a9.23-25:2 Cor 11.32-33

Acts 9

Saul e huli dono manawa

(Acts 22.6-16; 26.12-18)

Di madagoaa deelaa, Saul e hagamahi huoloo bolo ia e dadaaligi nia dama agoago di Tagi. Mee ga hana gi tagi aamua hai mee dabu, ga dangi ang gi mee bolo gi heia ana beebaa gi nia synagogee o digau o Jew i Damascus, be ia e gida dana dangada i digau ala e daudali di Ala o Tagi, gi mee ia di lawalawa de hilihili taane be di ahina, e laha mai gi Jerusalem. Malaa, di madagoaa Saul ne hana gu hoohoo adu gi di waahale Damascus, di maalama mai di langi ga inaina a mee, ga haganiga di gili o maa. Mee ga doo gi hongo nia gelegele, ga hagalongo gi di lee e helekai boloo, “Saul, Saul, goe e aha dela e hagahuaidu au?” Saul ga helekai, “Meenei, goe koai?”

Di lee deelaa ga helekai, “Go au go Jesus dela e hagahuaidu kooe.
Duu i-nua, hana gi lodo di waahale deenaa, di gowaa e haga modongoohia adu gi di goe au mee ala belee hai.” Digau ala nogo hula madalia a Saul, gu tuu dee muu, gu longono di lee, gei digaula digi gidee tangada. Saul ga duu i nua, gei mee gu dee gida. Digaula ga kumi di lima o maa, ga dagi gi lodo Damascus. Mee gu dee gida i lodo nia laangi e dolu, digi miami be e inu. 10 Tangada hagadonu nogo i Damascus, dono ingoo go Ananias, dela ne helekai ginai Tagi i lodo dana moe boloo, “Ananias!”

Mee ga helekai, “Deenei au, Meenei dogu Dagi.”
11 Tagi ga helekai, “Hagatogomaalia ina goe, hana gi di ala dela e haga ingoo bolo di “Ala Huudonu”, halahala ina i lodo di hale o Judas taane mai Tarsus dono ingoo go Saul. Mee e hai ana dalodalo, 12 i lodo dana moe, mee gu mmada gi taane dono ingoo go Ananias, e hanimoi, ga dugu ono lima gi ono nua, gi mee ia di gidee labelaa.” 13 Ananias ga helekai, “Meenei Tagi, nia daangada dogologo ne helekai mai i nnagadilinga mee huaidu huogodoo ala nogo hai go mee ang gi au daangada i Jerusalem. 14 Dolomeenei, gei mee gu hanimoi gi Damascus i ono mogobuna ala gu lawa dana kae mai baahi nia dagi hai mee dabu gi kumidia nia daangada huogodoo ala e daumaha adu gi di goe!” 15 Tagi ga helekai gi Ananias, “Hana, au gu hilihili taane deelaa belee hai hegau mai gi di au, ge e hagi anga dogu ingoo gi digau tuadimee, mono king, mo digau Israel. 16 Au ga bida hagi anga gi mee nnagadilinga mee huogodoo bolo mee e hai loo gi hagaduadua i di au.” 17 Ananias ga hana, ga ulu gi lodo di hale deelaa, ga dugu ono lima gi hongo Saul, ga helekai, “Saul, dogu duaahina daane, Tagi Jesus gu hagau mai au, go mee dela ne mmada ginai goe i doo hanimoi i hongo di ala. Mee ne hagau mai au bolo gi mee goe di gidee nia mee, gei gi honu i di Hagataalunga Dabu.” 18 Di madagoaa hua deelaa, gei nia mee be nia una iga ga too mai i lodo nia golomada o Saul, gei mee gu gidee nia mee, ga duu i-nua, ga babdais. 19 I muli hua o mee ne miami, gei mee gu maaloo labelaa.

Saul e hai ana agoago i Damascus

Saul gu noho i Damascus i nia laangi dulii, madalia digau ala gu hagadonu.
20 Gei mee gu hana haga huudonu gi nia synagogee o digau o Jew, ga daamada ga agoago bolo Jesus la Tama ni God. 21 Digau huogodoo ala nogo hagalongo gi mee, gu homouli huoloo, ga heheeu, “Ma hagalee go taane dela nogo dadaaligi digau i Jerusalem ala e daumaha ang gi Jesus? Mee hagalee ne hanimoi gi kinei belee kumi digaula, e wanga gi nia dagi hai mee dabu?” 22 Nia agoago Saul gu mada maaloo i ana agoago i mua. Ana haga modongoohia bolo Jesus la go di Mesaia, la gu maaloo huoloo, dela ga hidi mai digau o Jew ala e noho i Damascus, gu deemee di helekai gi nia agoago a maa. 23 I muli hua nia laangi e logo, gei digau o Jew ga dagabuli gi di gowaa e dahi belee helehelekai, e daaligi Saul gi made. a  24 Tangada i golo gu hagi ang gi Saul nia mee digaula ala nogo helehelekai ai. I di boo mo di aa, digaula e haga loohi nia ngudu nia bontai o di waahale deelaa belee daaligi a Saul gi made. 25 Dahi boo hua, nia dama agoago a Saul ga lahi a mee gi di bongoo di abaaba, ga wanga a mee gi lodo di gada, ga haga hege ia gi daha mo di abaaba deelaa.

