a13.2:Mt 17.20, 21.21; Mk 11.23

1 Corinthians 13

Di aloho

Maa au ga iloo eau nnelekai o nia daangada, mo nnelekai o digau di langi, gei di aloho la hagalee i di au, malaa, agu helekai le e hai gadoo be di lee baalanga balumee, be di lee o di beele dela e tangitangi balumee. Maa au ga kae di wanga dehuia o nnelekai kokohp a God, gei au gu iloo nia mee de iloo huogodoo mo nia mee ala e nngala, gei au gu honu i di hagadonu maaloo dela e mee di haga menegenege nia gonduu, gei di aloho la hagalee i di au, malaa, au la hagalee di mee loo. a  Maa au ga wanga agu mee huogodoo gi daha, ga dudu dogu huaidina gi wele, gei di aloho la hagalee i dogu baahi, malaa, nia mee aanei ono hadinga humalia mai gi di au ai.

Di aloho le e manawa hila gi lala, humalia, hagalee dubua, be hagamuamua, be hagapuu. Di aloho la hagalee hagagouwa, ge hagalee manawa hagagailaa, be limalima dono hagawelewele, be maanadu nia mee huaidu. Di aloho la hagalee tene gi nia mee huaidu, gei e tene hua gi nia mee ala e donu. Di aloho le e deemee di bagege, dono hagadonu, hagadagadagagee mo hila gi lala e deemee di hagalee. Di aloho le e hana hua beelaa, dono hagaodi ai. Nia helekai kokohp i golo ala ono hagalawa i golo. Nia helekai henua gee gee i golo ala e mee di hagalee. Di kabemee i golo dela dono hagaodi i golo. Idimaa tadau kabemee wanga dehuia mo nnelekai kokohp le e dee dohu. 10 Di madagoaa humalia ga dau mai, gei nia mee ala dee dohu la ga hagalee. 11 Dogu madagoaa nogo di tama, agu helekai, hagamaanadu mo agu hagabaubau la nia mee huogodoo dama. Gei dogu madagoaa ne madua, gei au gu dugu gi daha nia hegau o di tama dulii. 12 Dolomeenei gei gidaadou e mmada gi di ada nehu i lodo di kalaadi, ga nomuli ga mmada haga madammaa. Dolomeenei gei au gu iloo dulii, gei nomuli ga iloo hagatau, gadoo be God dela e iloo ia au.

13 Nia hagadilinga mee e dolu aanei e noho hua beelaa: di hagadonu, di hagadagadagagee, mo di aloho, gei di mee dela koia e aamua i nia maa, la go di aloho.

Copyright information for `KPG