a2.21:Lev 12.3; Lk 1.31
b2.22-24:Lev 12.6-8
c2.23:Ex 13.2, 12
d2.32:Is 42.6, 49.6, 52.10
e2.39:Mt 2.23
f2.41:Ex 12.1-27; Deut 16.1-8
g2.52:1 Sam 2.26; Prov 3.4

Luke 2

Di haanau o Jesus

(Matthew 1.18-25)

Di madagoaa deelaa, gei di king go Caesar Augustus ne dugu dana haganoho bolo nia daangada huogodoo dono henua le e hihi. Deenei di hihi dangada matagidagi i di madagoaa Quirinius di gobinaa o Syria. Digau huogodoo gu haga mmaanege gi nadau goaa donu, bolo gi hihi ginaadou. Joseph, tangada di hagadili a David, gu hagatanga i di waahale Nazareth i Galilee, ga hana gi Bethlehem, di waahale o David i lodo Judea, bolo gi dau ia e hihi ngaadahi mo Mary dela belee lodo gineia. Mary gu hai dama i di madagoaa deelaa. Di madagoaa meemaa e noho i Bethlehem, gei Mary gu dae gi dono madagoaa e haanau ai, gei mee ga haanau dana dama daane madua, ga hii a mee gi di gahu hii dama, ga dugu gi lodo di mee haangai manu, idimaa, di hale noho gainga la gu deeoo.

Digau hagaloohi siibi mo digau di langi

Digau hagaloohi siibi nogo hagaloohi nadau siibi i di boo i lodo henua. Tangada di langi o Tagi ga haga gida ia gi digaula, gei di maahina o Tagi ga ina digaula. Digaula gu uli nadau gai huoloo. 10 Gei tangada di langi ga helekai gi digaula, “Goodou hudee mmaadagu, au e gowadu gi goodou di Longo Humalia e haga tentene ai digau huogodoo. 11 Idimaa, Tangada Hagamouli gu haanau adu gi goodou boo nei i lodo di waahale o David. Mee go Christ go Tagi! 12 Deenei dono haga modongoohia: Goodou ga gidee di tama dulii e hii gi di gahu hii dama e moe i lodo di mee haangai manu.” 13 Di madagoaa hua deelaa, digau di langi dogologowaahee ga loomoi gi baahi tangada di langi deelaa, ga haga hagaamu a God, ga daahili:

14 “Hagaamuina God i di langi i nua loo, gei di aumaalia i henuailala ang gi digau ala e manawa lamalia ginai mee!”
15 Di madagoaa digau di langi ne hagatanga, ga hula gi di langi, gei digau hagaloohi siibi ga helehelekai i nadau mehanga, “Gidaadou ga hula gi Bethlehem, gi gidee gidaadou di mee ne hai, dela ne hagi mai go Tagi.” 16 Digaula ga limalima ga hula, ga gidee Mary mo Joseph, mo tama dulii e moe i lodo di mee haangai manu. 17 Digau hagaloohi siibi ne gidee ginaadou di tama dulii deelaa, gei digaula ga hagi ang gi Joseph mo Mary nia helekai a tangada di langi ala ne hai ang gi ginaadou i di hai o tama dulii deelaa. 18 Digau huogodoo ne longono nia helekai digau hagaloohi siibi, la gu goboina huoloo. 19 Mary ga langahia nia mee huogodoo, ga mamaanadu hua i ono lodo. 20 Digau hagaloohi siibi ga hula gi muli, e dadaahili hagaamu a God i nia mee huogodoo ala ne longono, gei gu mmada ginai, gu kila be nnelekai tangada di langi ala ne hai .

Di ingoo Jesus

21 Muli nia laangi e walu, gei di tama ga sirkumsais, gei digaula ga gahi di ingoo o maa go Jesus, gi hai be di ingoo tangada di langi dela ne wanga gi mee i mua, gei mee digi hai di tama. a 

Di hagadabu Jesus

22 I muli di nau haga madammaa be di hai Nnaganoho Moses, gei Joseph mo Mary ga lahi di tama gi Jerusalem belee hagadabu ang gi Dimaadua, b  23 gadoo be nnelekai ala ne hihi i lodo Nnaganoho Tagi: “Nia ulu mmaadua daane huogodoo le e hagadabu ang gi Dimaadua.” c  24 Gei meemaa gu kae labelaa nau mee e tigidaumaha gi hai be di mee dela gu haganoho mai baahi Dimaadua, “nia mwuroi e lua be nia damaa manu-“pigeon” e lua.” 25 Di madagoaa deelaa, gei taane dono ingoo go Simeon e noho i Jerusalem. Mee tangada hai mee donu, ge e hagalaamua a God, nogo talitali di haga mouli o Israel, gei di Hagataalunga Dabu gu i dono baahi. 26 Di Hagataalunga Dabu la gu haga donu gi mee bolo mee hagalee made i mua dono gidee ia di Mesaia dela ne hagababa go Dimaadua. 27 Go di Hagataalunga hua deelaa ga dagi a mee gi di Hale Daumaha. Di madagoaa tamana mo tinana o Jesus ne laha mai a mee gi lodo di Hale Daumaha gi hai be nnelekai o Nnaganoho, 28 Simeon ga daa di tama, ga daahi, ga danggee ang gi God boloo:

