b23.30:Hos 10.8; Rev 6.16
c23.34:Ps 22.18
d23.35:Ps 22.7
e23.36:Ps 69.21
f23.45:Ex 26.31-33
g23.46:Ps 31.5
h23.49:Lk 8.2-3
i23.56:Ex 20.10; Deut 5.14

Luke 23

Jesus i mua o Pilate

(Matthew 27.1,2,11-14; Mark 15.1-5; John 18.28-38)

Tagabuulinga daangada ga tuu i-nua, ga lahi Jesus gi mua o Pilate. Digaula ga daamada ga hagahuaidu a mee, ga helekai, “Gimaadou ne kumi taane deenei dela nogo dagi gee madau daangada. E helekai gi digaula bolo gi hudee hui dagitedi gi Caesar, gei e hai bolo ia go di Mesaia, di king. Pilate ga heeu, “Goe go di king digau o Jew?”

Jesus ga helekai, “Kooe dela e helekai.”
Pilate ga helekai gi nia dagi hai mee dabu, mo digau dogologo, “Au digi gida dagu ihala belee hagahuaidu taane deenei.” Gei digaula ga helekai aga mada maaloo, “Mee ne hai digau i nia gowaa huogodoo i Judea gi leelee logo i ana agoago. Mee ne daamada i Galilee, ga dau mai loo gi kinei.”

Jesus i mua Herod

Pilate ne longono ia nia mee aanei, ga heeu, “Taane Galilee deenei?” Di madagoaa mee ne iloo ia bolo mee tangada di guongo dela e dagi go Herod, geia ga hagau a mee gi Herod dela nogo i Jerusalem i di madagoaa hua deelaa. Gei Herod gu tentene huoloo dono mmada gi Jesus, i mee gu longono ia nia longo o maa, gu waalooloo dono hiihai bolo ia e mmada gi mee. Mee nogo talitali bolo ia e mmada gi Jesus e hai ana mogobuna. Gei Herod ga hai ana heeu e logo gi Jesus. Jesus digi helekai gi nia heeu a maa. 10 Nia dagi hai mee dabu mo digau hagadondonu haganoho ga tuu gi mua ga helekai maaloo hagahuaidu a Jesus. 11 Herod mo ana gau daua ga haganneennee haga balumee a Jesus, ga haga ulu a mee gi di gahu madamada, ga hagau labelaa gi Pilate. 12 Di laangi hua deelaa, gei Pilate mo Herod gu hai di hagadau ihoo, mai i-mua gei meemaa nogo hagadaumee.

Jesus gu hagi aga bolo e daaligi gi made

(Matthew 27.15-26; Mark 15.6-15; John 18.39—19.16)

13 Pilate ga haga dagabuli mai digau aamua hai mee dabu, nia dagi, mo nia daangada, 14 ga helekai, “Goodou gu laha mai taane deenei bolo mee ne haga hala nia daangada. Gei dolomeenei, au gu haga dina a mee i godou mua, gei au digi gida dagu mee, bolo mee e hala i nia hagahuaidu ala nogo helekai iei goodou. 15 Gei Herod digi gida bolo mee e hala labelaa, dela ga hagau mai labelaa taane deenei gi gidaadou. Goodou gi iloo bolo taane deenei digi hai dana hala bolo ga hidi iei mee e daaligi gi made. 16 Malaa, au ga wanga a mee e haga mamaawa go agu gau daua, nomuli gei au ga hagamehede a mee gi hana.” 17 [Nia madagoaa nia Hagamiami Pasoobaa huogodoo, gei Pilate e hai gi hagamehede ang gi digau o Jew dahi dangada galabudi.] 18 Digau huogodoo ga wwolo gi nua boloo, “Tangada deenaa la daaligidia gi made, gei Barabbas la gi hagamehede ina mai gi gimaadou!” 19 (Gei Barabbas la tangada huaidu ne hudu gi lodo di hale galabudi i di ngoongooaa nogo hai i lodo di waahale damana, gei mee ne daaligi dana dangada gi made.)
23.19: Di waahale damanala go Jerusalem
20 Pilate le e hiihai hua e hagamehede a Jesus, deelaa laa gei mee ga helekai labelaa gi di hagabuulinga dangada deelaa. 21 Gei digaula ga wwolo gi mee, “Daudaulia a mee! Daudaulia a mee!” 22 Pilate ga helekai tolu holongo, “Di hala aha ne hai go mee? Au digi gida dagu mee bolo mee e daaligi gi made! Au ga hai a mee gi haga mamaawa, ga lawa, ga hagamehede a mee.” 23 Gei digaula ga wwolo aga hua maaloo gi nadau lee mugi nua bolo Jesus le e daudau. Muli hua nia wwolowwolo digaula, gei di maa gu hai be di hai digaula. 24 Gei Pilate ga hagamodu di hagi aga o Jesus gi hai be nia hiihai digaula. 25 Gei mee ga hagamehede tangada dela nogo hiihai ginai digaula, dela nogo i lodo di hale galabudi i di ngoongooaa mo dana daaligi tangada gi made, gei mee ga wanga a Jesus gi digaula, gi hai ginai nadau hiihai.

