a7.6-7:Is 29.13
b7.10:Ex 20.12, 21.17; Lev 20.9; Deut 5.16

Mark 7

Nia agoago o digau namua

(Matthew 15.1-9)

Nia Pharisee mono gau haga dondonu haganoho ne loomoi i Jerusalem, ga dagabuli mai gi baahi o Jesus, ga gidee bolo hunu gau i ana dama agoago e miami hagalee tono nadau lima be di hai a nia Pharisee bolo nia daangada gi heia. (Idimaa, nia Pharisee mo digau o Jew ala i golo, le e daudali nia agoago o nadau maadua mai i mua. Digaula hagalee miami, go di maa hua digaula gu tono nadau lima gi humalia. Digaula hagalee gai nia mee ala e gaamai i nia gowaa huihui mee maa nia maa digi gaugau ina. Gei digaula e daudali nadau haganoho e logo ala ne daahi mai i mua, be di hai dela e tono ai nia ibu, mono baalanga miami, mono boolo mmee, mo nadau hada kii.) Malaa, nia Pharisee mo digau haga dondonu haganoho ga heeu gi Jesus, “Meenei, au dama agoago le e aha, ala hagalee daudali di hai o tadau maadua mai i mua i di nadau miami ge hagalee tono nadau lima i mua?” Jesus ga helekai gi digaula, “E donu hua go nia mee a Isaiah ala ne hagi aga godou huaidu, ge ala gu hihi boloo,

God gu helekai: Digau aanei e hagalaamua hua au i nadau helekai, gei nadau lodo le e mogowaa loo i di au. a 
E balumee go di nadau hai daumaha mai gi di au, i ginaadou e agoago hua nia haganoho o nia daangada bolo nia mee mai dogu baahi.
Goodou gu kili gi daha nia haganoho a God, gu haga dahidamee hua nia agoago o nia daangada.” Jesus ga duudagi adu hua, “E donu, idimaa, goodou e oho nia haganoho a God, gei goodou e hagalabagau hua go godou agoago. 10 Idimaa, Moses gu helekai boloo:

Gi hagalabagau ina doo damana mo doo dinana, gei tangada ma ga hagauwwou dono damana be go dono dinana, le e daaligi gi made. b 
11 Gei goodou e agoago bolo maa tangada dana mee i golo belee hagamaamaa dono damana be go dono dinana, gei mee gu helekai bolo di mee deelaa la di “Corban” dono hadinga boloo: di mee ni God, 12 gei mee e humalia hua ma ga hagalee hagamaamaa dono damana be go dono dinana. 13 Godou agoago beenei ala e hagadele gi nia daangada le e tono gi daha nia helekai a God. E logo nia mee beenei i golo e hai go goodou.”

Nia mee ala e haga milimilia ai tangada

(Matthew 15.10-20)

14 Jesus gu gahi mai labelaa digau dogologo aalaa, ga helekai, “Goodou huogodoo, hagalongo gi donu. 15 Deai dahi mee i daha e ulu gi lodo tangada, ga haga milimilia a mee. Go nia mee ala e loomoi i lodo o mee e haga milimilia a mee. 16 [Tangada ono dalinga i golo, gei mee gi hagalongo.”] 17 Gei Jesus ga hagatanga gi daha mo digau dogologo, ga ulu gi lodo di hale, ana dama agoago ga heeu gi Jesus tadinga di ala kai deelaa. 18 Jesus ga helekai gi digaula, “Goodou e de kabemee i digau ala i golo! Goodou digi iloo? Di mee e hana gi oo lodo e haga milimilia goe ai. 19 Idimaa, di mee deenei hagalee hana gi lodo doo manawa, e hana hua gi lodo doo dinae, ga lawa, ga ulu gi daha mo doo huaidina.” (Telekai deenei Jesus gu haga modongoohia bolo nia meegai huogodoo le e humalia dono gai.) 20 Gei mee ga helekai, “Di mee dela e hanimoi gi daha mo lodo tangada, deelaa di mee e haga milimilia a mee. 21 Idimaa, mai di manawa o tangada e loomoi ai nia maanadu huaidu, e dagi a mee gi nia mee huaidu, gaiaa, daaligi dangada gi made, 22 hai be di manu, hagagailaa, mono huaidu ala i golo, halahalau, hagalee langaadia i di huaidu, dubua, maanga, hagamuamua mo tee hagalongo. 23 Aanei nia mee huaidu ala e daamada aga i lodo tangada e haga milimilia tangada.”

Di hagadonu o di ahina

(Matthew 15.21-28)

24 Jesus ga hagatanga, ga hana gi tenua hoohoo gi di waahale Tyre. Gei mee ga hanadu, ga ulu adu gi lodo di hale, e de hiihai bolo nia daangada gi iloo bolo ia gu i-golo, gei e deemee di ngala. 25 Di ahina dana dama ahina e iai di hagataalunga huaidu i ono lodo ga iloo bolo Jesus i di gowaa deelaa, ga limalima dono hanadu, ga bala ia gi lala gi nia babaewae Jesus. 26 Mee di ahina tuadimee, ne haanau i Phoenicia i Syria. Gei mee ga dangi gi Jesus gi haga bagia di hagataalunga huaidu gi daha mo dana dama ahina. 27 Gei Jesus ga helekai, “Gidaadou e haangai nia dama i mua, hagalee humalia di kili tagangudu o nia dama gi nia paana.” 28 Gei di ahina ga helekai, “Meenei, e donu, gei nia paana i lala teebele e gai nia mee dubu i nia dama.” 29 Jesus ga helekai, “Idimaa goe gu helekai beenaa, hana gi doo hale, di hagataalunga huaidu la gu hana gi daha mo dau dama ahina.” 30 Di ahina ga hana hua gi dono hale, ga gidee ia dana dama ahina e moe i hongo di hada kii, di hagataalunga huaidu gu de igolo.

Jesus e hagahili taane longoduli ge deemee di leelee

31 Jesus ga hagatanga i nia henua o Tyre, e hana laa lodo Sidon gi di Tai o Galilee, mo laa lodo tenua go Decapolis.
7.31Decapolis: Di ingoo deenei dono hadinga i nnelekai Greek boloo, “nia waahale e madangaholu”
32 Gei nia daangada ga laha mai gi mee di nadau daane longoduli ge deemee di leelee, ga dangi gi Jesus gi dugua dono lima gi hongo o mee. 33 Gei Jesus ga lahi a mee gi daha mo nia daangada, ga wanga ono madaalima gi lodo nia dalinga o maa, ga bui ana haawale, ga bili gi tolole o taane deelaa. 34 Gei mee ga mmada gi di langi, ga dogi gi nua mo di helekai adu gi taane deelaa, “Ephphatha”, dono hadinga bolo “maahuge”. 35 Gei nia dalinga o maa gu maahuge, gu longono, gei dono holole gu mee di leelee. 36 Gei Jesus ga bule digaula, bolo hudee hagi anga ina di mee deenei gi nia daangada. Gei digaula koia ne maaloo dangihi di nadau hagadele di maa. 37 Gei digau ala ne longono, gu goboina huoloo, ga helekai, “Ana mee huogodoo ne hai, gu gila humalia huoloo! Mee ne hai tangada longoduli ge deemee di leelee gi longono, gi leelee!”

Copyright information for `KPG