Saul i Jerusalem

26 Saul ga hana gi Jerusalem, ga hagamada belee hagapuni ang gi nia dama agoago ala i golo, gei digaula hagalee hagadonu bolo mee tangada i nia dama agoago a Christ, digaula gu mmaadagu huoloo i mee. 27 Gei ogo Barnabas ga hagamaamaa a mee, ga laha mai a mee gi nia gau agoago hagau. Barnabas ga haga modongoohia gi digaula di hai o Saul, dono mmada gi Tagi i hongo di ala, mo di hai o Tagi ne helekai gi mee. Geia ga hagi anga labelaa gi digaula di hai o Saul i dono agoago manawa maaloo i di ingoo o Jesus i Damascus. 28 Malaa, Saul gu noho i baahi digaula, e heehee i lodo Jerusalem, e agoago manawa maaloo i di ingoo o Tagi. 29 Mee e helehelekai mo di lagamaaloo ang gi digau o Jew ala e leelee Greek, gei digaula gu hagamada bolo e daaligi a mee gi made. 30 Di madagoaa hua digau ala gu hagadonu ne longono di mee deenei, digaula ga hagau Saul gi Tarsus i Caesarea. 31 Malaa, nia nohongo dabu o nia gowaa huogodoo i Judea, Galilee mo Samaria, gu noho i di aumaalia, gu tomo aga, gu dogologowaahee, mai i di hagamaamaa o di Hagataalunga Dabu mo di nadau momouli hagalaamua Dimaadua.

Peter i lodo Lydda mo Joppa

32 Peter ne hana ne hagadau i nia waahale huogodoo, geia ne hana labelaa gi di waahale go Lydda, belee heetugi gi nia daangada a God ala e noho i golo. 33 Mee ne heetugi gi taane, dono ingoo go Aeneas e magi deemee di heehee, gu moe waalooloo, nogo deemee di duu i-nua gi daha mo dono moenge i lodo nia ngadau e walu. 34 Peter ga hai gi mee, “Aeneas, Jesus Christ ga hai goe gi hili. Duu i-nua, winia doo moenge.” Gei Aeneas ga limalima hua, ga duu i-nua. 35 Nia daangada huogodoo ala e noho i Lydda mo Sharon ne mmada gi mee, gei digaula gu huli ang gi Tagi.

36 Di ahina hagadonu, dono ingoo go Tabitha, i lodo di waahale go Joppa. Dono ingoo i telekai Greek la goDorcas.
9.36:Tadinga di ingoo Dorcas bolo “Di ee”
I nia madagoaa huogodoo mee e haihai nia mee humalia, gei e hagamaamaa digau hagaloale.
37 Di madagoaa hua deelaa, gei mee gu hai dono magi, gu made. Gei muli dono huaidina ne lawa di gaugau, ga haga moe i lodo di ruum i nua. 38 Joppa la hagalee mogowaa i Lydda. Digau hagadonu ala i Joppa ga iloo bolo Peter la i-lodo o Lydda, ga hagau nadau daane dogolua, e kae di nau dangidangi gi mee boloo, “Dumaalia, hanimoi doodoo mai laa gi madau baahi.” 39 Gei Peter ga hagatogomaalia, ga lloomoi ginaadou. I di nadau dau, digaula ga hai a mee gi gaga gi di ruum i nua. Nia ahina huogodoo gu mmade nadau lodo, e mmui haganiga a mee, e tangitangi, ga hagi ang gi Peter nadau gahu mo nadau gahu laa daha ala ne dui go Dorcas i dono madagoaa nogo mouli. 40 Peter ga hagau digaula gi daha, ga dogoduli, ga dalodalo, ga huli adu gi tuaidina o maa, ga helekai, “ Tabitha, ala aga!” Di ahina ga ala aga, ga gidee ia Peter, ga noho gi nua. 41 Peter ga kumi adu a mee, ga haga duu i-nua, nomuli ga gahigahi digau hagadonu aalaa, mono ahina gu mmade nadau lodo, ga helekai gi digaula bolo di ahina la gu mouli. 42 Di longo deenei gu dele i lodo Joppa hagatau, gei digau dogologowaahee gu hagadonu di Tagi. 43 Peter gu logo ono laangi nogo noho i Joppa, i baahi taane dono ingoo go Simon, tangada moomee gili kau.

Copyright information for `KPG