Acts 16

Timothy e hana madalia a Paul mo Silas

Paul ne hana gi Derbe mo Lystra, di gowaa dela e noho ai tama daane hagadonu, dono ingoo go Timothy, dono dinana tangada o Jew e hagadonu labelaa, dono damana tangada o Greece. Timothy le e hagalabagau i baahi digau hagadonu huogodoo ala i Lystra mo Iconium. Paul e hiihai bolo Timothy le e hana i ono muli, gei mee ga sirkumsais a mee. Mee ne hai di mee deenei, idimaa, digau huogodoo o Jew ala e noho i lodo nia gowaa aalaa, e iloo bolo tamana Timothy la tangada Greece. Di hula digaula laa lodo nia waahale aalaa, gei digaula gu hagi ang gi digau hagadonu di hai o nnaganoho ala gu lawa di haga noho go di gau agoago hagau mono gau mmaadua daumaha i Jerusalem, ge gu agoago gi digaula bolo gi daudalia nnaganoho aanei. Nia nohongo dabu la koia gu maaloo aga nadau hagadonu, gei gu dogologo mai i nia laangi huogodoo.

Di moe Paul i Troas

Digaula ne hula laa lodo tenua go Phrygia mo Galatia, idimaa, di Hagataalunga Dabu la digi dumaalia gi digaula gi agoago nia helekai i lodo tenua go Asia. Digaula ne dau i tenua go Mysia, ga hagamada belee ulu gi lodo tenua go Bithynia, gei di Hagataalunga o Jesus digi dumaalia gi digaula. Gei digaula gu lloo adu hua laa lodo o Mysia gi Troas. Di boo deelaa, gei Paul gu hai dana moe, e mmada gi taane Macedonia dela e duu e dangi ang gi deia, boloo “Hanimoi gi Macedonia, e hagamaamaa gimaadou!” 10 Di madagoaa a Paul ne hai dana moe deenei, gimaadou ga hagatogomaalia, belee hula gi Macedonia, i madau iloo bolo God ne gahi gimaadou bolo gi hagadele ina di Longo Humalia ang gi digau ala i golo.

Di huli o Lydia i Philippi

11 Gimaadou ne hula i di wagabaalii, ne hagatanga i Troas, ga dele haga huudonu gi Samothrace. Dono daiaa ga lloo adu gi Neapolis, 12 nomuli, gei gimaadou ga hula la uda gi Philippi, di waahale damana o tenua go Macedonia. Di waahale deenei e dau gi Rome. Gimaadou gu noho i golo nia laangi dulii. 13 Di Laangi Sabad, gei gimaadou ga hula gi daha mo di waahale gi taalinga di monowai. Gimaadou ne maanadu bolo ma deelaa di gowaa o digau o Jew e haihai nadau dalodalo. Gimaadou ga noho gi lala, ga helehelekai gi nia ahina ala gu dagabuli i golo. 14 Dahi i ginaadou ala ne longono gimaadou go Lydia mai Thyatira, tangada e huihui gi daha ana gahu angauli. Mee di ahina e dadaumaha ang gi God, gei Dimaadua gu huge ono lodo gi hagalongo hagahumalia gi nia mee a Paul ala e helekai ai. 15 Muli dono babdais mo digau o dono hale huogodoo, mee ga gahi gimaadou, “Lloomoi, noho i dogu hale, maa goodou e hai bolo dogu hagadonu a Dimaadua la gu donu.” Gei mee ga hai gimaadou gi lloomoi gi dono hale.

I lodo di hale galabudi i Philippi

16 Di laangi e dahi, gei gimaadou ne hula gi di gowaa dalodalo, gei gimaadou gu heetugi gi di hege ahina iai di hagataalunga huaidu i ono lodo, dela e mee di haga modongoohia nia mee ala ma ga loomoi maalia. Gei mee e kumikumi ana bahihadu e logo i dana haga modongoohia aga ana mee beenei. 17 Mee ga daudali a Paul mo gimaadou, ga wolowolo gi nua, “Nia daane aanei nia hege ni di God Aamua Huoloo! Digaula e hagi adu gi goodou di ala dela e mee di hula iei goodou gi di mouli!” 18 Nia laangi e logo, gei mee e haihai beenei, ga dae loo gi di madagoaa o Paul gu hagalongo haga de hiihai gi mee, ga huli mai, ga helekai gi di hagataalunga huaidu boloo, “I di ingoo o Jesus Christ, au e helekai adu bolo gi hanimoi gi daha mo mee.” Di madagoaa hua deelaa, gei di hagataalunga huaidu gu ulu mai gi daha mo mee. 19 Di madagoaa digau di nadau dama ahina deelaa ne modongoohia ginaadou bolo di nadau madagoaa humalia belee hai nadau bahihadu la gu hagalee, gei digaula ga kumi Paul mo Silas, ga lahi meemaa gi baahi digau aamua o di waahale ala e noho i di gowaa huihui mee. 20 Digaula ga lahi meemaa gi mua digau aamua o Rome, ga helekai boloo, “Nia daane dogolua aanei la nia daangada o Jew, meemaa gu hai di nau mee huaidu i lodo tadau waahale deenei. 21 Meemaa e haihai nau agoago i nia hangaahai ala e hai baahi mai gi tadau haganoho. Gidaadou digau o Rome e deemee di daudali nia hangaahaihai aanei.” 22 Digau dogologowaahee gu madalia digau ala gu hai baahi gi Paul mo Silas.

