a10.4:Deut 24.1-4; Mt 5.31
b10.6:Gen 1.27, 5.2
c10.7-8:Gen 2.24
d10.11-12:Mt 5.32; 1 Cor 7.10-11
e10.15:Mt 18.3
f10.19:Ex 20.12-16; Deut 5.16-20
g10.31:Mt 20.16; Lk 13.30
h10.38:Lk 12.50
i10.42-43:Lk 22.25-26
j10.43-44:Mt 23.11; Mk 9.35; Lk 22.26

Mark 10

Jesus e agoago di maewae taga hai lodo

(Matthew 19.1-12; Luke 16.18)

Jesus ga hagatanga i di gowaa deelaa, ga hana gi lodo di gowaa Judea, e hana laa lodo di monowai Jordan. Digau dogologowaahee gu dagabuli labelaa gi baahi o mee, gei mee ga agoago gi digaula be dana hai. Nia Pharisee ga loomoi belee hai a mee gi hala, ga heeu gi mee, “Hagia mai be tadau haganoho le e- dumaalia gi taane di hudu dono lodo gi daha?” Gei Jesus ga heeu, “Nnaganoho Moses ne gowadu gi goodou le e hai bolo aha?” Digaula ga helekai, “Moses gu wanga di mogobuna gi taane e hai di beebaa haga maewae, gei taane la ga mee di diiagi dono lodo.” a  Jesus ga helekai gi digaula, “Moses ne hihi taganoho deenei, idimaa, goodou ala e aago ngadaa. Mai taamada i di madagoaa nia mee ne hai, di Beebaa Dabu gu helekai bolo God ne hai taane mo di ahina. b  Deenei tadinga taane ga tanga gi daha mo dono damana mo dono dinana, ga buni gi dono lodo. c  Meemaa dogolua gu hai hua tuaidina e dahi. Meemaa gu hagalee dogolua, gu dahi. Di mee a God dela ne haga puni, gi hudee wwae ina go tangada.” 10 Di nadau ulu labelaa gi lodo di hale, gei ana dama agoago ga heeu gi mee i di agoago deenei. 11 Mee ga helekai gi digaula, “Taane ga diiagi dono lodo, ga lodo gi tuai ahina, mee gu hai di huaidu hai be di manu, gu hai baahi gi dono lodo donu. d  12 E hai be di ahina ma ga diiagi dono lodo, ga lodo gi tuai daane, mee gu hai di huaidu hai be di manu labelaa.”

Jesus e haga maluagina nia damagiigi lligi

(Matthew 19.13-15; Luke 18.15-17)

13 Digau e laha mai nadau damagiigi gi Jesus, bolo mee gi hagadau dugu ono lima gi hongo digaula, gei ana dama agoago ga wwou gi digaula. 14 Jesus ga iloo, gei mee gu de hiihai, ga helekai gi ana dama agoago, “Heia nia damagiigi gi lloomoi gi di au, hudee bule ina digaula, idimaa Tenua o God la ni digau beenei. 15 Au e hagi adu gi goodou di tonu bolo tangada dela hagalee kae Tenua o God be di hai o nia damagiigi, la deemee dana ulu i Tenua o God.” e  16 Gei mee ga daahi mai nia damagiigi gi lodo ono lima, ga hagadau dugu ono lima gi hongo digaula, ga haga maluagina digaula.

Taane maluagina

(Matthew 19.16-30; Luke 18.18-30)

17 Di madagoaa o Jesus e hana labelaa i hongo di ala, taane ga lele mai, ga dogoduli i ono mua, ga heeu gi mee, “Tangada Agoago humalia, au e hai dagu aha, gei au ga hai mee gi di mouli dee odi?” 18 Jesus ga helekai, “Goe e aha dela e gahi au bolo tangada agoago humalia? Deai tangada e humalia, dela hua go God modogoia. 19 Goe e iloo nia haganoho: Hudee daaligidia tangada gi made, hudee hai be di manu, hudee gaiaa, hudee dilikai, hudee halahalau ina nia daangada, hagalabagau ina doo damana mo doo dinana.” f  20 Taane deelaa ga helekai, “Nia mee aanaa gu hai huogodoo ko au mai i dogu mouli damagiigi.” 21 Jesus ga daumada adu a mee i dono aloho, ga helekai, “Di mee e dahi i golo digi heia kooe: Hana, huia oo goloo gi daha, wanga ina di bahi hadu gi digau hagaloale, gei goe ga kae oo maluagina i di langi. Nomuli, hanimoi, daudali mai au.” 22 Taane deelaa ga longono eia, gei mee gu mmada hagadugina, gu hana manawa gee, idimaa, mee taane maluagina. 23 Jesus ga mmada gi ana dama agoago, ga helekai gi digaula, “E haingadaa huoloo gi digau maluagina di ulu i Tenua o God.” 24 Nia dama agoago a maa gu gologolo gi ana helekai. Jesus ga helekai, “Agu dama, e haingadaa huoloo di ulu i Tenua o God! 25 Tangada maluagina ma ga ulu i Tenua o God la koia e haingadaa i di manu-‘camel’ ma ga ulu laa lodo di bongoo di iwi dui mee. 26 Gei nia dama agoago gu gologolo huoloo, ga leelee boloo, “Malaa, koai dela ga mee di mouli?” 27 Jesus ga mmada adu gi digaula, ga helekai, “Di mee deenei e deemee i baahi tangada, gei God le e mee. God e mee di hai nia mee huogodoo.” 28 Gei Peter ga helekai, “Mmada, gimaadou gu dugu madau mee huogodoo, gu daudali hua goe.” 29 Jesus ga helekai, “Uaa, e donu, gei au e hagi adu gi goodou bolo be koai ma ga diiagi dono hale, be ono duaahina daane mo ahina, be dono dinana be dono damana, be ana dama, be ana gowaa, i dogu gili mo di Longo Humalia, 30 gei mee ga kae ana mee logowaahee i lodo di mouli deenei. Mee ga hai mee haga lau holongo gi nonua i ono hale, mono duaahina daane mo ahina, mono dinana, mono dama, mono gowaa, ge e kae di hagaduadua labelaa. Gei di madagoaa dela ma ga dae mai, gei mee ga hai mee gi di mouli dee odi. 31 E dogologo digau ala i mugi mua dolomeenei, ga hula la muli, gei e dogologo digau ala i mugi muli dolomeenei, ga- hula la mua.” g 

