamo nemedenami, ba꞉gala ba꞉ma tetelo ebete bemedena, ba꞉gala ebete emedena emedena tetelo bemedenamene. Ba꞉ hibila, ebeno Gobogoboeno sa꞉ba꞉ni komate ebeno Ko Gawadalagi luta bahi dopo hapulu la꞉mota꞉hana. Ba꞉gala ebeno hibi komo hawakalimidawa ba꞉ Ya꞉su Kelisotela, ebe ba꞉ hoe ipuwane da꞉mahiguya꞉ ba꞉be Dopodawala, ba꞉gala ebe hopo haboeno hiliyonomo koko gawadubuino Namutudawala. Ba꞉bema꞉ wadiyala malemale komo ba꞉gala hete komote la꞉ hibima꞉ midipi ipuwalo na꞉pola꞉namena꞉, mabu ba꞉bi netewa komate Godogodone ba꞉gala ebeno Gobogobogodone ba꞉gala Ya꞉sugodone la꞉tamo puluhukuna.

Ba꞉ hibila, Ya꞉suti a malemalelo emalagidoloena, ba꞉gala ebete ha꞉kiya ebeno hawa꞉mo a aeno kuba ododili ipuwane uluhukua꞉tete, c 
ebeno Ko Gawadalagi habanapima꞉ a꞉midiya꞉, ale emedena tetelo ebeno Nabiwi Godokono oko kowatinama꞉. Ba꞉bema꞉ wadiyala konomo awagaha komo ba꞉gala konomo helo komote Ya꞉su Kelisogodolo emedena emedena tetelo na꞉pola꞉namena꞉! Ba꞉moe tabo hibinomola, ba꞉ba꞉la! d 

Mu numitota꞉la꞉, ebete hawai ipuwado puluhukuta! Ba꞉bema꞉ hopo habanapi hiliyonomate ebe ibino baida꞉mo kumima꞉na꞉, ba꞉gala puya꞉te ebe ba anakapumi tabilo kibila꞉mo dahohamiduya꞉ iba꞉te ebe ba꞉ atumu kakumima꞉na꞉, iyo, ba꞉moe hopo konomolo demedehona ba꞉bi tawakalubi hiliyonomate ibino hiya꞉hiya꞉ tama kapiyuimi ipuwalo ebe eba toleme konomamo ba꞉bo kihimitama꞉na꞉. Ba꞉bema꞉ wadiyala ba꞉be tetete hibilo nuluhukamene! e 

Kodawa Godote na꞉goena, “Na ba꞉ Mabula ba꞉gala na ba꞉ Kuititila!” Ba꞉ hibila, ebe Helonomodawala, ebete ba꞉moe hopo tupuimihino dopamo nemedenami, ba꞉gala ebete ba꞉ma tetelo bemedena, ba꞉gala ebete emedena emedena tetelo bemedenamene! f 

Yonekono Baiditi Hiya꞉ma꞉ Ba Eda꞉hame Ya꞉suku Dumiya꞉

Na ba꞉ Yonetela, a hibima꞉ midipino badininipala ipuwalo na ba꞉ ekawi etala. Iyo, na ba꞉gala la꞉, a ba꞉ puya꞉te Ya꞉suku ta꞉mata mabuma꞉ koko temeteme ipuwalo kapimilo demedehonama꞉ ba꞉bi tawakalubila, huiyatiya a ebeno Ko Gawadalagi habanapima꞉ ba eda꞉hana aeno tepo ipuwa kodakoduilamete heloha꞉ma꞉ keda꞉hanaha꞉.

Ba꞉ hibila, nale Godokono tabo komokomo ba꞉gala Ya꞉sukunu hibi komo tawakaluba꞉tamo dolamaginakomo, ba꞉bema꞉ Loma gabomana꞉te na lawenete kehaha꞉ kolomoeno Pa꞉tamoso haka deha꞉potoamo oenamiya꞉ nale naeno kuba huiyama꞉ oko ba꞉bolo konowatinama꞉.
10 Ba꞉bene eta tetelo, ale kebe hegelalo Kodawa Ya꞉suku dadikuminakoma꞉, ba꞉be hegelalo ebeno Gobogoboeno heloamo naeno baiditi hiya꞉ma꞉ deda꞉hanami naeno gunimi hapulu ebeno tabo madodo konomo bulimo, gebole diyamo keba ka꞉nala꞉ka꞉ ba꞉ba ka꞉nala. 11 Ebete natamo ba꞉ma ka꞉na goi, “Ama꞉le naeno heloamo dulamenakomena꞉ ba꞉bi komo hiliyonomo kapiya bukamo miya꞉tehote, ba꞉bene ba꞉be buka Epesese ba꞉gala Samena, Pegamama ba꞉gala Tayataila, Sadisi ba꞉gala Piladelapiya ba꞉gala Lodosiya, ba꞉moi sa꞉ba꞉ni habahabamo noemiya꞉ ibi ipuwalo demedehona ba꞉bi sose tawakalubi hiliyonomate koka꞉lamiholema꞉.”

