a22.3:Acts 5.34-39
b22.4-5:Acts 8.3, 26.9-11
c22.20:Acts 7.58

Acts 22

“Ogu ihoo digau Israel. Goodou hagalongo mai i dagu haga modongoohia au i godou mua.” Digaula ne hagalongo gi mee e helekai i nia helekai Hebrew, gei digaula gu noho haga kila. Paul ga helekai adu, “Au tangada o Jew, ne haanau i Tarsus i lodo tenua go Cilicia, ne tomo aga i ginei i Jerusalem, ga hai tangada kuulu ni Gamaliel. Au gu kae dogu duhongo hegau maaloo mai i lodo nia haganoho o tadau maadua mmaadua, nogo dogi ang gi God, gadoo be goodou huogodoo ala i ginei dangi nei. a  Au nogo hagahuaidu digau ala nogo daudali di Ala deenei, ga daaligi digaula gi mmade. Au gu lawalawa nia daane mono ahina, gu kili digaula gi lodo nia hale galabudi. b  Tagi aamua hai mee dabu mo digau hai gabunga aamua huogodoo e mee di haga modongoohia bolo agu helekai aanei le e donu. Au gu kae hunu lede ala gu hihi ang gi nadau duaahina ala i Damascus, au gu hana gi golo belee lawalawa digau daumaha, e laha mai gi Jerusalem, e galabudi.

Paul e helekai i dono huli

(Acts 9.1-19; 26.12-18)

I dogu hanadu hua i hongo di ala, ga hoohoo adu gi Damascus, holongo oodee, gei di maalama ga maahina ia i di langi, ga haganiga i dogu gili. Gei au ga doo gi hongo nia gelegele, ga longono di lee e helekai boloo, Saul! Saul! Goe e aha dela e hagahuaidu au? Gei au ga heeu, Goe koai, meenei dogu Dagi? Di lee deelaa ga helekai, Au go Jesus, tangada o Nazareth, dela e hagahuaidu kooe. Gei nia daane ala nogo madalia au gu gidee ginaadou di maalama deelaa, gei digaula e de longono ginaadou di lee dela e leelee mai gi di au. 10 Gei au ga heeu, Au e hai dagu aha, Meenei dogu Dagi? Gei di Tagi ga helekai mai gi di au, Duu i-nua, hanadu gi Damascus, gi di gowaa dela ga haga modongoohia adu gi di goe nia mee huogodoo a God ala ne hagatogomaalia adu belee hai kooe. 11 Gei au gu dee gida i di maahina o di maalama deelaa. Gei digau ala nogo hula gimaadou, ga kumi ogu lima, ga dagi au gi Damascus. 12 I lodo di waahale deelaa, taane dono ingoo go Ananias, taane daumaha donu, ge e hagalongo ang gi tadau haganoho, taane e hagalabagau i baahi digau o Jew ala e noho i golo. 13 Mee ne hanimoi gi di au, ga duu i dogu baahi, ga helekai, Dogu duaahina go Saul, goe gi gidee labelaa! Di madagoaa hua deelaa, gei au gu gidee, ga mmada adu gi mee. 14 Mee ga helekai boloo, Di God o tadau maadua mmaadua ne hilihili mai goe bolo gi iloo e-goe dono manawa, gi gidee e-goe dana Dangada Hai hegau Donu, gi longono e-goe a mee e helekai gi dono lee donu. 15 Idimaa, goe ga hai tangada haga modongoohia ni mee, e hagi ang gi nia daangada huogodoo i nia mee ala ne gidee e-goe ge ne longono. 16 Gei dolomeenei, goe e tali dau aha? Duu i-nua, gi babdais goe, gei oo huaidu la ga madammaa gi daha, mai i dau dangidangi ang gi mee.

Di haga gahi a Paul belee agoago gi digau tuadimee

17 “Gei au gu hana labelaa gi Jerusalem. I dogu madagoaa nogo dalodalo iei au i lodo di Hale Daumaha, gei au gu hai dagu moe. 18 I lodo dagu moe deenei, gei au gu mmada gi Tagi dela ne helekai mai gi di au, Hagalimalima, hana gi daha mo Jerusalem, idimaa, nia daangada o di guongo deenei hagalee hagadonu goe dela e haga modomodongoohia au gi ginaadou. 19 Gei au ga helekai, Meenei Tagi, digaula e iloo hagahumalia bolo au ne hana gi nia synagogee, belee kumi ge e dadaaligi digau ala gu hagadonu goe. 20 Di madagoaa dau dangada haga modongoohia go Stephen ne daaligi gi made, gei au nogo i golo, gei au nogo donu bolo mee e daaligi gi made, au nogo madamada humalia i nia gahu laa daha o digaula ala nogo daaligi a mee gi made. c  21 Tagi ga helekai mai gi di au, Hana, au ga hagau goe haga mogowaa gi digau tuadimee.” 22 Nia daangada nogo hagalongo gi Paul ga dae loo gi mee ne helekai beenei, gei digaula ga daamada ga wwolowwolo gi nua loo, boloo, “Haga bagia a mee gi daha mo kinei! E daaligi gi made! Mee hagalee humalia belee mouli!” 23 Digaula ga wwolowwolo, ga lialiagi nadau goloo, ga kilikili nadau gelegele gohu gi lodo di ahiaalangi. 24 Tagi dauwa aamua o Rome ga helekai gi ana gau dauwa bolo gi lahia a Paul gi lodo di abaaba o digau dauwa, ga hai gi digaula bolo gi haga mamaawadia, bolo gi iloo ia be dehee di mee digau o Jew ala e wwolowwolo ai ge e hai baahi gi mee. 25 Digaula ga lawalawa a mee belee haga mamaawa, gei Paul ga hai ang gi tagi dauwa e duu i golo, “Ma e donu go di godou haga mamaawa tangada o Rome donu, dela digi hagi aga gi di huaidu?” 26 Di madagoaa tagi dauwa ne longono ia di mee deenei, gei mee ga hana gi tagi dauwa aamua, ga helekai gi mee, “Goe e hai dau aha? Paul la tangada donu o Rome!” 27 Tagi dauwa aamua ga hana gi baahi o Paul, ga heeu gi mee, “Helekai mai gi di au, be di maa e donu bolo goe tangada donu o Rome?”

Paul ga helekai, “Uaa.”
28 Tagi dauwa aamua ga helekai gi mee, “Au gu hai tangada o Rome donu, mai i dagu hui au gi nia bahihadu e logo.”

Paul ga helekai, “Gei au mai i dogu haanau.”
29 Di madagoaa hua deelaa, gei nia daane ala belee heheeu gi Paul la ga hula gi daha mo mee. Gei tagi dauwa aamua deelaa, la gu madagu huoloo i dono iloo bolo ia gu lawalawa a Paul tangada donu o Rome gi taula baalanga.

Paul i mua digau hai gabunga aamua

30 Ga hooaga luada, tagi dauwa aamua e hiihai huoloo bolo gi iloo di mee digau o Jew dela ne hagi aga Paul, gei mee ga hai bolo nia daula baalanga gi wwede gi daha, gei mee ga haga dagabuli mai nia dagi hai mee dabu, mo digau aamua hai gabunga huogodoo. Gei mee ga lahi a Paul ga haga duu i mua digaula huogodoo.

Copyright information for `KPG