a12.4:Ex 12.1-27

Acts 12

Di kumi o Taaligi

Deenei di madagoaa di king Herod ne daamada ga daaligi hunu daangada o di nohongo dabu. Mee ne daaligi a James, tuaahina o John gi tulumanu dauwa. Mee ne gidee ia bolo digau o Jew e tentene gi di hai deenei, gei mee ga kumi labelaa a Peter. Di mee deenei ne hai di madagoaa Tagamiami o di Palaawaa Digi Hagatanga. Muli dana kumi a Peter, gei mee ga hudu a mee gi lodo di hale galabudi, e hagaloohi go nia hagabuulinga dauwa e haa, e dogohaa di hagabuulinga e dahi. Herod e hiihai e wanga a Peter gi di gowaa hai gabunga i mua nia daangada dogologo, i muli Tagamiami Pasoobaa. a  Peter e noho i lodo di hale galabudi, gei digau di nohongo dabu e dalodalo hagamahi i mee ang gi God.

Peter e mehede mai gi daha mo di hale galabudi

Di boo hua dela i mua di laangi Herod dela belee laha mai a Peter gi mua nia daangada, Peter nogo kii i mehanga nia daane hagaloohi dogolua, e lawalawa gi nia daula baalanga e lua, gei nia daane hagaloohi e madamada humalia i di ngudu di bontai di hale galabudi. Di madagoaa hua deelaa, tangada di langi o Dimaadua e duu i golo, gei di maalama ga ina i lodo di hale galabudi deelaa. Tangada di langi deelaa ga kumi di bakau o Peter, ga hangahanga a mee, ga helekai, “Hagalimalima! Duu i-nua!” Di madagoaa hua deelaa, nia daula baalanga la gu maahede gi daha mo nia lima o maa. Tangada di langi ga helekai, “Nnoodia doo duu gi mau, nnoodia oo suudi labelaa.” Gei Peter ga hai gi hai be nnelekai tangada di langi ne helekai. Gei tangada di langi ga helekai, “Ulu ina doo gahu laa daha, daudali mai i ogu muli.” Peter ga daudali a mee gi malaelae, gei digi modongoohia loo bolo maa tangada di langi dela e hai ana mee ang gi deia, mee ne maanadu bolo ma di moe hua. 10 Meemaa ga diiagi tahi buini hagaloohi, ga nomuli ga diiagi di lua buini hagaloohi, ga nomuli meemaa ga dau loo i di ngudu di bontai baalanga dela e huudonu gi di waahale, gei di bontai deelaa ga mahuge hua wa deia ang gi meemaa. Meemaa ga ulu gi daha, ga taele i hongo di ala, gei di madagoaa hua deelaa, tangada di langi ga ngala gi daha mo Peter. 11 Malaa, Peter la gu modongoohia ia nia mee ala ne hai ang gi deia, gei mee ga helekai boloo, “Au gu modongoohia bolo ma e donu hua go nia mee aanei. Dimaadua ne hagau mai dana dangada di langi, gu hagamehede au gi daha mo nia mogobuna a Herod, mo nia mee huogodoo digau o Jew ala e kana belee hai mai gi di au.” 12 Dono modongoohia hua nia mee aanei, gei mee ga hana gi di hale o Mary, tinana o John Mark. Nia daangada dogologowaahee ne dagabuli gi golo e hai nadau dalodalo. 13 Peter ga dugidugi di bontai dela i malaelae, gei tama ahina dela e ngalua i golo, dono ingoo go Rhoda, ga hana belee huge di bontai. 14 Tama ahina deelaa gu modongoohia ia di lee o Peter, gu tentene huoloo, digi huge ina di bontai, gu lele mai labelaa gi muli gi lodo di hale, ga hagi ang gi digau ala i lodo di hale bolo Peter i malaelae. 15 Digaula ga helekai gi tama ahina deelaa boloo, “Goe e laba!”

Gei mee e maaloo adu hua gi digaula boloo, “E donu!”

Gei digaula ga helekai gi mee, “Holongo go dono dangada di langi.”
16 Peter e dugidugi huaigolo di bontai, gei digaula ga huge di bontai. Di nadau gidee hua e-ginaadou a Peter, digaula gu goboina huoloo. 17 Peter ga helekai gi digaula bolo gi haga kila, gei mee ga haga modongoohia gi digaula di hai o Dimaadua dela ne dagi mai ia gi daha mo di hale galabudi. Gei mee ga helekai gi digaula boloo, “Goodou hagi anga ina di hai deenei gi James mo tadau duaahina ala i golo.” Gei mee ga hagatanga, ga hana gi tuai gowaa.

18 Di mee gu aa, digau hagaloohi gu gologolo huoloo be di maa di aha dela ne hai gi Peter. 19 Herod ga hai bolo digaula gi halahala ina a mee, gei digaula e deemee di gida a mee. Herod ga hai ana heeu gi digau hagaloohi aalaa, ga hai bolo digaula e dadaaligi gi mmade. Muli nia mee aanei, gei Herod ga hagatanga ga hana gi daha mo Judea, ga hana gi Caesarea, ga noho i golo.

Di made o Herod

20 Herod gu hagawelewele huoloo gi digau Tyre mo Sidon, malaa, digaula gu hai di nadau buini, ga hula belee heetugi gi Herod. Matagidagi, digaula ne tangi ang gi Blastus dela e dagi di hale o di king, bolo mee e hana madalia ginaadou. Digaula ga hula gi baahi o Herod, ga tangi gi mee i di noho i di aumaalia, idimaa, nadau meegai le e gaamai i di gowaa di king. 21 I lodo di laangi digaula dela ne dugu, Herod ne ulu gi ono goloo king, ga noho i hongo dono lohongo king, ga hai ana agoago gi nia daangada huogodoo. 22 Digaula ga wwolo loo gi nua boloo, “Ma hagalee tangada dela e helehelekai nia mee aanei, ma di god!” 23 Di madagoaa hua deelaa, tangada di langi o Dimaadua ga haga hinga a mee gi lala, idimaa, mee hagalee hagalaamua a God. Mee gu gai go nia ila, gu made.

24 Gei nia helekai a God gu hagadeledele, gu kila humalia. 25 Barnabas mo Saul ne haga lawa nau hegau, ga hagatanga i Jerusalem, ginaadou mo John Mark.

Copyright information for `KPG