a6.4:Jn 4.44
b6.8-11:Lk 10.4-11
c6.11:Acts 13.51
d6.13:Jas 5.14
e6.14-15:Mt 16.14; Mk 8.28; Lk 9.19
f6.17-18:Lk 3.19-20
g6.34:Num 27.17; 1 Kgs 22.17; 2 Chr 18.16; Ezek 34.5; Mt 9.36

Mark 6

Di haga balumee o Jesus i Nazareth

(Matthew 13.53-58; Luke 4.16-30)

Jesus ga hagatanga, ga hana gi muli gi dono waahale donu, gei ana dama agoago ga daudali a mee. Mee ga daamada ga agoago i lodo synagogee i di Laangi Sabad. Digau dogologo gu goboina gi nia agoago a maa, ga heheeu, “Nia agoago a maa ne gaamai i hee? Ma di kabemee aha dela i mee? Gei mee e hai ana mogobuna behee? Ma hagalee go mee tangada hau hale, go tama daane a Mary, tuaahina daane a James, Joseph, Judas mo Simon? Gei ono duaahina ahina hagalee e noho hua i ginei?” Gei digaula ga haga balumee a mee. Jesus ga helekai gi digaula, “Nia soukohp le e hagalabagau i nia gowaa huogodoo, gei digaula nadau hagalabagau ai i lodo nadau waahale donu, i baahi nadau gau, mo nadau madahaanau.” a  Mee gu deemee di hai ana mogobuna i golo, e dugu hua ono lima gi hongo digau magi dulii, gei digaula gu hili. Mee gu homouli huoloo i digaula nadau hagadonu ai.

Jesus e hagau ana dama agoago dilongoholu maa lua

(Matthew 10.5-15; Luke 9.1-6)

Gei Jesus ga hana gi nia waahale lligi ala i golo, ga agoago gi nia daangada.
Mee ga gahi mai ana dama agoago dilongoholu maa lua, ga hagau digaula dau dogolua. Gei mee ga wanga gi digaula di mogobuna gi maaloo i nia hagataalunga huaidu, ga boloagi gi digaula, “Hudee kae mee, dela hua go togodogo, hudee kae meegai, mee dugu goloo, mo teenedi i lodo godou budehede. b  Gahu ina goodou gi nia suudi, hudee kae gahu digagi.” 10 Mee ga helekai gi digaula, “Digau ala ma ga benebene goodou, goodou noho i golo, ga dae loo gi di godou hagatanga gi daha mo di gowaa deelaa. 11 Maa di waahale ga hagalee hagahi mai goodou, be hagalee hagalongo adu, diagia, hula, duiduia nia gelegele godou babaawae, gi iloo digaula di haingadaa.” c  12 Malaa digaula ga hula, ga agoago gi nia daangada, bolo gi huli gi daha mo nadau huaidu. 13 Digaula ga hagabagi nia hagataalunga huaidu e logo, ga hagatulu digau magi dogologo gi nia lolo olib, gei nadau magi gu hili. d 

Di made o John Babdais

(Matthew 14.1-12; Luke 9.7-9)

