a7.22:Is 35.5-6, 61.1
b7.27:Mal 3.1
c7.29-30:Mt 21.32; Lk 3.12
d7.37-38:Mt 26.7; Mk 14.3; Jn 12.3

Luke 7

Jesus e hagahili di magi tangada hai hegau di tagi daua o Rome

(Matthew 8.5-13)

Di madagoaa Jesus ne lawa di helekai gi nia daangada, gei mee ga hana gi Capernaum. Di hege tagi daua o Rome la gu hai dono magi, bolo ga made. Mee tangada hagalabagau ni dono dagi. Di madagoaa tagi daua ne longono di hai o Jesus, geia ga hagau ana dagi mmaadua o Jew gi mee, gi hanimoi e hagahili di magi dana hege. Digau o Jew aalaa ga lloomoi gi Jesus, ga dangidangi hagamahi gi mee, “Taane deenei e humalia gi dau hagamaamaa, idimaa, mee e aloho i digau tadau henua, gei mee ne bida hau di madau synagogee.” Gei Jesus ga hana i muli digaula. Mee ne hoohoo adu gi di hale, gei tagi daua ga hagau hunu gau i ono ehoo belee helekai gi Jesus boloo, “Goe hudee hai loo bolo goe hanimoi, idimaa, dogu hale le e dee tau loo bolo goe e hanimoi gi lodo, gei au e dee tau loo dogu hanadu gi di goe. Helekai hua, gei dagu dangada hai hegau la ga hili dono magi. Au tangada e noho i lala ogu dagi aamua labelaa, e dagi agu gau daua. Au ga hagadaba boloo, Hana! gei mee e hana. Au ga hagadaba boloo, Hanimoi! gei mee e hanimoi. Gei au ga hagadaba gi dogu ihege boloo, Heia di mee deenei! gei mee e hai.” Jesus gu goboina dono hagalongo gi nia helekai aanei. Mee ga huli gi tua, ga helekai gi di hagabuulinga dangada dela e daudali ia, “ Au e hagi adu gi goodou, bolo au digi gidee di hagadonu beenei, hagalee i Israel!” 10 Digau kae hegau ga hula gi di hale o tagi daua deelaa, ga mmada, gei tangada hai hegau deelaa la gu hili dono magi.

Jesus e haga mouli tama daane di ahina gu made dono lodo

11 Muli mai hua, gei Jesus ga hana gi di waahale go Nain, ginaadou dogologo mo ana dama agoago. 12 Di madagoaa hua ne dau iei mee gi di ngudu di bontai di waahale, gei di buini danu di nadau dangada e ulu gi daha. Di tama daane hua e dahi ni di ahina gu made dono lodo, gei di hagabuulinga gau dogologo o di waahale deelaa nogo madalia a mee. 13 Di madagoaa di Tagi ne mmada gi di ahina deelaa, mee gu aloho huoloo i mee, gei mee ga helekai gi mee, “Hudee dangi.” 14 Gei mee ga hanadu, ga bili gi tebedebe, gei digau nogo taga a mee ga tuu. Gei Jesus ga helekai, “Tama daane, au e helekai adu, noho gi nua!” 15 Taane made deelaa ga nnoo i nua, ga daamada ga leelee, gei Jesus ga wanga a mee gi dono dinana. 16 Digaula huogodoo gu mmaadagu huoloo mo di hagaamu a God boloo, “Soukohp aamua gu gila aga i tadau baahi. God gu hanimoi e haga mouli ana daangada!” 17 Di longo o Jesus gu dele gi lodo nia henua huogodoo o Judea mo nia guongo mai i daha.

Digau kae hegau o John Babdais

(Matthew 11.2-19)

18 Nia dama agoago a John ga hagi ang gi mee nia mee huogodoo aanei, gei mee ga gahi mai ana dama agoago dogolua, 19 ga hagau meemaa gi Tagi belee heeu gi mee, “Maa kooe dela nogo helekai iei John bolo e hanimoi, be gimaadou e tali di madau dangada i golo?” 20 Di madagoaa meemaa ne dau i baahi o Jesus, meemaa ga helekai, “Meenei, John Babdais ne hagau mai gimaua belee heeu adu, be maa kooe dela nogo helekai iei mee bolo e hanimoi, be gimaadou e tali di madau dangada i golo?” 21 Di madagoaa hua deelaa, Jesus e hagahili ana gau magi dogologo, mono gau hagataalunga huaidu, gei e haga gidee ana gau deegida. 22 Mee ga helekai gi nia daangada kae hegau a John boloo, “Hula, hagi anga ina gi John gulu mee ala ne gidee ge ne longono: Digau deegida gu gidee, digau habehabe gu mee di taele, digau longoduli gu longono, digau mmade gu mouli aga, gei di Longo Humalia gu agoago gi digau hagaloale. a  23 E maluagina go tangada dela hagalee manawa lua i di au.” 24 Muli hua digau kae hegau a John ne hula, gei Jesus ga daamada ga helekai i John gi digau dogologo, “Di godou madagoaa ne hula gi John i lodo di anggowaa, ma ni aha nogo maanadu bolo ga mmada ginai? Di laagau aalek e hahaangi i di madangi? 25 Ma di aha ne hula ginai goodou belee mmada ginai? Tangada e ulu nia gahu madamada? Deeai. Digau ala e ulu nia goloo beenei ge mouli maluagina e gidee gidaadou i lodo nia hale king. 26 Hagia mai ma di aha ne hula ginai goodou belee mmada ginai? Di soukohp? Uaa e donu, gei au e hagi adu gi goodou bolo goodou ne mmada gi tangada koia e aamua i soukohp. 27 John la go tangada dela gu helekai ai di Beebaa Dabu boloo:

