a19.4:Mt 3.11; Mk 1.4, 7-8; Lk 3.4, 16; Jn 1.26-27
b20.24:2 Tim 4.7

Acts 19

Paul i Ephesus

Di madagoaa Apollos nogo noho i Corinth, Paul gu hana laa lodo tenua deelaa, ga dau i Ephesus. Gei mee ga gidee ia hunu dama agoago i golo, ga heeu gi digaula, “Goodou gu kae di Hagataalunga Dabu i di godou madagoaa ne hagadonu?”

Digaula ga helekai, “Gimaadou digi longo bolo di Hagataalunga i golo.”
Paul ga heeu, “Di babdais behee ne kae go goodou?”

Gei digaula ga helekai, “Di babdais a John.”
Paul ga helekai, “Di babdais a John la anga hua gi digau ala ne huli mai gi daha mo nadau huaidu. Gei John gu hai labelaa gi nia daangada o Israel bolo digaula e hai loo gi hagadonu tangada dela ma ga hanimoi i ono muli, dela go Jesus.” a  Digaula ne longono di mee deenei, digaula gu babdais gi di ingoo o Tagi go Jesus. Paul ga dugu dono lima gi hongo digaula, gei di Hagataalunga Dabu ga hanimoi gi lodo digaula, gei digaula ga helehelekai nia hagadilinga helekai geegee, gei e hagadele nia agoagoa a God. Digaula huogodoo nia daane holongo dilongoholu maa lua.

Paul ga ulu gi lodo synagogee digau o Jew, gei i lodo nia malama e dolu, gei mee e agoago gi nia daangada o di gowaa deelaa, gei e hagamahi huoloo belee huli digaula gi Tenua o God. Hunu gau i digaula gu lodo hamaaloo huoloo, hagalee hiihai e hagadonu, gei digaula e hagahuaidu di Ala o Tagi, i mua digau dogologo huogodoo. Malaa, Paul ga hagatanga i baahi digaula, ga lahi ana dama agoago, ga hai ana agoago i lodo di hale hai agoago o Tyrannus i nia laangi huogodoo. 10 Di mee deenei la ne hai i nia ngadau e lua, deelaa laa nia daangada huogodoo ala e noho i lodo tenua go Asia, digau o Jew mo digau tuadimee, gu longono ginaadou nia helekai a Dimaadua.

Nia dama daane a Sceva

11 God gu haga hai hegau a Paul i ana mogobuna haga goboina. 12 Nia angkadi mono gahu haaligi ala nogo hai hegau iei mee, ne kae gi baahi digau magi, gei nia magi digaula gu hili, nia hagataalunga huaidu hogi gu ulu mai gi daha mo digaula. 13 Hunu daangada hua o Jew e haga bagibagi nia hagataalunga huaidu gi daha, gei digaula e hagamada e hai hegau labelaa i di ingoo o Tagi go Jesus. Digaula e helekai gi nia hagataalunga huaidu aalaa, “Au e helekai goe gi ulu mai gi daha i di ingoo o Jesus dela e agoago iei Paul!” 14 Taga haanau dogohidu, nia dama ni di tagi aamua hai mee dabu o Jew dono ingoo go Sceva, ginaadou ala e hai di nadau moomee deenei. 15 Gei di hagataalunga huaidu ga helekai gi digaula, “Au e iloo Jesus, gei au e iloo di hai o Paul, gei goodou koai?” 16 Taane dela dono hagataalunga huaidu, ga heebagi gi digaula. Mee gu maaloo i digaula huogodoo, gei digaula gu llele gi daha mo di hale o taane deelaa, gu lauwa, nadau gahu ai. 17 Digau o Jew huogodoo, mo digau tuadimee ala e noho i Ephesus, la gu longono di mee deenei. Digaula huogodoo gu mmaadagu, gu hagalaamua huoloo di ingoo o Tagi go Jesus. 18 Digau dogologowaahee i digau ala ne hagadonu ga loomoi, ga hagi aga ge e haga modongoohia nadau mee ala ne hai. 19 Dogologo i digau hai buubuu, ga hagabudu mai nadau beebaa gi di gowaa e dahi, ga dudu nia maa i mua nia daangada. Digaula gu hagabuni nia hui o nia beebaa aalaa, ono hui huogodoo e madalima mana(50,000) bahihadu silber. 20 I nia hagadilinga mogobuna beenei, nia helekai o Dimaadua la koia gu maaloo aga dono hagadele.

