a5.1-3:Mt 13.1-2; Mk 3.9-10, 4.1
b5.5:Jn 21.3
c5.6:Jn 21.6
e5.14:Lev 14.1-32
f5.30:Lk 15.1-2

Luke 5

Jesus e gahi ana dama agoago matagidagi

(Matthew 4.18-22; Mark 1.16-20)

Jesus nogo duu i taalinga Tai Gennesaret, nia daangada nogo honohono ginaadou i nadau loo adu gi Jesus belee hagalongo nia helekai a God. a  Mee ga gidee ia nia boodi e lua e haga pale aga i tongotai. Digau hai iga gu hula gu gaugau nadau kau. Jesus ga gaga gi hongo di boodi a Simon, ga helekai gi mee gi hologia dulii gi daha mo tongotai. Jesus ga noho i hongo di boodi, ga agoago gi digau dogologo aalaa. Mee ga haga lawa ana agoago, ga helekai gi Simon, “Hologia di boodi gi di gowaa honu, dugua gi lala nia kau gubenge.” Simon ga helekai, “Meenei Tagi, gimaua gu gubenge mai loo boo, gu duadua, gei digi kumi iga. Gei goe bolo gi dugua nia kau, gei au ga dugu nia kau.” b  Meemaa ga dugu nia kau gi lala, gu bulou nau iga logowaahee. Nia kau la bolo ga mahaahaa. c  Gei meemaa ga lialiagi gi nau ihoo boodi gi lloomoi e hagamaamaa ginaua. Digaula ga lloomoi, ga haa nadau boodi e lua gu hontula bolo ga aabulu. Simon Peter ne mmada gi nia mee ala ne hai beenei, gei mee ga dogoduli gi lala i mua o Jesus, ga helekai, “Meenei Tagi, hana gi daha mo au! Au tangada huaidu!” Mee mo ono ehoo gu goboina tagabae iga ala ne hai go ginaadou. 10 Nia hoo o Simon, James mo John go nia dama daane Zebedee la gu goboina labelaa ginaua. Jesus ga helekai gi Simon, “Goe hudee madagu, tugi dolomeenei ga huli gi muli, gei goe ga haangodo gi nia daangada.” 11 Digaula ga hudi aga nia boodi i tongotai, ga diiagi nia mee huogodoo, ga daudali a Jesus.

Jesus e hagahili taane magi genegene

(Matthew 8.1-4; Mark 1.40-45)

12 Nomuli, gei Jesus nogo i lodo di waahale dela nogo iai taane e hai dono magi genegene. Taane deelaa ga mmada gi Jesus, ga bala gi lala ga dangidangi, “Meenei, maa goe e hiihai, heina au gi madammaa!”
5.12 heina au gi madammaa:Digau o Jew e hai bolo di magi deenei le e haga dogolia dangada.
13 Jesus ga hagadau dae adu, ga bili gi mee, ga helekai, “Uaa, au e hiihai. Madammaa!” Di madagoaa hua deelaa, gei di magi genegene gu hili. 14 Jesus ga bule gi mee, “Hudee hagi anga ina di mee deenei gi tangada e dahi, hana haga huudonu gi tangada hai mee dabu, gi haga dina ina goe, ga lawa, ga hai dau tigidaumaha be di hai a Moses dela gu dugu, belee haga modongoohia gi digaula bolo goe gu madammaa.” e  15 Di longo o Jesus gu dele labelaa koia gi nonua, gu modoho gi daha, gei digau dogologo ne loomoi belee hagalongo gi mee, ge e hagahili nadau magi. 16 Gei mee ga hana gi di gowaa lomo e dalodalo.

Jesus e hagahili taane mmade ono dudaginga

(Matthew 9.1-8; Mark 2.1-12)