Tolu holongo a Jesus e hagi aga di hai o dono made

(Matthew 20.17-19; Luke 18.31-34)

32 Jesus mo ana dama agoago e hula i hongo di ala gi Jerusalem, gei Jesus e hana i mua. Digaula e hula uli nadau gai, gei nia daangada ala e loo adu i nadau muli le e mmaadagu. Gei Jesus ga haga dagabuli ana dama agoago gi mada ginaadou hua, ga hagi ang gi digaula nia mee ala ga hai ang gi deia. 33 Geia ga helekai, “Mmada, gidaadou e hula gi Jerusalem, dela di gowaa o Tama a Tangada ga wanga gi nia lima o nia dagi aamua hai mee dabu, mo digau haga dondonu haganoho. Digaula ga haga balumee a mee belee daaligi gi made, ga wanga a mee gi digau tuadimee. 34 Digaula ga hai hagahuaidu a mee mo di buibui nadau haawale gi mee, ge e haga mamaawa a mee, ga daaligi a mee gi made, gei muli nia laangi e dolu, geia ga mouli aga.”

Tangidangi o James mo John

(Matthew 20.20-28)

35 Gei James mo John, go nia dama daane a Zebedee, ga loomoi gi Jesus, ga helekai, “Tangada Agoago, di mee i golo e hiihai bolo goe gi heia mai gi gimaua.” 36 Jesus ga heeu gi meemaa, “Ma di aha dela e hiihai ginai goolua?” 37 Gei meemaa ga helekai anga, “Doo madagoaa dela ma ga noho i hongo doo lohongo king, gimaua e hiihai bolo goe gi haga noho ina gimaua i doo baahi, e dahi i doo baahi gau donu, ge e dahi i doo baahi gau ihala.” 38 Gei Jesus ga helekai gi meemaa, “Goolua e de iloo di gulu mee dela e tangi ai. Goolua e mee di inu di ibu o di hagaduadua dela ga inu ko au? Goolua e mee i di babdais dela ga babdais iei au?” h  39 Gei meemaa ga helekai, “Gimaua e mee.”

Jesus ga helekai, ‘Goolua ga inu di ibu dela ga inu ko au, ge ga babdais i di babdais dela ga babdais iei au.
40 Gei au ogu donu ai e hili tangada e noho i dogu baahi gau donu mo gau ihala. Ma go God dela ga wanga nia lohongo aanei gi ana gau ala gu hagatogomaalia ginai nia maa.” 41 Nia dama agoago dilongoholu ala i golo ne longono ginaadou di mee deenei, gu hagawelewele gi James mo John. 42 Gei Jesus ga haga dagabuli digaula, ga helekai, “Goodou e iloo bolo nia dagi o digau tuadimee le e mogobuna di dagi digau tuadimee. Gei nia dagi le e hai mee gi nia mogobuna dagi huogodoo. i  43 Di hai deenei la hagalee go di godou hai dela e hai hegau ai. Tangada i godou baahi dela bolo ia gi aamua, geia gi hai tangada hai hegau ni goodou. j  44 Tangada dela bolo ia gi hai tangada aamua, geia gi hai di hege ni digau huogodoo. 45 Tama a Tangada hogi la hagalee ne hanimoi bolo nia daangada gi hai hegau gi deia, geia ne haneia belee hai hegau gi digau huogodoo, ga wanga dehuia dono mouli gi mouli ai digau dogologo.”

Jesus e haga gidee a Bartimaeus

(Matthew 20.29-34; Luke 18.35-43)

46 Digaula ne dau i Jericho. Di madagoaa Jesus mo ana dama agoago, mo tagabuli damana ga hagatanga gi daha mo di waahale deelaa, taane deegida dono ingoo go Bartimaeus, tama ni Timaeus, e noho i taalinga di ala e madamadau ana mee. 47 Dono longono hua bolo ma go Jesus o Nazareth, geia ga wolo gi nua, “Jesus, tama a David, dumaalia mai gi di au!” 48 Digau dogologo gu wwou gi mee gi hudee leelee, geia koia ne wolo gi nonua, “Goe go tama a David, goe dumaalia mai gi di au!” 49 Gei Jesus ga duu, ga helekai, “Goodou laha mai a mee gi di au.”

Gei digaula ga helekai gi taane deelaa, “Tentene laa, duu i-nua, mee dela e gahigahi goe.”
50 Gei mee ga hobo gi nua ga hudu gi daha dono gahu laa daha, ga hana gi Jesus. 51 Gei Jesus ga heeu gi mee, “Ma di aha dela e hiihai ginai goe au gi heia adu gi di goe?”

Gei taane deegida ga helekai, “Tangada agoago, heia au gi mee di gidee labelaa.”
52 Gei Jesus ga helekai, “Hana. Ma go doo hagadonu dela gu hagahumalia goe.”

Di madagoaa hua deelaa, gei mee gu mee di mmada, ga daudali a Jesus laa hongo di ala.

Copyright information for `KPG