12 Ba꞉bene pote natamo tabo da꞉goi, nale ba꞉be dawa umima꞉ dohobiguimo, huiya koko golodo alo sa꞉ba꞉ni ba ulamita 13 ibi tetenomolo ebete la꞉nalo ba꞉bo umimo. Ba꞉be dawoeno holoholo ba꞉ hopo lumagino holoholo huiyala, ba꞉bene ebete da꞉puli ba꞉be ga꞉ga꞉ kalikote haka ologi, ba꞉gala ebeno bodolo tetelo ditama꞉nui ba꞉be kawali ba꞉ huiya konomo golodo ilinala. g  14 Ba꞉bene ebeno wato ba꞉gala hinibo keyakeyahibinomola, alomoeno a꞉la꞉mina keba ka꞉nala꞉ka꞉ ba꞉ba ka꞉nala, ba꞉gala ebeno baiditi koe powamo wamotemeti. h  15 Ba꞉bene ba꞉be dawoeno natote alonomoma꞉ eda꞉hami, iyo, okodawate hiya꞉nomo auli ilinoeno dalowa꞉ koa꞉mo demadolamemene, ba꞉bene koe ipuwane uluhukutiti kalikamo ba meteteho a꞉la꞉minanomoma꞉ da꞉midinako, ebeno natote ba꞉ba ka꞉na a꞉la꞉minalemiti, ba꞉gala konomo beyate da꞉goenapenanako ebeno tabo madodo ba꞉ ba꞉ba ka꞉nala. 16 Ba꞉bene ebeno tu hapu kokotolo sa꞉ba꞉ni oloki na꞉pola꞉ma꞉nui, ba꞉gala ebeno tabo ipuwane giha kiyokiyo giliti puluhukui, ba꞉gala hegela tuli tetelo hegelate keba ka꞉na ka꞉la꞉minutanako ebeno holoholoeno a꞉la꞉mina ba꞉ ba꞉ba ka꞉nala. i 

17 Ba꞉bema꞉ nale ba꞉be Kodawa dumimo, nale ebeno nato mabamo dito guimo, hoe lumagi keba ka꞉nala꞉ka꞉ ba꞉ba ka꞉na. Ba꞉ba tetelo ebete ebeno tu hapu kokotamo na ba ologini na꞉goi, “Ama꞉ akatoletola꞉la꞉, na ba꞉ Mabula ba꞉gala na ba꞉ Kuititila. j  18 Iyo, na ba꞉ emedena tetelo demedenamo ba꞉be Kodawala, mabu nale da꞉hoiya꞉mo ka꞉ka꞉ gala a꞉kalawiya꞉mo, ba꞉be ka꞉ka꞉te emedena emedena tetelo a꞉kawibonamene, ba꞉bema꞉ nagodolo helo konomo bitana nale Ha꞉lahapino Haboeno gigiho a꞉hiya꞉midate komo tawakalubi ba꞉bamo konoelamema꞉ ba꞉gala komo tawakalubi ba꞉be haba ipuwane ka꞉ka꞉mo kuluhukulatelema꞉. 19 Ba꞉bema꞉ wadiyala ama꞉le nagodolo dulamemena꞉ ba꞉bi hiliyonomo komo bukamo na꞉miya꞉tehuya꞉, iyo, kebe komate ba꞉ma tetelo dikulihomena꞉ ba꞉gala galane tetelo dikulihomena꞉ ba꞉bi komo hiliyonomo amia꞉no bukalo na꞉hawakalilamiya꞉. 20 Ka꞉lo ama꞉le naeno kokotolo dulamita ba꞉moi sa꞉ba꞉ni oloki, ba꞉gala na tetenomolo da꞉la꞉namo ba꞉moi sa꞉ba꞉ni golodo alo, ba꞉bi netewa komoeno ipuwate hopo habanapa꞉tamo awalelalo pola꞉na. Huiyatiya numa꞉, ba꞉bi komoeno ipuwa nale ama꞉ ba꞉ma ka꞉na iya꞉tumimata, sa꞉ba꞉ni oloki ba꞉ A꞉isiya hopoeno sa꞉ba꞉ni sose kapiyuimipino nopopila, Godote ba꞉bi nopopi ya꞉lo oelamiya꞉ iba꞉te ba꞉bi sose tawakalubi hidamo kobuiya꞉minalenama꞉, ba꞉gala sa꞉ba꞉ni alo ba꞉ ba꞉bi sa꞉ba꞉ni habahaboeno hibima꞉ midipino hiya꞉hiya꞉ kapiyuimila.”

Copyright information for `KNVARAMIA