a7.10-11:Mt 5.32, 19.9; Mk 10.11-12; Lk 16.18

1 Corinthians 7

Nia heeu taga hai lodo

Aanei agu helekai gi godou mee ala gu hihi mai i lodo di godou lede: Ma koia e humalia go taane ma ga hagalee hai dono lodo. Gei di maa nia hangaahai huaidu ala gu hai dolomeenei, e humalia taane gi heia dono lodo, di ahina gi heia dono lodo labelaa. Taane gi haga gila ina aga dono duhongo hegau ang gi dono lodo, gei di ahina gi heia labelaa beelaa gi dono lodo. Di ahina hai lodo hagalee bida dagi dono huaidina, go dono lodo( + dagi). Dela gadoo taane hai lodo hagalee bida dagi dono huaidina, go dono lodo e dagi. Taga hai lodo gi hudee dagalili nau huaidina i di hiihai o taga hai lodo, go di maa hua be meemaa gu buni ngaadahi e hagamolooloo, e dalodalo i tama madagoaa, nomuli, gei meemaa gu mee di haga gila aga di hiihai o taga hai lodo, bolo gi dee paagege hua ginaua ga too gi lodo di hagamada o Sedane. Deenei la hagalee taganoho adu gi goodou, nia helekai hua aago. Au bolo goodou huogodoo gi hai gadoo be au, gei tumaalia o God dela gu lawa di wanga gi tangada nei mo tangada nei, malaa e hai geegee. Tangada nei mo dono duhongo, tangada nei mo dono duhongo.

Ang gi digau ala digi hai nadau lodo mo digau gu mmade nadau lodo, au e helekai boloo: Ma koia e humalia di noho hua be au, dogu lodo ai. Maa digaula e deemee di dagi nadau hiihai i di hai lodo, digaula gi hai nadau lodo, idimaa, di hai lodo la koia e humalia i di noho, gei e haa manawa huoloo i nia hiihai o di hai be di manu.

10 Ang gi digau ala gu lawa di hai nadau lodo, taganoho i golo, hagalee taganoho ni aagu, gei taganoho mai baahi o Tagi: Di ahina hai lodo gi hudee diagia dono lodo. a  11 Maa mee ga hudu gi daha dono lodo, geia e deemee di hai labelaa dono huai lodo, geia e mee hua di lodo labelaa gi dono lodo. Gei taane hai lodo gi hudee diagia dono lodo.

12 Gei ang gi digau ala i golo, deenei dagu haganoho, taganoho ni aagu, deenei hagalee di mee ni Tagi: maa taane dama a Christ gu lodo ang gi di ahina de hagadonu, gei di ahina la gu hagababa ang gi mee bolo ia ga lodo ang gi taane i di waalooloo o dono mouli, gei taane deelaa gi hudee diagia a mee. 13 Maa di ahina dama a Christ gu lodo ang gi taane de hagadonu, gei taane deelaa la gu hagababa anga bolo ia e lodo ang gi di ahina deelaa i di waalooloo o dono mouli, gei di ahina gi hudee diagia taane deelaa. 14 Taane dela dono hagadonu ai, la gu dabu i dono hai lodo ang gi di ahina deelaa, gei di ahina dela dono hagadonu ai, la gu dabu labelaa i mee dela gu hai lodo ang gi taane hagadonu. Maa ga hagalee hai beelaa, malaa, nia dama meemaa le e hai be nia dama ni digau nadau hagadonu ai. Gei di maa ga hai beelaa, nia dama meemaa e dabu i baahi o God. 15 Maa di baahi dela hagalee hagadonu gu hiihai bolo ia ga hudu gi daha di baahi dela e hagadonu, le e mee hua di maewae. Malaa, i lodo di mee dela gu hai beenei, tadau duaahina dama a Christ, taane be di ahina, gu mehede ang gi deia, idimaa, God ne gahi mai gidaadou gi lodo di mouli noho manawa lamalia. 16 Di ahina dama a Christ, goe e iloo di aha bolo goe hagalee haga mouli doo lodo? Goe go taane dama a Christ, goe e iloo di aha bolo goe hagalee haga mouli doo lodo?

Mouli be doo gahi go God

17 Tangada nei mo tangada nei gi mouli hua be tumaalia a God ang gi deia, ge gi mouli hua be dono mouli i dono madagoaa dela ne gahi go God. Deenei di haganoho dela e agoago ko au i lodo nia nohongo dabu huogodoo. 18 Maa taane gu lawa di sirkumsais i dono madagoaa dela ne gahi go God gi lodo di hagadonu, geia hagalee e daa di hagailongo deelaa gi daha. Gei taane digi sirkumsais i dono madagoaa ne gahi gi lodo di hagadonu, geia gi hudee sirkumsais. 19 Maa taane gu sirkumsais be digi sirkumsais la dono hadinga ai. Di mee dono hadinga la go di haga gila aga nia haganoho a God. 20 Tangada nei mo tangada nei gi noho hua beelaa be dono mouli i dono madagoaa ne gahi go God. 21 Goe nogo hai di hege i doo madagoaa ne gahi mai go God? E humalia, goe hudee manawa gee. Gei goe e mee di hai dau hai belee hai goe gi dagaloaha, e humalia, heia. 22 Di hege ma ga gahi mai go Tagi, geia gu dagaloaha i baahi o Tagi, dela gadoo tangada dagaloaha ma ga gahi mai go Christ, geia gu hai di hege ni Christ. 23 God gu lawa i di hui goodou gi di hui aamua, malaa goodou gi hudee hege gi nia daangada. 24 Ogu duaahina nei, dahi mo dahi gi noho hua beelaa i lodo dono mouli buni ang gi God, gadoo be dono mouli i dono madagoaa ne gahi go God.

