a4.4:Deut 8.3
b4.8:Deut 6.13
c4.10:Ps 91.11
d4.11:Ps 91.12
e4.12:Deut 6.16
f4.18-19:Is 61.1-2
g4.24:Jn 4.44
h4.25:1 Kgs 17.1
i4.26:1 Kgs 17.8-16
j4.27:2 Kgs 5.1-14
k4.32:Mt 7.28-29

Luke 4

Di hagamada o Jesus

(Matthew 4.1-11; Mark 1.12,13)

Jesus ga hagatanga i Jordan, geia gu honu i di Hagataalunga Dabu dela e lahi a mee gi lodo di anggowaa. Gei mee ga noho i lodo di anggowaa i nia laangi e madahaa, ga hagamada go Satan. I lodo nia laangi aalaa, gei mee digi miami, gei mee gu hiigai huoloo. Satan ga helekai gi mee, “Maa goe di Tama ni God, helekai gi di hadugalaa deenei gi hai di palaawaa.” Jesus ga helekai, “Ma gu lawa di hihi i lodo di Beebaa Dabu boloo: Ma hagalee go nia palaawaa la hua ala e mee di haga mouli tangada.” a  Satan ga lahi labelaa a mee gi di gowaa nnoonua, ga haga mmada a mee gi nia henua huogodoo i henuailala i tama madagoaa bodobodo, ga helekai gi mee, “Au ga gowadu gi di goe nia mogobuna huogodoo aanei mo nia maluagina o nia henua aanei. Idimaa, gu dugu mai gi di au, gei au e mee hua di wanga nia maa gi tangada dela e hiihai ginai au. Nia mee aanei huogodoo e gowadu gi di goe, maa goe ga daumaha mai.” Jesus ga helekai, “Ma gu lawa di hihi i lodo di Beebaa Dabu boloo: Daumaha ang gi Dimaadua go doo God, go mee hua e hai hegau ginai goe!” b  Satan ga lahi labelaa a mee gi Jerusalem, ga dugu gi do gowaa mugi nua o di Hale Daumaha, ga helekai gi mee, “Maa goe di Tama ni God, hobo gi daha mo di gowaa deenei. 10 Idimaa, ma gu lawa di hihi i lodo di Beebaa Dabu boloo: God ga helekai gi ana gau di langi gi benabena ina goe gi humalia. c  11 Gu hai labelaa boloo: Digaula ga kumi laa goe gi dee tale oo wae gi nia hadu.” d  12 Jesus ga helekai, “Ma gu lawa di hihi boloo: Goe hudee hagamada ina Dimaadua, go doo God.” e  13 Di madagoaa Satan ne lawa di hagamadamada Jesus, gei mee ga hagatanga gi daha mo mee i tama madagoaa bodobodo.

Jesus e daamada ana hegau i Galilee

(Matthew 4.12-17; Mark 1.14,15)

14 Jesus gu maaloo mai i di Hagataalunga Dabu, geia ga hana gi muli gi Galilee. Dono longo gu dele i nia madagoaa huogodoo ala i golo. 15 Gei mee e hai ana agoago i lodo nia synagogee digaula, huogodoo gu haga hagaamu a mee.

Jesus hagalee hagalabagau i baahi digau Nazareth

(Matthew 13.53-58; Mark 6.1-6)

16 Jesus ga hana gi Nazareth, di gowaa dela ne tomo aga ieia, ga ulu gi lodo synagogee i di Laangi Sabad be dana hai nogo haihai. Gei mee ga duu aga belee dau dana Beebaa Dabu. 17 Gei digaula ga gaamai di beebaa soukohp Isaiah gi mee, ga huge di beebaa deelaa, ga dau di gowaa dela e hihi boloo:

