a16.1:Rom 15.25-26
b16.5:Acts 19.21
c16.8:Lev 23.15-21; Deut 16.9-11
d16.8-9:Acts 19.8-10
e16.10:1 Cor 4.17
f16.15:1 Cor 1.16
g16.19:Acts 18.2

1 Corinthians 16

Tigidaumaha hagamaamaa ang gi digau hagadonu

Gei di hai o tigidaumaha dela belee hai, di mee e hagamaamaa ai nia dama a God ala i Judea: Goodou e hai gi hai dagu mee dela gu lawa di haganoho ang gi nia nohongo dabu ala i Galatia gi heia. a  Nia laangi tabu huogodoo, tangada nei mo tangada nei i goodou gi dugua dana bahihadu, be e hia mai i lodo ana mee ne ngalua ginai, benabena ina, gi dee hai labelaa di haga budu bahihadu i dogu madagoaa ma ga dau adu gi godou baahi. I muli hua dogu dau adu, gei au ga wanga agu lede haga modongoohia gi godou gau ala ne hilihili belee kae di godou wanga dehuia gi digau o Jerusalem, ga hagau digaula gi Jerusalem. Gei di maa e humalia dogu hana, gei digaula ga hula madalia au.

Nia hagatau a Paul

Au ga gila adu gi goodou i muli dogu hana laa lodo Macedonia, idimaa, au e hai gi hana laa lodo Macedonia. b  Holongo au ga noho i godou baahi le e mada duai, holongo di madagoaa magalillili. Gei goodou ga mee di hagamaamaa mai au, gi mee dagu hana gi nia gowaa ala belee hana ginai au. Au hagalee hiihai bolo au gi noho hua i godou baahi i tama madagoaa haga bodobodo. Au e hagadagadagagee bolo au e mada duai i godou baahi, be di maa e dumaalia mai baahi o Tagi . Gei au ga noho hua i Ephesus ga dae loo gi di laangi Pentekos. c  Au gu gida dagu madagoaa humalia e hai agu hegau i ginei, gei e humalia huoloo, maeaha maa digau hagadaumee le e dogologo. d  10 Maa Timothy ga dau adu gi godou baahi, gei goodou gi hagahiange a mee, gi noho a mee manawa lamalia i godou baahi, idimaa, mee tangada e hai nia hegau a Tagi , gadoo be au. e  11 Goodou gi hudee haga balumee ina a mee, goodou hagamaamaa ina a mee, gi hanimoi labelaa a mee i lodo di aumaalia, gi dau i dogu baahi, idimaa, au e noho ge e talitali a mee mo nia duaahina hagadonu labelaa ala i golo.

12 Gei tadau duaahina go Apollos: Au gu helehelekai hagamahi gi mee gi hanadu madalia tadau duaahina hagadonu dama a Christ ala i golo. Mee digi baba dolomeenei. Hila hua mee gu dogomaalia, gei mee ga hanadu.

Nia helekai hagaodi

13 Goodou gi noho kanakana, tuu maaloo i lodo godou hagadonu. Gi haga mataane gi maaloo. 14 Godou hegau huogodoo gi heia i di aloho. 15 Goodou gu iloo humalia a Stephanas mo dono beeneinei. Digaula go taamada di huli o nia dama a Christ i Achaia ga hagadabu ginai nnegau o nia daangada a God. Au e dangi adu gi goodou, ogu ihoo hagaaloho, f  16 bolo goodou gi dugua anga goodou gi nia daangada beenei, mo digau huogodoo ala gu madalia digau aanei ala e hai nadau hegau ang gi God. 17 Au e tene gi Stephanas, Fortunatus mo Achaicus ala ne lloomoi. Digaula e pono goodou ala hagalee i ginei. 18 Digaula gu haga manawa lamalia au, e hai gadoo be di nadau haga manawa lamalia goodou. Hagalaamua ina nia daane ala e hai beenei. 19 Nia nohongo dabu ala i Asia e hai di nadau hagaaloho adu gi goodou. Aquila, Priscilla mo digau ala e dagadagabuli ge e dadaumaha i di hale meemaa, e hai di nadau hagaaloho gi goodou i di ingoo o Tagi. g  20 Tadau duaahina huogodoo ala e noho i ginei, e hai di nadau hagaaloho adu gi goodou.

Goodou gi hagadau hagaaloho i godou mehanga gi di hagaaloho o nia dama a Christ.
21 Au e hihi di mee deenei gi dogu lima donu:Nia hagaaloho mai Paul. 22 Tangada dela ma ga hagalee e aloho i Tagi, le e halauwa.

Marana tha — Tadau Dagi gi hanimoi!

23 Tumaalia o tadau Dagi go Jesus gi madalia goodou. 24 Dogu aloho gi madalia goodou huogodoo, i di ingoo o Jesus Christ.

Copyright information for `KPG