Nia heeu i digau digi hai lodo mo digau gu mmade nadau lodo

25 Deenei di hai o digau digi hai lodo, dagu haganoho mai i baahi o Tagi ai, gei deenei la di hagamaanadu hua ni aagu ang gi di hai deenei, idimaa, au tangada e mee di hagadonu go goodou mai i tumaalia o Tagi. 26 Deenei dagu hagamaanadu: idimaa di haingadaa o lodo di madagoaa dolomeenei, ma koia e humalia maa goodou ga noho hua beenaa. 27 Goe doo lodo ahina i golohudee hudua gi daha a mee. Goe digi hai doo lodo, hudee hai doo lodo. 28 Maa goe ga hai doo lodo, la dono huaidu ai. Maa di ahina digi hai lodo ga hai dono lodo, la dono huaidu ai. Gei digaula ga haingadaa e logo i nia laangi huogodoo, gei au bolo nia hagadilinga haingadaa beenei, la hagalee hai gi tale adu gi goodou.

29 Ogu duaahina nei, deenei dagu mee e hiihai e helekai iei au adu gi goodou: di madagoaa gu bodobodo loo, deenei di mee dela e humalia bolo nia daane ala gu hai nadau lodo, la gi mouli be digau nadau lodo ai. 30 Digau ala e tangitangi, la gi hai be digau hagalee lodo huaidu. Digau ala e tentene, la gi hai be digau nadau tene ai. Digau ala e hui nadau goloo, la gi hai bolo nadau mee ai. 31 Digau ala e hai hegau gi nia goloo o henuailala, la hudee hai bolo ne bau hua mo nia maa, idimaa, nia mee o henuailala nei le e limalima dono hagalee. 32 Au e hiihai bolo goodou gi hudee hagamaanadu ina nia haga daadaamee. Tangada dela dono lodo ai, le e hagabaubau hua dana hai dela e hai nnegau a Tagi, idimaa, mee e hiihai e haga tentene di manawa o Tagi. 33 Gei tangada dela gu hai dono lodo, le e hagabaubau nia mee o henuailala, be dehee dana hai dela e mee di haga tentene ai dono lodo. 34 Deenei laa i lodo hua ana hagamaanadu la gu manga lua. Di ahina be go tama ahina madammaa le e hagabaubau hua nia mee o Tagi, idimaa, mee e hiihai huoloo bolo dono huaidina mo dono hagataalunga le e hagadabu ang gi di Tagi. Gei di ahina gu hai dono lodo, le e daadaamee gi nia mee o henuailala, idimaa, mee e hiihai e haga tentene dono lodo.

35 Au e helekai nia mee aanei, idimaa, au e hiihai belee hagamaamaa goodou. Au hagalee bule goodou. Au e hiihai bolo goodou gi heia nia mee ala e humalia mo nia mee ala e donu, gei goodou ga hai hege ang gi Tagi i di manawa madammaa, gei e odi anga. 36 Maa taane mo di ahina gu hagababa belee haga hai lodo, gei meemaa gu hai bolo ginaua hagalee haga hai lodo, nomuli gei taane deelaa la gu hiihai huoloo bolo ia e lodo gi di ahina deelaa, meemaa belee haga hai lodo, di mee beenei la hagalee hala. 37 Maa taane ga hagababa ang gi deia i nia mee aanei, geia e dadaahi ono donu, gei e mee hua di hagakono ono lodo bolo ia hagalee lodo ang gi dana hagababa deelaa, geia digi hai dana mee hala. 38 Deenei laa, taane ma ga hai dono lodo, le e humalia hua, gei taane dela bolo ia hagalee hai dono lodo, la koia e humalia.

39 Di ahina gu hai dono lodo e deemee di hai labelaa dono huai lodo maa dono lodo donu le e mouli huaigolo. Maa dono lodo la gu made, geia gu mee hua di hai dono lodo gi taane dela e hiihai gineia, malaa gi hai di tama ni Christ. 40 Mee koia ga tentene ma ga hai bolo ia e noho hua beelaa, hagalee hai dono lodo. Deenei di hai o dagu hagamaanadu, gei au e hagadagadagagee bolo ma go di Hagataalunga o God dela ne haga honu au gi nia mee aanei.

Copyright information for `KPG