a4.6:Prov 3.34
b4.13-14:Prov 27.1

James 4

Hai hoo gi henuailala

Nia hagadilinga heheebagi mono lagalagamaaloo huogodoo ala e hai i godou mehanga, le e daamada mai i-hee? Ne daamada mai i godou manawa hiihai dangada huaidu ala e hagadau heheebagi i godou lodo i nia madagoaa huogodoo. Goodou e hiihai gi nia mee, gei goodou e deemee di hai mee ginai, ga hidi ai goodou e dadaaligi dangada. Goodou e hiihai maaloo gi nia mee, gei goodou e deemee di hai mee ginai, gei goodou ga lagalagamaaloo ga heheebagi. Gei goodou e deemee di hai mee gi di mee e hiihai ginai, idimaa, goodou hagalee tangi ang gi God. Goodou ga dangidangi gi God, gei goodou hagalee hai mee gi di mee e dangi ai, idimaa, godou hagamaanadu la hagalee donu, goodou e tangi hua i nia mee e haga manawa lamalia hua goodou. Goodou hagalee manawa dahi. Goodou e de iloo bolo goodou ma ga hai nia hoo ni henuailala, dono hadinga bolo goodou nia hagadaumee ni God? Tangada dela e hiihai gi hai di hoo hagaaloho ni henuailala, dela go mee ga hai di hagadaumee ni God. Goodou hudee haga balumee ina nia helekai di Beebaa Dabu ala e helekai,

“Di hagataalunga ne dugu go God i tadau lodo, le e honu i nia maanadu dubua.”
Tumaalia o God dela e gaamai gi gidaadou, la koia e damanaiee, gi hai be nnelekai di Beebaa Dabu,

“God e huli gi daha mo digau hagamuamua, geia e wanga dono dumaalia gi digau hila gi lala.” a 
Duguanga ina goodou gi God. Hai baahi gi Satan, gei mee ga lele gi daha mo goodou. Lloomoi hagahoohoo ina goodou gi baahi o God, gei mee ga hagahoohoo ia adu gi godou baahi. Digau huaidu, haga madammaa ina godou lima. Digau hai hegau ngudu golomada, haga madammaa ina godou lodo. Goodou gi manawa gee, tangitangi mo di wawwawe. Huluhia godou gadagada gi di tangi, di godou tentene gi di manawa gee. 10 Dugu ina goodou gi lala i mua o God, gei mee ga haga menege aga goodou.

Hudee hagi aga ina godou duaahina dama a Christ

11 Ogu duaahina nei, goodou hudee hagadau helekai huaidu i godou mehanga. Tangada dela e hagahuaidu be e hagi aga dono duaahina, geia e helekai huaidu mo di hagi aga nnaganoho. Maa goe e hagi aga nnaganoho, gei goe hagalee hagalongo gi nia maa, goe la gu hai tangada hagi aga nia maa. 12 Ma go God hua dela e hai nnaganoho ge e hagi aga tangada. Go mee hua dela e mee di haga mouli ge e hagahalaua. Goe koai dela bolo goe e hagi aga doo duaahina dama a Christ?

Hudee bida hagaamu

13 Hagalongo mai, goodou ala e helekai, “Dangi nei be daiaa gei gimaadou e hula gi di waahale deelaa, ga noho i golo i di ngadau e dahi, malaa, gimaadou ga huihui gi daha madau mee, ga gila mai tagabae bahihadu.” b  14 Gei e de iloo be godou mouli la ga hai behee nia laangi ala e loomoi, idimaa, goodou e hai gadoo be di magalillili o lala di langi, dela hua e gila aga tama madagoaa dulii, ga limalima hua dono hagalee. 15 Deenei di godou helekai belee hai, “Maa Dimaadua ga dumaalia mai, gei gidaadou ga mouli, ga hai nia mee aanei be nia mee aalaa.” 16 Dolomeenei, gei goodou e hagamuamua ge e hagaamu goodou, di mee deenei le e hai gee. 17 Malaa, tangada dela e iloo ia di mee donu dela belee hai, geia hagalee hai di maa, ia gu hai di hala.

Copyright information for `KPG