18 “Di Hagataalunga o Dimaadua la gu i dogu baahi. Mee gu hagatulu au gi agoago ina di Longo Humalia ang gi digau hagaloale. Mee ne hagau mai au gi hagadele ina gi digau ala e lawalawa gi maahede, mo digau ala e dee gida gi gidee, gi haga maahede ina digau ala e noho i lodo di haingadaa, f  19 gi hagadele ina bolo di madagoaa gu dae mai, go di madagoaa Tagi e haga dagaloaha ana daangada.”
20 Jesus ga wini di beebaa deelaa, ga wanga gi tangada hai hegau, ga noho gi hongo dono lohongo. Huogodoo ala i lodo synagogee, e daumada a mee, 21 mee ga daamada ga helekai, “Digau nei, dangi nei nia helekai di Beebaa Dabu ala gu longono goodou, la gu kila aga i tadau baahi!” 22 Digaula huogodoo gu tene gi mee huoloo, gei gu goboina i nia helekai humalia aalaa, ala ne loomoi i baahi o mee. Digaula ga helekai, “Mee hagalee go tama daane Joseph?” 23 Jesus ga helekai gi digaula, “Au e iloo bolo goodou ga hai di ala kai mai gi di au boloo: Togidaa, goe gi bida hagahili ina goe! Gei goodou ga helekai mai labelaa boloo: Nia mee haga goboina bolo ne hai kooe i Capernaum, gi heia labelaa kooe i lodo doo guongo donu.” 24 Gei mee ga duudagi adu hua, ga helekai, “Goodou gi iloo, bolo ma soukohp e hagalabagau i lodo dono guongo donu ai. g  25 “E donu bolo nia ahina gu mmade nadau lodo e dogologowaahee i Israel i di madagoaa soukohp Elijah, i di madagoaa di ua digi doo nia ngadau e dolu mo di baahi, mo dono dau magamaga damana gu gahu tenua deelaa. h  26 Gei di maa tangada ai i lodo Israel ne hagau ginai Elijah, dela hua go di ahina i Zarephath i lodo tenua go Sidon. i  27 Gadoo be di madagoaa soukohp Elisha, nogo iai di magi genegene i Israel, gei deai tangada i digaula ne hili ga madammaa ai, dela hua go Naaman, tangada o Syria.” j  28 Digau huogodoo nogo i lodo synagogee gu hagawelewele huoloo i di nadau longono nia helekai aanei. 29 Digaula ga lahi a Jesus gi daha mo di waahale gi tomo di gonduu dela ne hau ai di nadau waahale, belee bale a mee gi doo gi di gowaa helemodu. 30 Gei Jesus ga hana laa lodo digaula, ga hana gi daha mo digaula.

Taane iai di hagataalunga huaidu

(Mark 1.21-28)

31 Nomuli, Jesus ga hana gi Capernaum, di waahale i Galilee, ga agoago gi nia daangada i di Laangi Sabad. 32 Nia daangada huogodoo gu goboina nia agoago a maa, i mee e agoago i di mogobuna. k  33 Taane i lodo synagogee, iai di hagataalunga huaidu i ono lodo, mee ga wolo gi nua, 34 “Jesus o Nazareth, ma di aha e hiihai ginai goe i gimaadou? Goe ne hanimoi belee hagahuaidu gimaadou? Au e iloo eau goe tangada dabuaahia kae hegau a God!” 35 Jesus ga hagabuhi gi di hagataalunga huaidu, “Noho dee muu, ulu mai gi daha mo taane deenaa!”

Gei di hagataalunga huaidu ga hagahinga taane gi lala i mua digaula, ga ulu gi daha mo mee ge digi hai dana huaidu gi mee.
36 Nia daangada huogodoo gu goboina ga helehelekai, “Ma nia helekai aha aanei? Mee e mogobuna di helekai gi nia hagataalunga huaidu, gei digaula e ulu mai gi daha!” 37 Di longo o Jesus gu dele i nia madagoaa huogodoo i lodo tenua deelaa.

Jesus e hagahili ana gau dogologo

(Matthew 8.14-17; Mark 1.29-34)

38 Jesus ga hagatanga gi daha mo synagogee, ga hana gi di hale o Simon. Tinana di lodo Simon e magi welengina huoloo. Digaula ga helekai gi Jesus i di ahina deelaa. 39 Jesus ga menege adu gi mee, ga helekai gi di magi welengina gi ulu mai gi daha. Di magi welengina gu ulu mai gi daha, mee ga ala aga, ga nnoo i nua, ga hagamaamaa digaula. 40 Hiahi ia di mee, digau huogodoo ala nadau ihoo magi i nia hagadilinga magi e logo, ga laha mai digaula gi Jesus. Mee ga dugu ono lima gi hongo digaula huogodoo, e hagadau dagidahi, ga hagahili digaula. 41 Nia hagataalunga huaidu ala e ulu gi daha mo digau dogologo e wwolowwolo, “Goe go Tama a God!”

Jesus gu de hiihai gi digaula, digi dumaalia gi digaula gi helekai, i digaula gu iloo bolo mee go di Mesaia.

Jesus e agoago i lodo synagogee

(Mark 1.35-39)

42 Hooaga haga luada loo, Jesus ga hana gi daha mo di waahale gi di gowaa lomo modogoia. Gei nia daangada ga daamada ga halahala a mee, ga gidee a mee, ga tangi gi mee bolo mee gi hudee hagatanga gi daha mo ginaadou. 43 Mee ga helekai gi digaula, “Au e hai loo gi agoago di Longo Humalia o Tenua o God gi nia waahale labelaa ala i golo, idimaa, deelaa di mee a God ne hagau mai ginai au belee hai.” 44 Mee ga agoago i lodo nia synagogee i lodo tenua hagatau deelaa.

Copyright information for `KPG