a1.1:Mt 13.55; Mk 6.3; Acts 15.13; Gal 1.19
b1.10-11:Is 40.6-7
c1.17:1 Sam 15.29

James 1

Mai James, tangada hai hegau a God, mo Tagi go Jesus Christ.

Taga aloho ang gi nia dama a God huogodoo ala e noho modoho i nia madagoaa huogodoo i henuailala. a 

Di hagadonu mo di kabemee

Ogu duaahina nei, goodou gi maanadua bolo goodou e haadanga lamalia gi nia hagadilinga haingadaa huogodoo ala ma ga tale adu gi goodou. Idimaa, goodou e iloo bolo godou hagadonu ma ga maaloo i nia haingadaa aanei, le e haga llauehe aga godou manawa hagakono i di madagoaa haingadaa. Goodou la gi pula i godou manawa hagakono i nia madagoaa haingadaa gi noho hua beelaa, gei goodou ga dohu huoloo, ga dogomaalia. Maa tangada i goodou e dee dohu dono kabemee, geia gi dalodalo ang gi God, ge God ga dugu anga, idimaa, God e manawa dumaalia ga hana hua beelaa ang gi nia daangada huogodoo. Malaa, goodou e hai loo gi dalodalo i di hagadonu, hagalee manawa logo. Tangada dela e manawa logo le e hai gadoo be di beau o di moana dela e bagibagia i di madangi. Tagadilinga dangada beenei digi dogomaalia dono hilihili, digi hagatogomaalia ana mee e hai, ia gi hudee maanadu bolo ia e mee di kae ana mee mai baahi o Dimaadua.

Di hagaloale mo di maluagina

Nia duaahina dama a Christ hagaloale e hai loo gi tentene i di madagoaa dela e haga menege aga go God. 10 Nia duaahina dama a Christ maluagina gi tentene labelaa i di madagoaa dela e haga menege ia go God, idimaa, digau ala e maluagina ga hagalee, gadoo be di akai o di laagau geinga. b  11 Gei di laa ga hobo, ga welengina, ga dudu nia laagau, gei nia akai maae, ga monnono. Nadau madamada ga hagalee. Dela gadoo be tangada maluagina dela ma ga daaligi ga hagalee i dono madagoaa e hai dana moomee.

Nia hagamada

12 E maluagina go tangada dela e manawa dahi i lodo nia hagamada haingadaa. I muli di aali i ono hagamada, geia e kae di hau o di mouli. Deenei go di mouli a God ne hagababa ang gi digau ala e aloho i deia. 13 Maa tangada ga tale gi nia hagamada haingadaa, geia gi hudee helekai boloo, “Nia hagamada aanei ne loomoi i baahi o God.” Idimaa, di huaidu e mee di hagamada a God ai, gei God hogi hagalee e hagamada tangada. 14 Malaa, tangada le e tale gi nia hagamada mai i ono hiihai huaidu. 15 Gei ono hiihai huaidu ga hagadili aga nia huaidu, gei di huaidu ga tomo aga ga hidi ai di made.

16 Ogu ihoo hagaaloho nei, goodou hudee bida halahalau ina goodou. 17 Nia wanga dehuia humalia huogodoo, mono maluagina e dohu huogodoo, le e lloomoi i di langi i baahi o God dela ne hai nia maalama o di langi. God hagalee huli, ge hagalee hagabouli. c  18 Mai dono hiihai oono, mee ne hai gidaadou mai ana helekai donu, bolo gi hai gidaadou nia ulu mmaadua o ana mee huogodoo.

Hagalongo mo di haga kila aga nnelekai a God

19 Ogu duaahina hagaaloho nei, goodou gi langalangahia di mee deenei: Tangada nei mo tangada nei i goodou huogodoo, gi limalima di hagalongo, malaa, hudee hagalellele di helekai, hudee limalima di hagawelewele. 20 Idimaa, di hagawelewele o tangada la hagalee hagamaamaa di haga gila aga di manawa donu a God. 21 Malaa, goodou haga mogowaa ina goodou gi daha mo nia hangaahai milimilia, mo nia haihai hala huogodoo. Goodou dugua anga goodou gi God ge gi kae ina ana helekai ala e dogi go mee gi lodo godou manawa, aanei nia helekai e mee di haga mouli goodou. 22 Goodou haga kila ina aga nnelekai a God. Ma goodou ga hagalongo hua gi nia maa, gei goodou e bida halahalau hua goodou. 23 Tangada dela ma ga hagalongo hua gi nia helekai a God, gei hagalee haga gila aga nia maa, ia e hai gadoo be tangada dela ma ga mmada gi lodo di kalaadi, ia ne mmada hua gi dono ada. 24 Dono madagoaa ne hana gi daha mo di kalaadi, geia gu limalima hua gu de langahia dono ada. 25 Tangada dela e hagadina taganoho dela e donu humalia, dela e haga maahede nia daangada, ga daudali ai, hagalee hagalongo hua ga de langahia ia, gei e haga gila aga di maa, deenei tangada a God e hagahumalia i ana mee huogodoo ala ma ga hai. 26 Maa tangada i golo e hagamaanadu bolo ia tangada daumaha humalia, geia e deemee di dugu dono ngudu, dono hai daumaha le e balumee hua, ia e bida halahalau hua ia. 27 Di mee a God dela e hai bolo taumaha dela e madammaa gei e donu, la deenei: Madamada humalia nia damagiigi ala gu mmade nadau maadua, mo nia ahina gu mmade nadau lodo i nadau haingadaa, ge hudee hagahuaidu ina goodou gi nia hangaahai huaidu o henuailala.

Copyright information for `KPG