14 King Herod ne longono ia nia mee huogodoo, idimaa, di longo o Jesus gu baalahu. Hunu daangada e helekai boloo, “John Babdais gu mouli aga i mee dela e mee di hai ana mogobuna.” e  15 Hunu gau e helekai bolo mee go Elijah, gei hunu gau e helekai bolo mee dahi soukohp i nia soukohp namua. 16 Gei Herod ga longono ia, ga helekai, “Mee go John Babdais, ne tuu dono ua ko au, dela gu mouli labelaa.” 17 Herod ne helekai bolo gi kumidia John Babdais gi lawalawa ina, gi hudua gi lodo di hale galabudi. Herod ne hai di mee deenei, idimaa go Herodias, dela e lodo gineia, gei mee di lodo donu ni dono duaahina daane go Philip. f  18 John Babdais nogo helehelekai gi Herod, “Ma hagalee donu bolo goe e lodo gi di lodo doo duaahina.” 19 Deelaa di mee a Herodias ga dugineia huoloo i John, ga hiihai e daaligi a mee gi made, gei e deemee, idimaa go Herod. 20 Herod nogo madagu i John, i mee e iloo ia bolo John tangada e donu ge haga madagu, malaa, mee e benebene a mee gi dee daaligi go tangada. Herod e hiihai e hagalongo gi ana helekai, maeaha maa mee e lodo huaidu i nia madagoaa huogodoo ma ga hagalongo gi John. 21 Nomuli, Herodias ga gida dana madagoaa humalia. Di laangi haanau Herod, gei Herod gu hai dana hagamiami gi ana gau aamua mugi nua, nia dagi dauwa, mo nia dagi huogodoo Galilee. 22 Tama ahina a Herodias ga ulu mai, ga gagaalege, gu haga tentene Herod mo digau o tagamiami. Di king ga helekai gi tama ahina, “Goe e hiihai gi di aha? Au ga gowadu di ingoo hua di mee dela ga hiihai ginai goe.” 23 Mee ga hai dana hagamodu gi tama ahina, “Au e doange bolo au e gowadu di ingoo hua di mee dela e hiihai ginai goe. E de hei eau be di maa go di baahi o dogu henua king.” 24 Tama ahina la ga hana gi baahi dono dinana, ga heeu, “Ma di aha dela ga madau ko au gi mee?”

Gei dono dinana ga helekai, “Go di libogo o John Babdais.”
25 Tama ahina ga hana hagalimalima gi di king, ga helekai, “Au e hiihai goe gi gaamai gi di au di libogo o John Babdais i hongo di pileedi dolomeenei.” 26 Telekai deenei la gu hai di king gi lodo huaidu, gei gu deemee di haga deai gi mee idimaa ana hagamodu ala ne hai i mua digau dogologo tagamiami. 27 Di madagoaa deelaa, gei mee ga hagau tangada dauwa haga lellele, gi gaamai di libogo o John. Gei tangada dauwa ga hana gi di hale galabudi, ga tuu di ua o John. 28 Mee ga gaamai di libogo o maa i hongo di pileedi, ga wanga gi tama ahina, gei tama ahina ga kae gi dono dinana. 29 Nia dama agoago a John la ga longono, ga loomoi, ga kae tuaidina o maa, ga danu.

Jesus e haangai ana daane e lima mana (5,000)

(Matthew 14.13-21; Luke 9.10-17; John 6.1-14)

30 Digau agoago hagau ga loomoi labelaa gi baahi o Jesus, ga hagi anga nadau mee huogodoo ala ne hai ge ne agoago ai. 31 Jesus mo ana dama agoago gu de iloo di miami, i digau dogologo ne mmui mai. Deenei di mee a Jesus ne hidi ai ga helekai gi digaula, “Gidaadou ga hula mada gidaadou gi tei gowaa e lomo gi hagamolooloo goodou.” 32 Gei digaula ga hula mada ginaadou i di boodi gi di gowaa e lomo. 33 Digau dogologo ga mmada gi digau ala e hagatanga, ga iloo hua bolo ma go digaula. Digau huogodoo mai nia waahale ga hula lauda, ga dau i di gowaa deelaa, i mua Jesus mo ana dama agoago. 34 Di madagoaa o Jesus ne doo aga i di boodi, ga gidee ia digau dogologowaahee, gei mee gu lodo aloho i digaula, i digaula gu hai gadoo be nia siibi, deai di nadau dangada hagaloohi ai. Gei mee ga daamada ga agoago e logo gi digaula. g  35 Ga dae gi di hiahi ia di mee, ana dama agoago ga loo adu gi mee, ga helekai, “Ma ga boo ia di mee, gei di gowaa deenei la di gowaa lomo. 36 Haga maaheu ina digaula gi hula gi hui nadau meegai i nia adu hale mono gowaa ala e hoohoo mai.” 37 Jesus ga helekai, “Goodou haangai ina digaula.”

