b4:2Ais 6:1
c4:3Isi 1:28
e4:5Isi 1:13; Sek 4:2; Awo 1:4; 8:5; 11:19; 16:18
f4:6Isi 1:5-10,22; 10:14
g4:8Ais 6:2,3; Isi 1:18; 10:12

Revelation of John 4

Yonete Godoko Ebeno Kawo Elawodawano Okoli Bailo Okolitalo Dumiya

Ebene Kawodawagodone me tanalo bilibilinomo olowio dolopoligi, ebe tetelo naimano balidite iyama꞉ deda꞉onami ebe tanalote olopoligoa꞉no, nale Unu Duliyomolono gigiyu aligilitanalo ebo uimo.

Ebene nale dopamo dolowimo ebe atu tabo madodote natamo walo na꞉ka꞉pi, ebe tabo ebe tuteleno diyamo keba kunula꞉ka꞉ eba kunula. Ebema꞉ nale tabo ma kunu olowimo, “A꞉ma꞉ natamo na꞉podola. Tete tatalilo da꞉pemaimioma꞉na꞉ ebe iyaiya tanalo nale a꞉ma꞉ kiyatumiomamota.” a 
Ebe tetelo Godokono Uliyanano elawote na unamo eba piwisigalo, nale Kawodawa ebeno Unu Duliyomolono Kawo Elawodawano okoli bailo okolitalo ebo uimo. b  Ebe dawano Kawo Elawodawano okoli bai a꞉la꞉uwa꞉da꞉le molemabute anagogobeyamidadigi, ega꞉walo ebeno ololo alonomoma꞉ eda꞉mi, egelate kawonomamo eba pukuilamitalo wadewade gedo nokola ega꞉walo kalimakalima nokola iba꞉te keba kunu ka꞉la꞉uwa꞉da꞉olitanake eba kunu. c  Ega꞉walo nale 24 kawokawo elawodubu epetapino ilukuli baite Kawodawano okoli bai anakopa꞉midalo eba pola꞉nalo ka꞉nulaimo, ebe ilukuli bai unamo 24 Watowatopiate ilukuliya, iba꞉te keyakeya kaliku pupulite ega꞉walo kawokawo elawodubuno golodo kelekele inamabu watamo a꞉ka꞉pupuliya. d  Ebene Kawodawano okoli baine tobolono iyaiya gewataole tanalo ega꞉walo mole a꞉la꞉uwa꞉midaole tanalate maimiutiya, ega꞉walo ebe okoli bai dopo apulo sebeni wuiki alo pio na꞉pola꞉ni, me alo ibi Godokono Uliyanano sebeni apuapula. e  Ebene Kawodawano okoli bai dopo apulo alonomo obo paka꞉ kawonomote itani, ebe obono a꞉la꞉uwa꞉da꞉le wadenonomola.

Ebe tetelo nale Kawodawano okoli bai tametamelo Unu Duliyomolono netewa-netewa Elawo Nopopi Iyanomate lamota꞉onalo kulaimo, ibino ololo apulo ega꞉walo ginimi apulo balidi bilibilinomate na꞉pola꞉lameni. f 
Ibi magumulo dopo nopodawano ololo ebe layono-gaa keba kunula꞉ka꞉ eba kunula, ega꞉walo idino ololo ebe kalitagono kau-goeono ololola, ega꞉walo idino ololo ebe opo lumagino ololola, ega꞉walo uwomu nopodawano ololo ebe tobolo unudo da꞉wa꞉lubianako ebako wali olano ololola. Ebe netewa-netewa Nopopi Iyanomo ebe tamuagopila ega꞉walo balida꞉gopila, ebema꞉ iba꞉godolo sikisi tamuate pola꞉lameni, ega꞉walo ibino balidi bilibilinomate unu tamalo ega꞉walo magumu apulo atumu na꞉ka꞉pola꞉lameni. Nanitabola, egela ega꞉walo idoko bilibilinomolo iba꞉te Kawodawa amamate olopoligolamea꞉no, nale ibino tabo madodo ma kunu olowimo,

“Godoko ebe Kawodawa Elawonomodawala,
ebe talenala, iyo, ebe talenanomola,
ebe talenadawanomola!
Potele dopamo dokolinami,
ega꞉walo me tetelo dokolina,
ega꞉walo uwomua꞉ tetelo dokolinamene,
ebe ebe Igilodawala!” g 
Nanitabola, ebe Kawodawate uwomua꞉ tetelo ebeno Kawo Elawodawano okoli bailo dokolinamene, ebe mabuma꞉ ebe Elawo Nopopi Iyanomate ebe amamate atepa꞉no, ebe eba walogonalo ebeno mailo unamo adipatelo kalakala tabo ebetamo ebo gelanaka. 10 Iyo, mabu Kawodawate uwomua꞉ tetelo ebeno Kawo Elawodawano okoli bailo dokolinamene, ebema꞉ Elawo Nopopi Iyanomate ebe eba amamatenalo atu tetenomolo 24 Watowatopiate ibino watamo da꞉pupulinaka, iba꞉te ebe kawokawo elawodubuno kelekele inamabu Kawodawano okoli bai dopo apuamo eba niyalekelo, ibino ololo opamo alomote ebe amamatelo ma kunu gelanaka, h 

11 “Aimano Kawodawa Godo,
modobola Unu Duliyomolono nopopi ega꞉walo epo bilibilinomate a꞉ma꞉ nowalogoma꞉ta,
ega꞉walo a꞉imano mailo unamo nadipatema꞉na꞉,
ega꞉walo a꞉imano elawo tanalamo na꞉tudila꞉oma꞉na꞉!
Mabu opo ega꞉walo tobolo ununo inamabu bilibilinomo a꞉ma꞉le osiyodiloliyata,
iyo, a꞉imano ubi tanalodo
me inamabu bilibilinomate pawokalaiya!”
Copyright information for `KNVFLY_RIVER