a16.7:Mt 26.32; Mk 14.28
b16.15:Acts 1.8
c16.19:Acts 1.9-11

Mark 16

Di mouli aga o Jesus

(Matthew 28.1-8; Luke 24.1-12; John 20.1-10)

I muli di Laangi Sabad, Mary mai Magdala, mo Mary tinana o James, mo Salome ga hui nadau lolo kala, belee hula e hagatulu tuaidina o Jesus. Luada loo di laangi tabu, digaula ga dau i taalunga i di madagoaa di laa ne hobo, ge heheeu i nadau mehanga, “Ma koai dela ga hagamaamaa gidaadou e haga daga tadugalaa gi daha mo di bontai o taalunga?” I tadugalaa le e damanaiee. Digaula ga mmada adu, gei di maa gu hagadaga gi daha. Gei digaula ga ulu adu gi lodo taalunga, ga mmada gi tama daane e ulu ono gahu kene hila mmaa, e noho i di baahi gau donu taalunga, gei digaula gu homouli gu mmaadagu. Mee ga helekai, “Hudee mmaadagu, au e iloo bolo goodou e halahala a Jesus o Nazareth dela ne daudau. Mee hagalee i ginei, gu mouli aga. Mmada, deenei di gowaa ne dugu iei mee. Hula, haga iloo gi ana dama agoago mo Peter boloo: Mee gu hana gi Galilee i godou mua, deelaa di gowaa e heetugi iai goodou be ana helekai ala ne hai adu.” a  Digaula ga ulu mai gi daha mo taalunga, ga llele hua i lodo di nadau mmaadagu, digi leelee gi tei dangada.

Jesus gu haga gida gi Mary mai Magdala

(Matthew 28.9,10; John 20.11-18)

[I muli di mouli aga o Jesus luada loo di laangi tabu, mee ne haga gida eia gi Mary mai Magdala matagidagi, di ahina a mee ne hagabagi ono hagataalunga huaidu e hidu. 10 Mary ga hana ga odi gi nia hoo o Jesus ala e manawa gee ge e tangitangi. 11 Gei digaula digi hagadonu a mee ne helekai bolo Jesus gu mouli aga, gei gu mmada gi mee.

Jesus gu haga gida gi ana dama agoago dogolua

(Luke 24.13-35)

12 Nomuli hua, gei Jesus ga haga gida ono dina gee gi ana dama agoago dogolua, i nau hula di nau ala gi di nau guongo i tua di waahale. 13 Meemaa ga loomoi labelaa ga hagi ang gi nau ihoo aalaa, gei digaula hagalee hagadonu.

Jesus gu haga gida gi ana dama agoago dilongoholu maa dahi

(Matthew 28.16-20; Luke 24.36-49; John 20.19-23; Acts 1.6-8)

14 I di hagaodi nia mee huogodoo, Jesus ne haga gida gi nia dama agoago dilongoholu maa dahi, i di nadau madagoaa nogo miami. Geia ga haga buhi gi digaula i digaula hagalee hagadonu, ge e hagadonu ngadaa digau ala ne mmada gi deia ne haga mouli aga. 15 Mee ga helekai gi digaula, “Hula gi nia madagoaa huogodoo ala i henuailala, hagadele ina di Longo Humalia gi dau i nia daangada huogodoo. b  16 Tangada dela ga hagadonu, ga babdais, geia gu hagamouli. Tangada ma ga de hagadonu, le e hudu gi daha. 17 Digau hagadonu le e wanga ginai di mogobuna gi mee ai di hagabagi nia hagataalunga huaidu i dogu ingoo. Digaula ga leelee i nia helekai henua gee. 18 Maa digaula ma ga dahi aga nia gihaa, ga inu nia poisin, la hagalee mmade. Digaula ma ga daahi nadau lima gi hongo digau magi, nia magi le e hili.”

Jesus gu lahi gi di langi

(Luke 24.50-53; Acts 1.9-11)

19 Tagi Jesus i muli ana helekai gi digaula, gei mee ga lahi gi di langi, ga noho i di baahi gau donu o God. c  20 Gei nia dama agoago ga hula, ga agoago i nia madagoaa huogodoo, gei Tagi le e madalia digaula, e hagamaaloo nia agoago digaula bolo e donu, mai i nadau mogobuna ala e hai.]

Copyright information for `KPG