a20.9:Is 5.1
b20.17:Ps 118.22
c20.27:Acts 23.8
d20.28:Deut 25.5
e20.37:Ex 3.6
f20.42-43:Ps 110.1

Luke 20

Di heeu di mogobuna a Jesus

(Matthew 21.23-27; Mark 11.27-33)

Dahi laangi hua, Jesus nogo agoago gi nia daangada i lodo di Hale Daumaha i di Longo Humalia, gei nia dagi hai mee dabu mo digau haga dondonu haganoho ngaadahi mo nia dagi mmaadua gu loomoi, ga helekai gi mee, “Hagia mai gi gimaadou be nia mogobuna mai hee ala e hai au mee aanei? Ma koai dela ne gowadu di mogobuna e hai au mee aanaa?” Jesus ga helekai gi digaula, “Dolomeenei gei au e heeu adu dagu mee: Hagia mai, nia mogobuna a John nogo hai ana babdais, la ne lloomoi i baahi o God, be i baahi nia daangada?” Gei digaula ga helehelekai i nadau mehanga, “Gidaadou la ga helekai bolo aha? Maa gidaadou ga helekai boloo: Ne loomoi i baahi o God, gei mee ga helekai boloo, Malaa e aha goodou hagalee hagadonu John? Gei gidaadou ma ga helekai boloo: Ne loomoi i baahi nia daangada, gei digau dogologo aanei ga dilidili gidaadou, i digaula e hai bolo John la soukohp.” Gei digaula ga helekai, “Gimaadou e de iloo be nia mogobuna a maa ne loomoi i hee.” Gei Jesus ga helekai gi digaula, “Au hagalee hagi adu hogi be nia mogobuna ni aai ala e hai agu mee aanei.”

Di ala kai o digau benebene hadagee waini

(Matthew 21.33-46; Mark 12.1-12)

Jesus ga hai dana ala kai gi digaula, “Taane ne dogi dana hadagee waini, ga wanga gi ana gau benebene hadagee, geia ga hana haga mogowaa gu duai nau. a  10 Ga dae mai di madagoaa dela e hadi ai nia hua o di hadagee, gei mee ga hagau dana hege belee kumi dono duhongo i nia hua o di hadagee waini deelaa. Gei digau benebene hadagee ga daaligi di hege deelaa, ga hagau a mee gi hana ana mee ne kae ai. 11 Gei mee ga hagau labelaa dana hege, gei digaula ga daaligi labelaa a mee, ga hai a mee hagahuaidu, ga hagau a mee gi hana ana mee ne kae ai. 12 Gei mee ga hagau togodolu hege, gei digaula ga daaligi a mee gi moholehole labelaa, ga hudu a mee gi daha. 13 Gei tangada dana hadagee waini deelaa, ga helekai, Au ga hai dagu aha? Au ga hagau hua go dagu dama hagalabagau. Holongo digaula ga hagalaamua a mee! 14 Malaa, gei digau benebene di hadagee deelaa ne mmada gi mee, ga helekai i nadau mehanga, Deenei la go tama daane donu tangada dana hadagee waini. Gidaadou ga daaligi a mee gi made, gei ono maluagina ga hai nia mee ni gidaadou. 15 Gei digaula ga hudu a mee gi daha mo di hadagee waini, ga daaligi a mee gi made.”

Gei Jesus ga heeu, “Malaa, dehee laa di hai o tangada dana hadagee waini ga hai ang gi digau benebene hadagee aalaa?
16 Mee ga hanimoi, ga daaligi digau benebene hadagee aalaa, ga wanga di hadagee gi nnuai gau benebene hadagee.”

Gei digaula ala ne hagalongo gi di mee deenei ga helekai aga, “Hagalee loo e hai beenaa!”
17 Jesus ga mmada gi digaula ga helekai, “Malaa, di Beebaa Dabu deenei le e hai bolo aha:

Di hadu dela ne haga balumee go digau hau hale, la gu hai di hadu e kaedahi e hagalabagau! b 
18 Digau huogodoo ala ga hingahinga gi hongo di hadu deelaa, digaula ga mooho haga ligiligi, gei di hadu deelaa ma ga doo gi hongo tangada, gei tangada deelaa la ga mooho haga ligiligi, gu hai nia gelegele.”

