a2.3:Ps 34.8
b2.6:Is 28.16
c2.7:Ps 118.22
d2.8:Is 8.14-15
e2.9:Ex 19.5-6; Is 43.20, 21; Deut 4.20, 7.6, 14.2; Tit 2.14; Is 9.2
f2.10:Hos 2.23
g2.22:Is 53.9
h2.23:Is 53.7
i2.24:Is 53.5
j2.25:Is 53.6

1 Peter 2

Di hadu mouli mo tenua dabu

Goodou kilia gi daha nia mee huaidu huogodoo. Goodou kilia gi daha nia kai tilikai, mo nia halahalau dangada, dubua mo nnelekai huaidu. Goodou gi hai be nia dama lligi ala e hiihai hua e inu nia wee uu donu o di hagataalunga, gi tomo aga goodou gi mouli. Idimaa, di Beebaa Dabu e helekai boloo, “Goodou gu gidee di humalia o Dimaadua.” a  Malaa, goodou lloomoi gi Tagi, idimaa, go mee dela go di Hadu mouli, dela ne hudu gi daha go nia daangada be di balumee, ge gu hilihili aga go God gu hai di hadu hagalabagau. Goodou lloomoi be nia hadu mouli, e hau di hale daumaha hagataalunga, di gowaa dela e hai godou hegau dabu mo godou tigidaumaha hagataalunga gi God mai i Jesus Christ. Idimaa, di Beebaa Dabu e helekai,

“Au gu hilihili aga dagu hadu hagalabagau, e dugu e hai di hadu madaaduge i Zion. Tangada ga hagadonu di hadu deenei, geia hagalee lodo huaidu.” b 
Di hadu deenei e hagalabagau huoloo ang gi digau ala e hagadonu, ang gi digau ala de hagadonu:

“Di hadu dela ne haga balumee ga hudu gi daha go digau hau hale, la gu hai di hadu hagalabagau huoloo i hongo nia mee huogodoo.” c 
Gei nia madagoaa i golo, e helekai,

“Deenei di hadu dela e hai nia daangada gi tingatinga, deenei di hadugalaa dela e hai digaula gi too gi lala.” d 
Ginaadou e tingatinga, idimaa, digaula digi hagadonu ana helekai, deenei di manawa o God ang gi digaula.
Gei goodou la go di madawaawa ne hilihili, digau hai mee dabu ni di king, nia daangada dabuaahia, nia dama donu a God ne hilihili aga belee hagadele nia mee haga goboina ala ne hai gi ono lima, dela ne gahigahi mai goodou gi daha mo di bouli, ga dugu goodou gi lodo dono maalama madamada. e  10 I mua, goodou hagalee nia dama ni God, gei dolomeenei gu hai nia dama ni mee. I mua, goodou nogo de iloo tumaalia o God, gei dolomeenei, gu hai mee gi dono dumaalia. f 

Nia hege a God

11 Ogu ihoo hagaaloho nei, au e hagamahi adu gi goodou be digau mai i daha, bolo goodou gi maaliu mai gi daha mo nia hiihai huaidu o godou huaidina, ala e heebagi gi godou mouli i nia madagoaa huogodoo. 12 Godou hangaahaihai humalia gi heia labelaa i baahi nia daangada ala digi maalama, idimaa, di madagoaa digaula ga hai nadau kai tilikai bolo goodou digau huaidu, gei digaula ga mmada adu gi godou haihai humalia, ga hagaamu a God i di laangi ma ga hanimoi iei mee. 13 Mai di hiihai o Tagi, goodou gi dugua anga goodou gi digau huogodoo ala nadau mogobuna dagi: Ang gi di king aamua, go mee ono mogobuna e dagi muginua, 14 mo ang gi nia gobinaa ala ne dongo go mee belee hagaduadua digau ala e hai nia mee huaidu, ge e hagaamu digau ala e hai nia mee humalia. 15 Idimaa, deenei di manawa o God bolo goodou gi dugua nia leelee huaidu o digau ala e dadaaulia, gi godou haihai humalia. 16 Goodou gi mouli be digau maahede, ge hudee haga hai hegau ina godou maahede e gahu di huaidu, gei gi mouli be nia hege a God. 17 Goodou hagalabagau ina nia daangada huogodoo. Goodou aloho i godou duaahina nia dama a Christ. Goodou hagalaamua ina a God, gei gi hagalabagau ina di king.

Di ala hagatautau gi tuatua o Christ

18 Goodou go nia hege, dugua anga goodou gi godou gau aamua, gei gi haga modongoohia ina gi digaula godou hagalabagau digaula huoloo. Malaa, hagalee anga hua gi digau ala e humalia ge dumaalia, mo anga labelaa gi digau ala e hagamuamua. 19 God ga hagahumalia laa goodou i di godou hagalabagau daangada, maa goodou ga manawa hagakono i nia hagaduadua hagalee belee kaae go goodou, idimaa, goodou e iloo bolo goodou e hai di mee dela e hiihai ginai a God. 20 Maa goodou ga manawa hagakono gi godou dadaaligi e tau gi godou huaidu, di humalia aha e gila adu gi goodou? Maa goodou ga manawa hagakono gi godou dadaaligi i di gili nia huaidu hagalee ne hai go goodou, God ga hagahumalia goodou. 21 God ne gahigahi goodou gi di mee deenei, idimaa, ma go Christ dela ne hagaduadua i goodou, ga gowadu gi goodou di hagatau humalia bolo goodou gi daudalia ge kawe ai. 22 Mee digi hai dana mee hala, tangada ne longono di kai tilikai mai dono ngudu ai. g  23 Nia daangada ne leelee huaidu i mee, gei mee digi helekai hai baahi. I lodo dono hagaduadua, gei mee digi hagahuaidu ina digau nogo dadaaligi ia, gei mee ne dugu anga hua ono hagadagadagagee huogodoo gi God, Tangada Hai gabunga e donu. h  24 Christ gu kae tadau huaidu i lodo dono huaidina gi di loobuu, bolo gi mmade gidaadou gi di huaidu ge gi mouli gi di tonu. Ono gowaa moholehole ne hagahili ai goodou. i  25 Goodou nogo hai gadoo be nia siibi ne de gidee i di nadau ala, gei dolomeenei goodou gu laha mai gi mee dela go di godou Hagaloohi, ge Tangada benebene godou mouli. j 

Copyright information for `KPG