17 Nomuli, gei Jesus nogo agoago, nia Pharisee mono gau haga dondonu haganoho e noho i golo. Digaula ne loomoi mai nia waahale huogodoo Galilee, Judea, mo mai Jerusalem. Di mogobuna o Dimaadua gu i-baahi o Jesus e hagahili nia magi. 18 Hunu daane ne lloomoi e aamo di nadau daane mmade ono wae i hongo di hada. Digaula e hagamahi belee laha mai taane deenei gi mua o Jesus i lodo di hale. 19 Idimaa gu dogologowaahee, di gowaa e oo di lahi a mee gi lodo ai, gei digaula ga lahi a mee gi hongo di hale , ga haga bongoo di gowaa e haga hege ia a mee i hongo dono moenge gi lodo digau dogologo i mua o Jesus. 20 Jesus ga gidee ia nia hagadonu digaula, mee ga helekai gi taane deelaa, “Dogu ihoo hagaaloho, oo huaidu gu maahede.” 21 Digau hagadondonu haganoho mo nia Pharisee ga daamada ga helehelekai i nadau mehanga, “Taane deenei la koai, dela e helekai hai baahi gi God? Tangada e mee di wwede nia huaidu ai, go God hua modogoia!” 22 Jesus gu iloo nia maanadu digaula, ga helekai, “Goodou e aha ala e hagabaubau beenaa?” 23 Dehee di mee e haingoohia belee helekai boloo, Oo huaidu la gu maahede, be e helekai boloo, Duu i-nua, haele? 24 Au ga haga modongoohia adu gi goodou bolo Tama Tangada le e aamua i henuailala, e mee di wwede ana huaidu.”

Gei mee ga helekai gi tangada mmade ono wae, “Au e helekai adu duu i-nua, dahi aga ina doo moenge, hana gi doo hale.”
25 Di madagoaa hua deelaa, gei taane ga duu i-nua i mua digaula huogodoo, ga dahi aga dono moenge, ga hana gi dono hale mo di hagaamu a God. 26 Digaula gu goboina, gu mmaadagu, ga hagaamu a God, ga helekai, “Gidaadou gu mmada gi nia mee haga goboina dangi nei!”

Jesus e gahi Levi

(Matthew 9.9-13; Mark 2.13-17)

27 Muli di mee deenei, Jesus ga hana ga gidee ia tangada hagabudu dagitedi go Levi, e noho i lodo dono oobidi. Jesus ga helekai, “Daudali mai au.” 28 Levi ga duu i-nua ga diiagi ana mee huogodoo, ga daudali a mee. 29 Levi gu hai dana hagamiami damana i dono hale gi Jesus, digau hagabudu dagitedi dogologo i golo mono gau labelaa i baahi digaula. 30 Hunu Pharisee mono gau haga dondonu haganoho o di nadau buini, e helekai haga de hiihai gi nia dama agoago a Jesus boloo, “Maeaha dela goodou e miami ge e inu i baahi digau hagabudu dagitedi mono balu daangada?” f  31 Jesus ga helekai gi digaula, “Digau ala hagalee magi la hagalee halahala togidaa, go digau magi la hua. 32 Au hagalee ne hanimoi belee gahigahi digau e donu, ne hanimoi gi digau huaidu, gi daahuli nadau lodo.

Di heeu i di gili di noho hagaonge

(Matthew 9.14-17; Mark 2.18-22)

33 Hunu gau ne helekai gi Jesus, “Nia dama agoago John nogo noho hagaonge i nia madagoaa e logo ge e hai dalodalo. Nia dama agoago nia Pharisee nogo hai labelaa beelaa, gei au dama agoago e miami ge e inu.” 34 Jesus ga helekai, “Goodou e hagamaanadu bolo goodou e mee di hai digau tagamiami haga hai lodo gi noho hagaonge i di madagoaa taane hai lodo i baahi digaula? E deemee di hai beelaa! 35 Gei di madagoaa i golo, taane hai lodo ga lahi gi daha mo digaula, gei digaula ga noho laa hagaonge.” 36 Jesus ga helekai labelaa gi digaula di ala kai deenei, “Tangada e haahi dana mee gahu i di gahu hoou belee pono di gahu bobo ai. Maa ga hai beelaa, gei di gahu hoou la ga mahaa, idimaa, di gahu hoou hagalee tau gi di gahu bobo. 37 Tangada e hagahau ana waini hoou gi lodo nia mee dugu waini pobo ai, idimaa, nia waini hoou la ga haahi di mee dugu waini, gei nia waini la ga malingi, gei nia mee dugu waini la ga mooho. 38 Gei deeai, nia waini hoou le e hai gi hagahau gi lodo nia mee dugu waini hoou. 39 Tangada e hiihai gi nia waini hoou ai i muli dono inu nia waini gu duai. Mee ga helekai bolo nia waini ala gu duai la koia e humalia.

Copyright information for `KPG