Gei digaula ga heeu, “Goe e hiihai gimaadou gi hula gi huia madau meegai gi nia silber e lua lau e haangai digaula?”
38 Jesus ga heeu, “Ma nia palaawaa e hia i godou baahi? Hula, mmada.” Digaula ga iloo, ga hagi ang gi mee, “Nia palaawaa e lima, ge lua iga.” 39 Jesus ga helekai gi ana dama agoago, “Waewae ina digaula gi noho i hagabuulinga gi hongo nia geinga tolo. 40 Digaula ga noho gi lala i hagabuulinga daangada, hagabuulinga nei e lau dangada, hagabuulinga nei e madalima dangada. 41 Jesus ga dahi aga nia palaawaa e lima, ge lua iga, ga mmada gi di langi, ga danggee ang gi God, ga ginigini nia palaawaa, ga wanga gi ana dama agoago bolo gi duwwaa gi digaula. Gei mee ga duwwe labelaa nia iga e lua gi digaula huogodoo. 42 Digaula huogodoo ga miami, gu maaluu. 43 Nia dama agoago ga haa nadau gada e madangaholu maa lua gu honu i nia mee ne dubu i nia palaawaa e lima, ge lua iga. 44 Di hulu daane ala nogo miami le e lima mana(5,000).

Jesus e haele i hongo tai

(Matthew 14.22-33; John 6.15-21)

45 Jesus ga helekai i di madagoaa deelaa gi ana dama agoago bolo gi kaga gi di boodi, gi hula i ono mua gi Bethsaida, gi di baahi i golo o di tai. Gei mee ga haga maaheeu tagabuli dangada deelaa. 46 Gei muli dono hagau digaula, gei mee ga hana gi hongo di gonduu belee dalodalo. 47 Hiahi ia di mee, gei di boodi la gu tungaalodo di monowai, gei Jesus modogoia hua i hongo tenua. 48 Mee gu gidee ana dama agoago e maaloo gi nadau hoe, idimaa, digaula e aalo gi di madangi gono ga dae loo gi mehanga di laa e dolu mo di laa e ono luada, gei mee ga haaele adu i hongo tai. Mee ne belee hana gi haa gi mua digaula, 49 gei digaula ga gidee a mee e haaele i hongo tai. Digaula ga hagabau bolo ma di eidu, mo di wwolo gi nua. 50 Digaula gu uli nadau gai i di nadau mmada gi mee, gei Jesus ga limalima ga helekai adu, “Hagadagadagagee, ma ko au deenei. Hudee mmaadagu!” 51 Geia ga gaga gi baahi digaula i hongo di boodi, gei di madangi gu kila. Nia dama agoago gu goboina huoloo, 52 idimaa, digaula digi donu gi di haangai o digau lima mana(5,000), i nadau lodo e bouli huaigolo.

Jesus e hagahili ana magi i Gennesaret

(Matthew 14.34-36)

53 Digaula ga aalo adu gi di baahi i golo di tai, ga dau aga i Gennesaret, ga daula di boodi. 54 Di nadau too aga hua i di boodi, gei nia daangada gu limalima hua gu iloo bolo ma go Jesus, 55 ga llele laa lodo tenua hagatau, ga laha mai nadau gau magi ala e moe i nadau moenge. Digaula e laha mai digau magi gi di gowaa ne longono ginaadou bolo mee i golo. 56 Nia gowaa huogodoo a Jesus e hana ginai, nia waahale lligi mo llauehe, nia daangada e lahi nadau gau magi gi nia gowaa huihui mee, e tangi gi mee gi dugu ina nadau gau magi gi bili gi taalinga dono gahu. Malaa, huogodoo ala ne bili gi di gahu o maa la gu hili.

Copyright information for `KPG