Di daudau o Jesus

(Matthew 27.32-44; Mark 15.21-32; John 19.17-27)

26 Digau daua ga dagi a Jesus gi daha, di nadau lloo adu ga heetugi gi taane mai Cyrene go Simon, e hanimoi gi di waahale. Digaula ga kumi a mee, ga dugu di loobuu gi hongo o mee, gi aamo ina i muli o Jesus. 27 Di hagabuulinga gau dogologo e daudali a mee. Nia ahina i lodo digaula, e tangitangi i mee. 28 Jesus ga huli gi digaula, ga helekai, “Nia ahina o Jerusalem! Hudee tangitangi mai gi di au. Tangi adu gi goodou mo godou dama. 29 Idimaa, nia laangi e loomoi i golo, gei nia daangada ga helekai boloo: Gu hadanga lamalia go nia ahina ala digi hai nadau dama, gei digi haanau be hagalee haga uu nadau dama. 30 Deelaa di madagoaa nia daangada ga helekai gi nia gonduu boloo: Hinga mai gi madau nua! Gei e helekai gi nia gonduu lligi: Gahu ina gimaadou gi nngala! b  31 Maa nia mee aanei la ga hai i di madagoaa di laagau le e mouli, ma di aha ga hai i di madagoaa di laagau ga maangoo?” 32 Nia daane dogolua gu haga ulu mai labelaa gi daha belee daaligi gi mmade dalia a Jesus. Meemaa nia daangada gu dagahi nau haganoho. 33 Di nadau dau mai gi di gowaa e haga ingoo “Di Gowaa Hangaibu Libogo”, digaula ga daudau a Jesus i golo, mo nia daangada huaidu dogolua, tangada e dahi i dono baahi gau donu, ge dahi i dono baahi gau ihala. 34 Jesus ga helekai, “Tamana, dumaalia gi digaula, digaula e de iloo nadau mee ala e hai.”

Gei digaula ga duwwe nia gahu o maa i ginaadou gi di nadau bilei ne hai. c 
35 Nia daangada e tuu i golo e daumada nia mee aanei, gei nia dagi digau o Jew e haganneennee a mee, ga helekai, “E mee hua di haga mouli nia daangada ala i golo. mee gi bida haga mouli ia maa ia go di Mesaia ne hilihili go God.” d  36 Digau daua gu haganneennee a mee labelaa, ga loomoi mo nadau waini hui ngoohia, ga wanga gi mee, e  37 ga helekai, “Goe gi bida haga mouli ina hua goe, maa goe go di king o digau o Jew!” 38 I hongo di libogo Jesus i hongo di loobuu, e hihi nia helekai aanei: “Deenei di king o digau o Jew.” 39 Tangada e dahi i nia daangada huaidu ala ne daudau dalia a mee, ga helekai haga daamaha gi mee boloo, “Goe hagalee go di Mesaia? Hagamouli ina goe mo gimaua!” 40 Di hoo o maa ga helekai haga buhi gi mee, “Goe hagalee madagu i God? Goe gu kae di hagaduadua be mee. 41 Gidaua e donu hua di kae di hagaduadua deenei, idimaa, gidaua e kae di hui o tau mee ala ne hai, gei mee digi hai dana mee hala.” 42 Gei mee ga helekai, “Meenei Jesus, gi langahia e-goe au i doo madagoaa ma ga hanimoi iei goe be di king!” 43 Jesus ga helekai, “Au e hagi adu gi di goe di tonu bolo dangi nei hua, gei goe gu madalia au i Paradais.”

Di made o Jesus

(Matthew 27.45-56; Mark 15.33-41; John 19.28-30)

44 Holongo di laa e madangaholu maa lua, gei di bouli la gu gahu tenua hagatau ga dae loo gi di laa e dolu, 45 idimaa, di laa gu hagalee maahina. Gei di gahu dela e dau i lodo di Hale Daumaha la gu mahaa lua. f  46 Gei Jesus ga wolo gi nua, ga helekai, “Tamana! Au e dugu adu dogu hagataalunga gi lodo oo lima.” Mee ne helekai hua beenei, nomuli ga made. g  47 Gei tangada daua aamua dela ne gidee ia nia mee aanei, geia ga hagaamu a God, ga helekai, “E donu bolo tangada deenei la taane humalia.” 48 Digau dogologo ala ne dagabuli belee mmada gi nia mee aanei, ga gidee nia mee ala ne hai, gei digaula ga hula gi nadau hale mo di dugidugi nadau hadahada i nadau lodo huaidu. 49 Digau huogodoo nogo iloo Jesus, mo nia ahina ala nogo daudali a mee mai i Galilee, e tuu mai haga mogowaa e daumada nia mee ala ne hai. h 

Di danu o Jesus

(Matthew 27.57-61; Mark 15.42-47; John 19.38-42)

50 Taane dono ingoo go Joseph, mai Aremethea di waahale i Judea, mee tangada humalia ge dugu laamua go nia daangada, gei mee nogo talitali Tenua o God. Maeaha maa mee tangada i digau aamua hai gabunga, gei mee hagalee nogo hiihai gi nadau hangaahai maanadu mono hangaahai. 52 Mee ga hana gi mua o Pilate, ga dangi anga i tuaidina o Jesus. 53 Mee ga dugu ia tuaidina o maa, ga hii gi di gahu lenge, ga dugu gi lodo taalunga dela ne hodo gi lodo tadugalaa, digi hai hegau ai. 54 Ma di lima laangi, gei di Laangi Sabad gu hoohoo ga daamada. 55 Nia ahina ala nogo daudali a Jesus mai loo i Galilee, ga hula i muli o Joseph, ga mmada gi taalunga, mo di hai dela ne dugu a Jesus gi lodo taalunga. 56 Nomuli, gei digaula ga hula gi nadau hale, e hagatogomaalia nadau mee haga kala mee mono lolo kala ang gi tuaidina o maa.

Di Laangi Sabad, digaula ga hagamolooloo gi hai be nnelekai taganoho. i 

Copyright information for `KPG