Di hinihini i Ephesus

21 I muli hua nia mee aanei ne hai, Paul gu hagamaanadu bolo ia e hana gi Macedonia mo Achaia, ga hanadu gi Jerusalem. Mee ga helekai boloo, “Muli o dogu hana gi Jerusalem, gei au e hai gi gidee Rome.” 22 Gei mee ga hagau ana daangada hagamaamaa go Timothy mo Erastus gi hula gi Macedonia, gei mee gu noho mada waalooloo i tenua go Asia. 23 Deenei di madagoaa dela ne hai di hinihini damana i Ephesus i di Ala o Tagi. 24 Tangada tugi baalanga, dono ingoo go Demetrius, e hai ana ada hale daumaha o di god ahina go Artimis gi nia silber, e huihui. Dana moomee e kumi ana bahihadu e logo ang gi ana gau ngalua. b  25 Gei mee e gahigahi mai ono ehoo ngaadahi mo digau huogodoo ala nogo hai nadau moomee beenei, ga helekai gi digaula, “Nia daane nei, goodou e iloo bolo tadau maluagina la ne loomoi mai i di gili tadau moomee deenei. 26 Goodou gu gidee ge gu longo nia mee a Paul ala e haihai. Mee e hai bolo nia god ala ne hai go nia lima daangada, la hagalee nia god e donu, gei mee gu gila humalia huoloo i dono hagamahi huoloo gi nia daangada dogologo aanei, aalaa i Ephesus mo aalaa e noho i tenua go Asia hagatau. 27 E hagalliga huoloo go tadau moomee deenei dela ga hai dono ingoo huaidu. Gei hagalee deelaa hua, e hagalliga hogi gi di hale daumaha o di god ahina go Artimis, dela ga hai di balumee, gei dono aamua ga mooho gi daha, di aamua o di god ahina dela e daumaha ginai nia daangada huogodoo ala i Asia mo i hongo henuailala hagatau!” 28 Digau dogologo aalaa ga longono nia helekai aanei, gei digaula gu hagawelewele huoloo, ga daamada ga wwolowwolo, ga helekai, “Go Artimis o Ephesus, koia e aamua!” 29 Di hagalongoaa gu modoho gi daha gi lodo di waahale hagatau. Digaula ga kumi Gaius mo Aristarchus, meemaa nia daangada o Macedonia nogo heehee madalia a Paul, gei digaula ga lahi meemaa gi lodo di gowaa dagadagabuli dangada. 30 Paul e hiihai bolo ia e hana gi mua digau dogologo aalaa, gei digau ala ne hagadonu hagalee dumaalia. 31 Hunu daangada aamua o di gowaa deelaa, nia hoo hagaaloho ni Paul, ga hai labelaa di nadau hegau gi mee, e tangi gi mee bolo gi hudee haga gila aga ina ia i lodo di gowaa dagadagabuli dangada. 32 Di madagoaa hua deelaa, digau ala nogo dagabuli mai gi di gowaa deelaa, la gu hinihini huoloo. Nia daangada gu wwolowwolo i nia hagadilinga wwolowwolo, idimaa, e dogologo e de iloo be di maa di aha dela ne belee dagabuli ginai ginaadou. 33 Hunu gau e hai bolo ma di mee ni Alexander ne hai, idimaa, digau o Jew ne hono a mee gi hana gi mua tagabuli dogologo deelaa. Alexander ga liagi dono lima gi digau dogologo aalaa bolo gi haga kila, gei mee ga hagamada ga haga donu dana agoago hai baahi gi digaula. 34 Di madagoaa digaula ne iloo bolo Alexander la tangada o Jew, digau huogodoo ngaadahi ga wwolowwolo i nia aawaa e lua, “Go Artimis o Ephesus, koia e aamua!” 35 Tangada hihi mai i di waahale deelaa, ga dugu di hagalongoaa o digau dogologo, ga helekai, “Nia daane o Ephesus. Nia daangada huogodoo gu iloo bolo digau o Ephesus la go digau hagaloohi di hale daumaha o Artimis mo di hadu dabu dela ne doo ia i di langi. 36 Deai tangada e haga tilikai nia mee aanei ai. Goodou gi noho i di aumaalia, hudee hai dahi mee gi hala. 37 Goodou ne laha mai nia daane aanei gi kinei, gei meemaa digi gaiaa ina nia hale daumaha, be digi leelee huaidu i tadau god ahina deelaa. 38 Maa Demetrius mo ana gau ngalua bolo ginaadou e hagahuaidu dahi dangada, deelaa laa ma iei digau aamua mono laangi gabunga i golo. Nia gabunga e mee di hai i golo. 39 Maa nia mee labelaa i golo e hiihai ginai goodou, nia mee aanei e mee di haga noho i lodo tagabuli hai gabunga ma ga hai go digau o di guongo deenei. 40 I muli hua nia mee aanei ne hai dangi nei, e hagalliga gi dee hagi aga hua gidaadou i di haga hinihini deenei. Gidaadou e deemee di helekai dahi hadinga humalia i di mee dela ne hai.” 41 I muli hua dana helekai nia mee aanei, gei mee ga haga maaheu digaula.

Copyright information for `KPG