Luke 3

Yoneko Epo Obamo Waduba꞉midaoledawate Godokono Tabo Da꞉kiyawaiya

Ma꞉t 3:1-12; Mak 1:1-8; Yon 1:19-28

Ebe tetelo Sisa Taibiliyasite 15 ulamalo opo kawonomono Kawo Elawodubunomoma꞉ eba eda꞉nalo, dubu epetapiate ebeno opopima꞉ ma kunu eda꞉onamiya,

Poniyase Paeleteko Yudiya opono Kapela Elawodubula,
Elodiko Ga꞉lili opono Kawo Elawodubula,
Buka ka꞉la꞉mioledawa, modobola a꞉ma꞉ me tanalo niyatawa, Ya꞉sute dawokaliya ebe tetelo Yudiya opolo Kawo Elawodubuma꞉ deda꞉nami, ebe dopo Elodi ebe me Elodi idino nabiwila, iyo, nabiwite gudutamo atu Elodi mailo kikamiya.

ebeno naniwi Pilipiko Ituliya opo ega꞉walo Ta꞉konaitasi opono Kawo Elawodubula,
ega꞉walo Laisaniyasiko A꞉bilini opono Kawo Elawodubula.
Ebe atu tetelo A꞉nasiko ega꞉walo Kayapasiko ibi netewapiate Godotamo kalimagono ikameopino Ununomo Watowatopima꞉ eda꞉onamiya, ebene Sekalayakono gudu Yoneko ebete bulu opolo eba okolinalo Godokono tabote ebetamo ebo piya. Iyo, ebete Yodane Kolomono opo kawonomamo tote Godokono tabo ma kunu na꞉kiyawaiya, “La꞉imano kubane olobila꞉wete obamo aduba꞉mida tanalo laema꞉ na꞉pelama꞉la꞉, ebene Godote la꞉imano kuba egebolelametate ka꞉dodolomatililaema꞉ta.” b  Nanitabola, Godote dopamo ebeno woki awokalimidawa Aisayagodone Yonekono pe tanaloma꞉ ebeno Bukamo tabo ma kunu akuloliya,

“Lumagite bulu opolo tabo ma kunu kawonomamo ka꞉pegemene,
‘Kawodawano gabo nosiyodiloma꞉la꞉,
ebeno gabo na꞉tupugaima꞉la꞉!
Godote me opono damela bolaliyao bilibilinomo ilatolete,
damela unuunu kapatalulatolemene,
iyo, ebete kalawikalawi gabo nanitabolo tuputupuilamolete,
gabono damela gugu ilatolete ka꞉dilidililaemene.
Nanitabola, ebete epono igilo da꞉mula꞉lelaemene,
ibi bilibilinomate ebe tanalo ebo kuima꞉na꞉!’” c 
Ebene epo bilibilinomate Yonetamo na꞉pelamiya ebete ibi obamo kowaduba꞉midaolema꞉, wiyasiya ebete iba꞉tamo negiya, “La꞉ bu kalulata! La꞉ potele kanaletia obamo waduba꞉midaolema꞉ da꞉pelama꞉ema, ba꞉, Godokono kawo dowa tanalonomote la꞉tamo a꞉ka꞉pemene? Ao, ka꞉pemene! d  La꞉imano tepo magumu iyakobi da꞉midila꞉ema, modobola la꞉ la꞉imano nanitabo tanalo awokalima꞉ wadewade tanalo nosiyodilola꞉la꞉. La꞉ a꞉ka꞉tuwa꞉ la꞉tamo mako tabo gela akowagilima꞉la꞉, ‘A modobola mabu A꞉ibalayamako ebe aimano ewono nabiwila.’ Ao, la꞉ a꞉ka꞉modobomata! Na la꞉tamo nani tabo gemo, Godogodolo elawo bitana ebete me nokolamo A꞉ibalayamakono gudi kosiyodilolema꞉! e  Ebema꞉ ka꞉lo Godote ebeno kabi a꞉li, noloa꞉ da꞉imi kewa bilibilinomo ebete lute elamo kiyalekemene.” f 

10 Epate ebe tanalo olowite Yoneko nalatediya, “A Godokono dowa odiyoboma꞉ beda꞉ tanalo na꞉kosiyodiloma꞉?”

11 Ebete eba wiyalo negiya, “Modobola kaliku netewagodawate kalikua꞉dawa idi kowalubimene, ega꞉walo baeagodawate baea꞉dawa kowalubimene.”

