a2.1:Acts 11.30, 15.2
b2.6:Deut 10.17
c2.16:Ps 143.2; Rom 3.20, 22

Galatians 2

Paul mo digau agoago hagau ala i golo

Muli nia ngadau e madangaholu maa haa, gei gimaua mo Barnabas ne hula labelaa gi Jerusalem, gu lahi labelaa a Titus. a  God ne haga modongoohia mai gi di au bolo au gi hana gi golo. I lodo tagabuli mada gimaadou mo nia dagi, au gu haga modongoohia gi digaula di Longo Humalia dela e agoago ko au gi digau tuadimee. Au e hagalee hiihai bolo agu hegau namua be dolomeenei, gi dee de kila. Dogu ihoo go Titus, maeaha mee tangada Greece digi hono gi mee gi sirkumsais, gei hunu gau i digaula e hiihai bolo mee gi sirkumsais. Nadau hangaahai bolo ginaadou nia hoo hagadonu ni gimaadou, gei ne ulu mai be digau gaiaa, bolo gi iloo ginaadou di madau moholo i di madau buni ang gi Jesus Christ. Digaula e hiihai bolo gidaadou e hai nia hege, gei gimaadou digi dumaalia gi digaula, bolo di tonu di Longo Humalia la gi noho hua i godou baahi. Digaula e hai be nia dagi. (Au e helekai beenei, idimaa, au hagalee dugu geegee nia daangada. God e hagalee mmada gi tuaidina tangada.) Au e helekai bolo nia dagi aalaa digi gaamai nadau maanadu hagamaamaa hoou. b  Gei deeai, digaula gu gidee bolo God gu gaamai dogu duhongo hegau(, e-) agoago gi digau tuadimee di Longo Humalia, gadoo be di hai a mee dela ne wanga gi Peter bolo mee gi agoago ina gi digau o Jew di Longo Humalia. God dela ne hai au gi hai tangada agoago hagau ang gi digau tuadimee, ne hai Peter gi hai tangada agoago hagau ang gi digau o Jew. James, Peter mo John ala e hai be nia dagi digaula, la gu modongoohia bolo God gu dugu mai dogu duhongo hegau deenei. Digaula gu lulu mau lima mo Barnabas belee haga modongoohia bolo gimaadou huogodoo gu buni ngaadahi . Gimaadou gu noho baba bolo gimaua mo Barnabas e ngalua i baahi digau tuadimee, gei digaula ga ngalua i baahi digau o Jew. 10 Gei di mee hua e dahi digaula e hiihai gi gimaua, bolo gi langahia laa digau hagaloale ala i nadau baahi, deenei hogi dagu mee e ngalua damanaiee ginai au belee haga gila aga.

Paul e hai baahi gi Peter i Antioch

11 Di madagoaa Peter ne hanimoi gi Antioch, gei au gu hai baahi gi mee i mua digau dogologowaahee, i nia mee hai gee a maa la gu modongoohia. 12 I mua nia daane ala ne hagau mai baahi o James ne dau mai, gei Peter nogo miami i baahi digau tuadimee ala gu hai nia dama ni Christ. Muli hua nia daane ne dau mai, gei mee gu hagalee miami i baahi digau tuadimee, idimaa, mee madagu i digau ala e hiihai bolo digau tuadimee le e hai loo gi sirkumsais. 13 Mo nia duaahina gau o Jew labelaa gu madalia a Peter gu mmaadagu , deenei laa Barnabas gu madagu labelaa. 14 Dogu gidee bolo digaula hagalee taele i di ala e donu, be di tonu o di Longo Humalia, gei au ga helekai gi Peter i mua digaula huogodoo, “Goe tangada donu o Jew, gei goe e mouli di mouli o tangada tuadimee, hagalee mouli i di mouli digau o Jew. Malaa, e hai behee go dau hai dela e mahimahi ang gi digau tuadimee bolo gi hai be digau o Jew?

Digau o Jew mo digau tuadimee gu mouli mai di hagadonu

15 Gimaadou digau o Jew mai i madau haanau, hagalee “Digau tuadimee huaidu”. 16 Malaa, gidaadou gu iloo bolo tangada le e donu i mua o God mai i dono hagadonu hua a Jesus Christ, hagalee mai i dono haga gila aga Nnaganoho. Gidaadou labelaa gu hagadonu a Jesus Christ, gu hai digau e donu i mua o God, mai i tadau hagadonu a Christ, hagalee mai i tadau haga gila aga Nnaganoho! Ma deai tangada e mee di donu i mua o God ai mai i dono haga gila aga Nnaganoho. c  17 Maa gidaadou gu hai digau e donu i mua o God mai tadau hagadonu a Christ, malaa, ga gida bolo gidaadou digau e huaidu be digau tuadimee, deenei la bolo Christ le e hai hegau gi di huaidu? Deeai huoloo! 18 Maa au ga haga duu aga labelaa Nnaganoho ala gu lawa di oho gi daha i mua, deenei le e haga modongoohia, bolo au tangada dagadagahi Nnaganoho. 19 Mai i Nnaganoho, au gu made, go Nnaganoho hua ala ne daaligi au gi made, bolo gi mouli au ang gi God. Au gu dau madalia a Christ dono made i hongo di loobuu, 20 deenei laa, hagalee ko au dela e mouli, gei go Christ dela e mouli i ogu lodo. Gei di mouli deenei e mouli iei au dolomeenei, di mouli mai i lodo dogu hagadonu Tama a God dela ne aloho i di au ga tigidaumaha ia gi God i di au. 21 Au hagalee bae gi daha tumaalia o God, idimaa, maa nei bolo tangada le e donu i baahi o God mai Nnaganoho, gei di made o Christ la dono hadinga ai!

Copyright information for `KPG