Digau aamua o Rome gu hahaahi nia gahu meemaa, ga hai bolo gi haga mamaawadia meemaa.
23 I muli di nadau haga mamaawa meemaa, digaula ga kili meemaa gi lodo di hale galabudi, ga hai gi tangada hagaloohi gi lawalawa ina meemaa gi mau. 24 I muli dana kae nia helekai aanei, gei tangada hagaloohi ga kili meemaa gi lodo di abaaba mugi lodo loo, ga lawalawa nau wae i mehanga nia laagau daamaha.

25 I di madahidi waelua di boo, gei Paul mo Silas e hai nau dalodalo mo di dadaahili ang gi God, gei nia daangada galabudi ala i golo la gu hagalongo gi meemaa. 26 Di madagoaa hua deelaa, gei tenua gu ngalungalua, gu hagangalungalua di baba di hale galabudi deelaa. Nia bontai huogodoo di hale galabudi deelaa gu maahuge i di madagoaa hua deelaa, gei nia daula baalanga nogo lawalawa digau galabudi la gu maahede. 27 Gei tangada hagaloohi ga ala aga, ga gidee ia nia bontai di hale galabudi la gu maahuge huogodoo, gei mee ga hagabau hua i ono lodo, bolo digau galabudi la gu llele hagammuni, gei mee ga haga mmuu dana hulumanu dauwa belee mademade ia. 28 Gei Paul ga wolo gi nua, “Hudee mademade ina goe. Gimaadou aanei huogodoo i ginei.” 29 Tangada hagaloohi ga wolowolo gi gaamai di malama, ga lele gi lodo, ga dogoduli i mua nia wae o Paul mo Silas. 30 Gei mee ga lahi meemaa gi malaelae, ga heeu gi meemaa, “Meemaa nei, au e hai dagu aha, gei au ga mouli?” 31 Gei meemaa ga helekai gi mee, “Hagadonu ina di Tagi go Jesus, gei goe mo digau doo hale huogodoo ga mouli.” 32 Gei meemaa ga agoago nia helekai Dimaadua gi mee mo digau dono hale. 33 Di boo hua deelaa, gei tangada hagaloohi ga lahi meemaa ga gaugau nau gowaa moholehole, gei mee mo digau o dono hale huogodoo gu babdais i di madagoaa hua deelaa. 34 Gei mee ga laha aga Paul mo Silas gi dono hale, ga haangai meemaa. Gei mee mo digau o dono hale gu tentene huoloo, idimaa, digaula gu hagadonu a God.

35 Luada dono daiaa, digau aamua o Rome ga hagau nadau tinggee, ga haga iloo hagamodu, “Haga maahede ina nia daane aanaa gi hula.” 36 Tangada hagaloohi o di hale galabudi ga helekai gi Paul, “Nia dagi aamua gu haga iloo mai bolo goe mo Silas gi haga maahede ina. Goolua gi hula i lodo di aumaalia.” 37 Gei Paul ga helekai gi nia tinggee, “Gimaua digi hai di mau mee hala, gei digaula gu haga mamaawa gimaua i mua digau dogologo, gei gimaua nia daangada donu o Rome. Digaula gu kili gimaua gi lodo di hale galabudi, gei dolomeenei digaula e hiihai belee haga ulu gimaua gi daha hagammuni. E deemee di hai beenei! Nia dagi aamua o Rome aalaa belee lloomoi gi kinei, e hagaulu gimaua gi daha!” 38 Nia tinggee ga haga iloo nia helekai aanei gi nia gau aamua o Rome. I di nadau longono hua bolo Paul mo Silas nia daangada donu o Rome, digaula gu mmaadagu. 39 Gei digaula ga hula, ga dangidangi gi meemaa, ga haga ulu mai meemaa gi daha mo di hale galabudi, ga helekai gi meemaa bolo gi hula gi daha mo di waahale. 40 Paul mo Silas ga hagatanga i di hale galabudi, ga hula gi di hale o Lydia, ga heetugi labelaa gi digau hagadonu i golo, ga hai nau helekai haga lodo hagamahi digaula, nomuli gei meemaa ga hula.

Copyright information for `KPG