Di heeu di hai o di hui dagitedi

(Matthew 22.15-22; Mark 12.13-17)

19 Digau hagadondonu haganoho mo nia dagi aamua hai mee dabu ne hagamada belee galabudi Jesus i di madagoaa hua deelaa, idimaa digaula gu iloo bolo di ala kai a mee ne hai, le e hai baahi ang gi ginaadou, gei digaula e mmaadagu i nia daangada. 20 Digaula ga halahala di madagoaa humalia, ga haganeene nia daane gi hai bolo ginaadou digau humalia, ga hagau digaula belee haga hala a Jesus gi nadau heeu, gi mee di wanga a mee gi nia mogobuna o di gobinaa o Rome. 21 Digau madamada gaiaa aanei ga helekai gi Jesus, “Tangada Agoago, gimaadou gu iloo bolo au mee ala nogo agoago ai le e donu. Gimaadou e iloo labelaa bolo goe hagalee haga dahidamee nia haganoho nia daangada, ge e agoago hua di tonu a God mo dono hiihai gi nia daangada. 22 Hagia mai be di maa e hai baahi gi tadau haganoho ma gidaadou ga hui dagitedi gi di king o Rome go Caesar be deeai?” 23 Gei Jesus gu iloo ia di hai haga magiaa digaula, ga helekai, 24 “Gaamai tei bahihadu silber. Di ada mo di ingoo ni ooi aanei i hongo di maa?”

Digaula ga helekai, “Ni Caesar.”
25 Gei Jesus ga helekai, “Malaa, huia gi Caesar nia mee a Caesar, ge huia gi God nia mee a God.” 26 Digaula gu deemee di haga hala a mee i mua nia daangada, gu noho dee muu, gu goboina i ana helekai.

Di heeu di mouli aga

(Matthew 22.23-33; Mark 12.18-27)

27 Hunu Sadduccee, ala e hai bolo nia daangada la hagalee mouli aga, ne loomoi gi Jesus ga helekai, c  28 “Meenei, Tangada Agoago, Moses ne hihi taganoho deenei, bolo taane ma ga made, ga diiagi dono lodo nau tama ai, gei tuaahina daane o maa e hai gi lodo gi di ahina deelaa, ga hai nau dama, ga dugu bolo nia dama ni taane dela gu made. d  29 Taga haanau daane dogohidu i golo. Tama daane madua ga hai dono lodo, ga made, gei digi hai dana dama. 30 Nomuli, gei togolua duaahina daane o maa ga lodo gi di ahina deelaa. 31 Nomuli go togodolu duaahina daane. Taga haanau dogohidu huogodoo gu mmade, nadau dama gi di ahina deelaa ai. 32 Haga muliagina, gei di ahina deelaa la ga made. 33 Malaa, di laangi e mouli aga nia daangada, di ahina la ga hai di lodo ni ooi? Idimaa, tagahaanau dogohidu gu lodo gi di ahina deelaa!” 34 Gei Jesus ga helekai gi digaula, “Nia daane mono ahina dolomeenei e haga hai lodo, 35 gei nia daane mono ahina ala e tau ang gi di mouli aga mai di made mo e mouli i di madagoaa dela e hanimoi, la hagalee haga hai lodo. 36 Digaula ga hai be digau di langi, ga deemee di mmade. Digaula nia dama ni God, idimaa, digaula ne mouli aga mai i di made. 37 Gei Moses gu haga modongoohia haga madammaa bolo digau ala ne mmade le e mouli aga. Di kai o di laagau duduia dela ne ulaula, Moses ne helekai i Dimaadua bolo mee go di God Abraham, di God Isaac, mo di God Jacob. e  38 Mee di God ni digau mouli, hagalee ni digau mmade. Digau huogodoo e mouli ang gi mee.” 39 Hunu gau hagadondonu haganoho ga helekai aga, “Meenei Tangada Agoago, e donu go dau helekai deenaa!” 40 Idimaa, digaula gu mmaadagu di heeu labelaa nadau mee gi mee.

Di heeu di Mesaia

(Matthew 22.41-46; Mark 12.35-37)

41 Jesus ga heeu gi digaula, “Maeaha dela bolo Mesaia la di hagadili ni David? 42 Idimaa, David gu helekai i lodo di Beebaa Pisalem, boloo:

Dimaadua gu helekai gi dogu Dagi: Noho i ginei i dogu baahi gau donu, f 
43 ga dae loo gi dagu dugu oo hagadaumee gi lala oo babaawae be di mee mee haaligi wae.
44 Malaa, David ne gahi a mee bolo dono Dagi, malaa, e aha di Mesaia ga hai di hagadili ni David?”

Jesus e haga iloo hagalliga i digau hagadondonu haganoho

(Matthew 23.1-36; Mark 12.38-40)

45 Digau huogodoo nogo hagalongo gi mee, gei Jesus ga helekai gi ana dama agoago, 46 “Gi pula i goodou gi dee hai be digau haga dondonu haganoho ala e hiihai e heehee i lodo nadau gahu lloo, e hiihai bolo gi haga hagaaloho ge hagalaamua go nia daangada i lodo di gowaa huihui mee. Digaula e hilihili nia lohongo aamua i lodo nia synagogee mo nia gowaa ala koia e humalia i lodo nia hagamiami. 47 Digaula e kae nia haga humalia o nia ahina gu mmade nadau lodo ge gaiaa digaula i nadau hale, gei e dalodalo lloo! Di hagaduadua digaula koia e huaidu huoloo!”

Copyright information for `KPG