God e helekai, Au ga hagau dagu dangada kae hegau i oo mua, e huge di ala adu gi di goe!” b 
28 Jesus ga helekai, “John le e aamua i nia daangada huogodoo ala nogo mouli, gei tangada dela koia i mugi lala loo i lodo Tenua o God, le e mada aamua i John.” 29 Digau huogodoo gu longono Jesus, digaula mo digau hagabudu dagitedi, alaa go digau gu daudali nnelekai donu a God, idimaa, digaula gu babdais go John. c  30 Gei nia Pharisee mo digau haga dondonu haganoho e gaaui gi daha tadinga hagalabagau a God, idimaa, digaula ne de hiihai di babdais go John. 31 Jesus ga duudagi adu ana helekai, “Nia daangada dangi nei le e mee di hagatau ko au gi di aha? Digaula e hai be nia aha? 32 Digaula e hai be nia damagiigi ala e noho i di gowaa huihui mee. Di hagabuulinga e wwolo gi di hagabuulinga i golo boloo: Gimaadou ne daahili nia daahili haga hai lodo, gei goodou hagalee gaalege! Gei gimaadou ne daahili nia daahili dangada made, gei goodou hagalee tangitangi! 33 John ne hanimoi ga noho hagaonge, hagalee nogo inu nia waini, gei goodou nogo hai boloo: Di hagataalunga huaidu i lodo o mee! 34 Tama Tangada ne hanimoi gu miami gu inu, gei goodou nogo helekai boloo: Mmada gi taane deelaa! E hagalugai ge inu waini, gei mee di hoo ni digau hagabudu dagitedi mo nia balu daangada! 35 Di kabemee o God e donu i baahi digau ala gu kae di maa.

Jesus i di hale o Simon di Pharisee

36 Dahi Pharisee ne gahi a Jesus belee miami ginaua hiahi, gei Jesus ga hana gi di hale o maa, ga noho gi lala ga miami. 37 Lodo di waahale deelaa di ahina e mouli huaidu. Mee ga longo bolo Jesus e miami i di hale o di Pharisee, gei mee ga gaamai dana loloaabi-“albaster” e honu lolo kala, d  38 gei mee ga duu i tua Jesus ga bala gi lala gi baahi nia babaawae o maa, ga dangidangi mo di haga tiu nia babaawae o maa gi ono dangi, ga omo nia babaawae o maa gi ono ngaahulu, ga hongi, ga hagatulu gi nia lolo kala. 39 Di Pharisee ga mmada gi di mee deenei, ga daalo ang gi ono lodo, “Maa nei boloo taane deenei la soukohp donu, gei mee e iloo ia di ahina dela ne bili ang gi deia, e iloo ia di mouli huaidu o maa!” 40 Jesus ga helekai, “Simon, au dagu mee e hagi adu gi di goe.”

Simon ga helekai, “Uaa, Tangada agoago, hagia mai.”
41 Jesus ga helekai, “Nia daane dogolua e boibana nau bahihadu i taane ana bahihadu. Tangada e dahi e lima lau silber, ge di hoo o maa e madalima. 42 Meemaa gu deemee di hui nau boibana, gei tangada ana bahihadu ga daa nia boibana meemaa. Koai i meemaa e mada damana dono aloho i mee?”

43 Simon ga helekai, “Au e hagabau bolo go tangada dela ana mee e mada logo ne dumaalia ginai.”

Jesus ga helekai, “Goe e donu.”
44 Mee ga huli gi di ahina, ga helekai gi Simon, “Goe e gidee di ahina deenei? Au ne hanimoi gi doo hale, gei goe digi gaamai au wai belee tono ogu wae, gei mee ne tono ogu wae gi ono dangi, ga omo gi ono ngaahulu. 45 Goe digi hagalabagau ina au gi di hongi, gei taamada dogu hanimoi, gei mee digi noho i dono hongihongi ogu babaawae. 46 Goe digi gaamai au lolo olib belee haga maluu dogu libogo, gei mee gu hagatulu ogu babaawae gi di lolo kala. 47 Gei au e helekai bolo di aloho damanaiee dela gu haga modongoohia go mee, e haga modongoohia bolo ono huaidu logowaahee la gu maahede, gei tangada dela gu maahede ono huaidu hogoohi, geia e haga modongoohia hua go dono aloho dulii.” 48 Gei Jesus ga helekai gi di ahina, “Oo huaidu la gu maahede.” 49 Digau ala e noho i teebele ga daamada ga leelee i nadau mehanga boloo, “Ma koai deenei bolo ia e mee di wwede nia huaidu?” 50 Gei Jesus ga helekai gi di ahina, “Go doo hagadonu dela ne daa mai goe gi daha mo di made. Hana i di aumaalia.”

Copyright information for `KPG