29 “Meenei Tagi, dolomeenei goe gu daahi dau hagababa, gei goe gu mee hua di dugu anga dau hege gi hana i di aumaalia. 30 Au gu mmada donu dau haga mouli, 31 dela gu hagatogomaalia kooe i mua nia daangada huogodoo. 32 Di maalama e haga modongoohia doo hiihai gi digau tuadimee, ge e gaamai doo madamada gi au dama Israel.” d 
33 Tamana mo tinana o di tama gu goboina nia helekai a Simeon ala nogo helekai i di tama. 34 Simeon ga haga maluagina meemaa, ga helekai gi Mary, go tinana o di tama, “Tama deenei ne hilihili go God belee hagahuaidu gei e haga mouli digau dogologo o Israel. Mee ga hai di haga modongoohia mai baahi o God dela ga helekai hai baahi ginai digau dogologo, 35 ga haga modongoohia aga nadau maanadu hagammuni. Di manawa gee le e hai gadoo be di hulumanu daua ma ga daalo doo hadu manawa.

36 Soukohp ahina Anna, tama ahina ni Phanuel, tangada di madawaawa o Asher. Mee di ahina gu madumadua, ne hai dono lodo nia ngadau e hidu. 37 Muli di made dono lodo, gei mee nogo noho hua dono dina. Mee gu huowalu maa haa ono ngadau, gei mee digi hagatanga gi daha mo di Hale Daumaha. Boo mo aa, e daumaha ang gi God, e noho hagaonge mo di hai dalodalo. 38 Di aawaa hua deelaa gei mee ga dau, ga hai dana danggee ang gi God, mo di helekai i di tama ang gi digau huogodoo ala e tali gi God bolo gi haga mehede ina Jerusalem.

39 Meemaa ga lawa loo i di nau hai nia hegau gi hai be Nnaganoho a Tagi, ga hula gi muli gi Galilee gi di nau guongo go Nazareth. e  40 Di tama ne madua aga gu maaloo, gu honu i di kabemee, gei di haga maluagina o God gu madalia a mee.

Tama Daane go Jesus i lodo di Hale Daumaha

41 Nia ngadau huogodoo nia maadua Jesus e hula gi Tagamiami Pasoobaa i Jerusalem. f  42 Jesus gu madangaholu maa lua ono ngadau, gei digaula ga hula gi Tagamiami deelaa, be nadau hai nogo hulahula. 43 I muli Tagamiami ne lawa, gei digaula ga hula gi nadau guongo, gei tama daane go Jesus gu noho hua i Jerusalem, gei nia maadua digi iloo. 44 Meemaa e hagabau bolo mee i lodo digau dogologo ala e hula, gei meemaa ga hula i di laangi dogomaalia, ga daamada ga halahala a mee gi baahi nau gau mo nau ihoo. 45 Meemaa digi gidee a mee, ga hula gi muli gi Jerusalem, e halahala a mee. 46 I muli nia laangi e dolu, meemaa ga gidee a mee i lodo di Hale Daumaha, e noho i baahi digau agoago o Jew, e hagalongolongo gi nia helekai digaula mo di heheeu ana mee. 47 Digau huogodoo ne longono nia helekai kabemee a maa ne helekai gi nia heeu digaula, digaula gu goboina huoloo. 48 Nia maadua o maa gu goboina di nau gidee a mee, gei tinana o maa ga helekai, “Dagu dama daane, ma di aha ne hai kooe? Gimaua gu uli mau gai i di mau halahala goe!” 49 Jesus ga helekai, “Goolua e halahala au eiaha? Goolua e de iloo bolo au belee hai loo gi noho i lodo di hale o dogu Damana?” 50 Meemaa digi modongoohia telekai a maa. 51 Jesus ga hana i muli meemaa gi Nazareth, di gowaa nogo hagalongo iei mee gi meemaa. Tinana o maa e daahi hagahumalia nia mee huogodoo aanei i ono lodo. 52 Jesus gu tomo aga i dono huaidina mo dono iloo mee, gu hiihai ginai a God mo nia daangada. g 

Copyright information for `KPG