a24.6-7:Mt 16.21, 17.22-23, 20.18-19; Mk 8.31, 9.31, 10.33-34; Lk 9.22, 18.31-33
b24.49:Acts 1.4
c24.50-51:Acts 1.9-11

Luke 24

Di mouli aga

(Matthew 28.1-10; Mark 16.1-8; John 20.1-10)

Hagaluada loo di laangi tabu, nia ahina ne hula gi taalunga, e kae nadau lolo kala ala ne hagatogomaalia. Digaula gu gidee bolo di hadu la gu haga daga gi daha mo di bongoo taalunga, gei digaula ga ulu gi lodo, digi gidee tuaidina o Tagi Jesus. Digaula ga tuu huaigolo gu gologolo i di mee dela ne hai, i di madagoaa hua deelaa, nia daane dogolua e gahu i nia gahu maahina ge dabadaba, e tuu i nadau baahi. Nia ahina gu mmaadagu huoloo, ga pala loo gi lala gi hongo di gelegele, gei nia daane ga helekai, “Goodou e aha ala e halahala tangada e mouli gi lodo digau gu mmade? Mee hagalee i ginei, mee gu mouli aga. Goodou gi langahia ana helekai ne hai i Galilee: a  “Tama Tangada le e hai gi wanga loo gi digau huaidu, e hai gi daudau gi di loobuu, i muli nia laangi e dolu, ga mouli aga.” Gei nia ahina ga langahia nia helekai a maa, ga hula ga hagi anga nia mee aanei huogodoo gi nia dama agoago dilongoholu maa dahi a Jesus, mo digau ala i golo. 10 Nia ahina aanei la go Mary mai Magdala, Joanna, mo Mary tinana James. Digau aanei mo nia hoo digaula gu hagi anga gi digau agoago hagau. 11 Gei digau agoago hagau digi hagadonu nia ahina aalaa, idimaa digaula e hagamaanadu bolo nnelekai digaula la ono hadinga ai. 12 Gei Peter ga duu i-nua, ga lele gi taalunga, ga bala gi lala, ga mmada gi lodo taalunga, ga gidee ia di gahu daalunga, deai di mee labelaa i golo ai. Gei mee ga hana gi dono hale, gu gologolo be ma di aha dela ne hai.

Di hula gi Emmaus

(Mark 16.12,13)

13 Di laangi hua deelaa, gei nia daangada dogolua i digau ala nogo daudali Jesus e hula gi di waahale Emmaus, holongo nia maele e hidu mai Jerusalem. 14 Gei meemaa e ngudungudu kai i nia mee ala ne hai. 15 Di hula hua meemaa mo di ngudungudu kai, gei Jesus ga menege mai gi baahi meemaa, ga hana i baahi meemaa. 16 Meemaa ga mmada gi mee, gei digi modongoohia ginaua a mee. 17 Jesus ga hai adu gi meemaa, “Goolua e helehelekai i di aha, dela e helehelekai mo di hula?”

Gei meemaa ga tuu de ngalungalua loo mo nau golomada gu mmada be di mee e lodo huaidu.
18 Tangada e dahi i meemaa dono ingoo go Cleopas, ga heeu gi mee, “Goe tangada dogo hanimoi hua madamada gi Jerusalem dela e de iloo e-goe nia mee ala ne hai i nia laangi dulii ala gu hula?” 19 Jesus ga heeu, “Nia mee aha?”

