a5.2:Mt 24.43; Lk 12.39; 2 Pet 3.10
b5.8:Is 59.17; Eph 6.13-17

1 Thessalonians 5

Hagatogomaalia gi di hanimoi o Tagi

Madau duaahina nei, au hagalee bolo e hai loo gi hihi adu di madagoaa mo nia mee aanei ma ga hai. Idimaa, goodou gu iloo humalia di laangi o Tagi le e hai be tangada gaiaa dela e hanimoi i di boo. a  Deelaa di madagoaa nia daangada ga helekai boloo, “Nia mee huogodoo gu humalia, gu noho baba,” ge dela hogi di madagoaa di mooho damana ga limalima ga tale ang gi digaula, gadoo be di mmae o di ahina ma ga haanau, gei nia daangada huogodoo ga deemee di llele gi daha. Madau duaahina, goodou hagalee e noho i lodo di bouli, malaa, di laangi deelaa gi hudee haga homouli ina goodou be tangada gaiaa, goodou huogodoo la nia daangada ni di maalama, nia daangada ni di laangi. Gidaadou hagalee ni di boo be ni di bouli. Malaa, gidaadou hudee kii be digau ala i golo, gi aala, gi madammaa. Digau ala e kii, le e kii i di boo, gei digau ala e libaliba, le e libaliba i di boo. Malaa, gidaadou la nia hoo ni di laangi, gidaadou gi madammaa, gi ulu tuuli o tadau hadahada, go di hagadonu mo di aloho, gi ulu di goobai dauwa, go di hagadagadagagee o di mouli dee odi. b  God hagalee ne hilihili gidaadou bolo gi duadua i dono hagawelewele, gei gi hai mee gi di mouli dee odi mai i tadau Dagi go Jesus Christ, 10 dela ne made mai gi gidaadou bolo gi mouli dalia a mee, maeaha ma gidaadou e mouli be e mmade i dono madagoaa ma ga hanimoi ai. 11 Deenei laa, goodou hagadau hagamaaloo ina aga, hagadau hagamaamaa i goodou be di godou hai dela e hai dolomeenei.

Nia aago mono hagaaloho haga muliagina

12 Madau duaahina nei, gimaadou e tangi adu bolo goodou gi hagalabagau ina digau ala e hai nadau hegau i godou baahi, ala e dagi ge aago goodou gi di mouli o Christ. 13 Goodou hagalabagau ina gi aaloho i digaula, idimaa go nadau hegau ala e hai. Goodou gi noho i lodo di aumaalia.

14 Madau duaahina nei, gimaadou e helekai hagamahi adu gi goodou, bolo goodou gi hagailoo gi digau ala e hagatoo, gei gi hagamaaloo ina aga digau ala e lligi nadau hagadonu, mo di hagamaamaa digau ala e paagege, mo di hagakono di manawa ang gi nia daangada huogodoo. 15 Goodou mmada gi humalia gi dee hui di huaidu a tangada gi di huaidu, gei nia madagoaa huogodoo goodou gi dugu anga gi heia nia mee humalia i godou lodo mo i baahi nia daangada huogodoo.

16 Goodou gi tentene i nia madagoaa huogodoo, 17 gi hai dalodalo i nia madagoaa huogodoo. 18 Goodou gi danggee ang gi God i nia mee huogodoo, deenei di mee a God e haa manawa ai bolo goodou gi heia i lodo godou mouli buni ang gi Jesus Christ.

19 Goodou hudee dugua di moomee o di Hagataalunga Dabu dela i godou baahi, 20 gei goodou hudee haga balumee ina nia helekai mai baahi o God. 21 Goodou manamana ina nia mee huogodoo, daahia nia mee ala e humalia, 22 gei gi hagapaa gi daha mo nia mee huaidu huogodoo.

23 God dela ne gaamai gi gidaadou di aumaalia, gi heia goodou gi dabuaahia i nia ala huogodoo, ge gi benebene ina goodou hagatau, godou hagataalunga, godou mouli, mo godou huaidina, gi daha mo nia mee hai hala huogodoo i di madagoaa o tadau Dagi Jesus Christ ma ga hanimoi. 24 Mee dela e gahigahi goodou, ga haga gila aga di mee deenei, idimaa, mee e manawa dahi.

25 Madau duaahina nei, goodou dalodalo i gimaadou. 26 Goodou gi hagaaloho gi tadau duaahina huogodoo gi di hagaaloho o nia dama a Christ. 27 Au e hagamaaloo goodou i di mogobuna o Tagi bolo goodou gi daulia di lede deenei gi tadau duaahina daumaha huogodoo.

28 Tumaalia o tadau Dagi go Jesus Christ gi madalia goodou.

Copyright information for `KPG