12 Ebene ta꞉kese mani elemasigilo uwatepi dubu epetapi iba꞉te obamo waduba꞉midaolema꞉ da꞉pelamiya, iba꞉te ebe napalatediya, “Iyatulamedawa, a beda꞉ tanalo na꞉kosiyodiloma꞉?” g 

13 Ebete ibi nanaliya, “La꞉le ta꞉kese mani uwate tetelo a꞉da꞉ gabodo kawonomamo akouwatenakala꞉ la꞉ a꞉ka꞉tuwa꞉ la꞉ walubilima꞉, wiyasiya gabamani dubate degelanaka ebe modobolo nuwatenakiyala꞉.”

14 Ebene gowelaopi epetapiate Yoneko nalatediya, “A keba kunula꞉ka꞉? A beda꞉ tanalo na꞉kosiyodiloma꞉?”

Ebene ebete iba꞉tamo negiya, “La꞉le epo epetapino mani elawo gabodo o a꞉da꞉ gabodo akouwata꞉la꞉, ega꞉walo la꞉imano tabo gela magumulo epo epetapi akokubailama꞉la꞉, ega꞉walo la꞉imano woko wiya delawa꞉wenakoma ubia꞉ tabo gela꞉no kalakalago nuwatenakiyala꞉.”

15 Epate Yonekono tanalo eba malagidilolo, iba꞉te kalakalaolo nemalagidiliya Yoneko da꞉ Godokono Alibodawa Kelisotela꞉. 16 Ebene Yonete iba꞉tamo negiya, “Nale la꞉ obamo waduba꞉midaolemata, wiyasiya lumagi idite naimano walogabo apune ba꞉pena. Ebeno elawo kawonomola, naimano elawo nodoliona, ebema꞉ na wadenoa꞉ nale ebeno agowa ukulaolema꞉. Nanitabola, ebete la꞉ Godokono Uliyanamo ega꞉walo ebeno elamo ka꞉powaduba꞉midaolema꞉ta, h  17 iyo, ebete witi-laisono nonoka balamo alomono inamabu elawi, ebene ebete witi-laiso naono ebeno moto guamo eba alomolo nonoka elamo ebo kiyalekemene, ebe elate uwomua꞉ tetelo nowaena, ka꞉egana꞉.”

18 Nanitabola, Yonete Godokono Wade Tabo da꞉kiyawaonaki, ebete iyaiya tanalo bilibilinomo iyatulamolenaki epate ibino woki iyakobi ka꞉midilima꞉. 19 Ebene egela idilo Yonete Kawo Elawodubu Elodiko kawiya aniya, mabu ebete ebeno ekawino kamiyale Elodiyasiko pilolo lawiya ega꞉walo ebete kuba tanalo epetapi bilibilinomo osiyodilolenaki. i  20 Ebe tetelo Elodite kuba tanalo kawonomo idi ma kunu kosiyodiliya, ebete Yoneko idoko motamo gito iyatiya.

Yonete Ya꞉suko Obamo Daduba꞉midiya

Ma꞉t 3:13-17; Mak 1:9-11

21 Elodite ebe idoko motamo iyatia꞉no, dopamo Yonete epo bilibilinomo obamo owaduba꞉midaoliya, Ya꞉suko ebalata. Ebema꞉ Ya꞉sute obamo aduba꞉mida tanalo lawete, Godotamo kalakala tabo eba kiyawautalo Godote ebeno Unu Duliyomolo ebo a꞉iyamidiya. 22 Ebene Godokono Uliyanate bigo olamu ebe unamo eba piwisigalo, tabote Unu Duliyomolone ma kunu piwisigiya, “A꞉ma꞉ naimano kapiya Gudunomolata. Na a꞉ma꞉tamo nekalakalitamo.” j 

Ya꞉sukono Mabu Epono Mailono Tanalo

Ma꞉t 1:1-17

23 Ya꞉sute 30 ulamama꞉ eba eda꞉lo ebete ebeno kawo woko ebo wagilimiya, ebene ebeno mabu epono mailono tanalo ma kunula.

Epate ibino wokilo ebe Yausepekono guduma꞉ gelanamiya, me Yausepeko Ilaikono gudula. k 

24 Ilaiko Mata꞉takono gudula.

Mata꞉tako Libaikono gudula.

