a24.17-18:Acts 21.17-28
b24.21:Acts 23.6

Acts 24

Digau o Jew e hagi aga Paul

Muli nia laangi e lima, gei tagi aamua hai mee dabu go Ananias ga hana gi Caesarea dalia nia dagi mmaadua mo tangada hagamaamaa dono ingoo go Tertullus. Digaula ga hula gi mua o Felix, ga hai di nadau haga dondonu e hai baahi ang gi Paul. Gei Paul ga gahi mai gi lodo, gei Tertullus ga daamada ga hagahuaidu hai baahi boloo:

“Meenei Felix. Goe di tagi kabemee ne dugu mai gi gimaadou di madagoaa looloo di noho i di aumaalia, gei e logo nia mee humalia gu hai belee huli tadau henua gi humalia.
Gimaadou e tentene huoloo i nia mee aanei, i nia gowaa huogodoo mo nia madagoaa huogodoo, gei gimaadou e hagaamu huoloo goe. Au hagalee hiihai e hagauwwou oo madagoaa, deenei laa au e dangi adu gi di goe bolo goe gi manawa balabala gi hagalongo gi madau helekai dulii. Gimaadou gu gidee bolo taane deenei le e haga lliga huoloo, ge e haga deaadee, gu daamada dana haga hinihini i lodo digau o Jew i hongo henuailala hagatau, gei mee gu hai labelaa tangada dagi ni di hagabuulinga hai kai tilikai o tangada o Nazareth. Gei mee gu hagamada labelaa belee hagahuaidu di Hale Daumaha, gei gimaadou gu galabudi a mee. [Gimaadou gu maanadu bolo mee e gabunga gi hai be madau haganoho, gei di tagi dauwa aamua go Lysias mo ono gau dauwa dogologo ga lloomoi, ga lahi a mee i madau baahi. Lysias ga hai dana hagababa bolo digau ala e hai baahi gi mee gi lloomoi gi oo mua.] Maa goe ga hai au heeu gi taane deenei, gei goe ga mee di modongoohia nia mee huogodoo ala e hagahuaidu a mee go gimaadou.” Digau o Jew gu madalia di hagahuaidu deenei, gu hai bolo nia helekai aanei le e donu.

Paul e duuli ia gi daha i mua o Felix

10 Di gobinaa gu lialiagi dono lima gi Paul bolo gi helekai, gei Paul ga helekai,

“Au e iloo bolo goe gu hai tangada hai gabunga o tenua deenei i nia ngadau e logo, gei au e tentene huoloo bolo au e duuli au gi daha i oo mua.
11 Goe e-(mee di-)gidee bolo ma digi hai nia laangi e madangaholu maa lua belee hana iei au gi Jerusalem e daumaha. 12 Digau o Jew digi gidee bolo au gu lagamaaloo gi nia daangada i lodo di Hale Daumaha, be digi iloo bolo au gu haga hinihini nia daangada i lodo nia synagogee, be tei madagoaa i daha i lodo di waahale. 13 Digaula e deemee labelaa di haga modongoohia adu gi di goe di nadau hai dela e hagahuaidu hai baahi mai gi di au dolomeenei. 14 Au e haga modongoohia adu gi di goe, bolo au e daumaha ang gi di God o madau maadua mmaadua, i dagu daudali di Ala, dela e helekai iei digaula bolo di hagabuulinga hai kai tilikai. Gei au e hagadonu nia mee huogodoo ala gu hihi i lodo Nnaganoho Moses mo nia Beebaa o nia Soukohp. 15 Au e hagadagadagagee gi God, gadoo be nia daane aanei ala e hagadagadagagee ginai, bolo nia daangada huogodoo ala e humalia ge e huaidu, le e mouli aga mai di made. 16 Au e hagamahi huoloo e hai agu mee ala e mee di hai i nia madagoaa huogodoo bolo au e hai mee gi di manawa madammaa i mua o God mo nia daangada. 17 I muli dogu noho i daha mo Jerusalem i nia ngadau dulii, gei au gu hana labelaa gi golo, belee kae nia bahihadu gi agu daangada donu, ge e hai labelaa agu tigidaumaha. a  18 Di madagoaa nogo haihai agu mee aanei, gei digaula gu gidee au i lodo di Hale Daumaha, i muli hua dagu haga lawa di hagadabu di haga madammaa. Gei digau dogologo nogo madalia au ai, di haga hinihini ai. 19 Gei digau o Jew mai Asia nogo i golo. Ma go digaula ala belee lloomoi gi oo mua e haga modongoohia aga, be di maa nia mee i nadau baahi, e hai baahi mai gi di au. 20 Be dumaalia ang gi nia daane aanei gi hagi aga ina nia huaidu ala ne gidee iei ginaadou bolo ne hala iei au, i di madagoaa au nogo noho i mua digau hai gabunga aamua. 21 Dagu mee dela ne hai i di madagoaa au nogo i mua digaula, au ne helekai boloo: Goodou e hagi aga au dangi nei, idimaa, au dela e hagadonu bolo digau ala ne mmade la ga mouli aga.” b  22 Gei Felix la gu modongoohia hagahumalia di Ala deelaa, ga haga lawa di haga dondonu, ga helekai gi digaula, “Au ga haga noho di godou hai deenei, i di madagoaa di tagi dauwa aamua go Lysias ma ga dau.” 23 Gei mee ga hai gi tagi dauwa bolo gi hagaloohia hua a Paul i golo, gei gi dugu ang gi mee gi mee di loomoi nia hoo hagaaloho o maa, e gaamai ana mee ala e hiihai ginai.

Paul i mua o Felix mo Drusilla

24 I muli hua nia laangi dulii, Felix gu hanimoi mo dono lodo go Drusilla, tangada o Jew. Mee ne hagau tangada gi laha mai a Paul, gei meemaa ga hagalongo gi ana helekai i di hagadonu a Jesus Christ. 25 Gei Paul e duudagi adu hua, e helekai i di haihai humalia, di benebene tuaidina, mo di Laangi Hagi aga dela ga hanimoi. Felix gu madagu, ga helekai, “Goe gu mee dau hana dolomeenei. Au ga gahi goe labelaa i dogu madagoaa ma ga aadee.” 26 Gei mee gu hagamaanadu labelaa bolo Paul ga wanga ana bahihadu gi deia, deelaa di mee a mee e gahigahi ai a Paul i nia madagoaa huogodoo belee helehelekai ginaua.

27 I muli hua nia ngadau e lua ne too gi daha, Porcius Festus ga gobinaa di lohongo Felix. Felix e hiihai bolo ia gi gila humalia i baahi digau o Jew, dela ne dugu a Paul huaigolo i lodo di hale galabudi.

Copyright information for `KPG