Meemaa ga helekai, “Go nia mee ala ne hai gi Jesus o Nazareth. Tangada deenei la soukohp dela gu dugu go God mo digau dogologowaahee, bolo mee e mogobuna i ana mee nogo helehelekai ai mo ana mee ala nogo hai.
20 Tadau dagi hai mee dabu mo tadau dagi aamua gu wanga a mee gi di gabunga belee hagamodu a mee, e daaligi gi made, gei mee gu daudau i di loobuu. 21 Gei gimaadou nogo noho hagadagadagagee bolo ma go mee dela ga hai a Israel gi maahede! Gei dangi nei la go di tolu laangi i muli di laangi ne hai di mee deenei. 22 Hunu ahina o tadau hagabuulinga gu haga homouli gimaadou. Digaula ne hula heniheni gi taalunga, 23 gei digaula digi gidee ginaadou tuaidina o maa, ga loomoi hua, ga hai bolo ginaadou gu mmada gi digau di langi, gu hai ang gi ginaadou, bolo mee gu mouli aga. 24 Hunu gau i di madau hagabuulinga gu hula gi taalunga, gu gidee ginaadou nia mee huogodoo e hai be nia helekai nia ahina, malaa digaula digi gidee ginaadou a mee.” 25 Gei Jesus ga helekai gi meemaa, “Goolua e de kabemee! E buna huoloo di gulu hagadonu nia mee huogodoo ala gu helekai ai nia soukohp! 26 Ma hagalee e donu bolo di Mesaia le e hai loo gi hagaduadua i nia mee aanei, ga ulu gi lodo ono madamada?” 27 Gei Jesus ga haga donu gi meemaa nia mee ala ne helekai i deia i lodo nia helekai dabu huogodoo, e daamada i Nnaganoho Moses mo nia Beebaa o nia Soukohp. 28 Digaula ga hoohoo gi di waahale dela e hula ginai meemaa, gei Jesus ga hai be di mee bolo ia e hana huaigolo. 29 Gei meemaa ga dugu a mee, ga helekai bolo mee gi noho i nau baahi ma gu hoohoo ga bouli. Gei mee ga noho madalia meemaa. 30 Mee ga noho gi lala i baahi meemaa, ga dahi aga di palaawaa, ga danggee ang gi God, ga ginigini di palaawaa, ga wanga gi meemaa. 31 Gei nau golomada gu gidee, gu modongoohia a mee, gei mee gu haga ngala ia i meemaa. 32 Meemaa ga helekai i nau mehanga, “Ma hagalee gu hai be di ahi nogo ulaula i tau lodo i di madagoaa o mee nogo helekai mai gi gidaua i hongo di ala, mo di haga donu mai nia helekai dabu?” 33 Meemaa ga tuu i-nua, ga hula gi muli gi Jerusalem, ga gidee nia dama agoago dilongoholu maa dahi a Jesus la gu dagabuli mo nadau ihoo ala i golo. 34 Digaula ga helekai gi meemaa, “Tagi le e donu hua bolo gu mouli aga! Mee gu haga gida gi Simon!” 35 Gei nia daangada dogolua aanei ga haga modongoohia gi digaula nia mee ala ne hai i hongo di ala, mo di nau modongoohia ginaua di Tagi di madagoaa mee nogo ginigini dana palaawaa.

Jesus e haga gida gi ana dama agoago

(Matthew 28.16-20; Mark 16.14-18; John 20.19-23; Acts 1.6-8)

36 Di madagoaa hua meemaa nogo helekai nia mee aanei, gei Tagi ga gila aga i nadau mehanga, ga helekai, “Di aumaalia gi madalia goodou.” 37 Gei digaula gu homouli nadau lodo, e hagabau bolo ginaadou ne mmada hua gi di ieidu. 38 Gei mee ga helekai, “Goodou e homouli beleiaha? Ma e aha nia manawa logo e kila i lodo godou hagamaanadu? 39 Mmada malaa gi ogu lima mo ogu babaawae gi modongoohia bolo ma ko au. Bili mai malaa, gei goodou ga iloo bolo ma ko au, idimaa, di ieidu la ono goneiga mo ono iwi ai, gei au ogu goneiga mo ogu iwi i golo. 40 Mee ne helekai beenei ga lawa, ga haga gida ono lima mo ono babaawae gi digaula. 41 Gei digaula e de hagadonu huaigolo, i di nadau tentene mo di goboina, gei mee ga heeu, “Godou meegai i ginei?” 42 Digaula ga wanga di iga mmoo gi mee, 43 ga dahi mai, ga gai i mua digaula. 44 Mee ga helekai, “Aanei nia mee dahidamee ala ne hagi adu ko au gi goodou i dogu madagoaa dela nogo i godou baahi: Nia mee huogodoo ala ne hihi i di au i lodo Nnaganoho Moses mo nia Beebaa o nia Soukohp mono Pisalem belee hai gi kila.” 45 Gei mee ga huge nadau maanadu gi iloo ginaadou nia helekai di Beebaa Dabu, 46 ga helekai, “Deenei di hai ne hihi nia mee aanei beenei: di Mesaia le e hai loo gi hagaduadua, ga mouli aga i muli nia laangi e dolu. 47 Di Longo Humalia o di liu di manawa mo di wwede nia huaidu, le e hai gi agoago i dono ingoo ang gi nia henua huogodoo, e daamada i Jerusalem. 48 Goodou go digau e haga modongoohia nia mee ala ne mmada ginai goodou. 49 Ma ko au dela ga hagau adu gi goodou di mee ne hagababa go dogu Damana. Goodou gi taalia i lodo di waahale deenei, ga dae loo gi nia mogobuna mai i di langi ga dugu ia gi godou nua.” b 

Jesus gu lahi gi di langi

(Mark 16.19,20; Acts 1.9-11)

50 Gei mee ga dagi digaula gi daha mo Jerusalem ga dau adu gi Bethany, gei mee ga dahi aga ono lima ga haga maluagina digaula. c  51 Di madagoaa o mee ne haga maluagina digaula, mee ga hagatanga i baahi digaula ga hana gi di langi. 52 Digaula ga daumaha ang gi mee, ga hula gi muli gi Jerusalem mo di tentene huoloo, 53 ga noho hua i lodo di Hale Daumaha mo di hagahagaamu a God.

Copyright information for `KPG