Libaiko Melekaikono gudula.

Melekaiko Yanaikono gudula.

Yanaiko Yausepekono gudula.

25 Yausepeko Mata꞉tayasikono gudula.

Mata꞉tayasiko A꞉imosokono gudula.

A꞉imosoko Na꞉iumakono gudula.

Na꞉iumako Esalaikono gudula.

Esalaiko Nagaikono gudula.

26 Nagaiko Maa꞉takono gudula.

Maa꞉tako Mata꞉tayasikono gudula.

Mata꞉tayasiko Sema꞉inikono gudula.

Sema꞉iniko Yausekekono gudula.

Yausekeko Yaudakono gudula.

27 Yaudako Yowananakono gudula.

Yowananako Lisakono gudula.

Lisako Selababelakono gudula.

Selababelako Siyatiyelakono gudula.

Siyatiyelako Nelaikono gudula.

28 Nelaiko Melekikono gudula.

Melekiko Adaikono gudula.

Adaiko Kosamakono gudula.

Kosamako Elamadamakono gudula.

Elamadamako Eyakono gudula.

29 Eyako Yosuwakono gudula.

Yosuwako Eliyesakono gudula.

Eliyesako Yolimikono gudula.

Yolimiko Mata꞉takono gudula.

Mata꞉tako Libaikono gudula.

30 Libaiko Simiyonokono gudula.

Simiyonoko Yudakono gudula.

Yudako Yausepekono gudula.

Yausepeko Yaonamakono gudula.

Yaonamako Elayakimikono gudula.

31 Elayakimiko Meleyakono gudula.

Meleyako Menakono gudula.

Menako Mata꞉taikono gudula.

Mata꞉taiko Na꞉itanakono gudula.

Na꞉itanako Da꞉ibidikono gudula.

32 Da꞉ibidiko Yesikono gudula.

Yesiko Obedakono gudula.

Obedako Bowasekono gudula.

Bowaseko Samonokono gudula.

Samonoko Nasonakono gudula. l 

33 Nasonako Aminadabakono gudula.

Aminadabako Adaminakono gudula.

Adaminako Anikono gudula.

Aniko Esalonakono gudula.

Esalonako Pelesekono gudula.

Peleseko Yudakono gudula.

34 Yudako Ya꞉ikobokono gudula.

Ya꞉ikoboko Aisa꞉kekono gudula.

Aisa꞉keko A꞉ibalayamakono gudula.

A꞉ibalayamako Telakono gudula.

Telako Neyokono gudula.

35 Neyoko Selugukono gudula.

Seluguko Liyukono gudula.

Liyuko Pelegekono gudula.

Pelegeko Ibakono gudula.

Ibako Silakono gudula.

36 Silako Ka꞉inanekono gudula.

Ka꞉inaneko Apasa꞉dakono gudula.

Apasa꞉dako Semakono gudula.

Semako Nowakono gudula.

Nowako La꞉imekakono gudula. m 

37 La꞉imekako Metusalakono gudula.

Metusalako Inokokono gudula.

Inokoko Yeledikono gudula.

Yelediko Mayalalelakono gudula.

Mayalalelako Ka꞉inanekono gudula.

38 Ka꞉inaneko Inosokono gudula.

Inosoko Setakono gudula.

Setako A꞉da꞉mekono gudula.

A꞉da꞉meko Godokono gudula.

Ebema꞉ me Ya꞉sukono mabu epono tanalono uwomula. n 

Copyright information for `KNVFLY_RIVER